តុលាការ កោះហៅ សហជីព ធំៗ ចំនួន៦ សាកសួរ ពាក់ព័ន្ធ នឹងហិង្សា ពេលទាមទារ ប្រាក់ឈ្នួលកម្មករ
VOD | 2 កញ្ញា 2014
សាលាដំបូង រាជធានីភ្នំពេញ កោះហៅ មេដឹកនាំ សហជីព ចំនួន ៦ ឲ្យចូលបំភ្លឺ នៅពេល ខាងមុខនេះ ពាក់ព័ន្ធ នឹងហិង្សា ដែលកើតឡើង កាលពីពេល កម្មករ តវ៉ា ទាមទារ ដំឡើងប្រាក់ឈ្នួល តាំងពីចុងឆ្នាំ ២០១៣ និងដើមឆ្នាំ ២០១៤។ដីកាបង្គាប់ ឲ្យចូលបំភ្លឺ ចុះហត្ថលេខា ដោយចៅក្រម ស៊ើបសួរ សាលាដំបូង រាជធានីភ្នំពេញ លោក ជា សុខហៀង ឲ្យដឹងថា, ចោទប្រកាន់ លើឈ្មោះ ប៉ាវ ស៊ីណា ប្រធាន សម្ព័ន្ធសហជីព ចលនាកម្មករ ពីបទប្រើហិង្សា ដោយចេតនា, ស្ថានទម្ងន់ទោស ធ្វើឲ្យខូចខាត ដោយចេតនា, ស្ថានទម្ងន់ទោស គំរាមកំហែង ថា នឹងធ្វើ ឲ្យខូចខាត ដែលភ្ជាប់ នូវបញ្ហាអ្វីមួយ, និងប្រើមធ្យោបាយ ដើម្បី ជាឧបសគ្គ ដល់ចរាចរណ៍ សាធារណៈ។ ដីកា បន្តថា, ការចោទប្រកាន់នេះ ពាក់ព័ន្ធ នឹងករណីហិង្សា ប្រព្រឹត្តនៅចំណុច មុខសួន ឧស្សាហកម្ម កាណាឌីយ៉ា ផ្លូវ វ៉េងស្រេង, ភូមិ ត្រពាំងថ្លឹង, សង្កាត់ ចោមចៅ, ខណ្ឌ ពោធិ៍សែនជ័យ កាលពីថ្ងៃ ទី២៥ ខែធ្នូ ឆ្នាំ២០១៣ រហូត ដល់ថ្ងៃ ទី៣ មករា ឆ្នាំ២០១៤ តាមមាត្រា ២១៨, ៤១១, ៤២៤ នៃក្រមព្រហ្មទណ្ឌ និងមាត្រា ៧៨ នៃច្បាប់ចរាចរណ៍ ផ្លូវគោក។
លោក ប៉ាវ ស៊ីណា នឹងត្រូវ ចូលបំភ្លឺ នៅវេលា ម៉ោង៨ និង៣០ នាទី ព្រឹកថ្ងៃ ទី១២ ខែកញ្ញា ឆ្នាំ២០១៤។ តាមការសាកសួរ សហជីព ទាំង៦ ដែលត្រូវ បានកោះហៅនោះ រួមមាន៖ ទី១, សម្ព័ន្ធសហជីព ប្រជាធិបតេយ្យ កម្មករ កាត់ដេរ របស់លោក អាត់ ធន់; ទី២, សហជីព សេរីកម្មករ នៃព្រះរាជាណាចក្រ កម្ពុជា របស់លោក ជា មុនី; ទី៣, សមាគម គ្រូបង្រៀន កម្ពុជា ឯករាជ្យ លោក រ៉ុង ឈុន; ទី៤, សម្ព័ន្ធសហជីព ចលនា កម្មករ លោក ប៉ាវ ស៊ីណា; ទី៥, សហព័ន្ធ សហជីព ជាតិ នៃឧស្សាហកម្ម វាយនភ័ណ្ឌ កាត់ដេរ កម្ពុជា របស់ លោកស្រី ម៉ម ញឹម; និងទី៦, សហព័ន្ធ សហជីព កម្ពុជា របស់ លោកស្រី យ៉ាង សោភ័ណ្ឌ។ សហជីព ទាំងនោះ ធ្លាប់ចេញមុខ ពិភាក្សា និងធ្វើ ជាសេចក្តី ថ្លែងការណ៍ ទាមទារ ដំឡើងប្រាក់ឈ្នួល ដល់កម្មករ។
មាត្រា ៧៨ច្បាប់ស្តីពីចរាចរណ៍ផ្លូវគោក ត្រង់ចំណុចការប្រើប្រាស់មធ្យោបាយណាមួយជាឧបសគ្គដល់ចរាចរណ៍សាធារណៈ ឲ្យដឹងថា ជនណាបានប្រើប្រាស់មធ្យោបាយណាមួយ ដើម្បីជាឧបសគ្គ ដល់ចរាចរណ៍សាធារណត្រូវផ្តន្ទាទោសដាក់ពន្ធនាគារ ពីមួយ(១)ខែទៅមួយ(១)ឆ្នាំ ឬ /និងផ្តន្ទាទោសពិន័យជាប្រាក់ពី ម្ភៃម៉ឺន(២០០.០០០) រៀល ទៅពីរលាន(២.០០០.០០០)រៀល។
ការកោះហៅនេះ ធ្វើឡើងបន្ទាប់ពីតំណាងសហព័ន្ធ សហជីព សមាគម និងកម្មករនិយោជិកចម្រុះវិស័យនៅកម្ពុជា ព្រមានធ្វើយុទ្ធនាការទាមទារប្រាក់ឈ្នួលអប្បបរមា១៧៧ដុល្លាជាថ្មី ទៀត។សហជីពគ្រោងស្នើឲ្យមានការតស៊ូមតិ និងយុទ្ធនាការទាមទារដំឡើងប្រាក់ឈ្នួលជាថ្មីម្ដងទៀត និងស្នើឲ្យសហជីពអន្តរជាតិ IndustriAll, ITUC, UNI, CCC និងអង្គភាពពាក់ព័ន្ធដទៃទៀតបន្តធ្វើយុទ្ធនាការលើពិភពលោកទៀតចាប់ ខែកញ្ញា ឆ្នាំ២០១៤តទៅ។
ប្រាក់ឈ្នួលអប្បបរមាបច្ចុប្បន្នដែលកម្មករទទួលបានមានចំនួន១០០ដុល្លារ។
គួររំលឹកថា កាលពីថ្ងៃទី០២ និងទី០៣ ខែមករាកន្លងទៅ កម្មករទាមទារបានបាតុកម្មទាមទារប្រាក់ឈ្នួលគោល១៦០ដុល្លារក្នុង មួយខែ ដែលនាំឲ្យមានការប៉ះទង្គិចគ្នានៅផ្លូវវ៉េងស្រេង បណ្តាលឲ្យមនុស្សយ៉ាងហោចណាស់៥នាក់ស្លាប់ ១៣នាក់ត្រូវចាប់ខ្លួន និងរាប់សិបនាក់រងរបួស៕
No comments:
Post a Comment