សាលារាជធានី ភ្នំពេញ មិនឲ្យ ពលរដ្ឋ ហែក្បួន ក្នុងថ្ងៃ ទិវាសិទ្ធិ លំនៅដ្ឋាន ពិភពលោក ឆ្នាំ២០១៤នេះ
VOD | ១ តុលា ២០១៤
ស្តាប់ សំឡេង៖ |
ចម្លងទុក |
ការប្រារព្ធ ពិធី សិទ្ធិលំនៅដ្ឋាន កាលពីឆ្នាំ ២០១៣
សាលារាជធានី ភ្នំពេញ មិនអនុញ្ញាត ឲ្យប្រជាពលរដ្ឋ ហែក្បួន ក្នុងទិវា សិទ្ធិ លំនៅដ្ឋាន ពិភពលោក ខួបលើក ទី២៩ ដែលនឹងប្រព្រឹត្ត នៅថ្ងៃ ទី៦ ខែតុលានេះ, ដោយលើកឡើង ថា, មនុស្ស ច្រើនពេក, មិនអាច គ្រប់គ្រងបាន, ហើយ អាចបង្ក ឲ្យអសន្តិសុខ នៅពេលនោះ។
កំណត់ហេតុ ប្រជុំ ពិភាក្សា របស់ សាលារាជធានី ភ្នំពេញចេញ ថ្ងៃ ទី១ ខែតុលា ស្តីពី ការជូនដំណឹង រៀបចំ ប្រារព្ធទិវា សិទ្ធិលំនៅដ្ឋាន ពិភពលោក ដែលនឹងប្រព្រឹត្តទៅ នៅថ្ងៃ ទី៦ ខែតុលា ឲ្យដឹង ថា, ស្ថាប័ននេះ អនុញាតិ ឲ្យប្រជាពលរដ្ឋ ក៏ដូចជា សង្គមស៊ីវិល ប្រារព្ធទិវា ទីលាន ប្រជាធិបតេយ្យ, តែ មិនអនុញ្ញាត ឲ្យពួកគេ ហែក្បួន នោះទេ ដោយបារម្ភ ថា, ខ្លាចមាន ជន ឆ្លៀតឱកាស បង្កហិង្សា ឬភាពវឹកវរ ផ្សេងៗ ទៅដល់សង្គម ដោយសារ មានមនុស្ស ច្រើនពេក សមត្ថកិច្ច មិនអាច គ្រប់គ្រង បានទេ។
តាមការគ្រោងទុក ទាក់ទង នឹងកម្មវិធីនេះ, ប្រជាពលរដ្ឋ ក៏ដូចជា អង្គការ សិទ្ធិលំនៅដ្ឋាន គ្រោងជួបជុំគ្នា នៅសហគម ដីក្រហម ក្នុងរាជធានី ភ្នំពេញ, ហើយ ហែក្បួន ទៅមន្ទី រដ្ឋសភា, ហើយ ចុងក្រោយ ហែទៅ សាលារាជធានី, មានមនុស្ស ចូលរួម ១,៥០០នាក់។
តំណាង គណៈកម្មាការ រៀបចំ ទិវាសិទ្ធិ លំនៅដ្ឋាន ពិភពលោក ដែលបានចូលរួមក្នុងកិច្ចប្រជុំជាមួយថ្នាក់ដឹកនាំ និងមន្ត្រីសាលារាជធានីភ្នំពេញ នៅព្រឹកមិញនេះអ្នកស្រី ស៊ា ណារ៉េត មានប្រសាសន៍ថា ខ្លួននឹងដឹកនាំកម្មវិធីតាមការគ្រោងទុក ដោយមានការហែក្បួន ដើម្បីហែដាក់ញ្ញត្តិទៅស្ថាប័នពាក់ព័ន្ធ និងបង្ហាញឲ្យប្រជាជនផ្សេងៗដឹង