មេឃុំ បឹងប្រាំ ខេត្ត បាត់ដំបង ព្រមានប្ដឹង ក្រុមប្រឹក្សា ខេត្ត បក្សប្រឆាំង និងអាដហុក
RFA / វិទ្យុ អាស៊ី សេរី | ៩ កញ្ញា ២០១៤
សមាជិក ក្រុមប្រឹក្សា ខេត្តម្នាក់ ក្នុងចំណោម សមាជិក
ក្រុមប្រឹក្សាខេត្ត ៣នាក់ មកពីគណបក្ស សង្គ្រោះជាតិ ខេត្តបាត់ដំបង លោក
ជា ជីវ ដែលរង ការព្រមាន ប្ដឹង ពីមេឃុំ បឹងប្រាំ ក្នុងទំនាស់ ដីធ្លី។
រូបថតថ្ងៃ ទី៨ ខែកញ្ញា ឆ្នាំ២០១៤ (RFA/Morm Moniroth)
មេឃុំ បឹងប្រាំ, ស្រុក បវេល, ខេត្ត បាត់ដំបង មកពីគណបក្ស ប្រជាជនកម្ពុជា ព្រមានប្ដឹង ក្រុមប្រឹក្សា ខេត្ត គណបក្ស សង្គ្រោះជាតិ ចំនួន ៣នាក់ ទៅតុលាការ និងក្រុមប្រឹក្សា ធម្មនុញ្ញ។ លើសពីនេះទៀត បានប្រតិកម្ម ចំពោះ របាយការណ៍ របស់ សមាគម អាដហុក (Adhoc) ថែមទៀត។
ទាំងមន្ត្រី សិទ្ធិមនុស្ស សមាគម អាដហុក និងសមាជិក ប្រឹក្សាខេត្ត គណបក្ស សង្គ្រោះជាតិ សុទ្ធតែ បានអះអាង ថា, ពួកគេ ស្វាគមន៍ រាល់ការ ចាត់វិធានការ ផ្លូវច្បាប់ ជុំវិញរឿង អាស្រូវ ទាំងនេះ។
អតីតអ្នកជាប់ពន្ធនាគារព្រោះរឿងដីធ្លី មុននឹងក្លាយជាមេឃុំបឹងប្រាំ អះអាងថា ខ្លួននឹងដាក់បណ្ដឹងប្រឆាំងការចោទប្រកាន់រូបលោកពីបទបរិហារ កេរ្តិ៍ ដោយលោកចាត់ទុកការស្នើឲ្យក្រសួងមហាផ្ទៃ ដកតួនាទីរបស់លោកពីមេឃុំបឹងប្រាំ និងរបាយការណ៍ ស្ដីពីភាពមិនប្រក្រតីក្នុងរឿងសម្បទានដីសង្គមកិច្ចនោះ ថាគឺជារឿងអយុត្តិធម៌។
ប្រតិកម្មនេះ ធ្វើឡើងរយៈពេល ៨ថ្ងៃក្រោយ បន្ទាប់ពីសមាជិកបីរូបរបស់គណបក្សសង្គ្រោះជាតិ ដាក់សំណើទៅក្រសួងមហាផ្ទៃ តាមរយៈអភិបាលខេត្តបាត់ដំបង កាលពីថ្ងៃទី១ កញ្ញា ឲ្យព្យួរ និងដកតួនាទី លោក ឈា នី ពីមេឃុំបឹងប្រាំ។ បន្ថែមពីលើនេះ លោក ឈា នី ក៏ប្រតិកម្មប្រឆាំងនឹងរបាយការណ៍ដែលចេញដោយសមាគមសិទ្ធិមនុស្ស អាដហុក មួយផ្សេងទៀតក្នុងពេលថ្មីៗកន្លងទៅនេះ ដែលរកឃើញថា មេឃុំបឹងប្រាំ បានរំលោភដីប្រជាពលរដ្ឋក្រោមគោលនយោបាយសម្បទានដីសង្គមកិច្ចទៀតផង។
