ពលរដ្ឋ រងការ បណ្ដេញចេញ ប្រារព្ធទិវា សិទ្ធិលំនៅឋាន ពិភពលោក
RFA / វិទ្យុ អាស៊ី សេរី | ៦ តុលា ២០១៤
ពលរដ្ឋរងការបណ្ដេញចេញពីលំនៅឋានកាន់បដា
"សំឡេងអ្នកក្រក្រុងទីក្រុង"
ឈរចាំតំណាងរាស្ត្រចេញមកទទួលញត្តិនៅខាងមុខរដ្ឋសភា នៅថ្ងៃទី៦
តុលា ២០១៤។
RFA/Khe Sonorng
 |
| ពលរដ្ឋស្រែកទាមទារឲ្យតំណាងរាស្ត្រចេញមកយកញត្តិនៅខាងមុខរដ្ឋ |
ប្រជាពលរដ្ឋ រស់នៅ ក្នុងសហគមន៍ រងគ្រោះ ដោយការ បណ្ដេញចេញ, ព្រះសង្ឃ, និងក្រុមយុវជន ប្រមាណ ៣ពាន់អង្គ និងនាក់ មកពីខេត្ត-ក្រុង ចំនួន៨ បាននាំគ្នា ប្រារព្ធទិវា លំនៅឋាន ពិភពលោក លើកទី២៩ ដោយដើរ ហែក្បួន ពីអតីត សហគមន៍ ដីក្រហម ក្នុងសង្កាត់ ទន្លេបាសាក់, ខណ្ឌ ចំការមន យកញត្តិ ដាក់ជូន អ្នកតំណាងរាស្ត្រ នៅមន្ទីរ រដ្ឋសភា, ខុទ្ទកាល័យ លោក នាយករដ្ឋមន្ត្រី ហ៊ុន សែន, និងសាលារាជធានី ភ្នំពេញ។ ការប្រារព្ធ ដោយការហែក្បួននេះ ត្រូវ សាលារាជធានី ភ្នំពេញ បដិសេធ។
នៅក្នុងទិវាលំនៅឋានពិភពលោកលើកទី២៩ នៅថ្ងៃទី៦ ខែតុលា ដែលសហគមន៍រងគ្រោះដោយការបណ្ដេញចេញបានប្រារព្ធឡើងនោះ បានប្រែក្លាយពីការអបអរសាទរទៅជាការទាមទារឲ្យមន្ត្រីពាក់ព័ន្ធ ក្នុងស្ថាប័នថ្នាក់ជាតិដោះស្រាយវិបត្តិអត់ផ្ទះសម្បែងដីធ្លីជូន ពួកគាត់។
សំឡេងស្រែក ទាមទារ សុំលំនៅឋានវិញ
ក្រុមអ្នកតវ៉ាដែលពាក់អាវយឺតពណ៌ស ពាក់មួកស្លឹកត្នោត នៅលើអាវនិងមួកមានសរសេរពាក្យស្លោកថា "សំឡេងអ្នកក្រក្នុងទីក្រុង" បានធ្វើដំណើរពីអតីតសហគមន៍ដីក្រហម ក្នុងសង្កាត់ទន្លេបាសាក់ ដោយភាគច្រើនថ្មើរជើង ខ្លះជិះកង់ ម៉ូតូ និងរ៉ឺម៉កកង់បី កាន់ទង់ជាតិ ទង់សាសនា លើកបដាដែលសរសេរទាមទារឲ្យដោះស្រាយ បញ្ឈប់ការបណ្ដេញចេញដោយបង្ខំ និងសុំឲ្យរដ្ឋាភិបាលធ្វើការអភិវឌ្ឍន៍នៅនឹងកន្លែង។ ក្រៅពីនោះក៏មានបដារូបថតនៅពេលឈូសឆាយផ្ទះសម្បែងរបស់ពួកគេ។ ជាងនេះទៅទៀត ពួកគេក៏បានលើកកូនផ្ទះមួយខ្នង ហែជានិមិត្តរូបក្នុងពិធីនោះឆ្ពោះទៅមន្ទីររដ្ឋសភាថែមទៀត។
សំឡេងស្រែក ឲ្យអ្នកតំណាងរាស្ត្រ ចេញទទួលញត្តិ
អ្នកស្រី ជឹម សុខហេង មកពីភូមិស្វាយជ្រុំ ឃុំស្រអែម ស្រុកជាំក្សាន្ត ខេត្តព្រះវិហារ ដែលមានកាន់ញត្តិនៅនឹងដៃ បានស្នើអ្នកតំណាងរាស្ត្រដោះស្រាយវិវាទជូនពួកគាត់ជាបន្ទាន់។ អ្នកស្រីថា ដីធ្លីនិងផ្ទះសម្បែងត្រូវបានអាជ្ញាធរខេត្តនិងអាជ្ញាធរជាតិ ប្រាសាទព្រះវិហារ ឈូសឆាយបណ្ដេញចេញ ដោយថា ជាតំបន់អភិរក្សប្រាសាទព្រះវិហារ ជាសម្បត្តិបេតិកភណ្ឌពិភពលោក៖ «ឥឡូវ ហ្នឹងខ្ញុំសុំឲ្យអស់លោកមន្ត្រីខាងសភាមកទទួលញត្តិខ្ញុំផង។ អាយុ ៥៧ឆ្នាំហើយ មួយឆាកជីវិតខ្ញុំ ខ្ញុំខំរកមកឥឡូវគេឈូសឆាយអស់ដោយសារកម្លាំងអាជ្ញាធរជាតិប្រាសាទ ព្រះវិហារ ធ្វើលក្ខណៈចោរប្លន់ចាប់មាន់ចាប់ទា ចាប់ប្ដីខ្ញុំ ឃាត់ខ្លួន។ ខ្ញុំបានឮអនុសាសន៍សម្ដេចតេជោ ហ៊ុន សែន គាត់ឲ្យបងប្អូនខ្ញុំហែញត្តិមករកយុត្តិធម៌។ ឥឡូវយុត្តិធម៌នៅឯណា?»
