អាជ្ញាធរ អប្សរា បដិសេធ ចំពោះ ការផ្សាយ របស់CNN ថា, ជណ្ដើរ អង្គរ វត្ត គួរ ឲ្យភ័យខ្លាច
RFA / វិទ្យុ អាស៊ី សេរី | ១ តុលា ២០១៤
ភ្ញៀវទេសចរចម្រុះជាតិសាសន៍ជាច្រើនចូលទស្សនាអង្គរវត្ត នៃខេត្តសៀមរាប កាលពីថ្ងៃទី២៥ ខែសីហា ឆ្នាំ២០១៣។ RFA/Hang Savyouth
អាជ្ញាធរ អប្សរា បានប្រកាស បដិសេធ ការផ្សាយ របស់ ទូរទស្សន៍ ស៊ីអ៊ិនអ៊ិន (CNN) ថា, ជណ្ដើរ របស់ ប្រាសាទ អង្គរ វត្ត ជាជណ្ដើរ ដែលមានសភាព គួរ ឲ្យភ័យខ្លាច ជាងគេ ក្នុងចំណោម ជណ្ដើរឡើង ទៅកាន់ ទីតាំង រមណីយដ្ឋាន ល្បីៗ ចំនួន១៣ លើពិភពលោក។
មន្ត្រីជាន់ខ្ពស់ អាជ្ញាធរ អប្សរា បានឲ្យដឹង ថា, បច្ចុប្បន្ន ជណ្ដើរឡើង ទៅកាន់កំពូល ប្រាសាទ នៅអង្គរ វត្ត នោះ មានការរៀបចំ ដើម្បី ឲ្យទេសចរ អាចឡើងចុះ ដោយសុវត្ថិភាពហើយ។
មន្ត្រីជាន់ខ្ពស់ អាជ្ញាធរ អប្សរា បានចាត់ទុក ការផ្សាយ របស់ ទូរទស្សន៍ ពិភពលោក ស៊ីអ៊ិនអ៊ិន ថា, ជាការបំផ្លើស ខុស ពីការពិត ចំពោះ ព័ត៌មាន ថា, គួរ ឲ្យភ័យខ្លាច អំពី ជណ្ដើរឡើង ទៅកាន់កំពូល ប្រាសាទ នៅអង្គរ វត្ត ខេត្ត សៀមរាប។
លោក ប៊ុន ណារិទ្ធិ អគ្គនាយក អាជ្ញាធរ អប្សរា មានប្រសាសន៍ នៅថ្ងៃ ទី១ តុលា ថា, រូបភាពជណ្ដើរ ដែលទូរទស្សន៍ ស៊ីអ៊ិនអ៊ិន ផ្សាយនោះ គឺ មិនត្រឹមត្រូវទេ។ វា ជារូបភាព ចាស់ ជាង៥ឆ្នាំ មកហើយ។ លោក ចាត់ទុក ការផ្សាយ ព័ត៌មាន របស់ ស៊ីអ៊ិនអ៊ិន អំពី ជណ្ដើរ នៅប្រាសាទ អង្គរ វត្ត នោះ គឺ គ្មាន ការផ្ទៀងផ្ទាត់, ហើយ ខុស ពីការពិត៖ «មិនដឹង ថា អ្នក និយាយនោះ មានបំណង អី? គាត់ និយាយនោះ បើ ធៀប ជាមួយ ការពិត គឺ វា មិនពិត។ យករូបថត ជារឿងយូរ មកហើយ មកនិយាយ! ធ្វើ ឲ្យអ្នកមើល យល់ច្រឡំស្មាន ថា, សម័យ ឥឡូវនេះ។ អាចគេ មានបំណង ណាមួយ, ខ្ញុំ ក៏មិនដឹងដែរ។ តែ យើង ពិបាកទទួលណាស់ ព្រោះ រូបថត ដែលថត ច្រើនឆ្នាំ មកហើយ ផ្សាយអ៊ីចឹង ដូចជាបច្ចុប្បន្ន នេះ អ៊ីចឹង។»