មេឃុំបឹងប្រាំ ស្រុកបវេល ខេត្តបាត់ដំបង លោក ឈា នី ដែលនៅពេលនេះរងការចោទប្រកាន់ថា ជាភាគីបង្កទំនាស់នោះ ព្រមានថា លោកនឹងចាត់វិធានការតាមផ្លូវច្បាប់ប្រឆាំងមន្ត្រីគណបក្សសង្គ្រោះ ជាតិ ព្រមទាំងរបាយការណ៍ដែលចេញដោយសមាគមអាដហុក នេះទៀតផង ប្រសិនបើការបកស្រាយណាមួយមិនសមហេតុផល ឬថារកមិនឃើញពីកំហុសរបស់លោកដូចការចោទប្រកាន់នោះទេ។ លោក ឈា នី បន្តថា ប៉ុន្តែនៅពេលនេះ លោកឲ្យទុកឱកាសឲ្យភាគីពាក់ព័ន្ធឆ្លើយបំភ្លឺជាមុនសិន មុននឹងឈានដល់អនុវត្តតាមច្បាប់៖ «គាត់មិនចេញបុគ្គលខ្លួនគាត់ ឬក៏ប្រជាពលរដ្ឋមិនពេញចិត្ត ឬក៏គាត់គ្រាន់តែយកជាលេសតាមព័ត៌មានអីទៅ ដើម្បីចោទប្រកាន់ស្នើឡើងដក។ ខ្ញុំសូមឲ្យបកស្រាយឲ្យច្បាស់ត្រង់ហ្នឹង។»
ឆ្លើយតបបញ្ហានេះ សមាជិកក្រុមប្រឹក្សាខេត្តម្នាក់ក្នុងចំណោមសមាជិកក្រុមប្រឹក្សាខេត្ត ទាំង ៣រូប ដែលបានស្នើសុំឲ្យក្រសួងមហាផ្ទៃ ព្យួរ និងដកសិទ្ធិជាមេឃុំបឹងប្រាំ ពី លោក ឈា នី កាលពីដើមខែកញ្ញា គឺលោក ជា ជីវ បញ្ជាក់ថា ក្រុមប្រឹក្សាខេត្តមានភស្តុតាងគ្រប់គ្រាន់ដែលរកឃើញថា មេឃុំបឹងប្រាំ ពិតជាមិនសមក្នុងឋានៈជាមេឃុំឡើយ។ លោកឲ្យដឹងទៀតថា មានហេតុផលច្រើនសម្បើមណាស់ក្រៅពីនេះទៀត ដែលបញ្ជាក់ថា មេឃុំបឹងប្រាំ ពិតជាបានប្រើប្រាស់អំណាចលើសពីតួនាទីរបស់ខ្លួន ហើយរំលោភសិទ្ធិជាមូលដ្ឋានរបស់ប្រជាពលរដ្ឋនៅក្នុងសហគមន៍ ក្រោមគោលនយោបាយសម្បទានដីសង្គមកិច្ច៖ «ពាក់ព័ន្ធនឹងចេញប័ណ្ណរួច ហើយ ហេតុអីមិនមានដីប្រើប្រាស់ ហ្នឹងហើយជាអ្វីដែលជាអសមត្ថភាពគាត់។ មិនចេះសម្របសម្រួល ហើយបំផុសបំផុលប្រជាពលរដ្ឋម្ខាងឲ្យឈ្លោះប្រជាពលរដ្ឋ ហើយមានការរំលោភអំណាច ក្នុងការរឹបអូសយកគោយន្តគេ ដោយគ្មានឯកសារលិខិតស្នាម។»
