ក្រសួង សុខាភិបាល ណែនាំ ឲ្យពលរដ្ឋ ប្រយ័ត្ន ចំពោះ ជំងឺឆ្កែឆ្កួត
VOA / វីអូអេ | ២៧ កញ្ញា ២០១៤
ក្រសួង សុខាភិបាល និងអង្គការ សុខភាព ពិភពលោក (WHO) ណែនាំ ឲ្យពលរដ្ឋ ទូទៅ យកចិត្តទុកដាក់ ចូលរួម លុបបំបាត់ ជំងឺ ឆ្កែឆ្កួត។
សេចក្ដីប្រកាស ព័ត៌មាន រួម របស់ នាយកដ្ឋាន ប្រយុទ្ធ នឹងជំងឺឆ្លង របស់ ក្រសួង សុខាភិបាល និងអង្គការ សុខភាព ពិភពលោក ផ្សព្វផ្សាយ នៅថ្ងៃ ទី២៦ ខែកញ្ញា ឲ្យដឹង ថា, នៅកម្ពុជា ជំងឺឆ្កែឆ្កួត កំពុង គំរាមកំហែង អាយុជីវិត ពលរដ្ឋ។ ស្ថាប័ន ទាំងពីរ បញ្ជាក់ថា, មានតែ ការចាក់ថ្នាំ បង្ការ ឬវ៉ាក់សាំងទេ ទើប អាចលុបបំបាត់ ជំងឺនេះបាន។
លោក វេជ្ជបណ្ឌិត លី សុវណ្ណ អនុប្រធាន នាយកដ្ឋាន ប្រយុទ្ធ នឹងជំងឺឆ្លង លើកឡើង ថា, ជំងឺឆ្កែឆ្កួត នៅតែ គំរាមកំហែង ធ្ងន់ធ្ងរ ដល់សុខភាព ពលរដ្ឋ កម្ពុជា, ហើយ ភាគច្រើន បណ្ដាល ឲ្យស្លាប់, ដ្បិត ពុំមានថ្នាំ ព្យាបាលទេ នៅពេលជំងឺនេះ ចេញរោគសញ្ញា។ លោក ណែនាំ ឲ្យពលរដ្ឋ ចាក់ថ្នាំបង្ការ ជំងឺនេះ ដែលអាច ធ្វើបាន ទាំងមុន និងក្រោយ ត្រូវ សត្វខាំ។ លើសពីនេះ គឺ ត្រូវ ចាក់ថ្នាំបង្ការ ជំងឺនេះ ទៅលើសត្វឆ្កែ ដែលជាវិធានការ មានប្រសិទ្ធភាពមួយ។
សេចក្ដីណែនាំនេះ ធ្វើឡើង ស្របពេល ដែលកម្ពុជា នឹងប្រារព្ធ ទិវា ពិភពលោក លុបបំបាត់ ជំងឺឆ្កែឆ្កួត នៅថ្ងៃ ទី២៨ ខែកញ្ញា។
ការស្រាវជ្រាវ កាលពីឆ្នាំ ២០០៧ ឲ្យដឹងថា, មានពលរដ្ឋ ចំនួន ៨០០នាក់ បានស្លាប់ ដោយសារ ជំងឺឆ្កែឆ្កួត។ របាយការណ៍ របស់ អង្គការ សុខភាព ពិភពលោក រកឃើញ ថា, ជំងឺឆ្កែឆ្កួត បានសម្លាប់ មនុស្ស ៥ម៉ឺន ៥ពាន់នាក់។ ក្នុងនោះ ៩០ភាគរយ ជាអ្នករស់នៅ ក្នុងទ្វីបអាស៊ី និងអាហ្វ្រិក៕
No comments:
Post a Comment