ផលប៉ះពាល់ ពីកាកសំណល់ ប្លាស្ទិក
RFA / វិទ្យុ អាស៊ី សេរី | ១៨ កញ្ញា ២០១៤
ថង់ប្លាស្ទិក, ជ័រស្នោ, កំប៉ុងជ័រ, កំពុងក្លាយជាម ធ្យោបាយមួយ ប្រើប្រាស់ សម្រាប់ ខ្ចប់ចំណីអាហារ, ឬរបស់ ផ្សេងៗ បន្ទាប់មក ក៏ក្លាយ ជាសំរាម បានបន្សល់ទុក ស្ទើរគ្រប់ ទីកន្លែង។ សម្ភារៈ ជ័រនោះ បង្កការ ខូចខាត សោភណភាព ទីសាធារណៈ នៅលើដី។ តែ បើ វា កប់ក្នុងដី ឬប្រឡាយ វា មិនងាយ រលាយឡើយ និងបណ្ដាល ឲ្យស្ទះផ្លូវ ទឹកហូរ។ ប៉ុន្តែ បើ គេ យកវា ទៅដុត គឺ ឧស្ម័ន ហុយចេញ ពីការដុតនោះ ធ្វើឲ្យ ស្រទាប់ អូហ្សូន ធ្លុះធ្លាយ, នាំឲ្យផែនដី ឡើងកម្ដៅ។
មន្ត្រីជំនាញ ឲ្យដឹងថា, ភាព មិនងាយ រំលាយ ច្រើនរយឆ្នាំ នៃគ្រឿងជ័រ ធ្វើឲ្យ អាកាសធាតុ ប្រែប្រួល ព្រោះតែ ស្រទាប់ការពារ កម្ដៅថ្ងៃរហែក។ លោក ថា ដោយសារតែ ការប្រែប្រួល អាកាសធាតុ, វា បានប៉ះពាល់ ដល់ការដាំដុះ ដំណាំ ផ្សេងៗ, ហើយ ផែនដី ឡើងកម្ដៅ។ មូលហេតុនេះ ក្រសួង បរិស្ថាន អំពាវនាវ ឲ្យអ្នកលក់ដូរ សុំ ប្ដូរទម្លាប់ ប្រើប្រាស់ វេចខ្ចប់ ចំណីអាហារពីថង់ប្លាស្ទិក ជ័រស្នោ និងកំប៉ុងជ័រទៅប្រើស្លឹករុក្ខជាតិ និងក្រដាសជំនួសវិញ។
ការអំពាវនាវនេះធ្វើឡើងក្នុងពេលដែលមនុស្សជាច្រើន និយមភាពងាយស្រួលនៃការប្រើប្រាស់ប្លាស្ទិក ដើម្បីច្រកវេចខ្ចប់ជាដើមនៅក្នុងអាជីវកម្មជួញដូរ ដោយមិនបានគិតទៅដល់ផលប៉ះពាល់នានា អំពីការប្រើប្រាស់ថង់ប្លាស្ទិកនេះឡើយ។
អ្នកនាំពាក្យក្រសួងបរិស្ថាន លោក សៅ សុភាព បន្តថា ថង់ប្លាស្ទិក ជ័រស្នោ កំប៉ុងជ័រ មិនងាយរលាយទេ គេអាចប្រើរយៈពេលពាន់ឆ្នាំរង់ចាំមើលការរលាយរបស់វា ប៉ុន្តែបើស្លឹកឈូកស្លឹកចេក និងក្រដាសជាដើម គឺវាឆាប់រលួយផុយទៅក្នុងដីទើបក្រសួងបរិស្ថាន សូមឲ្យអ្នកលក់ដូរគួរប្រើថង់ក្រដាស ថង់បរិស្ថាន ស្លឹករុក្ខជាតិវិញក្នុងការវេចខ្ចប់ដើម្បីជួយដល់បរិស្ថានឲ្យ ស្រស់ស្អាតនៅក្នុងពិភពលោក៖ «ថង់ប្លាស្ទិកប៉ះពាល់យូរអង្វែងដល់ បរិស្ថានរហូតដល់រាប់សិបឆ្នាំ ឬក៏ដល់រយឆ្នាំ បើសិនជាវាកប់ ឬក៏បោះបង់ចោលនៅតាមទីសាធារណៈ។ យើងហៅថា ធ្វើជាចលនាមួយដើម្បីកាត់បន្ថយការប្រើប្រាស់ថង់ប្លាស្ទិកនេះឯង ក្នុង ២០១៥ ហ្នឹង។»
លោក សៅ សុភាព បន្តថា ក្រៅពីជ័រប្លាស្ទិកក្ររលាយក៏មានមនុស្សជាច្រើននៅតែប្រើប្រាស់ រថយន្ត ទូទឹកកក ម៉ាស៊ីនត្រជាក់ សេរីចាស់ៗ ដែលវាបង្ហុយឧស្ម័នពុលទៅលើបរិយាកាសគឺឧស្ម័ននោះ វាទម្លុះរបាំងការពារពន្លឺថ្ងៃហៅថា ស្រទាប់អូហ្សូនបណ្ដាលឲ្យអាកាសធាតុប្រែប្រួល។ ការធ្លាយរបាំងការពារពន្លឺថ្ងៃនេះហើយ វាបង្កឲ្យផែនដីឡើងកម្ដៅប៉ះពាល់ដល់ការដាំដុះដំណាំដោយសារ អាកាសធាតុប្រែប្រួល។
