អាជ្ញាធរ ស្រុកថ្មបាំង ឃាត់មនុស្ស ជាង១០នាក់ សួរនាំរឿង រារាំង អាជ្ញាធរ មិនឲ្យចូល តំបន់ អារ៉ែង
RFA / វិទ្យុ អាស៊ី សេរី | ១៤ កញ្ញា ២០១៤
ប្រជាពលរដ្ឋ មកពី ៣ឃុំ នៅស្រុក ថ្មបាំង ខេត្តកោះកុង
ហែរក្បួន តាមម៉ូតូ ទៅប្រមូលផ្តុំគ្នា នៅមុខសាលាខេត្ត កោះកុង
ដើម្បី ដាក់ញត្តិ ជូនអាជ្ញាធរ
ស្នើឲ្យផ្អាក គម្រោងសាងសង់ ទំនប់វារីអគ្គិសនី ស្ទឹងអារ៉ែង
នៅព្រឹកថ្ងៃ៣១ មីនា ឆ្នាំ២០១៤។ Licadho Photo
ពលរដ្ឋ ពីរឃុំ គឺ ឃុំប្រឡាយ និងឃុំជំនាប់ ប្រមាណ ៣០នាក់ នៅក្នុងស្រុក ថ្មបាំង រារាំង អាជ្ញាធរ ខេត្តកោះកុង មិនឲ្យ ចូលតំបន់ អារ៉ែង នៅព្រឹកថ្ងៃ ទី១៥ កញ្ញា។
អភិបាល រងខេត្ត គឺ លោក ផុន លីវីរៈ បានដឹកនាំ មន្ត្រីជំនាញ កសិកម្ម និងសមត្ថកិច្ច ប៉េអិម មួយក្រុម ដើម្បី ចុះទៅតំបន់ អារ៉ែង ដោយប្រាប់ អ្នកភូមិ ថា, ទៅដើម្បីសិក្សាផ្នែកកសិកម្មនៅទីនោះ។ ប៉ុន្តែពលរដ្ឋមិនជឿនិងសង្ស័យថា អាជ្ញាធរខេត្តទាំងនោះមានបំណងចុះទៅសិក្សាពីផលប៉ះពាល់នៃគម្រោង សាងសង់ទំនប់វារីអគ្គិសនីរបស់ក្រុមហ៊ុន ស៊ីណូ ហាយដ្រូ (Sinohydro) ហើយធ្វើផែនការជម្លៀសពលរដ្ឋចេញពីតំបន់នោះ។
អាជ្ញាធរស្រុកថ្មបាំង បានឃាត់ខ្លួនមនុស្ស ១៥នាក់ ក្នុងនោះមានប្រធានចលនាមាតាធម្មជាតិ គឺលោក អាឡិកហ្សង់ដ្រូ ហ្គន់ហ្សាឡេស ដេវិតសឹន (Alejandro Gonzalez Davidson) ដើម្បីសួរនាំអំពីការដឹកនាំពលរដ្ឋឲ្យមកបិទផ្លូវរារាំងដំណើររបស់ អាជ្ញាធរខេត្តមិនឲ្យចូលតំបន់អារ៉ែង។
អ្នកសម្របសម្រួលក្រុមយុវជនជាមួយអង្គការសង្គមស៊ីវិល និងជាសកម្មជនចលនាអង្គការមាតាធម្មជាតិ លោក ម៉េង ហេង ឲ្យដឹងថា តាមព័ត៌មានពីអ្នកភូមិ អាជ្ញាធរស្រុកថ្មបាំង បានឃាត់មនុស្ស ១៥នាក់ ក្នុងនោះរួមមានយុវជនចលនានិស្សិត និងយុវជនខ្មែរមហានគរចំនួន ៧នាក់ដែលទៅពីភ្នំពេញ តំណាងសហគមន៍តំបន់អារ៉ែង ២នាក់ យុវជននៅឃុំជំនាប់ ២នាក់ និង ៤នាក់ទៀតជាក្រុមចលនាអង្គការមាតាធម្មជាតិ ក្នុងនោះរួមមានលោក អេឡិក ដែរ។ លោកបញ្ជាក់ថា អាជ្ញាធរស្រុកថ្មបាំង សួរចម្លើយពួកគេពីការបិទផ្លូវរារាំងអាជ្ញាធរខេត្តចុះទៅតំបន់ អារ៉ែង។
