អង្គការ ឃ្លាំមើល ពិភពលោក តវ៉ា ទៅអ្នក ផ្ដល់អាជ្ញាប័ណ្ណ ឲ្យក្រុមហ៊ុន វៀតណាម
RFA | ១១ កញ្ញា ២០១៤
សកម្មភាព កាប់បំផ្លាញ ព្រៃឈើ របស់ ក្រុមហ៊ុន វៀតណាម ឈ្មោះ ហ័ង អាញ យ៉ាឡាយ (Hoang Anh Gia Lai) នៅកម្ពុជា ក្នុងអំឡុងឆ្នាំ ២០១៣។ Global Witness Photo
អង្គការ ឃ្លាំមើល ពិភពលោក (Global Witness) ដាក់ពាក្យ តវ៉ា មួយ ទៅក្រុមហ៊ុន ផ្ដល់ប័ណ្ណ ទទួលស្គាល់ ក្រុមហ៊ុន ដែលចេះថែ រក្សាព្រៃឈើល្អ ឈ្មោះ ហ្វ័រ៉េស ស្ទេវដស៊ីប ខនស៊ីល (Forest Stewardship Council) ដើម្បី ឲ្យពិនិត្យ ឡើងវិញ, ជុំវិញ ការទទួលស្គាល់ ក្រុមហ៊ុន កៅស៊ូ វៀតណាម ឈ្មោះ វៀតណាម រ៉ាប់ប៊ឺ ហ្គ្រុប (Vietnam Rubber Group)។
អង្គការឃ្លាំមើលពិភពលោក រកឃើញថា ក្រុមហ៊ុនកៅស៊ូវៀតណាម ពាក់ព័ន្ធនឹងការបំផ្លាញព្រៃឈើនៅកម្ពុជា និងឡាវ ហើយថា ក្រុមហ៊ុនកៅស៊ូវៀតណាម មិនមែនជាក្រុមហ៊ុនចេះគ្រប់គ្រងព្រៃឈើនិងការពារសិទ្ធិជនជាតិដើម ភាគតិចដែលជាម្ចាស់ព្រៃឈើឡើយ។
មន្ត្រីតស៊ូមតិអង្គការ Global Witness អ្នកស្រី អាលី ហ៊ីនស៍ (Ali Hines) បញ្ជាក់ថា ក្រុមហ៊ុនកៅស៊ូវៀតណាម ឈ្មោះ វៀតណាម រ៉ាប់ប៊ឺ ហ្គ្រុប ដែលទទួលបានដីសម្បទានសេដ្ឋកិច្ចដើម្បីដាំដើមកៅស៊ូទំហំ ១.៥សែនហិកតារនៅកម្ពុជា មានការពាក់ព័ន្ធនឹងការទន្ទ្រានយកដីជនជាតិដើមភាពតិច និងបំផ្លិចបំផ្លាញព្រៃឈើដែលមិនត្រូវទទួលបានប័ណ្ណទទួលស្គាល់ជា ក្រុមហ៊ុនមានការទទួលខុសត្រូវចំពោះព្រៃឈើ និងសិទ្ធិជនជាតិដើមភាគតិចឡើយ។
ក្រុមហ៊ុន ហ្វ័រ៉េស ស្ទេវដស៊ីប ខនស៊ីល ជាក្រុមហ៊ុនផ្តល់ប័ណ្ណទទួលស្គាល់ចំពោះក្រុមហ៊ុនដែលមានផលិតផលធ្វើ ពីឈើ ពីប្រេងដូង និងកៅស៊ូ ដែលគោរពគោលការណ៍ថែរក្សាសង្គម និងបរិស្ថាន។ ប័ណ្ណទទួលស្គាល់នេះ មិនចេញទៅឲ្យក្រុមហ៊ុនណាពាក់ព័ន្ធនឹងការកាប់ព្រៃឈើខុសច្បាប់ រំលោភសិទ្ធិមនុស្ស