Paris Peace Accords 23 Oct. 1991

Saturday, September 20, 2014

បក្ស​ប្រជាជន ​បដិសេធ​ ដាក់​ស្ថាប័ន​ រដ្ឋាភិបាល​ ឲ្យ​នៅ​ដាច់ ​ពី​បក្ស​នយោបាយ | CPP rejects calls for administrative institutions to be separate from political parties

បក្ស​ប្រជាជន ​បដិសេធ​ ដាក់​ស្ថាប័ន​ រដ្ឋាភិបាល​ ឲ្យ​នៅ​ដាច់ ​ពី​បក្ស​នយោបាយ

RFA / ​វិទ្យុ ​អាស៊ី សេរី | ២០ កញ្ញា ២០១៤

អង្គភាព​ប្រឆាំង​អំពើ​ពុក​រលួយ ៦១០
៣-ធ្នូ-២០១៣៖ អង្គភាព ​ប្រឆាំង ​អំពើ​ ពុក​រលួយ។  RFA/Vann Vichar

គណបក្ស ​ប្រជាជន ​កម្ពុជា បាន​ចេញ​ លិខិត​មួយ​ ឆ្លើយ​តប ​នឹង​ក្រុម​អង្គការ ​សង្គម​ស៊ីវិល ​ថា, គេ​ មិន​អាច​ ដាក់​ស្ថាប័ន ​រាជ​រដ្ឋាភិបាល, អាជ្ញាធរ ​ជាតិ​ សវនកម្ម, និង​អង្គភាព ​ប្រឆាំង ​អំពើ​ ពុក​រលួយ ឲ្យ​​នៅ​ដាច់ ​ពី​គណបក្ស ​នយោបាយ ​បាន​ទេ ដោយ​ចាត់​ទុក ​ថា, ការ​រៀបចំ​ បែប​នេះ​ ជា​ការ​ហាម​ឃាត់ ​មន្ត្រី នៃ​ស្ថាប័ន​ ទាំង​នោះ មិនឲ្យ​​ធ្វើ​ នយោបាយ។

ការ​ឆ្លើយ​តប​នេះ គឺ​ បន្ទាប់​ ពី​ក្រុម​ការងារ ​អង្គការ​ សង្គម​ស៊ីវិល​ ជាតិ និង​អន្តរជាតិ ​ប្រមាណ ១៦០ នាំ​មុខ​ ដោយ​គណៈកម្មាធិការ​ សហប្រតិបត្តិការ ​ដើម្បី​កម្ពុជា កាល​ពី​ថ្ងៃ ​ទី​១០ កញ្ញា បាន​ដាក់​ អនុសាសន៍ ​ចំនួន ១២​ចំណុច ដើម្បី ​ឲ្យ​គណបក្ស​ ទាំង​ពីរ ​ដែល​មាន​អាសនៈ ​ក្នុង​សភា ធានា​ ឲ្យ​បាន​ នូវ​ប្រសិទ្ធភាព​ ការ​អនុវត្ត​ របៀបវារៈ ​អភិវឌ្ឍ​ជាតិ ​ក្នុង​អាណត្តិ​ ទី​៥។

ក្រុម​អង្គការ​ មិន​មែន ​រដ្ឋាភិបាល ពន្យល់​តប ​ទៅ​គណបក្ស​ ប្រជាជន ​កម្ពុជា​វិញ ​ថា, អនុសាសន៍ ​ពួក​គេ ​លើក​ឡើង គឺ​ ចង់​បាន ​ឲ្យ​ស្ថាប័ន ​រដ្ឋាភិបាល ​សំខាន់ៗ​ ទាំង​នោះ ត្រូវ ​នៅ​ឯករាជ្យ មិន​ឋិត​ក្រោម ​ឥទ្ធិពល ​គណបក្ស ​នយោបាយ​នានា។