ជុំវិញបញ្ហានេះ លោក ឈា នី អះអាងថា រឿងសម្បទានដីសង្គមកិច្ចនេះ វាពុំមែនជាជម្រើស និងជាការចាត់ចែងរបស់លោកឡើយ ដែលតម្រូវឲ្យប្រជាពលរដ្ឋត្រូវតែអនុវត្តនោះ។ ប៉ុន្តែលោកបញ្ជាក់ថា យុទ្ធនាការកាលណោះ គឺធ្វើឡើងដោយការចាប់ឆ្នោតស្ម័គ្រចិត្ត ហើយមានការសម្របសម្រួលដោយ លោក អ៊ឹម ឈុនលឹម រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ទៀតផង តាមកម្មវិធីនយោបាយរបស់រដ្ឋាភិបាលថែមទៀត។
លើសពីនេះទៀត លោកអះអាងម្ដងហើយម្ដងទៀតថា លោកនឹងមិនញញើតចំពោះការបាត់បង់កៅអីជាមេឃុំឡើយ ប្រសិនបើរកឃើញថា ប្រជាពលរដ្ឋនៅក្នុងសហគមន៍ឃុំបឹងប្រាំ ពិតជាលែងគាំទ្ររូបលោកធ្វើជាមេឃុំពិតមែននោះ ជាពិសេស រឹតតែមិនខ្លាចទៅទៀតនោះ គឺលោកអាចហ៊ានដើរចូលគុកដោយមិនចាំបាច់មានបណ្ដឹងណាមួយប្រឆាំង រូបលោក ដូចជា លិខិតស្នើឲ្យដកតួនាទីជាមេឃុំរបស់សមាជិកក្រុមប្រឹក្សាខេត្ត គណបក្សសង្គ្រោះជាតិ នៅពេលនេះ៖ «បើមានប្រជាពលរដ្ឋរបស់ខ្ញុំនៅ ឃុំបឹងប្រាំ ដែលមាន ២ពាន់គ្រួសារជាងនេះ។ វាស្មើនឹងប្រជាពលរដ្ឋដែលមានឈ្មោះបោះឆ្នោត មានបញ្ជីបោះឆ្នោតនៅក្នុងឃុំបឹងប្រាំ ខ្ញុំ ៤ពាន់នាក់ជាង។ បើលោកមិនពេញចិត្ត លោកថាឥឡូវផ្ដិតមេដៃទម្លាក់មេឃុំ ៣ពាន់ នៅសល់តែ ១ពាន់។ ១ពាន់ ខ្ញុំចុះចេញភ្លាម មិនចាំបាច់ដល់តំណាងរាស្ត្រ ឬក៏ដាក់ដល់ក្រសួងមហាផ្ទៃ ទេ។ ដាក់តែត្រឹមឃុំ ខ្ញុំនឹងកាន់ទៅក្រសួងមហាផ្ទៃ ចុះចេញភ្លាម។»
បើទោះជាបែបណា មានរបាយការណ៍មួយចំនួនក្នុងចំណោមនោះ របាយការណ៍និយាយអំពីការប្រព្រឹត្តអំពើពុករលួយក្នុងពេល លោក ឈា នី រៀបចំគោលនយោបាយសម្បទានដីសង្គមកិច្ចនៅតំបន់បឹងប្រាំ។ លោក ឈា នី រងការចោទប្រកាន់ថា បានទទួលលុយជិត ៥០០លានរៀល (៤៧៣.៨៩០.០០០រៀល) ឬស្មើប្រមាណជិត ១២ម៉ឺនដុល្លារ (១១៨.៤៧២,២ដុល្លារ) សហរដ្ឋអាមេរិក។ ស្ថិតក្រោមហេតុផលនេះហើយ ដែលសមាគមសិទ្ធិមនុស្សអាដហុក ចាត់ទុកថា គឺជាដើមចមដែលនាំឲ្យការដោះស្រាយក្នុងរឿងដីធ្លីជិត ៤ពាន់ហិកតារ នៅឃុំបឹងប្រាំ ដោះមិនចេញ ហើយបន្តជាប់គាំងអស់ពេល ៨ឆ្នាំមកនេះ។
