ក្រសួង ការងារ លក់ពាក្យ ប្រឡងតេស្ដ ភាសាកូរ៉េ បានជាង ៤សែន ដុល្លារ ក្នុង១ថ្ងៃ
RFA / វិទ្យុ អាស៊ី សេរី | ១៦ កញ្ញា ២០១៤
យុវជន ទៅទិញ ពាក្យប្រឡង តេស្ដ ទៅធ្វើការ ស្របច្បាប់ នៅប្រទេស កូរ៉េ នាវិទ្យាស្ថាន ជាតិ ពហុបច្ចេកទេស កម្ពុជា កាលពីថ្ងៃ ទី១៥
ខែកញ្ញា ឆ្នាំ២០១៤។ RFA/Vann Vichar
បច្ចុប្បន្ននេះ យុវជន កម្ពុជា ជាច្រើនម៉ឺននាក់ កំពុងចំណាកស្រុក ទៅធ្វើការងារ ស្របច្បាប់ នៅប្រទេស កូរ៉េ ខាងត្បូង។ ពលករ ដែលអាច ទៅធ្វើការ នៅកូរ៉េ បាន លុះត្រាតែ ពួកគេ ប្រឡងជាប់ តេស្ដ សមត្ថភាព ភាសា កូរ៉េ ជាមុនសិន។
នៅភ្នំពេញឆ្នាំនេះ ក្រសួងការងារ ចែកពាក្យប្រឡង នៅបរិវេណ វិទ្យាស្ថាន ពហុបច្ចេកទេស កម្ពុជា ក្បែរទំនប់ កប់ស្រូវ។ នៅថ្ងៃ ចែកពាក្យ លើកដំបូង គឺ ថ្ងៃទី១៥ កញ្ញា មានយុវជន ប្រមាណ ជាង ២ម៉ឺននាក់ ទៅហើយ ដែលមកទទួល ពាក្យប្រឡងនេះ។
តើ ការចែកពាក្យ និងដាក់ពាក្យ ប្រឡងតេស្ដ ភាសាកូរ៉េ នោះ ប្រព្រឹត្តទៅ ដូចម្តេចខ្លះ?
តាំងពីព្រឹកព្រលឹមម៉ោង៥ នៅមុខកន្លែងចែកពាក្យប្រឡងភាសាកូរ៉េ មានយុវជនជាច្រើននាក់ប្រជ្រៀតគ្នាចាំជាស្រេច។ អ្នកដែលមកមុនរំពឹងថានឹងបានទទួលពាក្យមុន ហើយដាក់ពាក្យក៏បានមុន នឹងអាចប្រឡងនៅជិតទៀតផង។ នៅទីតាំងវិទ្យាស្ថានជាតិពហុបច្ចេកទេស លើផ្លូវកប់ស្រូវ ដែលរាល់ថ្ងៃឃើញតែឡានធំៗដឹកទំនិញវេរចុះវេរឡើងតាមគន្លងផ្លូវ ខូចនោះ ក៏ស្រាប់តែមានមនុស្សអ៊ូអររាប់ពាន់នាក់ ឈរកកកុញទៅវិញ។ អ្នកដែលត្រូវប៉ាន់ គឺអ្នកលក់ដូររបរកំប៉ិកកំប៉ុក មានបាយ ទឹក នំបុ័ង ពងទារស្ងោរ ស្វាយម្កាក់ អំពិល ជាដើម។ ឯអ្នកដែលត្រដរខ្យល់នោះ គឺយុវជនដែលចាំយកពាក្យប្រឡងភាសាកូរ៉េ ហ្នឹងឯង។ ម៉ោង ៧ព្រឹក ជាម៉ោងធ្វើការរបស់មន្ត្រីចុះចែកពាក្យប្រឡង។
