ប្រជាសហគមន៍ នៅកំពត ទាមទារ ឲ្យមាន វេទិកា សាធារណៈ ស្ដីពី បទល្មើស នេសាទសមុទ្រ
RFA / វិទ្យុ អាស៊ី សេរី | ២០ កញ្ញា ២០១៤
អង្គការ ការពារ ធនធាន ជលផល តំបន់ឆ្នេរ សំណូមពរ ឲ្យអាជ្ញាធរ ខេត្តកំពត បើកវេទិកា សាធារណៈ បង្ការទប់ស្កាត់ បទល្មើស នេសាទ ដើម្បី បង្រៀនអ្នកនេសាទ កុំឲ្យប្រើ ឧបករណ៍ ខុសច្បាប់ បំផ្លាញធនធាន សមុទ្រ ក្នុងតំបន់ ទឹករាក់ និងបញ្ចៀស មិនឲ្យ កើតមាន វិវាទ ជាថ្មីទៀត។
ប្រជាសហគមន៍ នេសាទ ដូនតោក ខេត្តកំពត ទាមទារ ឲ្យមាន វេទិកាសាធារណៈ ខណៈ បទល្មើស នេសាទសមុទ្រ នៅតែ កើនឡើង បើ ធៀបនឹងឆ្នាំ ២០១៣។
តំណាង សហគមន៍ នេសាទ ដូនតោក លោក ហាត់ ការីម ឲ្យដឹង ថា, ពីមួយខែ ទៅមួយខែ បទល្មើស នេសាទ ដោយប្រើ ឧបករណ៍ អូសគូ ដោយជនជាតិ វៀតណាម និងបទល្មើស ប្រើឧបករណ៍ ឆក់ ដោយជនជាតិ ខ្មែរ មកពីខេត្ត កែប នៅតែ កើតមាន ឥតឈប់ឈរ នៅដែនសមុទ្រ ទឹករាក់ ក្នុងសហគមន៍ ដូនតោក។ លោក បន្តថា, ដោយសារតែ សហគមន៍ ដូនតោក ចេញមុខបង្ក្រាប បទល្មើស ញឹកញាប់ ទើប នៅសប្ដាហ៍មុន អ្នកនេសាទ មកពីខេត្ត កែប ដែលប្រើ ឧបករណ៍ឆក់ ក្នុងដែនសមុទ្រ ទឹករាក់ ប្ដឹងចោទ សហគមន៍ ពួកគាត់ ពីបទប្លន់ ទៅវិញ។ មូលហេតុនេះ ទើប សហគមន៍ ដូនតោក ស្នើសុំ ឲ្យអាជ្ញាធរ ខេត្ត និងខណ្ឌ រដ្ឋបាល ជលផល បង្កើតវេទិកា សាធារណៈ ជជែក ពីបទល្មើស នេសាទសមុទ្រ៖ «យើង មានភស្តុតាង។ យើង យកកូនដៃ និងតៃកុង យកមក។ គាត់ សារភាព ថា, គាត់ ដាក់ឆក់មែន ព្រោះអី ខ្ញុំ ដាក់ចាប់គាត់ នៅកន្លែងហ្នឹង, គឺ ទូកហ្នឹង បានដាក់ ឆក់មែន។ យើង ក៏មិនមែន ចាប់គេ មកវាយដំ គេដែរ។ យើង គ្រាន់តែ ចាប់មក យើង ប្រគល់ ឲ្យជំនាញគេ ដោះស្រាយទៅ។»
លោក ហាត់ ការីម បន្តថា, នៅក្នុងឆ្នាំ ២០១៤ សហគមន៍ នេសាទ ដូនតោក បង្ក្រាបបាន ទូកអូសគូ វៀតណាម និងទូកខ្មែរ ប្រើឧបករណ៍ ឆក់ បាន១០គ្រឿង, ប៉ុន្តែ អាជ្ញាធរ មានសមត្ថកិច្ច នៅខេត្ត កំពត បានដោះលែង ក្រោយពីអប់រំ និងពិន័យ ជាប្រាក់៖ «បង្ក្រាបបាន ៦-៧ ករណីហើយ, ហើយ ទូកអូសគូ ៣គូហើយ, ទូកឆក់ ៥-៦ គ្រឿងហើយ។»
