រដ្ឋាភិបាល មិនអនុវត្ត គម្រោងសង់ទំនប់ វារីអគ្គិសនី តំបន់អារ៉ែង នៅអាណត្តិ នេះទេ
RFA / វិទ្យុ អាស៊ី សេរី | ១ តុលា ២០១៤
មេដឹកនាំ គណបក្ស ប្រឆាំង លោក សម រង្ស៊ី អះអាង ថា, រដ្ឋាភិបាល អាណត្តិ ទី៥នេះ នឹងមិនអនុវត្ត គម្រោងទំនប់ វារីអគ្គិសនី តំបន់អារ៉ែង ខេត្តកោះកុង ទេ។ លោក ថ្លែងបែបនេះ នៅមុខមន្ទីរ រដ្ឋសភាជាតិ បន្ទាប់ ពីលោក ជួបចរចា ក្រៅផ្លូវការ ជាមួយ លោក ហ៊ុន សែន ក្នុងកិច្ចប្រជុំ សភា នៅថ្ងៃ ទី១ ខែតុលា។
ទោះបី លោក នាយករដ្ឋមន្ត្រី ហ៊ុន សែន មិនបាន និយាយផ្ទាល់ ជាមួយ ក្រុមកាសែត, ប៉ុន្តែ លោក បានប្រាប់ តាមរយៈលោក សម រង្ស៊ី ថា, រដ្ឋាភិបាល អាណត្តិនេះ អត់ទាន់មាន សេចក្តីសម្រេច ណាមួយ ដើម្បី អភិវឌ្ឍតំបន់ អារ៉ែង ទៅជាទំនប់ វារីអគ្គិសនីទេ។ លោក សម រង្ស៊ី បានថ្លែង ប្រាប់ទៅ ប្រជាពលរដ្ឋ កុំ ឲ្យមាន ការព្រួយបារម្ភ ចំពោះ ការអភិវឌ្ឍ តំបន់អារ៉ែង នេះ៖ «វារីអគ្គិសនី នៅអារ៉ែង នេះ, សម្ដេច ហ៊ុន សែន បានបញ្ជាក់ ប្រាប់ខ្ញុំ ថា, ប្រហែល អាណត្តិនេះ អត់ធ្វើទេ, អត់សម្រេច អាណត្តិនេះទេ, លើកទៅ ជំនាន់ក្រោយ។ ខ្មែរយើង ជំនាន់ក្រោយ, អ្នក សម្រេចទៅ។ កុំឲ្យ បងប្អូន បារម្ភ។»
នាយក អង្គការ វេទិកា មិនមែន រដ្ឋាភិបាល (ឬហៅកាត់ ថា អិនជីអូ ហ្វរ៉ុម, NGO Forum) លោក តឹក វណ្ណារ៉ា បានថ្លែង ស្វាគមន៍ ចំពោះ ការពន្យារពេល របស់ រដ្ឋាភិបាល ក្នុងការអភិវឌ្ឍ តំបន់ស្ទឹង អារ៉ែង នេះ។ ជាងនេះ ទៅទៀត, លោក ទាមទារ ឲ្យរដ្ឋាភិបាល មុន នឹងសម្រេច អភិវឌ្ឍតំបន់ ណាមួយ ត្រូវ មានការចូលរួម ពីសង្គមស៊ីវិល និងភាគី ពាក់ព័ន្ធ ដទៃទៀត។
ទោះបី ការអភិវឌ្ឍ តំបន់អារ៉ែង មិនទាន់ លេចរូបរាងក្តី, ប៉ុន្តែ ព្រៃឈើ នៅតំបន់នេះ កំពុង ត្រូវ បានឈ្មួញ កាប់បំផ្លាញ ជាបន្តបន្ទាប់។ ករណីនេះ លោក សម រង្ស៊ី អះអាង ថា, លោក នឹងប្រើប្រាស់ តួនាទី ជាអ្នកតំណាងរាស្ត្រ ដើម្បី ទៅពិនិត្យមើល ការកាប់បំផ្លាញ ព្រៃឈើ នៅតំបន់ អារ៉ែង, ព្រមទាំង ស្នើឲ្យ រដ្ឋាភិបាល ពិនិត្យឡើងវិញ ចំពោះ ករណីនេះ៕
No comments:
Post a Comment