Paris Peace Accords 23 Oct. 1991

Friday, September 19, 2014

តើ​ ភាព​ជា​ដៃគូ ​រវាង ​កម្ពុជា​ និង​ចិន ​ជំរុញ​សេដ្ឋកិច្ច ​ឬ​បង្ក​ហានិភ័យ ​ដល់​កម្ពុជា ​ពេល​អនាគត? Will Cambodia's partnership with China be one of economic prosperity or disaster?

តើ​ ភាព​ជា​ដៃគូ ​រវាង ​កម្ពុជា​ និង​ចិន ​ជំរុញ​សេដ្ឋកិច្ច ​ឬ​បង្ក​ហានិភ័យ ​ដល់​កម្ពុជា ​ពេល​អនាគត?

RFA / ​វិទ្យុ ​អាស៊ី សេរី | ១៩ កញ្ញា ២០១៤

ជំនួយ​ចិន ៦១០
ពិធី​ចុះ​ហត្ថលេខា​ លើ​កិច្ច​ព្រមព្រៀង ​ផ្ដល់​ជំនួយ ​របស់​ចិន សម្រាប់​ សង្គ្រោះ​បន្ទាន់​ដល់​ប្រជាពលរដ្ឋ​ខ្មែរ​រង​គ្រោះ​ដោយសារ​ទឹក​ជំនន់ នៅ​ក្រសួង​ការបរទេស​កម្ពុជា ថ្ងៃ​ទី​៣ ខែ​វិច្ឆិកា ឆ្នាំ​២០១១។  Photo: RFA

ថ្នាក់​ដឹក​នាំ ​រដ្ឋាភិបាល​ កម្ពុជា តែង​តែ ​ទៅ​ទស្សនកិច្ច ​នៅ​ប្រទេស​ ចិន ច្រើន​ជាង​គេ។  រាល់​ទស្សនកិច្ច​ ម្ដងៗ ថ្នាក់​ដឹក​នាំ​ ប្រទេស​ ទាំង​ពីរ តែង​តែ​ ចុះ​កិច្ច​ព្រមព្រៀង ​សំខាន់​នានា ​ដូចជា ការ​ធ្វើ​ពាណិជ្ជកម្ម, ការ​លើក​លែង​ពន្ធ, រួម​ទាំង ​ការ​ផ្ដល់​កម្ចី​ ដល់​ប្រទេស​កម្ពុជា ជាដើម។

ទំនាក់ទំនង​នេះ កាន់​តែ​ បង្ហាញ​ភាព​ ជិតស្និទ្ធ ​រហូត​ ដល់​កម្ពុជា ទទួល​ស្គាល់​ ថា, ប្រទេស​ចិន ជា​ដៃគូ​ អភិវឌ្ឍន៍ ​គ្រប់​ជ្រុងជ្រោយ​ ដែល​មិន​អាច ​ខ្វះ​បាន។

តើ​ ភាព​ជា​ដៃគូ​នេះ អាច​ជំរុញ​ សេដ្ឋកិច្ច​ កាន់​តែ​ រឹងមាំ ឬ​បង្ក​ ជា​ហានិភ័យ​ សម្រាប់ ​សង្គម​កម្ពុជា នា​ពេល​អនាគត?

បន្ទាប់ ​ពី​លោក​ នាយក​រដ្ឋមន្ត្រី ហ៊ុន សែន បាន​ត្រឡប់​ ពី​ទស្សនកិច្ច​ ពី​ប្រទេស ​ចិន ម្ដងៗ, លោក ​តែង​តែ​ បង្ហាញ​លទ្ធផល​ ពី​ទស្សនកិច្ច ​របស់​លោក ដូចជា ការ​ទទួល​បាន​ នូវ​កិច្ច​សហប្រតិបត្តិការ ​ទ្វេ​ភាគី​ លើ​ផ្នែក​សេដ្ឋកិច្ច, យោធា, និង​កម្ចី​ សម្បទាន។  គិត​ត្រឹម​ ដើម​ខែ​កញ្ញា ឆ្នាំ​២០១៤ នៅ​ពេល​ ដែល​លោក​ ទៅ​ចូលរួម ​ពិព័រណ៍​ ចិន-​អាស៊ាន លើក​ទី​១១, លោក ហ៊ុន សែន បាន​ស្នើ​សុំ​ ទៅ​រដ្ឋាភិបាល ​ចិន ផ្តល់​គម្រោង​កម្ចី​ ក្នុង​ផ្នែក​ សហប្រតិបត្តិការ​ ទ្វេ​ភាគី សម្រាប់ ​វិស័យ​ការពារ​ ជាតិ និង​សន្តិសុខ ​ជាតិ។

