បូកសរុប របាយការណ៍ គ្រោះថ្នាក់ ចរាចរណ៍ អំឡុងពេល បុណ្យភ្ជុំបិណ្ឌ
RFA / វិទ្យុ អាស៊ី សេរី | ២៤ កញ្ញា ២០១៤
១៧-មករា-២០១១៖ គ្រោះថ្នាក់ ចរាចរណ៍ នៅតាម ដងផ្លូវមួយ ក្នុងរាជធានី ភ្នំពេញ (RFA/Tin Zakariya)
តួលេខនេះ បង្ហាញថា, គ្រោះថ្នាក់ ចរាចរ ចំនួន អ្នករងគ្រោះ ថ្នាក់ ក្នុងពិធីបុណ្យ ភ្ជុំបិណ្ឌ គឺ មានចំនួន ច្រើនជាងឆ្នាំមុន។ ក្នុងនោះ, អ្នកស្លាប់ កើន២១នាក់ ឯអ្នករបួសធ្ងន់ កើន៧៨នាក់។
របាយការណ៍ ដែលផ្សព្វផ្សាយ តាមគេហទំព័រ របស់ ក្រសួង មហាផ្ទៃ បង្ហាញថា, គ្រោះថ្នាក់ ចរាចរណ៍ ផ្លូវគោក ទូទាំងប្រទេស ក្នុងរយៈពេល ៥ថ្ងៃ ចាប់ពីបុណ្យ កាន់បិណ្ឌ ទី១២ ទៅដល់ថ្ងៃ ភ្ជុំបិណ្ឌ, គ្រោះថ្នាក់ ចរាចរ កើតឡើង ចំនួន ៥៣ករណី និងបណ្ដាល ឲ្យចំនួន អ្នកស្លាប់ និងរបួស បានកើនឡើង ដោយប្រៀបធៀប រយៈពេល ដូចគ្នា ក្នុងឆ្នាំ២០១៣។
របាយការណ៍នោះ បញ្ជាក់ថា, ករណីគ្រោះថ្នាក់ ចរាចរណ៍ បានកើនឡើង ជាង៥០ លើកនេះ គឺ បណ្ដាល ឲ្យអ្នកស្លាប់ មនុស្ស ៤៩នាក់ (ស្រី, ៥នាក់)។ អ្នករបួស សរុប ៣០៥នាក់ (ស្រី, ៧៩នាក់) ក្នុងនោះ រងរបួសធ្ងន់ ១៨៩នាក់ (ស្រី, ៤៣នាក់)។ មូលហេតុ បង្ក ឲ្យមាន គ្រោះថ្នាក់ រួមមាន ល្មើសល្បឿន, មិនគោរពសិទ្ធ អាទិភាព, មិនប្រកាន់ស្ដាំ, បើកបរ ប្រជែង គ្រោះថ្នាក់, ស្រវឹង, សុខភាព, ងងុយដេក, ជាដើម។ របាយការណ៍ នោះ កត់សម្គាល់ ខេត្ត ដែលមាន គ្រោះថ្នាក់ និងអ្នករងគ្រោះ ច្រើន, គឺ៖ ធិសាត់, ស្លាប់ ៨នាក់; កណ្ដាល, ស្លាប់ ៧នាក់; ព្រៃវែង, ស្លាប់ ៥នាក់; កំពង់ធំ, ស្លាប់ ៥នាក់; តាកែវ, ស្លាប់ ៣នាក់, រងរបួស ១៩នាក់។ គ្រោះថ្នាក់ ចរាចរណ៍ ៥ថ្ងៃនេះ បណ្ដាល ឲ្យខូចខាត ម៉ូតូ ១៧១គ្រឿង, រថយន្ត ធុនស្រាល ៤១គ្រឿង, រថយន្តធុនធ្ងន់ ៧គ្រឿង, និងយាន ផ្សេងៗ ១៤គ្រឿង។
ប្រធាន នាយកដ្ឋាន កណ្ដាល សណ្ដាប់ធ្នាប់ នៃក្រសួង មហាផ្ទៃ លោក ហ៊ិម យ៉ាន មានប្រសាសន៍ ថា, តែ ក្នុងរយៈពេល ២ថ្ងៃ គឺ ថ្ងៃកាន់បិណ្ឌ ទី១៤ និងថ្ងៃភ្ជុំបិណ្ឌ គ្រោះថ្នាក់ ចរាចរណ៍ ផ្លូវគោក ទូទាំងប្រទេស មានមនុស្ស ចំនួន ២៣នាក់ ស្លាប់ និងរបួស ធ្ងន់ស្រាល ១០៨នាក់៖ «នៅប្រហែល ជាម៉ោង ៧យប់អី គឺ កំពុងតែ បូក។»