លោក សៅ សុភាព៖ «ឲ្យគាត់បោះបង់ថង់ប្លាស្ទិកអីហ្នឹង គាត់មានអីប្រើជំនួស គឺយើងគិតថា ថង់បរិស្ថានដែលជាក្រណាត់ ឬក៏ជាក្រដាស ឬក៏ទៅប្រើប្រាស់ដូចជាស្លឹកឈូកស្អីៗហ្នឹងគឺត្រូវតែជំរុញហើយ។»
នៅក្នុងប្រទេសកម្ពុជា តំបន់ដែលមានរោងចក្រជាកន្លែងសំបូរអ្នកទទួលទានអាហារជាក្រុម ឃើញមានថង់ប្លាស្ទិក ប្រអប់ស្នោ និងកំប៉ុងជ័រ បោះចោលពាលវាលពាសកាលនៅក្បែររោងចក្រ និងក្បែរបន្ទប់កម្មករស្នាក់នៅ។ ទន្ទឹមនោះថង់ប្លាស្ទិកច្រកសំរាមចម្រុះពណ៌ច្រើនរយថង់ ចងទុកចោលត្រាំទឹកភ្លៀងនៅក្បែររោងចក្រនីមួយៗ នៅក្នុងខណ្ឌពោធិ៍សែនជ័យ។
ថង់ប្លាស្ទិកនេះទុកចោលហាលខ្យល់ ហាលថ្ងៃ ហាលភ្លៀងយូរខែក៏មិនរលួយ ឬខូចដែរ។ បញ្ហានេះនិស្សិតបរិញ្ញាបត្រគីមីសាស្ត្រនៃសកលវិទ្យាល័យភូមិន្ទ ភ្នំពេញ លោក ប៉ែន បញ្ញា ពន្យល់ថា ថង់ប្លាស្ទិកស្នោ កំប៉ុងជ័រ ជាដើម បើយកវាទៅចាក់កប់ក្នុងដីរាប់រយឆ្នាំ គឺវាក្ររលាយដែរ តែវាមិនសូវបង្កផលប៉ះពាល់ដល់ការប្រែប្រួលអាកាសធាតុទេ។ ប៉ុន្តែបើគេយកវាទៅដុត គឺឧស្ម័នពុលនោះវាហុយឡើង ធ្វើឲ្យប៉ះពាល់ស្រទាប់អូហ្សូន។
លោក ប៉ែន បញ្ញា៖ «បើសិនជាវាកប់ចូលទៅក្នុងដី គឺវាអត់រលាយទេ ថង់ប្លាស្ទិក ហើយវាអត់មានផលប៉ះពាល់អីធំដុំទេ ប៉ុន្តែបើសិនជាយើងដុតវាអាចបង្កជាឧស្ម័នពុលដែលចេញមកពីថង់ ប្លាស្ទិក ហើយនិងប្រអប់ស្នោចូលទៅក្នុងបរិយាកាសដល់ពេលឧស្ម័នដែលភាយចេញឡើយ ហ្នឹង វាអាចទៅកាត់បន្ថយអូហ្សូនដែលនៅក្នុងស្រទាប់ផែនដីរបស់យើង។»
មន្ត្រីក្រសួងបរិស្ថាន លោក សៅ សុភាព ឲ្យដឹងថា ដោយសារតែថង់ប្លាស្ទិក និងជ័រស្នោ ចោទជាបញ្ហាប៉ះពាល់បរិស្ថាន ទើបក្រសួងបរិស្ថានសហការជាមួយសាលារាជធានីភ្នំពេញ អង្គការនានា រួមទាំងផ្សារទំនើបនានា ក្នុងរាជធានីភ្នំពេញ មានទាំងថង់ធ្វើពីក្រដាស និងថង់ដែលងាយរលាយក្នុងដីលក់ក្នុងតម្លៃថោក និងជំរុញឲ្យអតិថិជនយកថង់នោះប្រើប្រាស់ដើម្បីជួយថែទាំស្រទាប់ អូហ្សូន ដែលកំពុងតែធ្លុះធ្លាយដោយសារឧស្ម័នពុលនៃការដុតគ្រឿងជ័រប្លាស្ទិក នេះ។
លោក សៅ សុភាព៖ «ជាពិសេសគឺយើងធ្វើការងារជាមួយក្រសួងទេសចរណ៍ដែល ជាក្រសួងមួយធ្វើការងារចលនាប្រឡងប្រណាំងទីក្រុងស្អាតនេះ។ យើងក៏បានធ្វើការងារជាមួយនឹងទីផ្សារធំៗមួយចំនួនជារបៀបដូច ឡាក់គី ដូចអីអ៊ីចឹង ដែលជាទីផ្សារទំនើបហ្នឹង ធ្វើយ៉ាងណាដើម្បីឲ្យគាត់កាត់បន្ថយការប្រើប្រាស់ថង់ប្លាស្ទិក ដើម្បីវេចខ្ចប់របស់របរ ឬក៏ចំណីអាហារដែលអតិថិជនទៅផ្សាររបស់គាត់ហ្នឹង។»
