កម្ពុជា និងថៃ ប្ដេជ្ញាដោះស្រាយ បញ្ហាព្រំដែន ដែលនៅសេសសល់
RFA / វិទ្យុ អាស៊ី សេរី | ១៩ តុលា ២០១៤
លោក នាយករដ្ឋមន្ត្រី ហ៊ុន សែន ថ្លែងក្នុងសន្និសីទ ពាណិជ្ជកម្ម នារាជធានី ភ្នំពេញ កាលពីព្រឹក ថ្ងៃ ទី៦ តុលា ២០១៤។ RFA/An Sithav
រដ្ឋាភិបាល កម្ពុជា និងរដ្ឋាភិបាល យោធាថៃ ប្ដេជ្ញាថា, នឹងដោះស្រាយ បញ្ហាព្រំដែន ដែលនៅសេសសល់ ដើម្បី សម្រួល ដល់កិច្ចសហប្រតិបត្តិការ រវាង ប្រទេសជិតខាង ទាំងពីរ ជាពិសេស ដើម្បី ជំរុញ ការអភិវឌ្ឍន៍ តាមបណ្ដោយ ព្រំដែន ដើម្បី ធ្វើឲ្យ តំបន់ព្រំដែន រវាង ប្រទេស ទាំងពីរ ក្លាយជាព្រំដែន សន្តិភាព និងសហប្រតិបត្តិការ លើគ្រប់វិស័យ។ ការប្ដេជ្ញា បែបនេះ ធ្វើឡើង នៅពេល ប្រមុខរដ្ឋាភិបាល កម្ពុជា និងថៃ ជួបពិភាក្សាគ្នា ដាច់ដោយឡែកមួយ ក្រៅជំនួប កំពូល អាស៊ី-អឺរ៉ុប លើកទី១០ ក្នុងទីក្រុង មីឡង់ (Milan) ប្រទេស អ៊ីតាលី (Italy) កាលពីថ្ងៃ ទី១៦ ដល់១៧ តុលា។
ការដោះស្រាយ បញ្ហាព្រំដែន, ការជំរុញ ការអភិវឌ្ឍន៍ តាមតំបន់ ព្រំដែន, ការបង្កើន ការផ្លាស់ប្ដូរ ពាណិជ្ជកម្ម រវាង កម្ពុជា និងថៃ សុទ្ធសឹង តែ ជាប្រធានបទ សំខាន់ៗ មួយចំនួន ដែលលោក នាយករដ្ឋមន្ត្រី ហ៊ុន សែន និងនាយករដ្ឋមន្ត្រី ថៃ ប្រាយុទ្ធ ចាន់ អូចា (Prayuth Chan O Cha) លើកមក ពិភាក្សា ជាមួយគ្នា ក្នុងពេល ទៅចូលរួម កិច្ចប្រជុំកំពូល អាស៊ី-អឺរ៉ុប ក្នុងប្រទេស អ៊ីតាលី។
ព័ត៌មាន ផ្សព្វផ្សាយ នៅលើគេហទំព័រ របស់ អង្គភាព ព័ត៌មាន និងប្រតិកម្ម រហ័ស នៃទីស្តីការ គណៈរដ្ឋមន្ត្រី ឲ្យដឹង ថា, ក្នុងជំនួប រវាង លោក ហ៊ុន សែន និងលោក ប្រាយុទ្ធ ចាន់ អូចា នោះ មេដឹកនាំ ប្រទេស ទាំងពីរ បានឯកភាព ថា នឹងមិនត្រូវ ទុកបញ្ហាព្រំដែន ដែលនៅ សេសសល់ ឲ្យក្លាយ ជាឧបសគ្គ ដល់កិច្ចសហប្រតិបត្តិការ រវាង ប្រទេស ទាំងពីរ នោះឡើយ។ ពួកគេ ក៏ប្ដេជ្ញា ខិតខំ ពង្រីក កិច្ចសហប្រតិបត្តិការ ឲ្យកាន់តែ រឹងមាំ ទ្វេឡើង ថែមទៀត, ជាពិសេស រិះរក គ្រប់មធ្យោបាយ ក្នុងការអភិវឌ្ឍន៍ តំបន់ព្រំដែន មួយ ប្រកប ដោយសន្តិភាព, កិច្ចសហប្រតិបត្តិការ ពាណិជ្ជកម្ម, វិនិយោគ ការផ្លាស់ប្ដូរ ទេសចរណ៍, វប្បធម៌, កីឡា, និងភាព រីកចម្រើន របស់ ពលរដ្ឋ ដែលរស់នៅ តាមតំបន់ព្រំដែន នៃប្រទេស ទាំងពីរ។