និងបំផ្លាញទ្រព្យសម្បត្តិធម្មជាតិឡើយ។ ក្រុមហ៊ុននេះ បានទទួលស្គាល់ក្រុមហ៊ុនហ្វ័រ៉េស ស្ទេវដស៊ីប ខនស៊ីល កាលពីឆ្នាំ២០០៧ ប៉ុន្តែបានដកប័ណ្ណនេះឡើងវិញកាលពីខែឧសភា ឆ្នាំ២០១៣ ក្រោយពីមានរបាយការណ៍ថា ក្រុមហ៊ុនវៀតណាមមួយនេះ ពាក់ព័ន្ធនឹងការកាប់បំផ្លាញព្រៃឈើ និងយកដីពលរដ្ឋ។
អ្នកស្រី អាលី ហ៊ីនស៍ បន្តទៀតថា ពាក្យបណ្ដឹងនេះធ្វើឡើងបន្ទាប់ពីក្រុមប្រឹក្សា ហ្វ័រ៉េស ស្ទេវដស៊ីប ខនស៊ីល បានផ្ដល់ប័ណ្ណទទួលក្រុមហ៊ុនវៀតណាម ឡើងវិញ ក្រោយពេលក្រុមប្រឹក្សានេះបានដកហូតកាលពីខែវិច្ឆិកា ឆ្នាំ២០១៣ បន្ទាប់ពីរកឃើញថា ក្រុមហ៊ុនវៀតណាម ពាក់ព័ន្ធនឹងការរំលោភយកដី និងបំផ្លាញបរិស្ថាននៅកម្ពុជា និងឡាវ។
អ្នកស្រី អាលី ហ៊ីនស៍៖ «យើងបានតវ៉ាទៅក្រុមប្រឹក្សា ហ្វ័រ៉េស ស្ទេវដស៊ីប ខនស៊ីល បន្ទាប់ពីក្រុមហ៊ុនវៀតណាម ត្រូវបានទទួលស្គាល់ឡើងវិញ។ អង្គការឃ្លាំមើលពិភពលោកបានសិក្សាឃើញថា ក្រុមហ៊ុនវៀតណាមពាក់ព័ន្ធនឹងការទន្ទ្រានយកដីសហគមន៍ និងបំផ្លាញព្រៃឈើ។ ខ្ញុំចង់បង្ហាញចំណុចសំខាន់ខ្លះៗនៃបញ្ហានេះ គឺក្រុមហ៊ុនកៅស៊ូវៀតណាម នៅកម្ពុជា ទទួលបានដីសម្បទាន ១.៥សែនហិកតារ។ ផ្ទៃដីនេះមានទំហំធំជាងទីក្រុងឡុងដុង ប្រទេសអង់គ្លេស និងទីក្រុងម៉ានីល ប្រទេសហ្វីលីពីន។ ក្រុមហ៊ុននេះក៏ទទួលបានដីទំហំ ១ម៉ឺន៩ពាន់ហិកតារនៅប្រទេសឡាវ ដែរ។»
អ្នកស្រី អាលី ហ៊ីនស៍ បន្តទៀតថា ក្រៅពីទន្ទ្រានយកដីពលរដ្ឋនិងបំផ្លាញព្រៃឈើរំលោភសិទ្ធិមនុស្ស ក្រុមហ៊ុនវៀតណាមនេះ ក៏បានរំលោភច្បាប់កម្ពុជា ផងដែរ។ មន្ត្រីជាន់ខ្ពស់រដ្ឋាភិបាលក៏ជាប់ពាក់ព័ន្ធនឹងបំពានច្បាប់ ហើយថែមទាំងមិនអនុវត្តច្បាប់ផងដែរ។
