លោក ហូរ វ៉ាន់៖ ប្រសិទ្ធភាព ប្រឆាំង អំពើ ពុករលួយ នៅមានកម្រិត នៅឡើយ
RFA / វិទ្យុ អាស៊ី សេរី | ២០ កញ្ញា ២០១៤
ប្រធាន គណៈកម្មការ អង្កេត, បោសសម្អាត,
និងប្រឆាំង អំពើ ពុករលួយ នៃរដ្ឋសភា លោក ហូរ វ៉ាន់ (ស្ដាំ)
និងប្រធាន អង្គការ តម្លាភាព កម្ពុជា លោក ព្រាប កុល
ផ្ដល់បទសម្ភាសន៍ ដល់អ្នកកាសែត នៅថ្ងៃ ទី១៩ ខែកញ្ញា ឆ្នាំ២០១៤។ RFA/Yeang Socheametta
ប្រធាន គណៈកម្មការ អង្កេត, បោសសម្អាត, និងប្រឆាំង អំពើ ពុករលួយ នៃរដ្ឋសភា យល់ថា, ប្រសិទ្ធភាព ក្នុងការដោះស្រាយ អំពើ ពុករលួយ នៅកម្ពុជា នៅមានកម្រិត នៅឡើយ បើ ទោះជា សព្វថ្ងៃ កម្ពុជា មានច្បាប់ និងស្ថាប័ន ប្រឆាំង អំពើ ពុករលួយ ក៏ដោយ។
ការកត់សម្គាល់ បែបនេះ ធ្វើឡើងបន្ទាប់ ពីគណៈកម្មការ ទី១០ នៃរដ្ឋសភា មួយនេះ ជួបពិភាក្សា ការងារ ជាមួយ មន្ត្រី អង្គការ តម្លាភាព កម្ពុជា នៅមន្ទីរ រដ្ឋសភា នៅថ្ងៃ ទី១៩ ខែកញ្ញា ដែលមជ្ឈដ្ឋាន ទូទៅ ចាត់ទុក ថា, ជារឿង ដ៏កម្រមួយ ពីមុនមក។
មន្ត្រី មកពីអង្គការ តម្លាភាព កម្ពុជា ដឹកនាំដោយ លោក ព្រាប កុល ចូលជួបគណៈកម្មការអង្កេត បោសសម្អាត និងប្រឆាំងអំពើពុករលួយនៃរដ្ឋសភា ដូចការគ្រោងទុកតាមការអញ្ជើញរបស់គណៈកម្មការនេះ ដើម្បីពិភាក្សាពាក់ព័ន្ធនឹងតម្លាភាព និងការរិះរកមធ្យោបាយប្រឆាំងអំពើពុករលួយនៅកម្ពុជា។
ប្រធានគណៈកម្មការអង្កេត បោសសម្អាត និងប្រឆាំងអំពើពុករលួយនៃរដ្ឋសភា លោក ហូរ វ៉ាន់ ថ្លែងថា បើទោះជាកម្ពុជា មានច្បាប់ប្រឆាំងអំពើពុករលួយ មានអង្គភាពប្រឆាំងអំពើពុករលួយ មានអង្គការសង្គមស៊ីវិល និងមានការចូលរួមរបស់ពលរដ្ឋក៏ដោយ ក៏ប៉ុន្តែប្រសិទ្ធភាពនៃការប្រឆាំងអំពើពុករលួយនៅមានកម្រិតនៅឡើយ។ លោក ហូរ វ៉ាន់ បន្ថែមថា ដើម្បីឲ្យការងារប្រឆាំងអំពើពុករលួយ ឬការត្រួតពិនិត្យការអនុវត្តច្បាប់ប្រឆាំងអំពើពុករលួយមាន ប្រសិទ្ធភាព វាទាមទារឲ្យមានឆន្ទៈមោះមុតពីគ្រប់ភាគីពាក់ព័ន្ធទាំងអស់ ព្រោះថា អំពើពុករលួយជាបញ្ហាសម្រាប់ប្រទេសជាតិទាំងមូល មិនមែនជារបស់គណបក្សនយោបាយណាមួយឡើយ។
លោក ថា គណៈកម្មការទី១០របស់លោក តាំងចិត្តធ្វើយ៉ាងណាព្យាយាមកាត់បន្ថយអំពើពុករលួយ និងជំរុញឲ្យមានការអនុវត្តច្បាប់ប្រឆាំងអំពើពុករលួយ ប្រកបដោយប្រសិទ្ធភាព៖ «សុំឲ្យឆន្ទៈនេះមោះមុតជានិច្ច ដើម្បីឲ្យយើងធ្វើការប្រឆាំងអំពើពុករលួយ ឬក៏ត្រួតពិនិត្យការអនុវត្តការប្រឆាំងអំពើពុករលួយរបស់រដ្ឋសភា មានប្រសិទ្ធភាព ត្រូវតែផ្ដោតទៅលើឆន្ទៈដ៏មោះមុតគ្រប់អង្គភាព គ្រប់ស្ថាប័នដើម្បីចាប់ដៃគ្នា កាត់បន្ថយភាពពុករលួយនេះឲ្យបានសំខាន់ គឺយើងបង្កើនការអនុវត្តច្បាប់ដែលយើងមាន ច្បាប់ប្រឆាំងអំពើពុករលួយ ច្បាប់សវនកម្ម។ល។»