ក្នុងជំនួប នោះដែរ លោក ប្រាយុទ្ធ ចាន់ អូចា បានថ្លែងថា រដ្ឋាភិបាលថៃមានគោលនយោ បាយ និងគោលបំណង បង្កើតតំបន់សេដ្ឋកិច្ចពិសេស នៅតាមតំបន់មួយចំនួននៃព្រំ ដែនកម្ពុជា ថៃ ពិសេសនៅតំបន់ប៉ោយប៉ែត ដើម្បីធ្វើការអភិវឌ្ឍន៍ សម្រាប់ធ្វើជាតំបន់ ពាណិជ្ជកម្ម សណ្ឋាគារ ទីក្រុង និងហេដ្ឋារចនាសម្ព័ន្ធផ្សេងៗ ព្រមទាំងរោងចក្រខ្នាតតូច ដើម្បីផ្ដល់ឱកាសឲ្យពលរដ្ឋរស់នៅតាមបណ្ដោយព្រំដែន និងពលករខ្មែរអាចរកការងារ ក្នុង តំបន់សេដ្ឋកិច្ចពិសេសនោះ។
ក្រៅពីនោះ លោក ប្រាយុទ្ធ ចាន់ អូចា ក៏បានសន្យាថា នឹងជួយសម្រួល និងផ្ដល់ភាពអនុគ្រោះផ្នែកច្បាប់ដល់ពលករកម្ពុជា ដែលចូលទៅបម្រើការងារក្នុងប្រទេសថៃ។
យ៉ាងណាក៏ដោយ ប្រមុខដឹកនាំថៃរូបនេះ ក៏មិនភ្លេចថ្លែងអំណរគុណ រដ្ឋាភិបាលកម្ពុជា ដែលបានដោះលែងអ្នកទោសថៃឈ្មោះ វីរៈ ស៊ុមខ្វាមឃីត ឲ្យមានសេរីភាពឡើងវិញ កាលពីពេលកន្លងមកនោះដែរ។
ជំនួបរវាងមេដឹកនាំប្រទេសជិតខាងទាំង២ ដែលជាសមាជិកអាស៊ាន នៅក្នុងទឹកដីអឺរ៉ុបនេះគឺជា ជំនួបផ្លូវការលើកទី១ គិតចាប់តាំងពីមេដឹកនាំយោធាថៃលោក ប្រាយុទ្ធ ចាន់ អូចា ត្រូវបានរដ្ឋសភាថៃបោះឆ្នោតជ្រើសតាំងជានាយករដ្ឋមន្ត្រី ក្នុងខែសីហា ឆ្នាំ២០១៤ កន្លងមក ដែលនៅពេលនោះ លោក ហ៊ុន សែន ក៏បានផ្ញើលិខិតចូលរួម អបអរសាទរ ផងដែរ។
យ៉ាងណាក៏ដោយ ក្នុងជំនួបនៅប្រទេសអ៊ីតាលីនោះ ភាគីទាំង២មិនបានបញ្ជាក់ ថាតើពួកគេនឹងដោះស្រាយបញ្ហាព្រំដែនសេសសល់នៅពេលណា ពិតប្រាកដនោះឡើយ។
ទាក់ទងបញ្ហាជម្លោះព្រំដែនកម្ពុជាថៃនេះ ជាពិសេសគឺជម្លោះព្រំដែននៅតំបន់ប្រាសាទ ព្រះវិហារ ភាគីថៃមិនទាន់បានអនុវត្ត តាមសាលដីការបស់តុលាការយុត្តិធម៌អន្តរជាតិខែវិច្ឆិកា ឆ្នាំ២០១៣ នៅឡើយ ដែលបានសម្រេចជាថ្មីឲ្យប្រទេសថៃដកគ្រប់កងកម្លាំង ប្រដាប់អាវុធ កងនគរបាល ឬឆ្មាំយាមផ្សេងទៀត ចេញពីតំបន់ប្រាសាទព្រះវិហារ។
ចំណែកខាងភាគីកម្ពុជាវិញ ក៏បានទុកពេលវេលាឲ្យភាគីថៃដោះស្រាយបញ្ហា វិបត្តិ នយោបាយផ្ទៃក្នុងជាមុនសិនដែរ។ ប៉ុន្តែពេលនេះ វិបត្តិនយោបាយក្នុងប្រទេសថៃ ហាក់ស្ងប់ស្ងាត់ទៅវិញហើយ។ តើវាគួរដល់ពេលដែលប្រទេសថៃ ងាកមកអនុវត្ត សាលដីការបស់តុលាការ យុត្តិធម៌អន្តរជាតិ ឬក៏យ៉ាងណា?
