មេដឹកនាំ រដ្ឋសភា មកពីបក្ស សង្គ្រោះជាតិ ស្នើ កុំលក់ពាក្យប្រឡង ធ្វើតេស្ត ភាសាកូរ៉េ ថ្លៃខ្ពស់
VOD | ១៧ កញ្ញា ២០១៤
ប្រធាន គណៈកម្មការ ទី៨ នៃរដ្ឋសភា មកពីគណបក្ស សង្គ្រោះជាតិ ស្នើ ឲ្យក្រសួង ការងារ ចែកជូន ពាក្យប្រឡង ធ្វើតេស្ត ភាសាកូរ៉េ ដោយឥត គិតថ្លៃ ឬក្នុងតម្លៃទាប ខណៈ ដែលសព្វថ្ងៃ ពាក្យប្រឡងនេះ ត្រូវ បានក្រសួង ការងារ លក់ក្នុងតម្លៃ ២៤ដុល្លារ។ការស្នើនេះធ្វើឡើងតាមលិខិតរបស់លោកស្រី កែ សុវណ្ណរតន៍ ប្រធានគណៈកម្មការសុខាភិបាល សង្គមកិច្ច អតីតយុទ្ធជន យុវនីតិសម្បទា ការងារ បណ្តុះបណ្តាលវិជ្ជាជីវៈ និងកិច្ចការនារី របស់រដ្ឋសភា បញ្ជូនទៅកាន់លោក អុិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ។ លិខិតដែលដាក់តាមរយៈ លោក កឹម សុខា ប្រធានរដ្ឋសភាស្តីទីរដ្ឋសភា ចុះថ្ងៃទី១៦ ខែកញ្ញា ឆ្នាំ២០១៤ បានលើកឡើងថា «ក្នុងស្ថានភាព បច្ចុប្បន្ននេះ ពលករភាគច្រើនលើសលប់គ្មានការងារធ្វើ គ្មានប្រាក់ចំណូលសមរម្យ ជីវភាពគ្រួសារគាត់មានការលំបាក។ ដូច្នេះការចំណាយ ២៤ ដុល្លារ សម្រាប់ពាក្យសុំមួយមានតម្លៃខ្ពស់ណាស់និងមិនសមស្របក្នុងកាលៈទេសៈ នេះ។»
លោកស្រី កែ សុវណ្ណរតន៍ ក៏បានស្នើឲ្យចុះផ្សាយគំរូពាក្យសុំទាំងនោះ ក្នុងគេហទំព័ររបស់ក្រសួងការងារដើម្បីឲ្យកម្មករខ្លះអាចទាញចេញពី គេហទំព័រនោះដោយមិនចាំបាច់ចំណាយពេលវេលា និងថវិកា។
អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក ហេង សួ អះអាងថា កម្ពុជាមិនអាចផ្តល់ពាក្យប្រឡងនេះដោយឥតគិតថ្លៃ ឬបញ្ចុះថ្លៃបានទេនៅពេលនេះ ដោយសំអាងថាតម្លៃនោះជាការកំណត់ក្នុងកិច្ចព្រៀងរវាងរដ្ឋាភិបាល កម្ពុជា និងរដ្ឋាភិបាលកូរ៉េរួចហើយ។
ក្រសួងការងារបានលក់ពាក្យប្រឡង ចាប់ពីថ្ងៃទី១៥ ដល់១៨ ខែកញ្ញា ឆ្នាំ២០១៤ ហើយប្រឡងនៅថ្ងៃសៅរ៍ ទី២៥ និងថ្ងៃអាទិត្យ ទី២៦ ខែតុលា ឆ្នាំ២០១៤។ ពលករដែលត្រូវការជ្រើសរើសមានចំនួន៤០០០នាក់ ក្នុងនោះវិស័យកសិកម្មចំនួន២៥០០នាក់ ឧស្សាហកម្មចំនួន១០០០នាក់ និងសំណង់ចំនួន៥០០នាក់៕
No comments:
Post a Comment