ឆ្លើយតបការចោទប្រកាន់នេះ លោក ឈា នី អះអាងថា លោកបើកចំហឲ្យមានការស៊ើបអង្កេតមួយដ៏ឯករាជ្យ ជុំវិញបញ្ហានេះ។ លោកព្រមានទៅវិញថា ប្រសិនបើរកពុំឃើញបទល្មើសដូចការចោទប្រកាន់ទេ ភាគីពាក់ព័ន្ធទាំងនេះនឹងត្រូវរងបណ្ដឹងពីលោកវិញ ក្រោមបទចោទបរិហារកេរ្តិ៍ទៅតុលាការ ឬថាទៅក្រុមប្រឹក្សាធម្មនុញ្ញ៖ «ប្រជាពលរដ្ឋ ណាថាដីយើងត្រូវបានប៉ុណ្ណេះ ឲ្យលុយខ្ញុំប៉ុណ្ណេះមក ខ្ញុំឲ្យប៉ុណ្ណេះ។ ខ្ញុំឥតមានទេ ឲ្យរកលិខិតស្នាមឲ្យឃើញ។ ៥០០គ្រួសារ រាប់បញ្ចូលទាំង ១៥០គ្រួសារទៀតមកពីណា? ខ្ញុំសូមឲ្យគាត់រក។»
ក្រៅពីព្រមានចាត់វិធានការតាមច្បាប់ប្រឆាំងសមាជិកក្រុមប្រឹក្សា ខេត្តមកពីគណបក្សសង្គ្រោះជាតិ មាន លោក ជា ជីវ លោក ខឺយ ស៊ីណា និងលោក ប៉ែន ឈន់សារ៉ាវ័ន្ត ហើយចំណែក លោក យិន ម៉េងលី មន្ត្រីសិទ្ធិមនុស្សនៃសមាគមអាដហុក ក៏រងការស្ដីបន្ទោសថា ជាមន្ត្រីនៃស្ថាប័នអង្គការមិនមែនរដ្ឋាភិបាល ដែលធ្វើការមិនទទួលខុសត្រូវដែរ។ លោក ឈា នី និយាយថា លោកពិតជាអស់សង្ឃឹមចំពោះរបាយការណ៍ចេញដោយ លោក យិន ម៉េងលី ដែលរកឃើញថា រូបលោកបានប្រើសិទ្ធិក្នុងតួនាទីជាមេឃុំ ទៅរំលោភយកដីពីប្រជាពលរដ្ឋទាំងបំពាន ក្រោមគោលនយោបាយសម្បទានដីសង្គមកិច្ចនោះ។ លោកចាត់ទុកថា របាយការណ៍ដែលចេញដោយសមាគមអាដហុក នេះ គឺផ្ទុយទាំងស្រុងខុសពីការពិត ហើយលោកស្នើឲ្យបកស្រាយជាចាំបាច់៖ «ខ្ញុំ សោកស្ដាយមួយអង្គការអាដហុក។ លោកបំភ្លឺក្នុងនេះក៏មិនមានន័យថាច្បាស់លាស់ដែរ។ លោកកាន់រឿងបឹងប្រាំ តាំងពីដើរលូនគុម្ពឫស្សី។ ដើរតត្រុកៗក្រោមគុម្ពឫស្សី មើលមិនឃើញមេឃទេ ហេតុអីបានលោកថាបឹងប្រាំ អនុវត្តគោលនយោបាយដីសម្បទានសង្គមកិច្ច មកយកដីប្រជាពលរដ្ឋស្រឡះស្រេច។ លោកផ្ទាល់ដើរតត្រុកកាលពីខ្ញុំជាប់ពន្ធនាគារ ដើរលុយទឹកដើរក្រោមគុម្ពឫស្សី។»
