រដ្ឋាភិបាល មិនអាច ដំឡើងប្រាក់ខែ ជូនកម្មករ ឲ្យបាន ១៧៧ ដុល្លារ ក្នុងស្ថានភាព បច្ចុប្បន្ន
RFA / វិទ្យុ អាស៊ី សេរី | ២ តុលា ២០១៤
ទេសរដ្ឋមន្ត្រី និងជារដ្ឋមន្ត្រី ក្រសួង ឧស្សាហកម្ម
និងសិប្បកម្ម លោក ចម ប្រសិទ្ធិ (ឆ្វេង)
និងជាអតីត រដ្ឋមន្ត្រី ក្រសួ ងពាណិជ្ជកម្ម
ថ្លែងនៅក្នុង កិច្ចប្រជុំសភា នៅថ្ងៃ ទី២ ខែតុលា ឆ្នាំ២០១៤។ RFA/Tin Zakariya
តំណាង រដ្ឋាភិបាល បានបកស្រាយ នៅក្នុងរដ្ឋសភា ជូនគណបក្ស ប្រឆាំង ថា, រដ្ឋាភិបាល មិនអាច ដំឡើងប្រាក់ខែ ជូនកម្មករ ឲ្យបាន ចំនួន ១៧៧ដុល្លារ នោះទេ ពីព្រោះ ថា, នៅមាន បញ្ហា ជាច្រើន ដែលធ្វើ ឲ្យនិយោជក មិនអាច ចំណេញបាន នៅក្នុងស្ថានភាព បច្ចុប្បន្ននេះ ដោយគេ ត្រូវ បង់ពន្ធ ជូនប្រទេស នាំចូល សម្លៀកបំពាក់ ពីកម្ពុជា។
ការអះអាង បែបនេះ នៅក្នុងសម័យ ប្រជុំសភា លើកទី៣ នីតិកាល ទី៥ នៅថ្ងៃ ព្រហស្បតិ៍ ទី២ តុលា ដែលតំណាងរាស្ត្រ គណបក្ស ប្រឆាំង បានទាមទារ ឲ្យដំឡើង ប្រាក់ខែ ជូនកម្មករ ដើម្បី ឲ្យកម្មករ រស់នៅ បានសមរម្យ ក្នុងតម្លៃ ជាមនុស្ស។
មន្ត្រីជាន់ខ្ពស់ រដ្ឋាភិបាល និងជាអតីត រដ្ឋមន្ត្រី ពាណិជ្ជកម្ម ឆ្លើយតប ទៅនឹង ការស្នើសុំ របស់ តំណាងរាស្ត្រ គណបក្ស សង្គ្រោះជាតិ នៅក្នុងកិច្ចប្រជុំ រដ្ឋសភា ព្រឹកថ្ងៃ ទី២ តុលា ថា, រដ្ឋាភិបាល មិនអាច ដំឡើងប្រាក់ខែ ជូនកម្មករ តាមការស្នើសុំ បានទេ។
ទេសរដ្ឋមន្ត្រី និងជារដ្ឋមន្ត្រី ក្រសួង ឧស្សាហកម្ម និងសិប្បកម្ម លោក ចម ប្រសិទ្ធិ និងជាអតីត រដ្ឋមន្ត្រី ក្រសួង ពាណិជ្ជកម្ម បានលើកឡើង នៅក្នុងកិច្ចប្រជុំ សភា នៅខណៈ សភា ប្រជុំពិភាក្សា អនុម័ត សេចក្ដីព្រាងច្បាប់ ស្ដីពី វិសោធនកម្ម មាត្រា មួយចំនួន នៃច្បាប់ ស្ដីពី ការគ្រប់គ្រង រោងចក្រ និងសិប្បកម្ម ថា, រដ្ឋាភិបាល ចង់ឲ្យ ដំឡើងប្រាក់ខែ ជូនកម្មករ លើសពីកម្មករ ទាមទារ បច្ចុប្បន្ន ទៅទៀត, តែ មូលហេតុ ដែលមិនអាច ដំឡើងបាន ដោយសារតែ ប្រទេសទិញ សម្លៀកបំពាក់ ពីកម្ពុជា នោះ គឺ អ្នកបញ្ជាទិញ ត្រូវ បង់ពន្ធ អស់ច្រើន។
លោក ចម ប្រសិទ្ធិ អះអាងថា ការនាំសម្លៀកបំពាក់ទៅកាន់ប្រទេសមួយចំនួន គឺអយុត្តិធម៌សម្រាប់កម្ពុជា ណាស់ ដូចជា ការនាំសម្លៀកបំពាក់ទៅលក់នៅសហរដ្ឋអាមេរិក បានថវិកាប្រមាណ ៦ពាន់លានដុល្លារសហរដ្ឋអាមេរិក គឺត្រូវបង់ពន្ធចន្លោះពី ៤៦០លាន ទៅ ៥០០លានដុល្លារសហរដ្ឋអាមេរិក ក្នុង១ឆ្នាំៗ។ ការនាំចេញទៅប្រទេសបារាំង បានថវិកាប្រមាណ ៤ពាន់លានដុល្លារសហរដ្ឋអាមេរិក ត្រូវបង់ពន្ធប្រមាណ ៥០០លានដុល្លារ និងការនាំទៅប្រទេសអង់គ្លេស ក៏ដូចគ្នា គឺអ្នកបញ្ជាទិញត្រូវបង់ពន្ធប្រមាណ ៥០០លានដុល្លារសហរដ្ឋអាមេរិក ដូចគ្នា។
