ក្រុមសហជីព កម្មករ គ្រោងធ្វើ យុទ្ធនាការ ជាថ្មី ទាមទារដំឡើង ប្រាក់ឈ្នួល គោល ១៧៧ដុល្លារ
RFA / វិទ្យុ អាស៊ី សេរី | ១០ កញ្ញា ២០១៤
កម្មករ លើកបដា ទាមទារ ប្រាក់ខែគោល ១៦០ដុល្លារ តវ៉ា នៅក្បែរ ទីស្ដីការ គណៈរដ្ឋមន្ត្រី នៅថ្ងៃ ទី៣០ ធ្នូ ឆ្នាំ២០១៣។ RFA/Mom Sophon
មេដឹកនាំ សហជីពកម្មករ ធំៗ គ្រោងថា នឹងចាប់ផ្ដើម យុទ្ធនាការថ្មី ទាមទារដំឡើង ប្រាក់ឈ្នួល អប្បបរមា ឬហៅ ថា ប្រាក់ឈ្នួល គោល សម្រាប់ កម្មករ នៅតាមរោងចក្រ សហគ្រាសនានា នៅពាក់កណ្ដាល ខែកញ្ញា។
យុទ្ធនាការនោះ មានសកម្មភាព មួយចំនួន, មានដូចជា៖ ការដាក់ញត្តិ, វេទិកាកម្មករ, និងការកៀរគរ រកការគាំទ្រ របស់ បណ្ដាអ្នកបញ្ជាទិញ ទាំងឡាយ។ តាមរយៈ យុទ្ធនាការនោះ ក្រុមសហជីព បានបង្កើន ការទាមទារ ឲ្យបាន ១៧៧ដុល្លារ ជាប្រាក់ឈ្នួល គោលថ្មី សម្រាប់ ឆ្នាំ២០១៥។
ក្រុមសហជីព នៅតែ ប្រកាន់ជំហរ ទាមទារ ប្រាក់ឈ្នួល គោល កម្មករ ទៅតាមតួលេខ ដែលក្រុមនេះ បានព្រមព្រៀងគ្នា កាលពីខែសីហា, បើ ទោះបី ជំនួបពីរដង រួចមកហើយ ជាមួយ ភាគីនិយោជក នៅតែ មិនទាន់ ទទួលបាន លទ្ធផល។
លោក អាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា ហៅកាត់ស៊ីខៅឌូ (CCAWDU) មានប្រសាសន៍ថា ក្រុមសហជីពនឹងបង្កើនការទាមទារបន្ថែមសម្រាប់ឆ្នាំ២០១៥ នៅពេលដែលភាគីនិយោជកហាក់បត់បែនលឿនពេកនៅក្នុងជំនួបជាជំហាន ដំបូង៖ «កាលពីថ្ងៃទី៨ គឺខាងនិយោជកហ្នឹងគេថាគេមិនទាន់និយាយផ្លូវការទេ គឺក្រៅផ្លូវការថាគេអាចឡើងបាន ១៥ដុល្លារ ស្រាប់តែថ្ងៃទី១ ខែកញ្ញា គេថាគេឡើងបានតែត្រឹម ១០ដុល្លារវិញទេ ដោយសារតែសមាជិកគេអត់ព្រម ហើយ ១០ហ្នឹងគឺជាលេខចុងក្រោយ។ ហីចឹង សហជីពយើងកាលពីថ្ងៃទី៨ យើងបានថាក្នុងករណីគេដំឡើងចឹង យើងក៏បញ្ចុះ កាលហ្នឹងយើងបានជជែកគ្នាក្រៅផ្លូវការ យើងអាចចុះដល់ ១៥០ តែដល់និយោជកថាយក ១១០ យើងប្រកាន់យក ១៧៧ វិញ ប៉ុន្តែយើងមានការចរចាអាចបញ្ចុះទៀត។»
គឺនៅក្រោយការប្រទាំងប្រទើសគ្នានោះហើយ ដែលក្រុមសហជីពងាកមកប្រកាន់ការទាមទារប្រាក់ឈ្នួលគោល ១៧៧ដុល្លារ។