រដ្ឋមន្ត្រី​ អម​នាយក​រដ្ឋមន្ត្រី លោក កៅ គឹមហួន មាន​ប្រសាសន៍​នៅ​ពេល ​វិល​ត្រឡប់មក ​ពី​ចូលរួម​ ពិព័រណ៍ ​ចិន-​អាស៊ាន លើក​ទី​១១ នៅ​ព្រលាន​ យន្តហោះ​ អន្តរជាតិ ​ភ្នំពេញ ​នោះ​ថា, លោក​ នាយក​រដ្ឋមន្ត្រី​បាន​ស្នើ​សុំ​ចិន អនុញ្ញាត​ឲ្យ​មាន​ការ​នាំ​ចូល​នូវ​ផលិតផល​កសិកម្ម​ជាច្រើន ដូចជា អង្ករ​ដោយ​មិន​មាន​បង់​ពន្ធ​គយ។ ក្រៅ​ពី​នេះ ប្រទេស​ចិន ក៏​បាន​សន្យា​ផ្ដល់​ប្រាក់​ចំនួន ២០០​លាន​យន់ សមាមាត្រ​នឹង​ទឹក​ប្រាក់​ជាង ៣២​លាន​ដុល្លារ​អាមេរិក​បន្ថែម​ទៀត​ដល់​កម្ពុជា បន្ទាប់​ពី​កម្ពុជា ទើប​តែ​បាន​ទទួល​កម្ចី​ប្រមាណ ១០០​លាន​ដុល្លារ​អាមេរិក កាល​ពី​ខែ​សីហា ឆ្នាំ​២០១៤ កន្លង​ទៅ។

ទាំង​ថ្នាក់​ដឹក​នាំ​រដ្ឋាភិបាល និង​មន្ត្រី​ជាន់​ខ្ពស់​រដ្ឋាភិបាល​កម្ពុជា បាន​ទទួល​ស្គាល់​ថា ការ​ផ្ដល់​ហិរញ្ញវត្ថុ​ពី​ប្រទេស​ចិន បាន​ជួយ​ប្រទេស​កម្ពុជា ក្នុង​ការ​ធ្វើ​សមាហរណកម្ម​កម្ពុជា ភ្ជាប់​ជាមួយ​អាស៊ាន និង​ក្នុង​តំបន់ តាម​រយៈ​ការ​ភ្ជាប់​ទំនាក់ទំនង​លើ​ផ្នែក​ហេដ្ឋារចនាសម្ព័ន្ធ និង​ការ​ភ្ជាប់​បណ្ដាញ​អគ្គិសនី។

ប៉ុន្តែ ស្ថាប័ន​ស្រាវជ្រាវ និង​អ្នក​វិភាគ​សេដ្ឋកិច្ច​មួយ​ចំនួន​យល់​ឃើញ​ថា ទំនាក់ទំនង​ទ្វេ​ភាគី​រវាង​កម្ពុជា និង​ចិន បាន​ផ្ដល់​ផល​ប្រយោជន៍​ឲ្យ​គ្នា​ទៅ​វិញ​ទៅ​មក ក្នុង​នោះ កម្ពុជា ទទួល​បាន​ប្រាក់​កម្ចី និង​ការ​សម្រួល​សម្រាប់​វិស័យ​ពាណិជ្ជកម្ម ប៉ុន្តែ​ចិន វិញ​ទទួល​បាន​កិច្ច​សន្យា​រុករក​រ៉ែ​នៅ​ប្រទេស​កម្ពុជា និង​ការ​ពង្រឹង​អំណាច​ទីតាំង​ភូមិសាស្ត្រ​នៅ​តំបន់​អាស៊ី។