តួលេខអ្នកដែលចាប់ខ្លួននេះ ត្រូវបានប្រភពនានាផ្ដល់មកខុសៗគ្នា។ ប្រភពខ្លះថាចាប់ខ្លួន ៧នាក់ ហើយខ្លះថា ១០នាក់ ខ្លះថា ១១នាក់ និងខ្លះទៀតថាមានរហូត ១៧នាក់។
វិទ្យុអាស៊ីសេរី មិនអាចទាក់ទងអធិការស្រុកថ្មបាំង លោក ស៊ឹម វ៉ាវី សួរនាំពីរឿងនេះបានទេ នៅរសៀលថ្ងៃទី១៥ កញ្ញា។ តែបើតាមការអះអាងលោក ប៊ុន ឡឺត អភិបាលខេត្តកោះកុង បញ្ជាក់ថា មន្ត្រីជំនាញមិនបានឃាត់ខ្លួនមនុស្សច្រើនដូចការអះអាងនោះទេ។ ប៉ុន្តែទទួលស្គាល់ថា ពិតជាបានឃាត់ខ្លួនជនបរទេសម្នាក់ដែលទំនងជាសំដៅទៅលើលោក អេឡិក ដើម្បីសួរនាំពីរឿងបិទផ្លូវនេះ។
ជុំវិញសំណួរដែលសួរថា តើលោកអាចចាត់វិធានការផ្លូវច្បាប់ចំពោះលោក អេឡិក ដែរឬយ៉ាងណានោះ? លោក ប៊ុន ឡឺត ប្រាប់ថា ការរារាំងសកម្មភាពអាជ្ញាធរជារឿងខុសច្បាប់ ប៉ុន្តែលោកទាន់អាចនិយាយបានថា នឹងត្រូវចាត់វិធានការយ៉ាងម៉េចចំពោះគាត់នៅឡើយទេ។
លោក អេឡិក បានផ្ដល់ព័ត៌មានមុនការឃាត់ខ្លួនថា រថយន្តរបស់អង្គការមាតាធម្មជាតិ និងម៉ូតូជាច្រើនគ្រឿងរបស់ពលរដ្ឋ រួមនឹងពលរដ្ឋប្រមាណ ៣០នាក់ បានដាក់និងឈរពាំងផ្លូវចូលតំបន់អារ៉ែង នៅចំណុចច្រាំងត្រឡាច ស្ថិតក្នុងឃុំឫស្សីជ្រំ ក្នុងស្រុកថ្មបាំង។
ពលរដ្ឋបារម្ភថាដំណើររបស់អាជ្ញាធរខេត្តនៅពេលនេះ គឺមិនមែនមានបំណងទៅសិក្សាជំនាញកសិកម្មទេ តែអាចជាការសិក្សាពីផលប៉ះពាល់ទាក់ទងការសង់ទំនប់វារីអគ្គិសនី របស់ក្រុមហ៊ុនស៊ីណូហាយដ្រូ ហើយធ្វើផែនការជម្លៀសប្រជាពលរដ្ឋចេញពីតំបន់នោះ។
លោក អេឡិក បានផ្ដល់ព័ត៌មានចុងក្រោយប្រាប់វិទ្យុអាស៊ីសេរី ថាលោកនិងពលរដ្ឋបានព្យាយាមចេញពីតំបន់នោះ បន្ទាប់ពីឃើញកម្លាំងសមត្ថកិច្ចនិងប៉េអិមបញ្ជូនមកកាន់តែច្រើន។ ប៉ុន្តែអាជ្ញាធរមិនអនុញ្ញាត ហើយលោកបានដាច់ទំនាក់ទំនងនៅរសៀលថ្ងៃដដែល។
ប្រធានសមាគមឃុំជំនាប់ លោក វ៉ែន វ៉ន ឲ្យដឹងថា អាជ្ញាធរមិនបានជូនដំណឹងជាមុនពីគោលបំណងចុះទៅតំបន់ ទើបពលរដ្ឋមកចេញមករាំងផ្លូវ។ យ៉ាងណាលោក ប៊ុន ឡឺត អភិបាលខេត្តកោះកុង បញ្ជាក់ថា អាជ្ញាធរចុះទៅតំបន់អារ៉ែង ដើម្បីទៅសួរសុខទុក្ខពលរដ្ឋ ហើយនេះជាតួនាទីនិងភារកិច្ចរបស់អាជ្ញាធរ៕
No comments:
Post a Comment