ប្រធានសហភាពការងារកម្ពុជា លោក រ៉ុង ឈុន បញ្ជាក់ពីយុទ្ធនាការនោះថា នឹងចាប់ផ្ដើមនៅថ្ងៃទី១៥ ខែកញ្ញា៖ «ថ្ងៃ ១៥ហ្នឹងធ្វើសន្និសីទកាសែតប្រកាសបើកយុទ្ធនាការ។ ថ្ងៃទី១៦ នឹងមានតំណាងកម្មករ និងសហជីពហ្នឹង មានយុទ្ធនាការមានអាវយឺតហើយដាក់ឡូហ្គោ (Logo) ១៧៧ដុល្លារ ហើយនិងថ្ងៃទី១៧ មានប្រជុំត្រីភាគី។ បន្ទាប់ពីភ្ជុំបិណ្ឌចប់មិនមានការឆ្លើយតបមិនមានការឆ្លើយតប ដែលអាចទទួលយកបានទេ និងមានការជួបប្រជុំទ្រង់ទ្រាយធំ គឺកម្មករចូលរួមការប្រមូលផ្តុំជ្រើសរើសទីសាធារណៈណាមួយ ឬទីលានប្រជាធិបតេយ្យនោះបាទ។»
ចំណែក លោក អាត់ ធន់ វិញបញ្ជាក់ថា នៅថ្ងៃទី១៧ ក៏មានវេទិការបស់កម្មករនៅតាមរោងចក្រសហគ្រាសនានាដែលជាសមាជិករបស់ ក្រុមលោក។ ក្នុងវេទិកានោះ កម្មករអាចស្នើនូវតម្រូវការរបស់ពួកគេទៅភាគីនិយោជក។ ស្របគ្នានេះ សហជីពដៃគូនៅក្រៅប្រទេស នឹងជួយជ្រោមជ្រែងយុទ្ធនាការនេះដែរ៖ «បង្ហាញ សារទៅខាងនិយោជកថា យើងចង់បានប្រាក់ខែប៉ុន្មាន? ហីយើងពិបាកអី តើយើងចង់អោយអ្នកបញ្ជាទិញគួរតែជួយគាំទ្រយើងប៉ុន្មាន? ជាមួយគ្នានេះដែរ ដោយសារតែយើងធ្វើការជាមួយសហជីពអន្តរជាតិ ព័ត៌មានទាំងអស់នេះនឹងផ្ញើទៅសហជីពអន្តរជាតិ ដើម្បីធ្វើការពិភាក្សាជាមួយអ្នកបញ្ជាទិញអន្តរជាតិ ដើម្បីអោយគាត់ដោះស្រាយ ព្រោះគាត់បានសន្យាតាំងពីខែ១ មកថា នឹងដោះស្រាយបញ្ចប់បញ្ហាប្រាក់ឈ្នួលហ្នឹង។»
ក្រុមសហជីពកម្មករបានអះអាងថា ការទាមទារនេះ គឺផ្អែកតាមលទ្ធផលស្រាវជ្រាវរបស់គណៈកម្មការសិក្សាប្រាក់ឈ្នួលកាល ពីចុងឆ្នាំ២០១២។ លទ្ធផលស្រាវជ្រាវនោះរកឃើញថា ប្រាក់ខែគោលរបស់កម្មករអាចនឹងទទួលបានពីចន្លោះ ១៥៧ដុល្លារ ទៅ ១៧៧ដុល្លារ ដើម្បីអាចរស់នៅបានសមរម្យ។
ផ្ទុយពីមេដឹកនាំសហជីពផ្សេងទៀត ប្រធានសហភាពសហព័ន្ធសហជីពជាតិកម្ពុជា និងជាអនុប្រធានគណៈកម្មការប្រឹក្សាការងារ លោក ជួន មុំថុល ថ្លែងថា លោកនឹងមិនចូលរួមការទាមទារប្រាក់ឈ្នួលនេះទេ ប្រសិនណានៅតែបន្តដាក់តួលេខនៃការទាមទារដំឡើងប្រាក់ឈ្នួលគោល របស់កម្មករចំនួន ១៧៧ដុល្លារនោះ។ លោកគិតថា ការរឹងត្អឹងបែបនេះ គឺមិនយុត្តិធម៌ទេសម្រាប់និយោជក៖ «យើងភាគីសហជីព និងភាគីនិយោជក យើងបានចរចា យើងបានបញ្ចុះមក ១៥០ ហើយ។ បើយើងនៅតែទារ ១៧៧ ទៀត មានន័យថា យើងហ្នឹងចរចាដោយគ្មានភាពស្មោះត្រង់ និយោជកក៏គេថាអោយយើងដែរ។»
ចំណែកភាគីនិយោជកនៅមិនទាន់ថាយ៉ាងណានៅឡើយទេចំពោះការទាមទារនេះ ដោយសំអាងថា ពួកគេកំពុងពិភាក្សា។