ចៅសង្កាត់ចោមចៅខណ្ឌពោធិ៍សែនជ័យ លោក សុទ្ធ សាត ទទួលស្គាល់ថា នៅក្នុងមូលដ្ឋាននោះបានអប់រំកម្មករកុំឲ្យដុតថង់ប្លាស្ទិក តែត្រូវប្រមូលវាចងទុកម្តុំ ទុកឲ្យក្រុមហ៊ុនប្រមូលសំរាមយកទៅបោះចោល។ លោកអះអាងថា នៅក្នុងមូលដ្ឋាននោះ អ្នកលក់ដូរភាគតិចប្រើស្លឹកឈូក និងស្លឹកចេកពេលវេចខ្ចប់អាហារឲ្យកម្មករ៖ «អ៊ីចឹងលើបញ្ហាទាំងអស់ហ្នឹង ការខ្វះខាតវាតែងតែមានដែរហើយ ប៉ុន្តែក្នុងនោះដែរទាល់តែការកសាងឡើងវិញ។»
ក្រុមប្រជាពលរដ្ឋនៅខណ្ឌពោធិ៍សែនជ័យ ឲ្យដឹងថា ក្រៅពីថង់ប្លាស្ទិក ក្ររលាយក៏វាបានជះក្លិនអាក្រក់នៃសារធាតុគីមីផលិតថង់នោះ នៅពេលយកទៅប្រើដែរ។
ក្រៅពីការទិតៀនអំពីក្លិននៃថង់ប្លាស្ទិក ក៏មានការរិះគន់ពីភាពយឺតយ៉ាវនៃការយកសំរាមដឹកចេញដែរ។ បុរសម្ចាស់ផ្ទះជួលម្នាក់ថ្លែងថា ថង់ប្លាស្ទិក មិនរលាយឯសំរាមនៅក្នុងថង់បង្កក្លិនស្អុយពីក្នុងថង់នោះ ប៉ះពាល់សុខភាពមនុស្សដែរ។
លោកថា ពេលខ្លះថង់ប្លាស្ទិកហើរចូលលូ ស្ទះចរន្តទឹកហូរចេញពីភ្នំពេញ ដោយសារវាមានភាពស្វិត មិនងាយរលាយ ឬមិនងាយផុយរលួយ៖ «ថង់ប្លាស្ទិកនេះ វាប៉ះពាល់បញ្ហាធំគឺរឿងបរិស្ថានហ្នឹងហើយ ដូចក្រសួងបរិស្ថាន គេឲ្យកែមកប្រើក្រដាសខ្ចប់ ឬប្រើស្លឹកឈូកបែបធម្មជាតិវិញ ប៉ុន្តែដោយសារប្រជាជនបងប្អូនយើងអ្នករស់នៅក្នុងនេះ គាត់មិនប្រើប្រាស់អាហ្នឹងប៉ុន្មានគាត់ប្រើជាងគេគឺប្លាស្ទិក រួចដាក់សំរាមដល់ពេលដាក់សំរាមទៅ នៅពេលគាត់យកទៅចោល ខាងក្រុមហ៊ុនប្រមូលសំរាមហ្នឹងមិនសូវមកប្រមូល យូរៗមកម្ដង វារលួយប៉ាយពេញហ្នឹង ខ្លះអណ្ដែតទឹកចូលលូ ចូលអី ស្ទះលូស្ទះអី។»
អ្នកនាំពាក្យសាលារាជធានីភ្នំពេញ លោក ឡុង ឌីម៉ង់ ថ្លែងថា ការអប់រំមនុស្សឲ្យងាកពីប្រើប្រាស់ថង់ប្លាស្ទិក ប្រអប់ស្នោ កំប៉ុងជ័រជាដើម ទៅប្រើថង់បរិស្ថាន ឬស្លឹកចេក ស្លឹកឈូកវិញនោះ ត្រូវប្រើពេលយូរ ឬឆាប់ អាស្រ័យលើការឆាប់ទទួលយកនៃអ្នកប្រើប្រាស់។ លោក ថា បើមនុស្សទាំងអស់ព្រមបោះចោលគ្រឿងប្លាស្ទិកទៅប្រើប្រាស់ស្លឹក រុក្ខជាតិ ឬក្រដាសវេចខ្ចប់សម្ភារៈនោះ គឺវាធ្វើឲ្យសេដ្ឋកិច្ចអ្នកស្រែចម្ការដែលដាំឈូក ដាំចេក ទទួលបានចំណូលពីការលក់ស្លឹកវា ហើយបរិស្ថានក្នុងទីក្រុងក៏មិនកខ្វក់ដោយសារប្លាស្ទិកដែរ៕
No comments:
Post a Comment