ប្រធាន​ក្រុមប្រឹក្សាភិបាល​នៃ​មជ្ឈមណ្ឌល​សិទ្ធិ​មនុស្ស​កម្ពុជា លោក អ៊ូ វីរៈ មាន​ប្រសាសន៍​ថា ស្ថានភាព​សេដ្ឋកិច្ច​ប្រទេស​ចិន បច្ចុប្បន្ន ត្រូវ​ការ​ធនធាន​មក​ពី​ប្រទេស​ខាង​ក្រៅ ដើម្បី​ពង្រឹង និង​លើក​ស្ទួយ​សេដ្ឋកិច្ច​របស់​ខ្លួន។ ជាក់ស្ដែង ការ​ជួយ​ជ្រោមជ្រែង​របស់​ចិន មក​លើ​ប្រទេស​កម្ពុជា គឺ​ជា​ថ្នូរ​នៃ​ការ​ទទួល​បាន​ដី​សម្បទាន​សេដ្ឋកិច្ច​លំដាប់​លេខ​ពីរ បន្ទាប់​ពី​ប្រទេស​វៀតណាម ដើម្បី​រុករក​ធនធាន​ធម្មជាតិ។

បន្ថែម​លើ​នេះ អ្នក​វិភាគ​មួយ​ចំនួន​ទៀត​យល់​ឃើញ​ថា ស្រប​ពេល​ប្រទេស​ចិន បាន​ផ្ដល់​កម្ចី​កាន់​តែ​ច្រើន​ដល់​កម្ពុជា ការ​វិនិយោគ​មក​ពី​ប្រទេស​ចិន វិញ ក៏​មាន​ចំនួន​កាន់​តែ​ច្រើន​ដែរ ដែល​បញ្ហា​នេះ ស្ថាប័ន​ពាក់ព័ន្ធ​ទាំងអស់​ត្រូវ​តែ​ធ្វើ​ការ​សិក្សា​អំពី​ផល​ប៉ះពាល់ និង​ការ​ចូលរួម​ចំណែក​ដល់​សេដ្ឋកិច្ច និង​ការ​កាត់​បន្ថយ​ភាព​ក្រីក្រ​នៅ​ប្រទេស​កម្ពុជា បច្ចុប្បន្ន។

អ្នក​វិភាគ​សេដ្ឋកិច្ច​កម្ពុជា លោក ស្រី ចន្ធី វិញ​យល់​ឃើញ​ថា តួនាទី​របស់​ចិន នៅ​ប្រទេស​កម្ពុជា បង្កើត​ការងារ​ដល់​ប្រជាពលរដ្ឋ​កម្ពុជា និង​ការ​ផ្ដល់​ប្រយោជន៍​ដល់​សេដ្ឋកិច្ច​នៅ​ក្នុង​រយៈពេល​វែង។ ប៉ុន្តែ​លោក​បញ្ជាក់​ទៀត​ថា ឱកាស​ទទួល​បាន​ផល​ប្រយោជន៍​ច្រើន​ពី​ប្រទេស​ចិន គឺ​អាស្រ័យ​ផែនការ និង​ការ​អនុវត្ត ដើម្បី​ប្រើប្រាស់​កម្ចី និង​ការ​វិនិយោគ​របស់​ចិន នៅ​ប្រទេស​កម្ពុជា។

របាយការណ៍​របស់​ក្រុមប្រឹក្សា​អភិវឌ្ឍន៍​កម្ពុជា បាន​បង្ហាញថា ការ​វិនិយោគ​របស់​ចិន ភាគ​ច្រើន គឺ​នៅ​ក្នុង​វិស័យ​កសិកម្ម ការ​រុករក​រ៉ែ ហេដ្ឋារចនាសម្ព័ន្ធ និង​ផលិតផល​កាត់​ដេរ។ ចំណែក​ទំហំ​ពាណិជ្ជកម្ម​ទ្វេ​ភាគី​រវាង​ប្រទេស​ទាំង​ពីរ​នា​ពេល​បច្ចុប្បន្ន បាន​កើន​ឡើង​ដល់​ទំហំ ៣​ពាន់​លាន​ដុល្លារ ហើយ​រំពឹង​ថា​នឹង​កើន​ឡើង​ដល់ ៥​ពាន់​លាន​ដុល្លារ​នៅ​ក្នុង​ឆ្នាំ​២០១៧។