ឆ្លើយតបនឹងការព្រមានចាត់វិធានការតាមច្បាប់របស់ លោក ឈា នី មេឃុំបឹងប្រាំ ប្រឆាំងការចោទប្រកាន់នេះ លោក ជា ជីវ បង្ហាញស្នាមញញឹមបន្តិចមុននឹងឆ្លើយសំណួរ ដោយលោកអះអាងថា សមាជិកក្រុមប្រឹក្សាខេត្តទាំងបីរូប ស្វាគមន៍ជានិច្ចប្រសិនបើ លោក ឈា នី ពិតជាហ៊ានប្ដឹងពិតមែន។ ប៉ុន្តែលោកពុំមានជំនឿសោះឡើយថា មេឃុំបឹងប្រាំ មកពីគណបក្សប្រជាជនកម្ពុជា អាចនឹងប្ដឹងប្រឆាំងរូបលោក និងសមាជិកដទៃទៀត ព្រោះមានភស្តុតាងច្រើនណាស់ដែលរកឃើញថា លោក ឈា នី ពិតជាមានកំហុសក្នុងរឿងសម្បទានដីសង្គមកិច្ចនេះ៖ «យើងមាន របាយការណ៍ពីប្រជាពលរដ្ឋចំនួន ៤៤៤គ្រួសារ បានផ្ដល់ថវិកាជូនគាត់ ក្នុងការទិញដីសម្បទានសង្គមកិច្ចពីរដ្ឋ ដែលផ្ដល់លទ្ធភាពជូនលោកមេឃុំ។»
ដោយឡែកអ្នកសម្របសម្រួលសមាគមអាដហុក លោក យិន ម៉េងលី ឯណេះវិញ អះអាងថា សមាគមអាដហុក មានសំណុំរឿងគ្រប់គ្រាន់នៅក្នុងដៃ ពាក់ព័ន្ធនឹងករណីប្រព្រឹត្តអំពើពុករលួយក្នុងការដាក់បន្ទុក ប្រឆាំង លោក ឈា នី ប្រសិនបើមេឃុំបឹងប្រាំ កើតទុក្ខមិនសុខចិត្ត ហើយប្រើប្រាស់ប្រព័ន្ធតុលាការ ដើម្បីរកខុសត្រូវ។ លោកបញ្ជាក់ទៀតថា ជំហររបស់សមាគមអាដហុក នៅតែប្រកាន់គោលការណ៍របស់ខ្លួនដូចមុនដដែល ក្នុងការស្វែងរកយុត្តិធម៌សម្រាប់អ្នករងគ្រោះ៖ «អាដហុក បានទទួលបានឯកសារលាយលក្ខណ៍អក្សរ ១លាន ២លានរៀល រាប់រយគ្រួសារ ដែលយើងសរុប ដែលយើងសរុបទៅរាប់ម៉ឺនរាប់សែនលានរៀលឯណោះ។ នេះខ្ញុំបានទទួលជាលាយលក្ខណ៍អក្សរ ហើយយើងមានសាក្សីថែមទៀត ប្រសិនបើគាត់ចង់បាន។»
គិតមកដល់ពេលនេះ ភាគីពាក់ព័ន្ធនៅក្នុងជម្លោះហាក់បានឃ្លាតឆ្ងាយបន្តិចពីសង្វៀន ទំនាស់រឿងដីធ្លី។ ចំណែករលកទីពីរនេះ ភាគីនីមួយៗសុទ្ធតែចង់រកកន្លែងកណ្ដាល ដើម្បីដេករៀងៗខ្លួន។ នៅក្នុងសំណុំរឿងដីធ្លីហាក់កប់ទៅវិញ ប៉ុន្តែរឿងទីពីរថ្មីបានកើតឡើងជំនួសវិញម្តង គឺតួអង្គក្រៅឆាកឯណេះទៅវិញ ត្រូវរងសម្ពាធតាមផ្លូវតុលាការ ដោយរួមទាំងបុគ្គលិកផ្នែកសិទ្ធិមនុស្ស និងមន្ត្រីបក្សប្រឆាំងផង៕
No comments:
Post a Comment