ក្នុង​លិខិត​ ឆ្លើយ​តប ​របស់ ​ក្រុម​អង្គការ​ សង្គម​ស៊ីវិល ចុះ​ថ្ងៃ​ ទី​១៨ ខែ​កញ្ញា ផ្ញើ​ទៅ​គណបក្ស ​ប្រជាជន​ កម្ពុជា លើក​ឡើង​ ថា, ក្នុង​សំណើ​ របស់​ ក្រុម​នេះ គឺ ​ចង់​ឲ្យ​កង​កម្លាំង ​ប្រដាប់​អាវុធ, អាជ្ញាធរ​ ជាតិ,​ សវនកម្ម, និង​អង្គភាព ​ប្រឆាំង​ អំពើ​ ពុក​រលួយ ដែល​ជា​ស្ថាប័ន ​ជាតិ​ សំខាន់ គួរ​តែ ​ត្រូវ​បាន​ដាក់ ​ដោយ​ឡែក ​ពី​ឥទ្ធិពល​ គណបក្ស​ នយោបាយ​នានា។

នាយក​ប្រតិបត្តិ ​នៃ​គណៈកម្មាធិការ​ សហប្រតិបត្តិការ ​ដើម្បី​កម្ពុជា ហៅ​កាត់​ថា ស៊ីស៊ីស៊ី (CCC) លោក សឿង សារឿន មាន​ប្រសាសន៍​ នៅ​រសៀល ​ថ្ងៃ​ ទី​១៩ ខែ​កញ្ញា ថា, ក្នុង​លិខិត​ ឆ្លើយ​តប ​របស់​ គណបក្ស ​ប្រជាជន​ កម្ពុជានោះ ហាក់​បាន ​វាយ​តម្លៃ​ ខុស​គ្នា ពី​អត្ថន័យ ​ដែល​សង្គម​ស៊ីវិល​ លើក​ឡើង។  លោក បន្ត​ថា, សង្គម​ស៊ីវិល ​ពុំ​មាន​បំណង ​លើក​ឡើង ​ពី​ការ​រៀបចំ ដែល​ធ្វើ​ ឲ្យ​ប៉ះពាល់​សិទ្ធិ ​នយោបាយ ​របស់​ ពលរដ្ឋ​ណា ​ម្នាក់​ឡើយ។

អនុសាសន៍​ ដែល​ក្រុម​ការងារ ​អង្គការ ​សង្គម​ស៊ីវិល ​ផ្តល់​ឲ្យ​ គណបក្ស​ នយោបាយ កាល​ពី​ថ្ងៃ​ ទី​១០ កញ្ញា ក៏​បាន ​លើក​ឡើង ​ពី​ប្រសិទ្ធភាព ​នៃ​កំណែ​ទម្រង់ ​គណៈកម្មាធិការ​ ជាតិ ​រៀបចំ​ ការ​បោះ​ឆ្នោត, រដ្ឋសភា, ស្ថាប័ន​រដ្ឋាភិបាល, តម្លាភាព ​ក្នុង​តួនាទី និង​ដំណើរ​ការ ​នៃ​ស្ថាប័ន ​នីតិប្បញ្ញត្តិ, ការ​ធានា​ ការ​បែង​ចែក​ អំណាច​ សំខាន់ៗ​ ទាំង​៣ គឺ ​ស្ថាប័ន​ នីតិប្បញ្ញត្តិ, នីតិប្រតិបត្តិ, និង​តុលាការ។  ពួក​គេ ​ស្នើ​ឲ្យ ​លើក​ទឹក​ចិត្ត​ ការ​ចូលរួម ​របស់ ​សង្គម​ស៊ីវិល និង​ពលរដ្ឋ ក្នុង​ដំណើរ​ការ​ អភិវឌ្ឍ ​គោល​នយោបាយ ​ជាតិ, ការ​បង្កើត​ គោល​នយោបាយ ​ប្រាក់​ឈ្នួល ​អប្បបរមា​ សម្រាប់ ​មន្ត្រី និង​បុគ្គលិក ​សាធារណៈ, ការ​ធានា ​គុណភាព និង​សេវា ​សាធារណៈ, ការ​លើក​កម្ពស់​ គណនេយ្យ​ភាព និង​អភិបាល​ កិច្ច​ល្អ, ការ​ការពារ​ សិទ្ធិ​មនុស្ស, និង​ការ​លើក​កម្ពស់ ​ការ​ការពារ​ បរិស្ថាន ជាដើម។