និងផ្តល់សិទ្ធិរស់នៅត្រឹមត្រូវដល់ជនរងគ្រោះករណីដីធ្លី ដែលកំពុងខ្វះជម្រក។ អ្នកស្រីថា «ឲ្យប្រជាពលរដ្ឋទាំងអស់គាត់បាន ប្រារព្ធទិវាសិទ្ធិលំនៅដ្ឋាន ប្រជាពលរដ្ឋយើងទូទៅឲ្យគាត់យល់ដឹង ឲ្យគាត់យល់ដឹង ឲ្យគាត់ចូលរួម ឥឡូវបាត់បង់លំនៅដ្ឋាន យើងប្រារព្ធទិវាសិទ្ធិលំនៅដ្ឋាននេះ គឺថាប្រជាពលរដ្ឋមួយៗត្រូវមានលំនៅដ្ឋានសមរម្យ ដោយមានសិទ្ធិរស់នៅ មានលំនៅដ្ឋានសមរម្យ។»
នាយកលេខាធិការដ្ឋានក្រុមការងារពិសេសទទួលបន្ទុកផ្នែកសិទ្ឋិ លំនៅដ្ឋាន លោក សៀ ភារម្យ មានប្រសាសន៍ថា អាជ្ញាធរគួរតែអនុញ្ញាតឲ្យពលរដ្ឋហែក្បូន ព្រោះដើម្បីបានបង្ហាញពីបញ្ហារបស់ពួកគេ ហើយថានេះជាទិវាសិទ្ធិលំនៅដ្ឋានពិភពលោក។ លោកបន្តថា បញ្ហានឹងមិនអាចកើតឡើងនោះទេ ប្រសិនបើមានការចូលរួមពីអាជ្ញាធរ។ លោកមានប្រសាសន៍ថា «ប៉ូលីសនាំផ្លូវទៅធ្វើម៉ូតូស ដូចអ្នកធំនាំ ហ៊ុន សែន ដែរទៅមានបញ្ហាអី មួយភ្លែតហ្នឹងគ្រាន់តែជួយហែជួយអីចូលរួមមកមានរឿងអីស្ទះ ហើយគាត់ជួយចរាចរណ៍ វាដូចនៅស្រុកគេ ប៉ូលីសគេហែនាំមុខពិធីហ្នឹង ហើយវាអត់មានរឿងអីស្ទះទេ ហើយសុំទោសគេ ដែលផ្លូវឆ្លងកាត់ប៉ះពាល់ហ្នឹង គឺប៉ូលីសសុំគេ ៥នាទី ១០នាទី ទម្រាំតែក្បួនហែផុតទៅផ្លូវរថភ្លើងអ៊ីចឹង។»
VOD មិនអាចទាក់ទងអ្នកនាំពាក្យសាលារាជធានីភ្នំពេញ លោក ឡ៉ុង ឌីម៉ង់ បានទេដោយលោកមិនលើកទូរស័ព្ទ។
សមាគម ការពារ សិទ្ធិមនុស្ស អាដហុក បង្ហាញរបាយការណ៍ នៅខែ ឧសភា ឆ្នាំ២០១៤ នេះថា, ជម្លោះដីធ្លី ចាប់ពីឆ្នាំ ២០០០ រហូត ដល់ឆ្នាំ ២០១៣ មានមនុស្ស ចំនួន ៧៧០,០០០នាក់ បានទទួលរង ផលប៉ះពាល់ យ៉ាងធ្ងន់ធ្ងរ។ ចំណែកក្នុងឆ្នាំ២០១៣ មានការចោទប្រកាន់មនុស្ស១០៩នាក់ ចាប់ខ្លួន៤៣នាក់ ហើយជាប់ដាក់ពន្ធនាគារ១៩នាក់។ ភាគច្រើននៃជនរងគ្រោះដោយសារបញ្ហាដីធ្លីបានបាត់បង់មុខរបរ និងគ្មានទីជម្រក៕
No comments:
Post a Comment