កម្ពុជា, ថៃ, និងវៀតណាម បើកវេទិកា ស្ដីពី ការបន្ស៊ាំខ្លួន របស់ សហគមន៍ រស់នៅ តាមមាត់សមុទ្រ
RFA / វិទ្យុ អាស៊ី សេរី | ២៣ តុលា ២០១៤
វេទិកា ថ្នាក់តំបន់ ប្រចាំឆ្នាំ លើកទី៣ របស់ អង្គការ សហភាព
អន្តរជាតិ ដើម្បី ការអភិរក្ស ធម្មជាតិ (IUCN) នាសណ្ឋាគារ ឆ្នេរសុខា
ខេត្ត ព្រះសីហនុ នៅថ្ងៃ ទី២៣ ខែតុលា ឆ្នាំ២០១៤។ RFA/Den Ayuthyea
តំណាង អង្គការ សហភាព អន្តរជាតិ ដើម្បី ការអភិរក្ស ធម្មជាតិ មកពីប្រទេស ចំនួន៣, មានវៀតណាម, ថៃ, និងកម្ពុជា, រួមគ្នា បើកវេទិកា ថ្នាក់តំបន់ ដើម្បី ចែករំលែក បទពិសោធន៍ ស្ដីពី គម្រោង នៃការកសាង ភាពធន់ទ្រាំ ទៅនឹងផលប៉ះពាល់ នៃការប្រែប្រួល អាកាសធាតុ នៅអាស៊ីអាគ្នេយ៍។
មន្ត្រីជាន់ខ្ពស់ ក្រសួង បរិស្ថាន ដែលចូលរួម បើកវេទិកា បានគាំទ្រ គម្រោងនេះ និងចាត់ទុក ការប្រែប្រួល អាកាសធាតុ ពេលបច្ចុប្បន្ន ថា, ជាបញ្ហា គំរាមកំហែង ដ៏ធ្ងន់ធ្ងរមួយ ដែលពិភពលោក កំពុងជួបប្រទះ, ក្នុងនោះ រួមទាំង កម្ពុជា, ថៃ, និងវៀតណាម។
មន្ត្រីជាន់ខ្ពស់ នៃកម្មវិធី អង្គការ សហភាព អន្តរជាតិ ដើម្បី ការអភិរក្ស ធម្មជាតិ (ឬហៅកាត់ ថា, អាយយូស៊ីអិន, IUCN) ប្រចាំប្រទេស កម្ពុជា លោក គង់ គឹមស្រេង មានប្រសាសន៍ ថា, វេទិកា ថ្នាក់តំបន់ ប្រចាំឆ្នាំ លើកទី៣ ដែលកម្ពុជា ធ្វើជាម្ចាស់ផ្ទះ ពេលនេះ មានរយៈពេល ៣ថ្ងៃ, គឺ ចាប់ពីថ្ងៃ ទី២៣ ដល់ថ្ងៃ ទី២៥ ខែតុលា។ ហើយវេទិកានេះ រៀបចំ នៅសណ្ឋាគារ ឆ្នេរសុខា ខេត្តព្រះសីហនុ។
លោក បន្តថា, គម្រោង នៃការកសាង ភាពធន់ទ្រាំ ទៅនឹងផលប៉ះពាល់ នៃការប្រែប្រួល អាកាសធាតុ របស់ អាយយូស៊ីអិន សម្រាប់កម្ពុជា គឺ បានជ្រើសតំបន់ ឆ្នេរសមុទ្រ ខេត្តកំពត និងកោះកុង ដើម្បី ផ្ដោតលើការ ការពារ ធនធានធម្មជាតិ និងផ្តល់ ការអប់រំ ផ្សេងៗ ដល់ប្រជាសហគមន៍ ដែលងាយ រងគ្រោះ។ លោក បន្តថា, មុននឹងអនុវត្ត គម្រោងនេះ គឺ អង្គការ អាយយូស៊ីអិន បានធ្វើ ផែនការ គ្រប់គ្រង និងប្រើប្រាស់ ធនធានធម្មជាតិ ប្រកប ដោយនិរន្តរភាព, ព្រមទាំង បានកាត់បន្ថយ ការគំរាមកំហែង ទៅលើធនធាន ធម្មជាតិ និងជួយបង្កើន ភាពធន់ទ្រាំ ដល់ប្រជាសហគមន៍ តទល់ នឹងការប្រែប្រួល អាកាសធាតុ។