ចំណែក របាយការណ៍ របស់ មន្ត្រី ប៉ូលិស ខេត្តកណ្ដាល គិតចាប់ ពីថ្ងៃដាក់បិណ្ឌ ១, គឺ ថ្ងៃ ទី៩ ខែកញ្ញា ឆ្នាំ២០១៤ រហូត ដល់ថ្ងៃភ្ជុំបិណ្ឌ ថ្ងៃទី២៣ ខែកញ្ញា ឆ្នាំ២០១៤, មានមនុស្ស ស្លាប់ ៣០នាក់, របួស ៣៤នាក់, ខូចរថយន្ត ៩គ្រឿង, ម៉ូតូ ២៣គ្រឿង, និងឆេះផ្ទះ មួយខ្នង។
ប្រធាន នាយកដ្ឋាន កណ្ដាល សណ្ដាប់ធ្នាប់ នៃក្រសួង មហាផ្ទៃ លោក ហ៊ិម យ៉ាន មានប្រសាសន៍ ថា, របាយការណ៍ គ្រោះថ្នាក់ ចរាចរណ៍ ផ្លូវគោក ទូទាំងប្រទេស កម្ពុជា ក្នុងពិធីបុណ្យ កាន់បិណ្ឌ ទី១ រហូត ដល់ថ្ងៃ ភ្ជុំបិណ្ឌ មិនទាន់ បូកសរុប ចប់នៅឡើយ។
ចំពោះ បញ្ហាសន្តិសុខវិញ នៅខេត្ត ព្រៃវែង មានករណី ប្រើអាវុធ បាញ់ ក្នុងវត្ត អ្នកលឿង ក្រោម កាលពីយប់ ថ្ងៃ២៣ ខែកញ្ញា មានមនុស្ស រងរបួស។ មន្ត្រីប៉ូលិស ឃុំ អ្នកលឿង ស្រុក ពាមរក៍ ខេត្ត ព្រៃវែង លោក ជួន សៀម ថ្លែងថា កំពុងកសាងសំណុំរឿងបញ្ជូនទៅអធិការដ្ឋាន និងស្នងការដ្ឋានខេត្តព្រៃវែង៖ «របួស ម្នាក់ គឺរបួសត្រូវគ្រាប់កាំភ្លើងគឺមានម្នាក់។ វាឃាត់មិនបាន មកពីក្មេងៗ វាប្រទូសរ៉ាយ ហើយដល់ពេលមានកាំភ្លើង មានអី យើងជាសមត្ថកិច្ច មានកាំភ្លើងដូចគ្នា យើងត្រូវគេចចេញសិន ព្រោះខ្លាចមានរឿង។ ឥឡូវ ខ្ញុំកំពុងតែធ្វើឯកសារនឹង។»
គេហទំព័រ របស់ក្រសួងមហាផ្ទៃ នាថ្ងៃទី២៣ ខែកញ្ញា ឆ្នាំ២០១៤ ពាក់ព័ន្ធបញ្ហាសន្តិសុខសង្គម មានករណីហិង្សាដោយចេតនា នៅសង្កាត់ទន្លេបាសាក់ ក្រុងភ្នំពេញ ខណៈជនរងគ្រោះឈ្មោះ គង់ ប៊ុននី ភេទប្រុស អាយុ២១ឆ្នាំ រស់នៅភូមិតាព្រុំ ឃុំព្រែកឯង ខណ្ឌច្បារអំពៅ កំពុងជិះម៉ូតូ តាមផ្លូវព្រះមុនីវង្ស ត្រូវជនសង្ស័យចំនួន ០៦នាក់ ជិះម៉ូតូ ០២គ្រឿង កាប់ពីក្រោយ បណ្ដាលឲ្យរបួសក្បាល ផ្នែកខាងឆ្វេង ធ្ងន់។ នៅថ្ងៃ២៣ ខែកញ្ញាដែរ ករណីប្រច័ណ្ឌ គឺប្ដីប្រើកាំបិតចិតបន្លែ ចាក់សម្លាប់ប្រពន្ធ នៅឃុំអង្គររាជ ស្រុកព្រះស្តេច ខេត្តព្រៃវែង៕
No comments:
Post a Comment