អ្នកហែក្បួនបានស្រែករង់ចាំជិតមួយម៉ោងនៅមុខមន្ទីររដ្ឋសភាទម្រាំអ្នកតំណាងរាស្ត្រចេញមកទទួលញត្តិ។
លោកស្រី កែ សុវណ្ណរតន៍ អ្នកតំណាងរាស្ត្រគណបក្សសង្គ្រោះជាតិ ជាប្រធានគណៈកម្មការទី៨នៃរដ្ឋសភា និងលោកស្រី ឡោក ខេង សមាជិកគណៈកម្មការទី១នៃរដ្ឋសភាតំណាងរាស្ត្រមកពីគណបក្សប្រជាជន កម្ពុជា ចេញមកទទួលញត្តិពីពលរដ្ឋ។
លោកស្រី ឡោក ខេង បានថ្លែងទទួលស្គាល់ថា ពលរដ្ឋកំពុងជួបការលំបាកពិតប្រាកដ។
លោកស្រីថា នឹងរៀបចំយន្តការពិនិត្យតាមដានដោះស្រាយជូនពលរដ្ឋទាំងអស់ដែលមាននៅ ក្នុងញត្តិនេះ៖ «បើបងប្អូនជាប្រជាពលរដ្ឋឈឺចាប់នាងខ្ញុំ ជាតំណាងរាស្ត្រឈឺចាប់ជាងបងប្អូនទៅទៀត។ អ្វីដែលបងបងប្អូនប្រជាពលរដ្ឋកំពុងតែជួបលំបាក ទោះបីត្រូវច្បាប់ក្ដី មិនត្រូវច្បាប់ក្ដី យើងត្រូវពិនិត្យយើងត្រូវពិនិត្យទៅតាមយន្តការទាំងអស់ ដើម្បីដោះស្រាយ។ សំណូមពរបងប្អូនទាំងអស់នៅថ្ងៃនេះ យើងនឹងយកទៅពិភាក្សានៅក្នុងគណៈកម្មការទី១ ហើយយើងតាមដានជំរុញនូវរាល់ការអនុវត្តទាំងអស់ ហើយយើងគាំទ្រចំពោះការអភិវឌ្ឍនៅនឹងកន្លែង។»
យ៉ាងណាក៏ដោយ អ្នកតវ៉ាមិនបានបញ្ចប់ត្រឹមនេះនោះទេ។ ពួកគេមានគោលដៅបន្តដំណើរហែញត្តិទៅសាលារាជធានី និងទៅខុទ្ទកាល័យលោកនាយករដ្ឋមន្ត្រី ហ៊ុន សែន ទៀត ថ្វីត្បិតអភិបាលរងរាជធានីភ្នំពេញ លោក ឃួង ស្រេង មកទទួលញត្តិដល់កន្លែងជាថ្នូរមិនឲ្យហែក្បួនក៏ដោយ។
លោក ឃួង ស្រេង បានចាត់ទុកថា សហគមន៍ដីធ្លី និងអង្គការសង្គមស៊ីវិលដែលរៀបចំពិធីនេះ បានរំលោភនឹងកំណត់ហេតុ គោលការណ៍របស់ក្រសួងមហាផ្ទៃ រួចទៅហើយ។
កងសន្តិសុខជាច្រើនរយនាក់ ត្រូវបានគេដាក់ពង្រាយ និងបិទរបាំងនៅលើផ្លូវជាច្រើនកន្លែង ប៉ុន្តែមានការសម្រុះសម្រួលគ្នាវិញ រវាងអ្នករៀបចំពិធីនិងសាលារាជធានី ឲ្យយកញត្តិទៅដាក់នៅក្រោមដើមពោធិ៍ដែលមានមន្ត្រីខុទ្ទកាល័យលោក នាយករដ្ឋមន្ត្រី និងមន្ត្រីសាលារាជធានីចាំទទួលយកនៅទីនោះ។
ទាក់ទងនឹងការប្រារព្ធទិវាលំនៅឋានអន្តរជាតិឆ្នាំ២០១៤នេះ នាយកលេខាធិការដ្ឋាននៃក្រុមការងារពិសេសសិទ្ធិលំនៅឋាន លោក សៀ ភារម្យ បានវាយតម្លៃថា ប្រជាពលរដ្ឋមានការភ្ញាក់រលឹកនិងយល់ដឹងច្រើនក្នុងការចូលរួម។ រីឯអាជ្ញាធរក៏មានការប្ដូរឥរិយាបថច្រើន ដោយមានការបញ្ជូនតំណាងមកចរចាគ្មានអំពើហិង្សា។ ជាងនេះទៅទៀត តំណាងរាស្ត្រក៏បានចេញមកទទួលញត្តិនិងបានសន្យាដោះស្រាយជូនពលរដ្ឋ ទោះបីជាកន្លងមកអ្នកតំណាងរាស្ត្រទាំងនោះ បានកុហកមិនបានគោរពពាក្យសន្យារបស់ខ្លួនក៏ដោយ៕
No comments:
Post a Comment