ភ្លាមៗ​នោះ អ្នក​នាំ​ពាក្យ ​គណបក្ស​ សង្គ្រោះ​ជាតិ បាន​ឆ្លើយ​តប​ ភ្លាមៗ​ ថា, សមាជិក​ សភា​ គណបក្ស​នេះ នឹង​ព្យាយាម​ អនុវត្ត​ ឲ្យ​បាន ​តាម​ការ​ស្នើ​សុំ។  ចំណែក ​គណបក្ស​ ប្រជាជន ​កម្ពុជា បាន​ឆ្លើយ​តប​ ទៅ​ក្រុម​អង្គការ ​មិន​មែន ​រដ្ឋាភិបាល​វិញ តាម​រយៈ​លិខិត​ ចុះ​ថ្ងៃ​ ទី​១៥ ខែ​កញ្ញា។  ក្នុង​នោះ ​បញ្ជាក់​ថា, ចំណុច ​ជាច្រើន​ ដែល​ស្នើ​ឡើង គឺ​ មាន​នៅ​ក្នុង​ គោល​នយោបាយ ​របស់​ គណបក្ស​នេះ ​រួច​ហើយ។  រីឯ ​ចំណុច ​មួយ​ចំនួន​ទៀត ដូចជា បញ្ហា​ទាក់ទង​ នឹង​ការ​បោះ​ឆ្នោត, ការ​ដំឡើង​ បៀវត្ស​មន្ត្រី​ រាជការ ​សាធារណៈ, គណបក្ស ​កំពុង​ យក​ចិត្ត​ទុក​ដាក់ ​ដោះស្រាយ។  គណបក្ស​ប្រជាជន​ កម្ពុជា បាន​បញ្ជាក់ទៀត ​ថា, ការ​ដាក់​ស្ថាប័ន ​រាជ​រដ្ឋាភិបាល, អាជ្ញាធរ​ ជាតិ​ សវនកម្ម, និង​អង្គភាព ​ប្រឆាំង​ អំពើ ​ពុក​រលួយ ឲ្យ​នៅ​ដាច់ ​ពី​គណបក្ស​ នយោបាយ​ បាន​ទេ ជា​ការ​ហាម​ឃាត់ ​មន្ត្រី ​នៃ​ស្ថាប័ន​ ទាំង​នោះ​ មិន​ឲ្យ​ធ្វើ ​នយោបាយ ដែល​ប៉ះពាល់​ ដល់​រដ្ឋធម្មនុញ្ញ និង​ច្បាប់ ​បោះ​ឆ្នោត ស្ដីពី​ សិទ្ធិ​នយោបាយ ​របស់ ​ពលរដ្ឋ។

យ៉ាង​ណា នាយក​ប្រតិបត្តិ​នៃ​គណៈកម្មាធិការ​សហប្រតិបត្តិការ ដើម្បី​កម្ពុជា ស៊ីស៊ីស៊ី លោក សឿង សារឿន លើក​ឡើង​ថា ការ​ឆ្លើយ​តប​នេះ គឺ​ជា​សញ្ញា​ល្អ​មួយ​ក្នុង​ភាព​ជា​ដៃគូ។

សង្គម​ស៊ីវិល​សង្ឃឹម​ដែរ​ថា ពួក​គេ​នឹង​អាច​ដើរ​តួនាទី​សំខាន់​ក្នុង​ការ​គាំទ្រ និង​លើក​កម្ពស់​តម្លាភាព គណនេយ្យ​ភាព ក្នុង​ដំណើរ​ការ​អភិវឌ្ឍ​ប្រទេស​ជាតិ៕



No comments:

Post a Comment