មន្ត្រីជាន់ខ្ពស់នៃសមាគមរោងចក្រកាត់ដេរនៅកម្ពុជា ឬហៅថា ជីម៉ាក (GMAC) លោក ជាតិ ខេមរ៉ា មានប្រសាសន៍នៅថ្ងៃទី៩ ខែកញ្ញា ថា រឿងប្រាក់ឈ្នួលជាបញ្ហាដែលទាមទារអោយមានការសិក្សាច្បាស់លាស់មួយ ជាមុនសិន។ លោកថា និយោជកក៏ជួបការលំបាកច្រើនដែរនៅពេលនេះ ដែលជាមូលហេតុមួយធ្វើអោយពួកគេនៅមិនទាន់អាចសម្រេចបាន៖ «យើង ត្រូវគិតអោយបានដិតដល់ មិនមែនថាយើងធ្វើទៅចុងបញ្ចប់ស្រាប់តែយើងទទួលទាំងអស់គ្នា ក៏យើងគិតដែរចំណុចហ្នឹង ជាចំណុចអាទិភាពដែរ ព្រោះក្នុងហ្នឹងជាទីផ្សារប្រកួតប្រជែងគ្នាទាំងក្នុងតំបន់។ ភាគីនិយោជកក៏គាត់ព្រួយបារម្ភខ្លាំងណាស់រាល់ថ្ងៃ។ ទី១ យើងឃើញរាល់ថ្ងៃហ្នឹង អឌ័រ (Orders) បានធ្លាក់អស់ហើយ ត្រូវគេដកចេញ ៣០ភាគរយ រោងចក្រខ្លះ ៤០ ខ្លះ ២០ ខ្លះ ៦០ភាគរយអស់ហើយ។»
ទាក់ទងនឹងបញ្ហានេះ លោកនាយករដ្ឋមន្ត្រី ហ៊ុន សែន កាលពីថ្ងៃទី៤ ខែសីហា បានថ្លែងថា រដ្ឋាភិបាលកំពុងគិតគូររកមធ្យោបាយដើម្បីដំឡើងប្រាក់ខែកម្មករ។ លោកថា ប្រាក់ខែរបស់កម្មករខ្មែរបច្ចុប្បន្ននេះ គឺមានចំនួនខ្ពស់ជាងកម្មករនៅប្រទេសបង់ក្លាដេស (Bangladesh) ដែលទទួលបានចំនួន ៧០ដុល្លារ។
ពាក់ព័ន្ធដល់ការទាមទារប្រាក់ឈ្នួលនេះ កាលពីចុងឆ្នាំ២០១២ និងដើមឆ្នាំ២០១៣ យុទ្ធការទាមទារប្រាក់ឈ្នួលគោលកម្មករ បានកំណត់យកចំនួន ១៦០ដុល្លារ ប៉ុន្តែយុទ្ធនាការនោះពុំបានសម្រេចឡើយ។ ហេតុការណ៍អាក្រក់នៅពេលនោះ គឺការបង្ក្រាបបង្ហូរឈាមនៅលើផ្លូវវ៉េងស្រេង ដែលធ្វើអោយកម្មករជាបាតុករ ៥នាក់ស្លាប់ ម្នាក់បាត់ខ្លួន និងជិត ៤០នាក់របួស។ ស្របគ្នានោះ ក៏មានសកម្មជនសិទ្ធិមនុស្ស សមាគម និងកម្មករចំនួន ២៣នាក់ ត្រូវចាប់ដាក់ពន្ធនាគារ។ ប៉ុន្តែជាលទ្ធផល ប្រាក់ខែគោលកម្មករត្រូវបានដំឡើងត្រឹម ១០០ដុល្លារ តាំងពីខែកុម្ភៈ ឆ្នាំ២០១៤ មក។
មកដល់ពេលនេះ គឺនៅមុនយុទ្ធនាការចាប់ផ្ដើម មេដឹកនាំសហជីពកម្មករចំនួន ៦នាក់ ត្រូវចៅក្រមស៊ើបសួរនៃសាលាដំបូងរាជធានីភ្នំពេញ កោះហៅអោយចូលទៅបំភ្លឺជាបន្តបន្ទាប់នៅក្នុងខែកញ្ញា នេះ ពាក់ព័ន្ធបណ្ដឹងរបស់ក្រុមនិយោជក ដែលទាមទារសំណងចំពោះការខូចខាតទ្រព្យសម្បត្តិរបស់រោងចក្រសហគ្រាស។ អ្នកទាំងនោះមាន លោក រ៉ុង ឈុន លោក អាត់ ធន់ លោក ជា មុនី លោក ប៉ាវ ស៊ីណា អ្នកស្រី ម៉ម ញឹម និងអ្នកស្រី យ៉ាង សុភ័ណ្ឌ។ ពួកគេត្រូវចោទប្រកាន់ពីបទហិង្សា និងបង្កការខូចខាតដោយចេតនា ដែលមានស្ថានទម្ងន់ទោស និងបង្កឱ្យស្ទះចរាចរណ៍នៅផ្លូវវ៉េងស្រេងនោះ។
