Sunday, September 28, 2014

តើ កម្ពុជា មានចេតនា លាក់បាំង ព័ត៌មាន ពីកិច្ចព្រមព្រៀង ទទួល ជនភៀសខ្លួន ឬយ៉ាងណា? Cambodia is intentionally keeping the public in the dark re refugee deal?

តើ កម្ពុជា មានចេតនា លាក់បាំង ព័ត៌មាន ពីកិច្ចព្រមព្រៀង ទទួល ជនភៀសខ្លួន ឬយ៉ាងណា?

VOD | ២៨ កញ្ញា ២០១៤

រដ្ឋមន្ត្រី អន្តោប្រវេសន៍ អូស្រ្តាលី លោក ស្កុត ម៉ូរីសុន (ធ្វេងដៃ) និងរដ្ឋមន្រ្តី ក្រសួង មហាផ្ទៃ លោក ស ខេង ក្នុងពិធី ចុះហត្ថលេខា លើកិច្ចព្រមព្រៀង កាលពីថ្ងៃ ទី២៦ ខែកញ្ញា (រូបថត ដោយ កាន់ វិច្ឆិកា)

កាលពីថ្ងៃ ទី២២ ខែកុម្ភៈ ឆ្នាំ២០១៤ លោក នាយករដ្ឋមន្ត្រី ហ៊ុន សែន បានជួប ជាមួយ រដ្ឋមន្ត្រី ការបរទេស អូស្ត្រាលី លោកស្រី Julie Bishop នៅវិមាន សន្តិភាព រាជធានី ភ្នំពេញ។ ក្នុងជំនួបនោះ រដ្ឋមន្ត្រី ការបរទេស អូស្ត្រាលី បានស្នើសុំ ឲ្យកម្ពុជា ពិចារណា ក្នុងការទទួលយក ជនភៀសខ្លួន ពីប្រទេស អូស្ត្រាលី មកតាំង ទីលំនៅ ថ្មី នៅកម្ពុជា។

ការស្នើសុំនេះ ស្របពេល កម្ពុជា កំពុងជួបវិបត្តិ នយោបាយ គឺ តំណាងរាស្ត្រ គណបក្ស សង្គ្រោះជាតិ ទាំង៥៥រូប មិនទាន់ ចូលសភា ដើម្បី ធ្វើការ ជាមួយ តំណាងរាស្ត្រ គណបក្ស ប្រជាជន កម្ពុជា ចំនួន ៦៨រូប។ ការមិនចូល សភានេះ មានការរិះគន់ ថា, រដ្ឋាភិបាល កម្ពុជា មិនស្របច្បាប់ ខណៈ មានការអំពាវនាវ ពីសហគមន៍ អន្តរជាតិ ឲ្យភាគី ទាំងពីរ ចរចា ជាមួយគ្នា ដើម្បី រកដំណោះស្រាយ នយោបាយ រួម។ ក្នុងនោះ ក៏មានប្រទេស អូស្ត្រាលី ផងដែរ។

សហគមន៍ អន្តរជាតិ ដែលតែងតែ រិះគន់ ពីបញ្ហា សិទ្ធិមនុស្ស និងការបោះឆ្នោត នៅកម្ពុជា, រួមមាន សហរដ្ឋ អាមេរិក, សហភាព អឺរ៉ុប, និងប្រទេស អូស្ត្រាលី។

បន្ទាប់ ពីការស្នើសុំ របស់ ប្រទេស អូស្ត្រាលី ទៅលោក នាយករដ្ឋមន្ត្រី ហ៊ុន សែន ក្នុងការទទួលយក ជនភៀសខ្លួន ការចរចា ជាបន្តបន្ទាប់ ជាមួយ មន្ត្រីជាន់ខ្ពស់ រាជរដ្ឋាភិបាល កម្ពុជា បាន កើតឡើង។ រដ្ឋមន្ត្រី ក្រសួង អន្តោប្រវេសន៍ និងកិច្ចការពារ ព្រំដែន អូស្ត្រាលី លោក ស្កុត ម៉ូរីសុន (Scott Morrison) បានបំពេញ ទស្សនកិច្ច នៅកម្ពុជា និងជួបជាមួយ រដ្ឋមន្ត្រី ក្រសួង មហាផ្ទៃ លោក ស ខេង ដើម្បី ពិភាក្សា ពីលទ្ធភាព នៃការទទួលយក ជនភៀសខ្លួន។ តែ ព័ត៌មាន នៃជំនួបនេះ មិនត្រូវ បានបង្ហាញ ជាផ្លូវការ ពីក្រសួង ការបរទេស កម្ពុជា និងក្រសួង មហាផ្ទៃ នោះទេ។