មន្ត្រីតម្រូវឲ្យយុវជនរាប់ពាន់នាក់នោះ ឈរតម្រង់ជួរជាជួរៗ ក្នុង១ជួរមិនតិចជាង ១៥០នាក់ឡើយ។ ដំបូង មនុស្សឈរមាន ៧៩ជួរ លុះក្រោយមក ក៏ចេះតែបង្កើនចំនួនបន្តបន្ទាប់។ មន្ត្រីក្រសួងការងារ ប្រាប់ទៅយុវជនទាំងនោះថា ក្រសួងការងារ ចែកពាក្យឲ្យពលករហ្វ្រី (Free) ឬឥតគិតថ្លៃ តែអ្នកណាចង់បានពាក្យ ត្រូវបង់លុយ ២៤ដុល្លារសិន។
យុវជនម្នាក់ៗប្រញាប់រាប់លុយឲ្យតែគ្រប់ នឹងអាលប្រគល់ឲ្យមន្ត្រីក្រសួងការងារ ទិញពាក្យដាក់ប្រឡងឲ្យបានឆាប់។ ពាក្យនោះជាក្រដាសពណ៌លឿង រាងរឹងបន្តិច សរសេរជាភាសាខ្មែរផង អង់គ្លេសផង និងកូរ៉េផង។ យុវជនភាគច្រើនបានតែរអ៊ូនៅខាងក្រៅឆាកថា ហេតុអ្វីក៏ពាក្យហ្នឹងថ្លៃម្ល៉េះ? តែដៃនៅតែរាប់លុយឲ្យគេ។ អ្នកខ្លះឲ្យទៅ ១០ម៉ឺន អ្នកទទួលលុយអាប់វិញ ១ពាន់ក៏មាន អាប់ ប្រាំរយក៏មាន។ មន្ត្រីក្រសួងការងារ ទាំងនោះថ្នឹកណាស់ខាងប្ដូរប្រាក់ គឺពួកគាត់ប្ដូរប្រាក់ឲ្យពលករក្នុងអត្រា ១ដុល្លារ ស្មើ ៤.១០០រៀលតែម្តង។
យុវជនមកពីខេត្តស្វាយរៀង លោក យ៉ាវ វ៉ាន រៀបរាប់ថា រូបគេ និងមិត្តភ័ក្ដិនៅស្រុកជាមួយគ្នាប្រាំប្រាំមួយនាក់ មកចាំទទួលពាក្យប្រឡងភាសាកូរ៉េ នេះតាំងពីព្រឹកព្រលឹម។ ប៉ុន្តែរហូតដល់ម៉ោងជាង ៣រសៀលនេះ ទើបលោកអាចចុះឈ្មោះប្រឡងបាន។ តែមិត្តភក្ដិ ៣នាក់ទៀត មិនទាន់ចុះឈ្មោះរួចនៅឡើយ។ លោកបន្តថា មូលហេតុដែលលោកចង់ទៅប្រទេសកូរ៉េ ដោយសារការងារនៅស្រុកខ្មែរបានកម្រៃចាយមិនគ្រប់ និងចង់ស្គាល់ភាពជឿនលឿនរីកចម្រើននៅបរទេស។ លោកបន្ថែមថា លោកត្រូវចំណាយថ្លៃចាយវាយជាងកន្លះខែ ដើម្បីបានប្រាក់ ២៤ដុល្លារ ទិញពាក្យប្រឡងនេះ៖ «២៤ដុល្លារ បើនិយាយទៅថ្លៃណា បើគិតទៅរកកន្លះខែឯណោះ បើអ្នកស្រែវិញ ត្រដរខ្យល់ហើយ។»
យុវតីត្រៀមប្រឡងតេស្ដភាសាកូរ៉េ ម្នាក់ទៀតមានកម្ពស់ប្រហែល ១ម៉ែត្រ៦០ រាងស្គម មុខស្ងួត សាច់ឈាមនេះបើគេទាយមិនខុសទេ នាងជាកម្មការិនីរោងចក្រ។ កញ្ញា ម៉ៅ ម៉ារ៉ី និយាយមួយៗប្រាប់ថា នាងអស់សង្ឃឹមនឹងការធ្វើការងារនៅក្នុងស្រុក ព្រោះនាងធ្វើការក្នុងរោងចក្រ ៧ឆ្នាំមកហើយ មិនឃើញធូរស្បើយក្នុងជីវភាពសោះ។ មួយខែៗនៅតែរកលុយចាយមិនគ្រប់ រកអាហារឆ្ងាញ់ញ៉ាំមិនបាន ហើយត្រូវទុកប្រាក់ខ្លះមើលជំងឺទៀត។ ម៉ារ៉ី បញ្ជាក់ថា នាងមកប្រឡងភាសាកូរ៉េ ព្រោះតែចង់គេចវេសពីជីវភាពលំបាកជាកម្មកររោងចក្រនៅស្រុកខ្មែរ៖ «ធ្វើការរោងចក្រយូរៗទៅ លុយមើលខ្លួនមិនចង់បាន។»
ម៉ារ៉ី បន្ថែមថា នាងមិនបានដឹងថាអ្វីជាតេស្ដភាសាកូរ៉េ នោះទេ តែការមកទិញពាក្យនេះជាការប្រថុយមួយក្ដារប៉ុណ្ណោះ ក្រែងលោជាប់។
នៅឆ្នាំ២០១៥ ខាងមុខ ក្រសួងមុខរបរ និងការងារនៃប្រទេសកូរ៉េខាងត្បូង បានសម្រេចផ្តល់ឱកាសការងារដល់ពលករខ្មែរចំនួន ៤ពាន់នាក់។ ក្នុងនោះការងារផ្នែកកសិកម្មមាន ២.៥០០នាក់ ការងារផ្នែកសំណង់ ៥០០នាក់ និងការងារផ្នែកឧស្សាហកម្ម ១ពាន់នាក់។ វេបសាយ (website) ក្រសួងការងារ និងមុខរបររបស់ប្រទេសកូរ៉េ បញ្ជាក់ថា ពលករដែលមានបំណងធ្វើការនៅប្រទេសកូរ៉េ ទាំងអស់ ត្រូវតែឆ្លងកាត់វគ្គបណ្តុះបណ្តាលភាសាកូរ៉េ ជាមុនសិន។ បើសិនជាពលករនោះប្រឡងតេស្ដជាប់ ក៏មិនបានន័យថា ពួកគេនឹងអាចទៅធ្វើការនៅប្រទេសកូរ៉េ បានដែរ ព្រោះបេក្ខជនទាំងនោះ នឹងត្រូវជ្រើសរើសដោយថៅកែរបស់គេផ្ទាល់ តាមរយៈការសម្ភាសតាមបណ្ដាញអ៊ីនធឺណិត ដែលក្រសួងការងារ ជាអ្នករៀបចំជូន។ ភាគីកូរ៉េ មិនបានបញ្ជាក់ថា ពួកគេនឹងបើកឲ្យមនុស្សប៉ុន្មាននាក់ ប្រឡងតេស្ដសមត្ថភាពភាសាកូរ៉េ ឡើយ ហើយអ្នកប្រឡង ត្រូវបង់លុយ ឬអត់នោះ ក៏មិនបានបង្ហាញឲ្យច្បាស់ដែរ។
ទោះជាបែបណាក៏ដោយ គ្រាន់តែថ្ងៃទី១៥ ខែកញ្ញា មួយប៉ុណ្ណោះ កន្លែងលក់ពាក្យនៅភ្នំពេញតែមួយទីតាំងគត់ មានយុវជនប្រមាណជាង ២ម៉ឺននាក់ បានទិញពាក្យប្រឡងធ្វើតេស្តសមត្ថភាពភាសាកូរ៉េ នេះ។ ប្រាក់ដែលភាគីក្រសួងការងារ និងភាគីកូរ៉េ ប្រមូលបានពីយុវជនខ្មែរនេះ មិនក្រោម ៤សែនដុល្លារឡើយ។ គណៈកម្មការរៀបចំលក់ពាក្យ បានជួលទាហានទ័ពពិសេសមួកក្រហម ជួយចាត់ចែងការពារសន្តិសុខទៀត។ ទាហានទាំងនេះស្លៀកឯកសណ្ឋានបារ៉ា សៀតកាំបិតសាំងគីមនៅចង្កេះ ដើរចុះដើរឡើងស្រែកបញ្ជាយុវជនទិញពាក្យឲ្យមានរបៀបរៀបរយ។ អ្នកដាក់ពាក្យរួច ត្រូវគេដេញចេញពីបរិវេណវិទ្យាស្ថានជាតិពហុបច្ចេកទេស ដើម្បីធានាសុវត្ថិភាព។ មន្ត្រីលក់ពាក្យប្រឡងតេស្ដសមត្ថភាពភាសាកូរ៉េ ឲ្យដឹងថា ឆ្នាំនេះទំនងជាអាចលក់អស់ពី ៨ម៉ឺនទៅ ១០ម៉ឺនច្បាប់ ឬអាចប្រមូលប្រាក់បានជាង ២លានដុល្លារ។
យុវជនរង់ចាំដាក់ពាក្យ
ប្រឡងតេស្ដទៅធ្វើការស្របច្បាប់នៅប្រទេសកូរ៉េ
ក្នុងវិទ្យាស្ថានជាតិពហុបច្ចេកទេសកម្ពុជា កាលពីថ្ងៃទី១៥ ខែកញ្ញា
ឆ្នាំ២០១៤។ RFA/Vann Vichar
ទាក់ទងនឹងការលក់ពាក្យប្រឡងនេះ ប្រធានគណៈកម្មការសុខាភិបាល សង្គមកិច្ច អតីតយុទ្ធជនយុវនីតិសម្បទា ការងារបណ្តុះបណ្តាលវិជ្ជាជីវៈ និងកិច្ចការនារីនៃរដ្ឋសភា អ្នកស្រី កែ សុវណ្ណរតន៍ នៅថ្ងៃទី១៦ ខែកញ្ញា បានចេញលិខិតមួយស្នើទៅរដ្ឋមន្ត្រីក្រសួងការងារ ពន្យល់ពីបញ្ហានេះ និងស្នើឲ្យក្រសួង ចែកជូនពាក្យប្រឡងនេះឲ្យពលករដោយឥតគិតថ្លៃ ព្រមទាំងចុះផ្សាយគំរូពាក្យនេះតាមរយៈគេហទំព័ររបស់ក្រសួងការងារ ទៀតផង។
អ្នកស្រី កែ សុវណ្ណរតន៍ មានប្រសាសន៍ថា ពលករខ្មែរកំពុងមានជីវភាពខ្វះខាត ដូចនេះទំហំទឹកប្រាក់ត្រូវបង់ ២៤ដុល្លារនេះ ពិតជាបន្ទុកដ៏ធ្ងន់ធ្ងរសម្រាប់ពួកគាត់។ អ្នកស្រីបញ្ជាក់ថា ក្រសួងការងារ ត្រូវចាត់វិធានការនេះឲ្យបានឆាប់៖ «នៅ ក្នុងស្ថាប័នជាតិមួយៗគេមានកញ្ចប់ថវិកាជាតិសម្រាប់រដ្ឋបាល និងសេវាសាធារណៈ សម្រាប់ការងារផ្សេងៗហ្នឹង យកលុយហ្នឹងទៅណាចឹង ក្រសួងត្រូវដើរតួនាទីជាអ្នករកលុយទៀតហើយ។ គាត់ទៅរកលុយណាបានរឿងហ្នឹង យើងកាន់តែទម្លាក់កំហុសមកលើអ្នកដែលមិនបានទៅហ្នឹងទៀតហើយ។»
ឆ្លើយតបនឹងបញ្ហានេះ មន្ត្រីអ្នកនាំពាក្យក្រសួងការងារ បណ្តុះបណ្តាលវិជ្ជាជីវៈ លោក ហេង សួរ បានផ្ញើសារតាមទូរស័ព្ទប្រាប់វិទ្យុអាស៊ីសេរី ថា ប្រាក់ ២៤ដុល្លារនោះ ក្រសួងការងារ មិនមែនជាអ្នកទទួលយកនោះទេ តែភាគីកូរ៉េ ជាអ្នកយក។ លោកបន្តថា ការបង់ប្រាក់ដើម្បីបានធ្វើតេស្ដប្រឡងនេះ ដូចជាអ្នកប្រឡងតេស្ដភាសាអង់គ្លេស ដូច្នោះដែរ ហើយក្រសួងការងារកូរ៉េ ជាអ្នកយកប្រាក់នេះពីបេក្ខជនដែលមានបំណងធ្វើតេស្តភាសាកូរ៉េ។