លោក អាត់ ធន់ ដែលនឹងចូលទៅបំភ្លឺនៅថ្ងៃទី១៧ ខាងមុខ បញ្ជាក់ថា ការកោះហៅនៅពេលនេះ បង្ហាញយ៉ាងច្បាស់ថាជាការគំរាមកំហែងបំបាក់ស្មារតីមេដឹកនាំសហជីព ដែលសកម្មក្នុងការទាមទារអត្ថប្រយោជន៍សម្រាប់កម្មករ និងបង្ហាញពីភាពមិនស្មើមុខមាត់គ្នាក្នុងការចរចាប្រាក់ឈ្នួល។ លោក អាត់ ធន់ អំពាវនាវអោយទម្លាក់ចោលនូវរាល់បទចោទចំពោះមេដឹកនាំសហជីព ដ្បិតពួកគេពុំមានកំហុសទេ រាល់ការទាមទារកន្លងទៅ គឺដើម្បីប្រយោជន៍កម្មករ៖ «វាបង្ហាញថា តុលាការនៅក្រោមឥទ្ធិពលនៃទឹកប្រាក់ ឬក៏អ្នកមានអំណាច វាធ្វើអោយប៉ះពាល់ដល់តុលាការវិញទេ វាអត់ចំណេញដល់កេរ្តិ៍ឈ្មោះតុលាការទេ។»
ទាក់ទិននឹងករណីនេះ តំណាងនិយោជកពុំបានបញ្ជាក់ ឬបដិសេធចំពោះការចាត់ទុកការកោះហៅនោះជាគំរាមកំហែងទេ ប៉ុន្តែបានលើកឡើងថា សហជីពតែងតែគំរាមកំហែងនិយោជកដែរ តាមរយៈការធ្វើកូដកម្ម បាតុកម្ម ដែលជាញឹកញយតែងឈានទៅដល់ការរំលោភច្បាប់ និងពុំមានការទទួលខុសត្រូវ។
តាមរយៈសំណុំរឿងនេះ មន្ត្រីជាន់ខ្ពស់សមាគមជីម៉ាក លោក ជាតិ ខេមរ៉ា សង្ឃឹមថា រាល់ការអនុវត្តទៅថ្ងៃមុខនឹងអាចកាត់បន្ថយការប្រព្រឹត្តផ្ទុយពី ច្បាប់ ដោយក្រុមសហជីពដែលពុំមានការទទួលខុសត្រូវ៖ «ថ្នាក់ដឹក នាំគេ ប៉ុន្តែយើងពុំមានយុទ្ធសាស្ត្រមួយ ដើម្បីអោយគាត់យល់ដឹងខ្លះនូវផ្នែកផ្លូវច្បាប់ នីតិវិធីអីដោះស្រាយអីយ៉ាងម៉េចៗ យើងអត់អោយគាត់យល់ ហ្នឹងហើយចុងក្រោយផលវិបាកទៅលើគាត់។ អ្វីដែលយើងចង់បាន គឺការកាត់បន្ថយ គម្លាតនៃការមិនអនុវត្តច្បាប់ អនុវត្តខុសនីតិវិធី។»
ក្រុមមេដឹកនាំសហជីពបានបញ្ជាក់ដែរថា យុទ្ធនាការថ្មីនេះអាចនឹងជួយកាត់បន្ថយការប៉ះទង្គិច ហើយជំហររបស់សហជីព គឺប្រកាន់យកការតវ៉ាដោយអហិង្សា។ ពួកគេលើកទឹកចិត្តអោយក្រុមកម្មករ ចូលរួមការទាមទារដោយពុំមានការភ័យបារម្ភ បើទោះបីជាការទាមទារកាលពីលើកមុន បានធ្វើអោយមនុស្សស្លាប់ របួស និងជាប់គុករួចហើយក៏ដោយ៕
No comments:
Post a Comment