នៅពេល សាកសួរ មន្ត្រី ក្រសួង ការបរទេស កម្ពុជា គ្រាន់តែ លើកឡើង ថា, កម្ពុជា យល់ព្រម ជាគោលការណ៍ ទៅលើ ការទទួល ជនភៀសខ្លួន ទាំងនេះ និងកំពុងសិក្សា បន្ថែមទៀត មុនចុះ កិច្ចព្រមព្រៀង។ ព័ត៌មាន នៃការសិក្សា មុនចុះ កិច្ចព្រមព្រៀង ទទួលយក ជនភៀសខ្លួន មិនត្រូវ បានទម្លាយ ជាផ្លូវការ ឲ្យដឹង នោះទេ។

រហូត មកដល់ថ្ងៃ ទី២៤ ខែកញ្ញា ក្រសួង ការបរទេស កម្ពុជា បានចេញសេចក្តី ជូនព័ត៌មាន មួយ ថា, កម្ពុជា នឹងចុះហត្ថលេខា ជាផ្លូវការ ជាមួយ រដ្ឋាភិបាល អូស្ត្រាលី ក្នុងការ ទទួលយក ជន ភៀសខ្លួន នៅថ្ងៃ ទី២៦ ខែកញ្ញា។ នេះ ជាលើកដំបូង ដែលរដ្ឋាភិបាល កម្ពុជា បញ្ចេញព័ត៌មាន ទាក់ទង នឹងកិច្ចព្រមព្រៀង លើជនភៀសខ្លួន។

មុនការចុះ ហត្ថលេខា គណៈកម្មាធិការ ប្រព្រឹត្តិកម្ម នៃអង្គការ សមាគម ការពារ សិទ្ធិមនុស្ស (ហៅ កាត់ថា CHRAC) បានជំរុញ ឲ្យរដ្ឋាភិបាល កម្ពុជា និងអូស្រា្តលី បញេ្ចញព័ត៌មាន ជាក់លាក់ ទាក់ទង នឹងជនភៀសខ្លួន អូស្រា្តលី ដើម្បី ពិភាក្សា ស្វែងរក ដំណោះស្រាយ ដោយបារម្ភ ថា, អ្នកទាំងនោះ នឹងបង្ក អស្ថិរភាព សង្គម។ សេចក្តីថ្លែងការណ៍ របស់ CHRAC ជំរុញរដ្ឋាភិបាល ទាំងពីរ បង្ហាញព័ត៌មាន ថា, តើ ជនភៀសខ្លួន ចេញ ពីមន្ទីរ ឃុំឃាំង ណាខ្លះ? តើ ជនភៀសខ្លួន ប្រភេទណា ត្រូវ បញ្ជូនមក កម្ពុជា? សេចក្តី ថ្លែងការណ៍ បន្តថា, តើ ទឹកប្រាក់ ប៉ុន្មាន ដែលរដ្ឋាភិបាល កម្ពុជា និងអូស្ត្រាលី បានសន្យា ជាមួយគ្នា, ហើយ ត្រូវ ចំណាយ លុយប៉ុន្មាន លើជនភៀសខ្លួន ទាំងនោះ? សេចក្តី ថ្លែងការណ៍ បន្ថែមទៀត ថា, តើ ជនភៀសខ្លួននោះ នឹងមកតាំង លំនៅនៅ កម្ពុជា ពេលណា, ហើយ បន្តបញ្ជូន ទៅមន្ទីរ ឃុំឃាំង ផ្សេងទៀត នៅប្រទេស កម្ពុជា ឬអត់?