ចំណែកឯមន្ត្រីអ្នកលក់ពាក្យប្រឡងតេស្ដវិញប្រាប់ថា ប្រាក់ ២៤ដុល្លារនេះ ក្រសួងនឹងយកទៅចាត់ចែងថ្លៃសំបុត្រយន្តហោះដែលដឹកពាក្យមកពីកូរ៉េ ចំណាយជួលទីតាំងចែកពាក្យ ចំណាយជួលគណៈមេប្រយោគកែវិញ្ញាសាប្រឡង និងចំណាយផ្សេងៗទៀត។
យ៉ាងណាមិញ នាយកប្រតិបត្តិអង្គការតម្លាភាពកម្ពុជា លោក ព្រាប កុល លើកឡើងថា ទោះបីជាប្រាក់នោះ ក្រសួងការងារ ជាអ្នកយក ឬភាគីកូរ៉េ ជាអ្នកទទួលក៏ដោយ តែក្រសួងការងារកម្ពុជា មាននាទីពន្យល់ប្រាប់ពលករឲ្យបានច្បាស់ពីរឿងនេះ ជៀសវាងការយល់ច្រឡំ។ លោកបន្តថា ពលរដ្ឋដែលបានបង់ប្រាក់ មានសិទ្ធិដឹងថា ប្រាក់នោះគេយកទៅធ្វើអ្វី? អ្នកណាជាអ្នកទទួល?
ការប្រឡងតេស្ដសមត្ថភាពភាសាកូរ៉េ នឹងប្រព្រឹត្តទៅថ្ងៃទី២៥ និងថ្ងៃទី២៦ ខែតុលា។ ចំណែកឯការលក់ពាក្យវិញ នឹងបញ្ចប់នៅថ្ងៃទី១៨ ខែកញ្ញា។ ក្រៅពីទិញពាក្យតម្លៃ ២៤ដុល្លារនេះ បេក្ខជនទាំងអស់ក៏ត្រូវចំណាយលើថ្លៃហូបចុក ថ្លៃទិញវិញ្ញាសាកូរ៉េ ថ្លៃចូលរៀនភាសាកូរ៉េ តាមសាលាបណ្តុះបណ្តាលនានា ដែលកើតឡើងពេញប្រទេសកម្ពុជា។ អ្នកបើកសាលាបង្រៀនភាសាកូរ៉េ ប្រាប់ថា ពួកគេរត់ការបើកសាលាបាន ដោយទាក់ទងមន្ត្រីក្រសួងការងារ ហើយចំណាយសុំច្បាប់បើកសាលាបង្រៀនភាសាកូរ៉េ នោះក៏អស់មិនតិចដែរ។
យុវជនម្នាក់ដែលធ្លាប់ជួយលក់ពាក្យប្រឡងតេស្ដសមត្ថភាពភាសាកូរ៉េ ឲ្យក្រសួងការងារ ប្រាប់វិទ្យុអាស៊ីសេរី ថា កាលពីឆ្នាំមុន ពាក្យប្រឡងក៏តម្លៃ ២៤ដុល្លារដែរនៅថ្ងៃដំបូង តែដល់ថ្ងៃចុងក្រោយ បេក្ខជនមានប្រាក់ ១០ដុល្លារ ក៏អាចទិញបានដែរ។ យុវជនម្នាក់នោះបន្ថែមថា តម្លៃលក់ពាក្យប្រឡង អាចប្រែប្រួលបានតាមកាលៈទេសៈ និងតាមមេពីក្រសួងការងារ៕
No comments:
Post a Comment