បក្សជាប់ឆ្នោត ទាំងពីរ ឯកភាពគ្នា ភាគច្រើន លើសេចក្ដី ព្រាងច្បាប់ គ.ជ.ប.
RFA / វិទ្យុ អាស៊ី សេរី | ២៧ តុលា ២០១៤
ប្រធាន គណបក្ស សង្គ្រោះជាតិ លោក សម រង្ស៊ី (ឆ្វេង)
ចាប់ដៃ ជាមួយ លោក នាយករដ្ឋមន្ត្រី ហ៊ុន សែន
ក្រោយជំនួប ចរចា នាវិមាន ព្រឹទ្ធសភា នៅថ្ងៃ ទី២២ កក្កដា ២០១៤។ RFA/Tin Zakariya
ក្រុមការងារ គណបក្ស សង្គ្រោះជាតិ និងគណបក្ស ប្រជាជនកម្ពុជា អះអាង ថា, បានឯកភាពគ្នា ជិតទាំងស្រុង ហើយ លើសេចក្ដី ព្រាងច្បាប់ ស្ដីពី ការរៀបចំ និងការប្រព្រឹត្តទៅ នៃគណៈកម្មាធិការ ជាតិ រៀបចំ ការបោះឆ្នោត (គ.ជ.ប.)។
តំណាង ក្រុមការងារ គណបក្ស សង្គ្រោះជាតិ លោក អេង ឆៃអ៊ាង កាលពីថ្ងៃ ទី២៧ តុលា បញ្ជាក់ថា, តំណាង គណបក្ស ទាំងពីរ សម្រេចបញ្ចប់ សេចក្ដីព្រាងច្បាប់ ស្ដីពី ការរៀបចំ និងការប្រព្រឹត្តទៅ នៃគ.ជ.ប. បានប្រមាណ ៩០ភាគរយ។ ចំណែក ឯ១០ ភាគរយទៀត នឹងបន្ត ពិភាក្សា នៅថ្ងៃទី១០ វិច្ឆិកា បន្ថែមទៀត។ លោក ថា, ប្រសិនបើ ក្រុមការងារ ទាំងពីរ មិនអាច ឯកភាពទាំងស្រុង ក្នុងកិច្ចប្រជុំ ចុងក្រោយ នេះទៀត, តំណាង គណបក្ស ទាំងពីរ នឹងដាក់ ឲ្យមេដឹកនាំ គណបក្ស ទាំងពីរ ជាអ្នកសម្រេច ជាចុងក្រោយ។
លោក អេង ឆៃអ៊ាង៖ «យើង បានជជែកគ្នា ជាច្រើនសប្តាហ៍ មកហើយ។ ឥឡូវ យើង ជជែក ពីទម្រង់ ជាង៦០ មាត្រាហ្នឹង, យើង បានជជែក ឯកភាពគ្នាហើយ។ យើង នៅសល់តែ ១០ភាគរយ ដែលយើង មិនទាន់ ឯកភាពគ្នា។ យើង នឹងជជែកទៀត នៅថ្ងៃ ១០ វិច្ឆិកា, ហើយ ក្រោយពេល បញ្ចប់, យើង នឹងធ្វើកំណត់ហេតុ ដើម្បី ឲ្យមេដឹកនាំ ទាំងពីរ ជាអ្នកសម្រេច។»
លោក អេង ឆៃអ៊ាង បដិសេធ មិនបញ្ជាក់ ព័ត៌មានលំអិត ពីការខ្វែង គំនិតគ្នា ដែលមិនអាច ឈានទៅបញ្ចប់ សេចក្តីព្រាងច្បាប់ នោះទេ។ ប៉ុន្តែ ប្រភព ជាសមាជិក ក្នុងក្រុមការងារ អះអាងថា, ឧបសគ្គ រារាំង ការឯកភាព ទាំងស្រុងនោះ គឺ ដោយសារតែ តំណាង គណបក្សទាំង ពីរ បន្តខ្វែងគំនិត លើការជ្រើសរើស អគ្គលេខាធិការ និងអគ្គលេខាធិការ រង នៃគ.ជ.ប.។