ចំពោះបញ្ហានេះ អ្នកវិភាគនយោបាយលោក បណ្ឌិត សុខ ទូច កត់សម្គាល់ថា តាមពិត កម្ពុជាគួរតែជំរុញឲ្យភាគីថៃអនុវត្តសាលដីការបស់តុលាការ តាំងសម័យរដ្ឋាភិបាល របស់អ្នកស្រី យីងឡាក់ ស៊ីណាវ៉ាត់ (Yingluck Sinawatra) មក ម្ល៉េះ ប៉ុន្តែលោកថា កម្ពុជាហាក់ថ្នមសុខភាពរដ្ឋាភិបាលរបស់អ្នកស្រី យីងឡាក់ ហើយទុករហូតដល់ប្រទេស ថៃមានបញ្ហានយោបាយ។ យ៉ាងណាក៏ដោយ លោកបណ្ឌិត សុខ ទូច ថា បញ្ហានៅតែអាច ដោះស្រាយបានដដែល ប្រសិនបើរដ្ឋាភិបាលថៃបច្ចុប្បន្ននេះ មានឆន្ទៈពិតប្រាកដ៖ «ការដែល យើងគោរពទៅតាមច្បាប់អន្តរជាតិ ឬតុលាការអន្តរជាតិ អាហ្នឹងគឺជាការ ស្រេចទៅហើយ ប៉ុន្តែខ្លាចក្រែងតែ គ្រាន់តែនីតិវិធី ភាពលោងលោម គេដឹងខ្មែរយើងចូល ចិត្ត ពាក្យផ្អែមល្ហែម ប៉ុន្តែនៅពេលខាងមុខនេះ យើងតាមដានថាតើ ថៃមានបំណងយ៉ាង ដូចម្ដេចនៅក្នុងការចរចាពីបញ្ហាប្រាសាទព្រះវិហារ។»
ព័ត៌មានរបស់អង្គភាពព័ត៌មាន និងប្រតិកម្មរហ័សនៃទីស្ដីការគណៈរដ្ឋមន្ត្រី ក៏ឲ្យដឹងដែរថា តបតាមការអញ្ជើញរបស់លោក ហ៊ុន សែន លោក ប្រាយុទ្ធ ចាន់ អូចា សន្យាថានឹងដឹកនាំគណៈប្រតិភូរដ្ឋាភិបាលថៃ មកបំពេញទស្សនកិច្ចនៅកម្ពុជា ពីថ្ងៃទី៣០ដល់៣១ ខែតុលា ខាងមុខ ដើម្បីពង្រឹង និងពង្រីកទំនាក់ទំនងកិច្ចសហប្រតិបត្តិការ ប្រទេសទាំង២ ឈាន ដល់ចំណុចកំពូលថ្មីមួយទៀត។
យ៉ាងណាក៏ដោយ លោកបណ្ឌិត សុខ ទូច ថា ប្រសិនបើថៃពិតជាមានឆន្ទៈធ្វើឲ្យប្រសើរ កិច្ចសហប្រតិបត្តិការលើគ្រប់វិស័យជាមួយកម្ពុជាមែននោះ រដ្ឋាភិបាលថៃត្រូវគោរពសាលដីកាតុលាការយុត្តិធម៌អន្តរជាតិជាមុន នោះមានន័យថា រដ្ឋាភិបាលថៃត្រូវដកកងទ័ព របស់ខ្លួនជាឯកតោភាគី ចេញពីតំបន់ប្រាសាទព្រះវិហាររបស់កម្ពុជា៕
No comments:
Post a Comment