លោក បន្ថែមថា, ការងារ របស់ អាយយូស៊ីអិន ប្រចាំកម្ពុជា គឺ បានជួយអភិរក្ស ដែនជម្រក សត្វព្រៃ ពាមក្រសោប ដើម្បី ជួយកាត់បន្ថយ ហានិភ័យ របស់ សហគមន៍ កោះកាពិ ពីការប្រែប្រួល អាកាសធាតុ តាមរយៈ ការស្ដារឡើងវិញ នូវផ្លូវទឹក ធ្វើដំណើរ ពីកោះកាពិ មកទីរួមខេត្ត កោះកុង, ព្រមទាំង បានកំណត់ ផែនទី និងការអនុវត្ត ជាក់ស្តែង អំពី ព្រៃកោងកាង និងស្មៅសមុទ្រ នាខេត្ត កំពត ដើម្បី រួមចំណែក ដល់ការ ការពារ ពីផលប៉ះពាល់ និងបញ្ហាប្រឈម រវាង ប្រជាពលរដ្ឋ នៅក្នុងសហគមន៍ មានលំនៅឋាន និងប្រកប របរ តាមឆ្នេរសមុទ្រ៖ «អ្វី ដែលជាបទពិសោធន៍ នៅខាងថៃ ឬវៀតណាម និងអ្វី ដែលជាបទពិសោធន៍ នៅខាងថៃ និងវៀតណាម ឬអ្វី ដែលជាបញ្ហា នៅខាងថៃ និងវៀតណាម ឬនៅកម្ពុជា, យើង អាចផ្លាស់ប្ដូរ នៅក្នុងវេទិកានេះ។ អ្នករៀបចំ គោលនយោបាយ អាចជួបគ្នា, ជជែកគ្នា ផ្លាស់ប្ដូរ បទពិសោធន៍ និងជួបមុខគ្នា ដើម្បី កសាងបណ្ដាញ ទំនាក់ទំនង។ ទីពីរ សហគមន៍ និងសហគមន៍ ដូចដែលលោក បានឃើញស្រាប់ហើយ គឺយើងមានសហគមន៍មកពីប្រទេស និងសហគមន៍មកពីតាមតំបន់ឆ្នេរនៃខេត្តទាំង៤នៅកម្ពុជា និងសហគមន៍ពីខេត្តចំនួន៤ទៀតពីប្រទេសវៀតណាម បានអញ្ជើញមកជួបជជែកគ្នា និងផ្លាស់ប្ដូរយោបល់គ្នាទៅវិញទៅមក។»
លោក គង់ គឹមស្រេង ចាត់ទុកកិច្ចគាំពារបរិស្ថាន និងការអភិរក្សធនធានធម្មជាតិតំបន់ឆ្នេរសមុទ្រ ថាជាបញ្ហាប្រឈមដ៏លំបាកមួយ ដោយសារតែកំណើនប្រជាពលរដ្ឋ ការអភិវឌ្ឍគ្មាននិរន្តរភាព និងការថយចុះធនធានធម្មជាតិ ដែលនាំឲ្យបាត់បង់តុល្យភាពនៃប្រព័ន្ធអេកូឡូស៊ី និងធ្វើឲ្យខូចដល់សុខមាលភាពធនធានធម្មជាតិ ដែលទ្រទ្រង់ និងផ្តល់សេវាកម្មដល់ចង្វាក់ចំណីអាហារ ទីជម្រកលំនៅឋាន និងថាមពល។ លោកថា ទន្ទឹមគ្នានេះ ការប្រែប្រួលអាកាសធាតុ ក៏ជាបញ្ហាប្រឈមចម្បងមួយទៀតដែលបានបង្កឲ្យមានគ្រោះទឹកជំនន់ គ្រោះរាំងស្ងួត ខ្យល់ព្យុះ រន្ទះបាញ់ និងរលកកម្ដៅ ហើយភាពអវិជ្ជមាននេះ បានបង្កផលប៉ះពាល់ធ្ងន់ធ្ងរដល់អាយុជីវិត ផលដំណាំ ហេដ្ឋារចនាសម្ព័ន្ធ របរចិញ្ចឹមជីវិត សេដ្ឋកិច្ចសង្គម និងប្រព័ន្ធអេកូឡូស៊ីនៅក្នុងប្រទេសកម្ពុជា។ ហើយបញ្ហាប្រឈមនេះ គឺសហគមន៍តាមតំបន់ឆ្នេរជាអ្នកមានភាពរងគ្រោះជាងគេ ទៅនឹងផលប៉ះពាល់នៃការប្រែប្រួលអាកាសធាតុ ដោយសារតែអសមត្ថភាពនៃការបន្ស៊ាំខ្លួនរបស់ប្រជាសហគមន៍រស់តាមមាត់ សមុទ្រ បានយល់ដឹងតិចតួច និងជីវភាពពឹងផ្អែកទាំងស្រុងទៅលើធនធានធម្មជាតិ និងការខ្វះព័ត៌មាន ជាដើម។