នាយកប្រតិបត្តិ អង្គការ ខុមហ្វ្រែល (Comfrel) លោក គល់ បញ្ញា បញ្ជាក់ថា ក្រុមការងារទាំងពីរបានប្រើប្រាស់រយៈពេលយូរ ហើយនៅតែខ្វែងគំនិតគ្នាមិនអាចបញ្ចប់សេចក្តីព្រាងច្បាប់បាន។ លោកស្នើឲ្យក្រុមការងារទាំងពីរបង្ហាញនូវលទ្ធផល ៩០ភាគរយ ដែលបានសម្រេចរួចមក ហើយបង្ហាញចំណុច ១០ភាគរយផ្សេងទៀតដែលមិនទាន់បានសម្រេចនៅឡើយ។ លោកបញ្ជាក់ថា របៀបនៃការជ្រើសរើសអគ្គលេខាធិការ និងអគ្គលេខាធិការរង គ.ជ.ប ត្រូវកំណត់ឲ្យមានតម្លាភាព និងបើកទូលាយឲ្យបេក្ខជនគ្រប់រូបមានសិទ្ធិចូលរួមប្រឡងជ្រើសរើស បម្រើការងារក្នុងមុខតំណែងនិងតួនាទីទាំង២។
លោក គល់ បញ្ញា៖ «របៀប គាត់ ចរចា មួយអាទិត្យ ធ្វើម្តង, មួយអាទិត្យម្តង មិនម៉ត់ចត់ទេ។ យកមក ជជែករាល់ថ្ងៃ បានត្រូវ។ បើ គណបក្ស ទាំងពីរ មួយអាទិត្យ ធ្វើម្តងនោះ, រឿងអ្វី ការងារនេះ បានលទ្ធផល ល្អ។»
ពាក់ព័ន្ធ ទៅនឹងសំណើ របស់ អង្គការ ខុមហ្វ្រែលនេះ, លោក អេង ឆៃអ៊ាង ឆ្លើយតបវិញ ថា, ក្រុមការងារ ទាំងពីរ មានក្រមសីលធម៌ ដែលមិនអាច បកស្រាយ ពីការខ្វែង គំនិតគ្នា ក្នុងពេលជួប ការចរចា នោះទេ។ លោក បន្តថា, គណបក្សទាំងពីរ មិនបាន លាក់បាំងព័ត៌មាន នៃការចរចាឡើយ។ ប៉ុន្តែ លទ្ធផល នៃការចរចា នឹងប្រកាស ជាសាធារណៈ នៅពេល សេក្តីព្រាងច្បាប់ បានសម្រេច ជាស្ថាពរ។
នៅក្នុងកិច្ចព្រមព្រៀង នយោបាយ របស់ គណបក្ស ជាប់ឆ្នោត ទាំងពីរ, មុន នឹងបញ្ចប់ ការជាប់គាំង នយោបាយ កាលពីថ្ងៃ ទី២២ កក្កដា នោះ, គណបក្ស ប្រជាជនកម្ពុជា និងគណបក្ស សង្គ្រោះជាតិ ឯកភាព រៀបចំ ក្បាលម៉ាស៊ីន គ.ជ.ប. មានសមាជិក ចំនួន ៩រូប។ ក្នុងនោះ បេក្ខភាព មកពីគណបក្ស ទាំងពី ម្ខាង៤រូប និងមក ពីសង្គមស៊ីវិល ១រូបទៀត។ មកទល់ ពេលនេះ, គណបក្ស ទាំងពីរ មិនទាន់ ជជែក អំពី ការរៀបចំ សមាសភាព គ.ជ.ប. ថ្មី នេះនៅឡើយទេ គឺ រង់ចាំ សភាអនុម័តច្បាប់ ស្ដីពី ការរៀបចំ និងការប្រព្រឹត្តទៅ នៃគ.ជ.ប. និងការអនុម័ត សេចក្ដីព្រាងច្បាប់ ការវិសោធនកម្ម ច្បាប់បោះឆ្នោត ជាមុនសិន៕
No comments:
Post a Comment