មន្ត្រីសម្របសម្រួលសមាគមការពារសិទ្ធិមនុស្សអាដហុក (Adhoc) ខេត្តរតនគិរី លោក ឆាយ ធី មានប្រសាសន៍ថា បច្ចុប្បន្នក្រុមហ៊ុនវៀតណាម ចំនួន ៥ បន្តមានវត្តមាននៅខេត្តរតនគិរី ប៉ុន្តែក្រុមហ៊ុនទាំងនោះបានផ្អាកកាប់ព្រៃឈើហើយក្នុងរដូវភ្លៀង នេះ។ លោកបន្តថា កម្មករក្រុមហ៊ុនបានដាំដើមកៅស៊ូ និងដាំដើមដូងប្រេង ប៉ុន្តែលោកមិនទាន់ដឹងអំពីផែនការក្រុមហ៊ុននៅរដូវប្រាំងនៅឡើយទេ។
លោក ឆាយ ធី ក៏ស្នើសុំឲ្យក្រុមហ៊ុន ហ្វ័រ៉េស ស្ទេវដស៊ីប ខនស៊ីល ពិនិត្យឡើងវិញចំពោះការចេញប័ណ្ណទទួលស្គាល់ក្រុមហ៊ុនវៀតណាម៖ «ស្ថាប័ន ដែលគាំទ្រ ដូចខាងធនាគារពិភពលោកក្ដី អ្នកដែលទទួលស្គាល់អាជ្ញាប័ណ្ណនាំចេញកៅស៊ូរបស់ (ក្រុមហ៊ុន) ហ័ង អាញ យ៉ាឡាយ ហ្នឹង ត្រូវតែស៊ើបអង្កេត និងទប់ស្កាត់ ដើម្បីឲ្យក្រុមហ៊ុននេះមានការផ្លាស់ប្ដូរ ងាកមកគោរពសិទ្ធិមនុស្ស។»
កាលពីថ្ងៃទី១៣ ខែឧសភា ឆ្នាំ២០១៣ អង្គការឃ្លាំមើលពិភពលោក បានផ្សាយរបាយការណ៍មួយមានចំណងជើងថា រ៉ាប់ប៊ឺ ប៊ែរ៉ន (Rubber Barons) បង្ហាញពីសកម្មភាពបំពានច្បាប់ជាតិ បំផ្លាញធនធានធម្មជាតិ និងរំលោភសិទ្ធិមនុស្សនៅកម្ពុជា និងប្រទេសឡាវ ដោយក្រុមហ៊ុនដំណាំកៅស៊ូវៀតណាម ធំៗពីរ គឺក្រុមហ៊ុនឯកជន ហ័ង អាញ់ យ៉ាឡាយ (Hoang Anh Gia Lai) និងក្រុមហ៊ុនរដ្ឋវៀតណាម វៀតណាម រ៉ាប់ប៊ឺ ហ្គ្រុប។ ក្រុមហ៊ុនទាំងនោះទទួលបានដីសម្បទាននៅខេត្តក្រចេះ ព្រះវិហារ កំពង់ធំ សៀមរាប រតនគិរី មណ្ឌលគិរី ស្ទឹងត្រែង និងឧត្តរមានជ័យ។
ក្រុមហ៊ុនដាំកៅស៊ូរបស់វៀតណាម ទាំងពីរនេះ បានទទួលប្រាក់កម្ចីពីធនាគារអន្តរជាតិ និងភាគហ៊ុនអន្តរជាតិជាច្រើន រួមមានធនាគារវៀតណាម ឈ្មោះ ដ្រាហ្គ័ន ខេបភីថល (Dragon Capital) ធនាគាររបស់អាល្លឺម៉ង់ ឈ្មោះ ដាត្ឆ ប៊ែង (Dutch Bank) ធនាគារនៃប្រទេសស្វីស ឈ្មោះ ស្វីស ប៊ែង (Swiss Bank) និងសាជីវកម្មហិរញ្ញវត្ថុរបស់ធនាគារពិភពលោក (International Finance Corporation=IFC) ក្រុមហ៊ុននេះនាំកៅស៊ូទៅលក់នៅប្រទេសចិន៕
No comments:
Post a Comment