នៅថ្ងៃចុះហត្ថលេខា អ្នកសារព័ត៌មានជាតិ និងអន្តរជាតិសម្តែងការខកចិត្តដោយសារតែភាគីទាំងពីរមិនបានផ្តល់ ឱកាសដល់អ្នកកាសែតក្នុងការសួរនាំព័ត៌មាន។ ភាគីទាំងពីរបានត្រឹមតែចេញសេចក្តីប្រកាសព័ត៌មានធម្មតាមួយ។

អគ្គលេខាធិការនៃគណៈកម្មាធិការប្រព្រឹត្តិកម្ម លោក សួន ប៊ុនស័ក្កិ យល់ថាការមិនធ្វើសន្និសីទសារព័ត៌មាននេះបង្ហាញថារដ្ឋាភិបាលដែលកើត ពីប្រជាធិបតេយ្យមិនប្រកាន់យកគោលការណ៍តម្លាភាព។ លោកថារដ្ឋាភិបាលគួរតែបង្ហាញព័ត៌មានជាសាធារណៈដើម្បីឲ្យប្រជាពលរដ្ឋ កម្ពុជាបានដឹងពីលទ្ធភាពទទួលយកជនភៀសខ្លួន។

តាមការស្ទង់មតិលើទំព័រហ្វេសប៊ុកVOD អ្នកលេងហ្វេសប៊ុក៩៩,៩៩ភាគរយហើយដែលមិនគាំទ្រកិច្ចព្រមព្រៀងនេះ។ បើតាមសង្កេតនៅលើហ្វេសប៊ុកជាទូទៅ អ្នកលេងហ្វេសប៊ុកភាគច្រើនក៏មានការរិះគន់ទៅលើកិច្ចព្រមព្រៀងនេះដែរ ។

មុនពេលធ្វើដំណើរមកកម្ពុជាដើម្បីចុះហត្ថលេខាលើអនុស្សរណៈយោគយល់ គ្នា លោក ស្កុត ម៉ូរីសុន បានប្រាប់សារព័ត៌មានអូស្ត្រាលីABCថា ប្រទេសអូស្ត្រាលីនឹងផ្តល់ជំនួយបន្ថែមចំនួន៣៥លានដុល្លារអាមេរិក លើជំនួយដែលមានស្រាប់ប្រមាណ៧០លានដុល្លារអាមេរិក សម្រាប់គម្រោងលើផ្នែកអង្ករ ការដោះមីន និងកំណែទម្រង់ប្រព័ន្ធបោះឆ្នោតជាដើម។ លោកបន្តថារដ្ឋាភិបាលអូស្ត្រាលី នឹងចំណាយលើការស្នាក់នៅផ្សេងៗទៀតដល់ជនភៀសខ្លួន។ព័ត៌មាននេះ រដ្ឋាភិបាលកម្ពុជាគួរតែប្រាប់ទៅដល់ប្រជាជនកម្ពុជា ដែលជាម្ចាស់ប្រទេស។

លោក ខៀវ សុភ័គ អ្នកនាំពាក្យក្រសួងមហាផ្ទៃ បានបដិសេធព័ត៌មានថាកម្ពុជាទទួលជំនួយ៣៥លានដុល្លារជាថ្នូរនឹង ការទទួលយកជនភៀសខ្លួន។តែលោកថាប្រហែលជារដ្ឋាភិបាលអូស្ត្រាលីត្រៀម ជាកញ្ចប់ថវិកាមួយចំនួនជួយដល់កម្ពុជា។លោកថាការទទួលយកជនភៀសខ្លួន នេះជាការបង្ហាញសកម្មភាពមនុស្សធម៌ ដែលកម្ពុជាអាចចូលរួមចំណែកជួយ។

