ភិក្ខុ លួន សុវ៉ាត ពន្យារពេល ចូលទៅបំភ្លឺ នៅតុលាការ
VOD | ១០ កញ្ញា ២០១៤
ព្រះតេជគុណ លួន សុវ៉ាត ថ្លែងទៅកាន់ អ្នកសារព័ត៌មាន នាពេល កន្លងមក (រូបថត ដោយ ជន ស្រីណុច)
ព្រះភិក្ខុ លួន សុវ៉ាត មានសង្ឃ ដីកា ប្រាប់VOD នៅព្រឹក ថ្ងៃពុធនេះ ថា, កាលពីម្សិលមិញ សាលាដំបូង រាជធានីភ្នំពេញ បានចេញដីកា កោះហៅព្រះអង្គ ឲ្យចូលទៅបំភ្លឺ នៅថ្ងៃ ទី១៨ ខែកញ្ញា ពាក់ព័ន្ធ បទសង្ស័យ មួយចំនួន, ដូចជា បទញុះញង់ ឲ្យប្រព្រឹត្ត បទឧក្រិដ្ឋ, បទរួមគំនិតក្បត់, និងបទប្រឆាំង ការបោះឆ្នោត។
ព្រះភិក្ខុ លួន សុវ៉ាត មានសង្ឃដីកា ថា, ការចោទប្រកាន់ មកកាន់ព្រះអង្គ គឺ ជារឿង នយោបាយ សុទ្ធសាធ, ព្រោះ ព្រះអង្គ មិនបានប្រព្រឹត្ត ដូចអ្វី ដែលតុលាការ បានចោទប្រកាន់ នោះទេ, ហើយ ការចោទប្រកាន់នេះ ក៏មិនមែន ជាបទល្មើស ជាក់ស្តែងដែរ។ ព្រះអង្គ បន្តថា, មេធាវី របស់ ព្រះអង្គ បានដាក់ពាក្យ សូម ពន្យាពេល ទៅតុលាការ រួចហើយ ព្រោះ ព្រះអង្គ មានធុរៈ ទៅក្រៅប្រទេស។
មេធាវី នៃមជ្ឈមណ្ឌល អប់រំច្បាប់ សម្រាប់ សហគមន៍ លោក ហម ស៊ុនរិទ្ធ ដែលជាមេធាវី ការពារក្តី របស់ ព្រះភិក្ខុ លួន សុវ៉ាត ប្រាប់VOD នៅថ្ងៃពុធ ដែរនេះ ថា, កាលពីម្សិលមិញ បន្ទាប់ ពីទទួលបាន ដីការកោះ, លោក បានដាក់ពាក្យ ទៅតុលាការ ដើម្បី សូម ពន្យារពេល ឲ្យកូនក្តី របស់លោក ក្នុងការចូល ទៅបំភ្លឺ នៅតុលាការ រួចហើយ។
លោក បន្តថា មូលហេតុ ដែលលោក ដាក់ពាក្យ សូម ពន្យាពេល ព្រោះតែ ដីការកោះ ឲ្យចូលទៅបំភ្លឺ មានរយៈពេល លឿនពេក, ត្រឹមតែ មួយសប្ដាហ៍។ ដូច្នេះ ទើប លោក សូម ពន្យាពេល ដើម្បី សិក្សាសំណុំរឿង ឲ្យបានច្បាស់សិន។ ទោះបី ជាយ៉ាងណា, លោក ពុំបានបញ្ជាក់ ថា ពន្យារទៅដល់ ពេលណា នោះទេ។
ព្រះតេជគុណ លួន សុវ៉ាត មានសង្ឃដីកា ឲ្យដឹងដែរ ថា, កាលពីឆ្នាំ ២០១១ សាលាដំបូង រាជធានីភ្នំពេញ ក៏បានកោះហៅ ព្រះអង្គ ម្តងដែល ដោយចោទប្រកាន់ ពីបទញុះញង់ ឲ្យប្រព្រឹត្ត បទឧក្រិដ្ឋ បទពាក់ព័ន្ធ ចលនា អំណាច ពលរដ្ឋខ្មែរ (លោក សួន សេរីរដ្ឋា) និងពីបទចលនា បដិវត្ត ផ្កាឈូក ជាដើម៕
No comments:
Post a Comment