ទោះយ៉ាងណា លោក ហូរ វ៉ាន់ ថា ដើម្បីឲ្យការងារប្រឆាំងអំពើពុករលួយមានប្រសិទ្ធភាព លុះណាតែមានការកែលំអកត្តាចាំបាច់មួយចំនួន ដូចជា ការធ្វើវិសោធនកម្មច្បាប់ប្រឆាំងអំពើពុករលួយ ព្រោះថា ច្បាប់ប្រឆាំងអំពើពុករលួយសព្វថ្ងៃ រឹតត្បិតទៅលើអ្នកដែលហ៊ានរាយការណ៍ពីអំពើពុករលួយ ហើយដែលអាចមានទោសទណ្ឌទៀតផង។ លោកថា ផ្ទុយទៅវិញ ច្បាប់គួរតែលើកទឹកចិត្តដល់អ្នកដែលហ៊ានរាយការណ៍ពីករណីពុករលួយ។
លោក ហូរ វ៉ាន់ បញ្ជាក់ថា នេះគឺជាគំនិត និងអនុសាសន៍មួយចំនួន ដែលលោក និងគណៈកម្មការទី១០ ទទួលបានពីអង្គការតម្លាភាពកម្ពុជា។ នៅក្នុងជំនួបជាង ២ម៉ោងជាមួយគណៈកម្មការទី១០ អង្គការតម្លាភាពកម្ពុជា បានធ្វើបទបង្ហាញ និងផ្តល់របាយការណ៍សិក្សាស្រាវជ្រាវពាក់ព័ន្ធនឹងអំពើពុករលួយរបស់ ខ្លួន ទៅឲ្យគណៈកម្មការនេះ។
ប្រធានអង្គការតម្លាភាពកម្ពុជា លោក ព្រាប កុល ឲ្យដឹងនៅក្រោយជំនួបនោះថា ឯកសារដែលក្រុមលោកប្រគល់ឲ្យគណៈកម្មការទី១០ មានដូចជា របាយការណ៍សន្ទស្សន៍វាស់វែងអំពើពុករលួយ របាយការណ៍ប្រព័ន្ធសុចរិតភាពថ្នាក់ជាតិឆ្នាំ២០១៤ ដែលអង្គការលោកទើបបានចេញផ្សាយកាលពីពេលថ្មីៗនេះ និងឯកសារសំខាន់ៗផ្សេងទៀត។ លើសពីនេះ ក៏មានការពិភាក្សាផ្លាស់ប្ដូរមតិយោបល់គ្នាទៅវិញទៅមកផងដែរ។
លោក ព្រាប កុល៖ «អនុសាសន៍យើង សំខាន់ៗនោះ មានតាំងពីកំណែទម្រង់ ប្រព័ន្ធតុលាការ ដែលបច្ចុប្បន្នត្រូវបានមជ្ឈដ្ឋានទូទៅមើលឃើញថា នៅមានបញ្ហាប្រព័ន្ធសុចរិតភាពនៅខ្សោយ ហើយនៅមានឥទ្ធិពលនយោបាយ មានបញ្ហាពុករលួយនៅក្នុងតុលាការហ្នឹង ហើយកែទម្រង់ច្បាប់មួយចំនួនដែលទើបតែអនុម័ត ៣កន្លងទៅហ្នឹង យើងបានផ្តល់អនុសាសន៍ឲ្យពិនិត្យមើលទៅលើការអនុម័តច្បាប់ ស្ដីពីការទទួលព័ត៌មានឲ្យបានឆាប់កាន់តែប្រសើរ ព្រោះឥឡូវនេះ ស្ថិតនៅក្នុងសមត្ថកិច្ចក្រសួងព័ត៌មាន។»
លោក ហូរ វ៉ាន់ ថ្លែងថា អ្វីដែលគណៈកម្មការលោកត្រូវធ្វើនោះ គឺបន្តត្រួតពិនិត្យការអនុវត្តច្បាប់ប្រឆាំងអំពើពុករលួយ និងវិភាគលើពាក្យបណ្ដឹងដែលគណៈកម្មការលោកទទួលបាន ព្រមទាំងពិនិត្យមើលការអនុវត្តការងាររបស់អង្គភាពប្រឆាំងអំពើពុក រលួយ។
ក្រៅពីអង្គការតម្លាភាពកម្ពុជា គណៈកម្មការអង្កេត បោសសម្អាត និងប្រឆាំងអំពើពុករលួយរដ្ឋសភា ដែលមានសមាជិកសភាមកពីគណបក្សសង្គ្រោះជាតិ ធ្វើជាក្បាលម៉ាស៊ីនដឹកនាំនោះ ក៏បានកោះហៅមន្ត្រីមកពីអង្គភាពប្រឆាំងអំពើពុករលួយចូលជួប ដើម្បីសួរនាំពីការអនុវត្តការងាររបស់ពួកគេក្នុងពេលកន្លងមក។
លោក ហូរ វ៉ាន់ ឲ្យដឹងថា អង្គភាពប្រឆាំងអំពើពុករលួយ បានជូនដំណឹងមកលោករួចហើយថា ពួកគេរង់ចាំប្រជុំបូកសរុបការងារនៅដំណាច់ខែកញ្ញា នេះជាមុនសិន មុននឹងចូលជួបតាមការកោះហៅរបស់គណៈកម្មការទី១០របស់សភា។ បើតាម លោក ហូរ វ៉ាន់ ការប្រជុំនេះអាចនឹងធ្វើឡើងនៅក្នុងខែតុលា ខាងមុខ៕
No comments:
Post a Comment