របាយការណ៍​របស់​ក្រសួង​សេដ្ឋកិច្ច និង​ហិរញ្ញវត្ថុ​កម្ពុជា បាន​បង្ហាញ​ថា ប្រទេស​ចិន បាន​ផ្ដល់​ទឹក​ប្រាក់​សរុប ២,៨៥​ពាន់​លាន​ដុល្លារ​ដល់​កម្ពុជា ចាប់​ពី​ឆ្នាំ​១៩៩២ ដល់​ឆ្នាំ​២០១៤ ហើយ​ទឹក​ប្រាក់​ភាគ​ច្រើន​បំផុត​ជា​កម្ចី​សម្បទាន ដែល​ប្រទេស​កម្ពុជា ត្រូវ​សង​ត្រឡប់​ទៅ​ប្រទេស​ចិន វិញ​នៅ​ពេល​អនាគត។ ចំពោះ​ការ​វិនិយោគ​ដោយ​ផ្ទាល់​របស់​ប្រទេស​ចិន នៅ​កម្ពុជា នៅ​ចន្លោះ​ឆ្នាំ​១៩៩៤ ដល់​ឆ្នាំ​២០១២ មាន​តម្លៃ​ជិត ១០​ពាន់​លាន​ដុល្លារ​អាមេរិក។

ទោះ​ជា​យ៉ាង​ណា​ក៏ដោយ ស្ថាប័ន​ផ្ដល់​ជំនួយ​ដល់​ប្រទេស​កម្ពុជា ក្នុង​នោះ​រួម​មាន​ធនាគារ​អភិវឌ្ឍន៍​អាស៊ី (ADB) បាន​រិះគន់​តួនាទី​របស់​ចិន នៅ​ក្នុង​ការ​អភិវឌ្ឍ​សេដ្ឋកិច្ច​របស់​កម្ពុជា គឺ​ឡើង​រូបភាព​ជា​កម្ចី​សម្បទាន មិន​មែន​ការ​ផ្ដល់​ជំនួយ​ឥត​សំណង​នោះ​ទេ។ ការ​ផ្ដល់​ជំនួយ​ឥត​សំណង​នេះ ប្រធាន​អង្គការ​កិច្ចការ​ពិសេស​សិទ្ធិ​មនុស្ស​កម្ពុជា លោក អ៊ូច ឡេង ធ្លាប់​បាន​រិះគន់​ថា ជំនួយ និង​កម្ចី​របស់​ប្រទេស​ចិន បាន​ប៉ះពាល់​សង្គម និង​ប្រជាពលរដ្ឋ​កម្ពុជា យ៉ាង​ធ្ងន់ធ្ងរ ក្នុង​នោះ​បាន​ធ្វើ​ឲ្យ​ប្រជាពលរដ្ឋ​កម្ពុជា បាន​បាត់​បង់​ដីធ្លី​ផ្ទះ​សម្បែង ប៉ះពាល់​ដល់​បរិស្ថាន និង​បន្ទុក​នៃ​ការ​ជំពាក់​បំណុល​បរទេស​របស់​ប្រជាពលរដ្ឋ​កម្ពុជា នឹង​កើន​ឡើង៕



1 comment:

  1. Anonymous11:59 PM

    វាប្រហែលជានឹងទៅដូចកាលពីទសវត្សទី៦០​ ដល់​ ទី៨០ អញ្ចឹង ។ កាលណោះអ្នកដឹកនាំប្រទេសទាំង
    ៃសីហនុ ទាំងប៉ុលពត សុទ្ធតែទទួលជំនួយពីប្រទេសកុម្មុយនិស្តចិនទាំងអស់ ។ ទីបញ្ចប់ តើវាសនាប្រ
    ទសកម្ពុជា និង ប្រជាពលរដ្ឋខ្មែរបានប្រែក្លាយទៅជាយ៉ាងម៉េចដែរ ? ។ ជំពាក់បំណុលចិន​ និង កូរ៉េ
    ខាងជើង រហូតដល់ត្រូវសងឲគេវិញទាំងភោគផល ទាំងទ្រព្យសម្បត្តិរបស់រដ្ឋទាំងមូល ថែមទាំងជីវិត
    របស់ពលរដ្ឋជិត២លាននាក់ទៀតផង ។ បន្ទាប់មកនៅទសវត្សទី៨០មកដល់សព្វថ្ងៃនេះ អ្នកដឹក
    នាំមកពីគណៈបក្សប្រជាជនដែលកើតចេញពីពួកកុម្មុយនិស្តយួន បានជំពាក់បំណុលពួកយួនហា
    ណូយ រហូតដល់ត្រូវសងអ្វី ៗ ទាំងអស់ដែលជារបស់ខ្មែរទៅឲគេជារៀងរហូតទៀត ។ នេះហើយពាក្យ
    ដែលហៅថា "ជំនួយ ឥតចំណង" របស់ពួកមេដឹកនាំចំកួត ឥតមានគ្រូមើលជានោះ ។

    ReplyDelete