ក្រសួងធម្មការ បដិសេធ មិនមាន ការវិនិយោគ ឬលក់ដី ពុទ្ធសាសនបណ្ឌិត្យ
VOD | ១៨ កញ្ញា ២០១៤
ការដ្ឋានផ្លូវក្រោមដីរបស់ក្រុមហ៊ុនណាហ្គាវើល ស្ថិតនៅក្បែរវិទ្យាស្ថានពុទ្ធសាសនបណ្ឌិត្យ (រូបថត៖ Krishan)
ក្រសួង ធម្មការ និងសាសនា បដិសេធ ព័ត៌មាន ពាក់ព័ន្ធ នឹងការលក់ដី វិទ្យាស្ថាន ពុទ្ធសាសនបណ្ឌិត្យ ទៅឲ្យក្រុមហ៊ុន ណាហ្គា វើល។
ប្រតិកម្មនេះ ឆ្លើយតបទៅ នឹងអត្ថបទ ព័ត៌មាន របស់ កាសែត ភ្នំពេញ ប៉ុស្ដិ៍ ដែលបានចុះផ្សាយ កាលពីពុធ ទី១៧ ខែកញ្ញា ឆ្នាំ២០១៤ ដែលផ្សាយ ថា, ក្រុមហ៊ុន ណាហ្គា កំពុងតែ សម្លឹងដី វិទ្យាស្ថាន ពុទ្ធសាសនបណ្ឌិត្យ សម្រាប់ អភិវឌ្ឍ សណ្ឋាគារ ថ្មីមួយ។
កាសែត ភ្នំពេញ ប៉ុស្ដិ៍ បានដកស្រង់ សម្ដីលោក ហ្វីលីព លី (Philip Lee) ប្រធាន ផ្នែកហិរញ្ញវត្ថុ របស់ ក្រុមហ៊ុនណាហ្គា ដែលបានប្រាប់ វិនិយោគិន និងអ្នកវិភាគ ក្នុងអំឡុង សន្និសីទ វីដេអូ កាលពីថ្ងៃ ទី៧ ខែសីហា ថា, ក្រុមហ៊ុននេះ មានផែនការ សាងសង់ ណាហ្គា ៣ ដែលជាសណ្ឋាគារ មិនមាន ប្រតិបត្តិការ លេងល្បែង, ហើយ បើ ទទួលបាន ការយល់ព្រម នឹងធ្វើនៅលើ ទីតាំងវិទ្យាស្ថាន ពុទ្ធសាសនបណ្ឌិត្យ។
កាសែត ភ្នំពេញ ប៉ុស្ដិ៍ បានដកស្រង់សម្ដីលោក ហ្វីលីព លី ថា៖ «ដូច្នេះ យើង កំពុងធ្វើការងារ។ យើង បានស្នើឡើង ដើម្បី សាងសង់ សណ្ឋាគារ ណាហ្គា ៣ នៅទីតាំងនេះ។ អ្នកមើលឃើញនោះ គឺ ជារចនាសម្ព័ន្ធ ពីរ៉ាមីដ, ហើយ នៅខាងឆ្វេង, វា រចនាសម្ព័ន្ធ ពណ៌សនេះ នឹងជាការិយាល័យ ថ្មី របស់ វិទ្យាស្ថាន ពុទ្ធសាសនបណ្ឌិត្យ។»
កាសែត ភ្នំពេញ ប៉ុស្ដិ៍ ក៏បានដកស្រង់ សម្ដីប្រធាន ផ្នែកប្រតិបត្តិការ របស់ ក្រុមហ៊ុន ណាហ្គា វើល លោក ម៉ាគ ប្រោន (Mark Brown) ថា, បច្ចុប្បន្ន ក្រុមហ៊ុន ណាហ្គា កំពុងចរចា ជាមួយ រដ្ឋាភិបាលកម្ពុជា អំពី ដីនៅវិទ្យាស្ថាន ពុទ្ធសាសនបណ្ឌិត្យ នេះ។
សេចក្ដីថ្លែងការណ៍ របស់ ក្រសួងធម្មការ និងសាសានា ចុះថ្ងៃ ទី១៧ ខែកញ្ញា ឆ្នាំ២០១៤ បដិសេធ នឹងព័ត៌មាននេះ, ហើយ ថា, ក្រសួង ពុំដែលមាន គោលការណ៍ គិតគូរ ដល់ការ វិនិយោគ ឬលក់វិទ្យាស្ថាន ពុទ្ធសាសនបណ្ឌិត្យ ដល់ក្រុមហ៊ុន ឯកជន ណាមួយឡើយ, រាប់ទាំង ក្រុមហ៊ុន ណាហ្គាវើល ផងដែរ។ សេចក្ដី ថ្លែងការណ៍ បន្តថា, បច្ចុប្បន្ន វិទ្យាស្ថាន ពុទ្ធសាសនបណ្ឌិត្យ កំពុងដំណើរការ ការងារ ជាប្រក្រតី, ដូចជា បោះពុម្ពផ្សាយ ទស្សនាវដ្ដី កម្ពុជសុរិយា និងអត្ថបទ បោះពុម្ពផ្សាយ ផ្សេងៗ។
សេចក្ដីថ្លែងការណ៍ ឲ្យដឹងទៀត ថា, ក្រៅពីការងា របស់ វិទ្យាស្ថាន, ក្រសួងធម្មការ បានលើកគម្រោង ថវិកាជាតិ ដើម្បី ជួសជុល, កែលម្អ, និងសាងសង់ អគារថ្មី បួន ឬប្រាំជាន់ នៅក្នុងទីតាំងដី វិទ្យាស្ថាន ពុទ្ធសាសនបណ្ឌិត សម្រាប់ រៀបចំ កម្មវិធី នាទីព្រះពុទ្ធសាសនា ផ្សារភ្ជាប់សង្គម, សាល សម្រាប់បណ្ដុះបណ្ដាល អាចារ្យ-អាចរិនី, និងការិយាល័យ ម្រើការងារ ជាដើម។
ព័ត៌មាន នៃការលក់ទិញ វិទ្យាស្ថាន ពុទ្ធសាសនបណ្ឌិត្យនេះ កើតឡើង ខណៈ ក្រុមហ៊ុន ណាហ្គា កំពុងសាងសង់ ផ្លូវ ណាហ្គា Walk តាមបណ្ដោយ មហាវិថី ព្រះសីហនុ មុខវិទ្យាស្ថាននេះ និងកំពុង សាងសង់ ណាហ្គា ២ ដែលធ្វើ ឲ្យវិទ្យាស្ថាន ពុទ្ធសាសនបណ្ឌិត្យ ស្ថិតនៅចំ កណ្ដាល ណាហ្គា និងណាហ្គា ២៕
No comments:
Post a Comment