លោក ចម ប្រសិទ្ធិ ពន្យល់ថា ការបង់ពន្ធទាំងនេះ គឺធ្វើឲ្យនិយោជកបាត់ចំណូល ហើយក៏ជាកត្តាមួយធ្វើឲ្យនិយោជកមិនអាចដំឡើងប្រាក់ឈ្នួលជូន កម្មករតាមការស្នើសុំនោះដែរ។
ទោះបីជាការអនុម័តសេចក្តីព្រាងច្បាប់ ស្ដីពីវិសោធនកម្មមាត្រាមួយចំនួន នៃច្បាប់ស្ដីពីការគ្រប់គ្រងរោងចក្រ និងសិប្បកម្ម ដែលតំណាងរាស្ត្រគណបក្សប្រឆាំងមិនបានជំទាស់ទៅនឹងការអនុម័ត សេចក្ដីព្រាងច្បាប់នេះក្ដី ក៏ប៉ុន្តែ តំណាងរាស្ត្រគណបក្សសង្គ្រោះជាតិ មួយចំនួន ក្នុងនោះមានទាំងមេគណបក្ស លោក សម រង្ស៊ី ផង បានទាមទារឲ្យរដ្ឋាភិបាលដំឡើងប្រាក់ខែជូនកម្មករ និងត្រូវគិតគូរពីលក្ខខណ្ឌការងារសមរម្យ មានប្រាក់ធានារ៉ាប់រងសង្គម និងត្រូវដំឡើងប្រាក់ខែជូនកម្មករឲ្យបាន ១៧៧ដុល្លារ ជាដើម។
ប្រធានគណបក្សសង្គ្រោះជាតិ និងជាតំណាងរាស្ត្រ លោក សម រង្ស៊ី មានប្រសាសន៍ថា ការបង្កើតអគាររោងចក្រឲ្យបានច្រើន មិនមែនជាកត្តាសំខាន់នោះទេ។ បញ្ហាសំខាន់នៅត្រង់ថា រដ្ឋាភិបាលត្រូវដំឡើងប្រាក់ខែជូនកម្មករ និងទប់ស្កាត់អតិផរណា ដើម្បីឲ្យកម្មករមានលទ្ធភាពរស់នៅបានសមរម្យជាមនុស្ស។
លោក សម រង្ស៊ី ដែលជាអតីតរដ្ឋមន្ត្រីក្រសួងសេដ្ឋកិច្ច និងជាអ្នកជំនាញសេដ្ឋកិច្ចផងនោះ អះអាងថា ការដំឡើងប្រាក់ខែជូនកម្មករក្នុងបច្ចុប្បន្ននេះ មិនមែនជាការលំបាកនោះទេ។ លោកបានលើកពីបញ្ហាជាក់ស្ដែងកំពុងកើតមាននៅក្នុងសង្គមកម្ពុជា ដោយលោកទទូចឲ្យរដ្ឋាភិបាលលុបបំបាត់ការចំណាយលុយក្រោមតុ គឺសំដៅលើអំពើពុករលួយ ដោះស្រាយបញ្ហាតម្លៃថាមពលអគ្គិសនីថ្លៃ បញ្ហាហេដ្ឋារចនាសម្ព័ន្ធ និងការដឹកជញ្ជូននៅកំពង់ផែមានតម្លៃថ្លៃ ជាដើម។
នៅក្នុងកិច្ចប្រជុំរបស់គណៈកម្មការប្រឹក្សាការងារ ស្ដីពីការចរចារឿងប្រាក់ឈ្នួលអប្បបរមារបស់កម្មករកាត់ដេរ និងស្បែកជើងនៅកម្ពុជា កាលពីខែកញ្ញា គឺខាងនិយោជក និងតំណាងសហជីព មិនទាន់ត្រូវរ៉ូវគ្នានៅឡើយ។ ខាងសហជីពនៅតែទាមទារឲ្យដំឡើងប្រាក់ឈ្នួលឲ្យបាន ១៧៧ដុល្លារក្នុង១ខែ នៅខណៈប្រាក់ខែកម្មករបានតែ ១០០ដុល្លារ។
ការចរចាអំពីប្រាក់ឈ្នួលរវាងភាគីកម្មករ និងថៅកែ គឺនៅចន្លោះតួលេខពី ១១០ដុល្លារ ទៅ ១៧៧ដុល្លារក្នុង១ខែ។ ប្រសិនបើមិនមានការព្រមព្រៀងគ្នាលើតួលេខណាមួយទេ រដ្ឋាភិបាលនឹងកំណត់តួលេខមួយឱ្យភាគីកម្មករទទួលយក។ ចំណុចនេះ ក៏ជាការស្នើសុំដោយភាគីថៅកែដែរ៕
No comments:
Post a Comment