បញ្ហានេះដែរ លោក ចាយ សាមិត្ត ប្រតិភូរាជរដ្ឋាភិបាលកម្ពុជា ទទួលបន្ទុកអគ្គនាយកដ្ឋានរដ្ឋបាលការពារ និងអភិរក្សធម្មជាតិនៃក្រសួងបរិស្ថាន មានប្រសាសន៍ថា បញ្ហាប្រែប្រួលអាកាសធាតុ គឺជាការគំរាមកំហែងដ៏ធ្ងន់ធ្ងរ ដែលពិភពលោកកំពុងជួបប្រទះ។ បញ្ហាប្រឈមនេះ ក៏បានជះឥទ្ធិពលដល់កម្ពុជា ថៃ និងវៀតណាម ថែមទៀត។ លោកបន្តថា បញ្ហាប្រឈមនៃការប្រែប្រួលអាកាសធាតុនេះ ប្រមុខដឹកនាំរដ្ឋាភិបាលកម្ពុជា ក៏បានដាក់បញ្ចូលទៅក្នុងគោលនយោបាយយុទ្ធសាស្ត្រចតុកោណ និងផែនការយុទ្ធសាស្ត្រអភិវឌ្ឍន៍ជាតិ ហើយក្រសួងបរិស្ថាន ក៏បានសហការធ្វើការងារនេះជាមួយដៃគូអភិវឌ្ឍន៍ វិស័យឯកជន និងអង្គការក្រៅរដ្ឋាភិបាលនានាជាបន្តបន្ទាប់។
លោក ចាយ សាមិត្ត ទទួលស្គាល់តម្លៃនៃប្រព័ន្ធអេកូឡូស៊ីនៅតាមតំបន់ឆ្នេរសមុទ្រ ដូចជាព្រៃកោងកាង និងស្មៅសមុទ្រ ជាដើម ថាបានជួយលើកកម្ពស់ដល់ជីវភាពរស់នៅរបស់ប្រជាសហគមន៍តំបន់ឆ្នេរ និងតួនាទីរបស់វា ក្នុងការកាត់បន្ថយហានិភ័យពីការប្រែប្រួលអាកាសធាតុថែមទៀត៖ «ចឹង ហើយបានជាបញ្ចូលបញ្ហាប្រែប្រួលអាកាសធាតុចូលទៅក្នុងយុទ្ធសាស្ត្រ ចតុកោណរបស់រដ្ឋាភិបាល ក្នុងការធ្វើម៉េចបន្ស៊ាំការប្រែប្រួលអាកាសធាតុទៅដល់សហគមន៍ មូលដ្ឋាន អាជ្ញាធរមូលដ្ឋាន ក៏ដូចជាថ្នាក់ជាតិ និងថ្នាក់ក្រោមជាតិ ដើម្បីឲ្យទទួលបាននូវការយល់អំពីការប្រែប្រួលអាកាសធាតុ ក៏ដូចជាការបន្ស៊ាំទៅនឹងការប្រែប្រួលអាកាសធាតុនៅក្នុងប្រទេស កម្ពុជា របស់យើង។»
គម្រោងការកសាងភាពធន់ទ្រាំទៅនឹងផលប៉ះពាល់ នៃការប្រែប្រួលអាកាសធាតុអាស៊ីអាគ្នេយ៍ ដែលមានការិយាល័យតំណាងនៅប្រទេសវៀតណាម ថៃ និងកម្ពុជា របស់សហភាពអន្តរជាតិ ដើម្បីការអភិរក្សធម្មជាតិ ផ្តល់មូលនិធិដោយសហភាពអឺរ៉ុប ដោយចាប់ផ្ដើមតាំងពីឆ្នាំ២០១១ មកម្ល៉េះ។ តាមរយៈវេទិកាថ្នាក់តំបន់នេះ មន្ត្រីជាន់ខ្ពស់រដ្ឋាភិបាល និងមន្ត្រីអង្គការ អាយយូស៊ីអិន អះអាងថា តាមរយៈវេទិកាប្រចាំឆ្នាំថ្នាក់តំបន់ ហើយមានការចូលរួមផ្តល់នូវបទពិសោធន៍ ចំណេះដឹង និងការអនុវត្តល្អៗពីកម្រិតថ្នាក់តំបន់ ដល់ថ្នាក់មូលដ្ឋាន រវាងអ្នកពាក់ព័ន្ធប្រទេសទាំង៣ គឺកម្ពុជា វៀតណាម និងថៃ នឹងជំរុញឲ្យការបន្ស៊ាំខ្លួនរបស់ប្រជាសហគមន៍ ទៅនឹងការប្រែប្រួលអាកាសធាតុ និងការអភិរក្សធនធានធម្មជាតិសមុទ្រមានលទ្ធផលប្រសើរនាថ្ងៃអនាគត៕
No comments:
Post a Comment