កាលពីថ្ងៃទី២៥ កញ្ញា វែបសាយ (Website) របស់ទូរទស្សន៍ ស៊ីអ៊ិនអ៊ិន ឈ្មោះ ស៊ីអ៊ិនអ៊ិន ត្រាវែល បានបង្ហោះអត្ថបទមួយ ដោយមានដាក់រូបថតជណ្ដើរចោតឡើងទៅកំពូលប្រាសាទអង្គរវត្ត ដោយមានភ្ញៀវទេសចរកំពុងតែតោងចុះពីលើមកផង។ អត្ថបទនោះ បានដាក់ចំណងជើងថា ជណ្ដើរដ៏គួរឲ្យខ្លាចនៅលើពិភពលោក។ ចំពោះចំណងជើងរូបថតវិញ ស៊ីអ៊ិនអ៊ិន បានដាក់ចំណងជើងថា កាំជណ្តើរនៅប្រាសាទអង្គរវត្តនៅកម្ពុជា ជាការរំឭកឲ្យអ្នកឡើងជណ្ដើរនោះដឹងថា ការឡើងឋានសួគ៌មិនមែនជាការងាយទេ។
នៅថ្ងៃទី៣០ កញ្ញា អាជ្ញាធរអប្សរាបានចេញផ្សាយសេចក្តីបំភ្លឺចំនួន ៥ទំព័រ ឆ្លើយតបអត្ថបទរបស់ ស៊ីអ៊ិនអ៊ិន នោះ និងចាត់ទុកថា ការផ្សាយរបស់ ស៊ីអ៊ិនអ៊ិន មិនត្រឹមត្រូវទេ គឺជាការបំផ្លើស ហើយរូបថតនោះជារូបថតចាស់ជាយូរឆ្នាំមកហើយ។
លិខិតបំភ្លឺរបស់អាជ្ញាធរអប្សរាបានឲ្យដឹងថា បច្ចុប្បន្នមានជណ្ដើរជាច្រើនសម្រាប់ឡើងទៅលើប៉មកំពូលប្រាសាទ កណ្ដាលនោះ ឬហៅថា បាកាណនោះ បានបិទហាមឃាត់ ហើយមានជណ្ដើរថ្មី២ ធ្វើពីឈើទំហំ ១ម៉ែត្រ ២តឹក មាន ៤៧កាំ ដោយមានបង្កាន់ដៃសម្រាប់ភ្ញៀវទេសចរប្រើឡើង និងចុះ។
ទាក់ទងនឹងជណ្ដើរឡើងកំពូលប៉មប្រាសាទអង្គរវត្តនេះ អ្នកបកប្រែភាសា និងមគ្គុទ្ទេសក៍ភ្ញៀវមួយរូប គឺលោក ព្រំ សុវណ្ណ មានប្រសាសន៍ថា ជណ្ដើរចោតឡើងទៅកំពូលប្រាសាទអង្គរវត្ត ឬហៅថាបាកាណនោះ គឺមានការលំបាកមែន។ លោកបានលើកឡើងថា ពិតមែនតែមានជណ្ដើរឈើថ្មីសាងសង់សម្រាប់ភ្ញៀវឡើងចុះមែន ប៉ុន្តែវាមានលក្ខណៈចង្អៀត ព្រោះទេសចរភាគច្រើនចង់ឡើងទៅលើបាកាណនោះ នៅពេលពួកគេមកលេងអង្គរវត្ត៖ «ខ្ញុំជាអ្នកមគ្គុទ្ទេសក៍ទេសចរណ៍ នោះ ខ្ញុំសង្កេតឃើញថា មានការពិបាកនៅកន្លែងនោះមែនទែន។ មើលទៅវាមានបង្កាន់ដៃតែពីរជណ្ដើរទេ តែដល់កន្លែងដែរផុតនោះ ហើយដល់ចូលទៅនោះអត់មានបង្កាន់ដៃទេ។ អ៊ីចឹងក៏វាអាចបង្កគ្រោះថ្នាក់មួយដែរ។ សំណូមរបស់ខ្ញុំ បើសិនជាអាចធ្វើទៅរួច សុំធ្វើកន្លែងឡើងផ្សេង កន្លែងចុះផ្សេង ហើយសុំធ្វើបង្កាន់ដៃឲ្យដល់ខាងលើ បើធ្វើត្រឹមតែជណ្ដើរអ៊ីចឹង ក៏វាពិបាកដែរ។»
រមណីយដ្ឋានអង្គរ បានទទួលចំណាត់ថ្នាក់ជាបេតិកភណ្ឌពិភពលោក ចាប់ពីខែធ្នូ ឆ្នាំ១៩៩២។ របាយការណ៍រដ្ឋាភិបាលបានឲ្យដឹងថា នៅក្នុងឆ្នាំ២០១៣ មានភ្ញៀវទេសចរជាង ៤លាននាក់ មកទស្សនកិច្ចប្រទេសកម្ពុជា បើប្រៀបធៀបជាមួយឆ្នាំ២០១២ គឺមានការកើនឡើង ១៧,៥%៕
No comments:
Post a Comment