សេចក្ដីប្រកាសព័ត៌មានរួមរបស់ប្រទេសទាំងពីរ ឲ្យដឹងថារដ្ឋាភិបាលអូស្ត្រាលីសន្យាថាខ្លួននឹងជួយប្រទេសកម្ពុជា ទាំងផ្នែកហិរញ្ញវត្ថុ និងបច្ចេកទេសទូទៅដើម្បីធ្វើឲ្យការងារទទួលជនភៀសខ្លួន ពីប្រទេសអូស្ត្រាលីទទួលបានជោគជ័យ។សេចក្តីប្រកាសព័ត៌មានឲ្យដឹងទៀត ថា អូស្ត្រាលីនឹងប្រើប្រាស់បទពិសោធន៍ និងជំនាញរបស់ខ្លួនដើម្បីជួយដល់កម្ពុជាក្នុងការពង្រឹងការគាំទ្រ ផ្តល់ទីលំនៅដល់ជនភៀសខ្លួននៅប្រទេសកម្ពុជា។ សេចក្តីប្រកាសរួមបន្តថា ជាផ្នែកនៃការប្តេជ្ញាចិត្តនេះ ប្រទេសអូស្ត្រាលីនឹងទទួលរ៉ាប់រងផ្ទាល់លើថ្លៃចំណាយក្នុងការបញ្ជូន ជនភៀសខ្លួន រួមទាំងការគាំទ្រចាំបាច់ដល់ជនភៀសខ្លួន និងការកសាងសមត្ថភាពរបស់ប្រទេសកម្ពុជា ដើម្បីធានាថាកម្ពុជាមានធនធានគ្រប់គ្រាន់ក្នុងការទទួល និងសមាហរណកម្មជនភៀសខ្លួនដោយជោគជ័យ។

ដោយសារតែការលាក់បាំងព័ត៌មានទាក់ទងនឹងការទទួលយកជនភៀសខ្លួនពីប្រទេសអូស្ត្រាលី ប្រជាជនកម្ពុជាភាគច្រើនមិនបានដឹង៖

១.ថាតើកម្ពុជាទទួលបានផលប្រយោជន៍អ្វីខ្លះពីការទទួលជនភៀសខ្លួននេះ ក្រៅពីជំនួយមនុស្សធម៌?

២.ថាតើកម្ពុជាពិតជាទទួលបានជំនួយឥតសំណងពីប្រទេសអូស្ត្រាលីដែរឬទេ?ទទួលប៉ុន្មានដែរ?យកទៅធ្វើអ្វីដែរ?

៣.តើកម្ពុជានឹងទទួលបានផលប្រយោជន៍អ្វីទៀតទៅថ្ងៃអនាគត?អូស្ត្រាលី បញ្ឈប់ការរិះគន់បញ្ហាសិទ្ធិមនុស្សនៅកម្ពជា? អូស្ត្រាលីនឹងមានទំនាក់ទំនងកាន់តែល្អជាមួយកម្ពុជា? អូស្ត្រាលីនឹងផ្តល់ជំនួយកាន់តែច្រើននៅកម្ពុជា? អូស្ត្រាលីនឹងឈប់រិះគន់ការបោះឆ្នោតនៅកម្ពុជា?

៤.តើកម្ពុជានឹងត្រូវធ្វើយ៉ាងដូចម្តេចចំពោះជនភៀសខ្លួនទៅនោះ?ដាក់ ពួកគេនៅកន្លែងណា?ពេលណាទទួលជនភៀសខ្លួនទាំងនោះ?រៀបចំ ហេដ្ឋារចនាសម្ព័ន្ធយ៉ាងដូចម្តេច? តើពួកគេមានសិទ្ធិដូចពលរដ្ឋខ្មែរឬយ៉ាងណា?តើប្រជាពលរដ្ឋខ្មែរ គួរតែត្រៀមខ្លួនអ្វីខ្លះ? តើរដ្ឋាភិបាលមានបញ្ហាប្រឈមអ្វីខ្លះក្នុងការធ្វើកិច្ចការនេះ?

ប្រសិនបើសំណួរទាំងនេះត្រូវបានពន្យល់ ប្រជាពលរដ្ឋខ្មែរនឹងអាចថ្លឹងថ្លែងពីផលប៉ះពាល់ និងផលប្រយោជន៍ និងអាចបញ្ឈប់ការរិះគន់។

លោក ស្កុត ម៉ូរីសុន បានឲ្យដឹងទៀតថា ការផ្ទេរជនភៀសខ្លួនមកកម្ពុជាអាចនឹងត្រូវធ្វើឡើងនៅចុងឆ្នាំ២០១៤ នេះ ដោយមិនមានការកំណត់ចំនួនឡើយ។ លោកបន្តថាការផ្ទេរជនភៀសខ្លួននេះនឹងជួយប្រទេសអូស្ត្រាលីអាចសម្រេច នូវគោលនយោបាយ «មិនមាននរណាម្នាក់មកតាំងទីលំនៅក្នុងប្រទេសអូស្ត្រាលី។»