អ្នកសម្របសម្រួល គម្រោង របស់ អង្គការ សម្ព័ន្ធភាព ដើម្បី អភិរក្សធនធាន ជលផល នៅតំបន់ឆ្នេរ លោក ហួត ស៊ីណាត ឲ្យដឹង ថា, ដោយសារតែ បទល្មើស នេសាទ នៅឆ្នាំ២០១៤ នៅតែ កើនឡើង បើ ធៀបនឹងឆ្នាំ ២០១៣, គឺ លើសជាង ១០ករណី, បើ គិតក្នុងរយៈពេល ដូចគ្នា។ លោក បន្តថា, ការបង្កើត វេទិកា សាធារណៈ នឹងអាច ឲ្យអាជ្ញាធរ ខេត្ត និងសមត្ថកិច្ច ពាក់ព័ន្ធ ចូលរួម ដោះស្រាយបញ្ហា ដែលប្រជានេសាទ កំពុងជួបប្រទះ៖ «បទល្មើស នេសាទ នៅសហគមន៍ ដូនតោកហ្នឹង, វា កើតឡើង ជាញឹកញាប់ ទាំងទូក អូសគូ របស់ ជនជាតិ វៀតណាម, ហើយ និងទូកឆក់ របស់ ខ្មែរយើង មកពីខាង ព្រែកតានេន ខាងខេត្ត កែប, ឃើញមកឆក់ ជាញឹកញាប់, ហើយ ឆក់ នៅពេល ថ្ងៃទៀត។ ហើយ ថ្មីៗនេះ គឺ មានអភិបាល ក្រុង ខេត្តកំពត, គាត់ បានចុះទៅ ដូនតោកហ្នឹង ជាមួយ ខាងអង្គការ សម្ព័ន្ធភាព ដើម្បី អភិរក្សធនធាន ជលផល។ មានខ្ញុំផ្ទាល់, ហើយ មាន លោក ស សារិន ដែលជានាយខណ្ឌ រដ្ឋបាល ជលផល កំពត ហ្នឹង ចុះទៅ សម្របសម្រួល ក្នុងការដោះស្រាយ បញ្ហាបទល្មើស នេសាទហ្នឹង។ ហើយ យើង បានឯកភាពគ្នា ថា, យើង នឹងធ្វើវេទិកា សាធារណៈមួយ សម្របសម្រួល ដោយលោក អភិបាលខេត្ត កំពត។ វេទិកា សាធារណៈ មិនទាន់ បានធ្វើទេ, ប៉ុន្តែ ករណី បទល្មើស នេសាទហ្នឹង, វា កើតឡើង ជាបន្តបន្ទាប់។ ប៉ុន្តែ ដំណោះស្រាយ វា មិនជាដុំ កំភួនទេ, ប៉ុន្តែ គ្រាន់ថា, បានឯកភាពគ្នា ដើម្បី ដោះស្រាយ ជូនប្រជាជន។»
វិទ្យុអាស៊ីសេរី ព្យាយាមទាក់ទង លោក ស សារិន មន្ត្រីខណ្ឌរដ្ឋបាលជលផល និងអភិបាលខេត្តកំពត លោក ឃួយ ឃុនហូរ ប៉ុន្តែលោកមិនលើកទូរស័ព្ទ។
ចំណែកក្រុមប្រឹក្សាខេត្តកំពត អ្នកស្រី សំ ចរិយា ថ្លែងថា នឹងលើកសំណើរបស់អង្គការ និងសហគមន៍នេះជូននៅក្នុងកិច្ចប្រជុំប្រចាំខែតុលា ដើម្បីសុំឲ្យអភិបាលខេត្តពិចារណាឲ្យមានវេទិកាសាធារណៈនេះកើតឡើង។
លោក ហួត ស៊ីណាត មន្ត្រីអង្គការសម្ព័ន្ធភាព ដើម្បីអភិរក្សធនធានជលផលនៅតំបន់ឆ្នេរ ឲ្យដឹងថា នៅឆ្នាំ២០១៤ មិនមានព័ត៌មានបាញ់សម្លាប់អ្នកនេសាទខ្មែរ ដែលចូលនេសាទរំលោភដែននេសាទវៀតណាម នៅឡើយ។ មន្ត្រីដដែលឲ្យដឹងថា កាលពីឆ្នាំ២០១១ អ្នកនេសាទកម្ពុជា ៦នាក់ ត្រូវជនជាតិវៀតណាម បាញ់ឲ្យរបួស៕
No comments:
Post a Comment