នៅថ្ងៃចុះហត្ថលេខាលើកិច្ចព្រមព្រៀង ប្រជាពលរដ្ឋមានជម្លោះដីធ្លីមួយចំនួនបានតវ៉ាប្រឆាំងនឹង កិច្ចព្រមព្រៀងទទួលជនភៀសខ្លួននេះ ដោយអះអាងថារដ្ឋាភិបាលត្រូវទទួលខុសត្រូវលើពលរដ្ឋរងគ្រោះរបស់ខ្លួន សិន។ អ្នកតវ៉ាលើកឡើងថាជាតិសាសន៍ខ្លួនឯងកំពុងរងគ្រោះដោយសារជម្លោះដីធ្លី មិនទាន់ដោះស្រាយបានផង បែរទៅជាទទួលយកជនភៀសខ្លួនខុសច្បាប់ឲ្យចូលមកក្នុងប្រទេសខ្លួនទៅវិញ ។

សមាគមការពារសិទ្ធិមនុស្សហៅកាត់ថា អាដហុក លោក ធន សារាយ យល់ថាការបិទបាំងព័ត៌មានពីការទទួលយកជនភៀសខ្លួននេះ ហាក់មានភាពមិនប្រក្រតីមួយចំនួនកើតឡើង។ លោកថាកម្ពុជាមិនមែនជាប្រទេសអ្នកមាន ឬមានលទ្ធភាពគ្រប់គ្រាន់ក្នុងការទទួលខុសត្រូវលើជនទាំងនោះឡើយ ដូច្នេះការទទួលយកនេះប្រហែលដោយសារកម្ពុជាទទួលបានផលប្រយោជន៍អ្វី ម្យ៉ាងពីរដ្ឋាភិបាលអូស្ត្រាលី។លោកបន្ថែមថា កម្ពុជាមិនត្រូវទទួលយកជនភៀសខ្លួនទាំងនោះដោយសារតែទទួលបានជំនួយ នោះទេ។

សម្រាប់ប្រធានក្រុមប្រឹក្សាភិបាលនៃមជ្ឈមណ្ឌលសិទ្ធិមនុស្សកម្ពុជា លោក អ៊ូ វីរៈ បានបញ្ចេញមតិលើទំព័រហ្វេសប៊ុករបស់លោកថា «ហេតុផលនៅខាងក្រោយកិច្ចព្រមព្រៀងនេះអាចបណ្តាលមកពីប្រទេសអូស្ត្រាលី នឹងឈប់ធ្វើការថ្កោលទោសការរំលោភសិទ្ធិមនុស្សនៅកម្ពុជា។ រដ្ឋាភិបាលកម្ពុជាអាចនឹងទទួលបានភាពស្របច្បាប់ និងលុយ ហើយអូស្ត្រាលីនឹងអាចសម្រាលបញ្ហារបស់ខ្លួន និងការពារអ្នកស្វែងរកសិទ្ធិជ្រកកោនថ្មី។ ហើយវាក៏ជាកិច្ចព្រមព្រៀងឈ្នះឈ្នះសម្រាប់ទាំង លោកនាយករដ្ឋមន្ត្រី ហ៊ុន សែន និង Abbot (នាយករដ្ឋមន្ត្រីអូស្ត្រាលី)។ ចំណែកជនភៀសខ្លួន និងប្រជាជនកម្ពុជាគឺជាអ្នកចាញ់ក្នុងកិច្ចព្រមព្រៀងនេះ៕»

No comments:

ប្រវត្តិសាស្ត្រ ប្រទេស កម្ពុជា | History Series

សម រង្ស៊ី / Sam Rainsy: ខ្ញុំ សូម លាតត្រដាង ប្រវត្តិសាស្ត្រ ប្រទេស កម្ពុជា មួយរយៈកាល (ពីឆ្នាំ ១៩៥១ ដល់ឆ្នាំ ១៩៩១) ដែលគេ បិទបាំង មិនឲ្យ ប្រជារាស្ត្រខ្មែរ បានដឹង។ I would like to expose a period of Cambodia's history (from 1951 to 1991) that has been hidden to the Cambodian people.