Paris Peace Accords 23 Oct. 1991

Tuesday, November 18, 2014

រដ្ឋាភិបាល​ បារាំង​ នឹង​ផ្ដល់ ​ឯកសារ​​ ប្រវត្តិសាស្ត្រ ​ទឹកដី កម្ពុជា​ក្រោម​ តាម​ការ​ ស្នើសុំ | France will release documents pertaining to Kampuchea Krom as requested

រដ្ឋាភិបាល​ បារាំង​ នឹង​ផ្ដល់ ​ឯកសារ​​ ប្រវត្តិសាស្ត្រ ​ទឹកដី កម្ពុជា​ក្រោម​ តាម​ការ​ ស្នើសុំ

RFA / ​វិទ្យុ ​អាស៊ី សេរី | ១៦ វិច្ឆិកា ២០១៤

ខ្មែរ​ក្រោម តវ៉ា ៦២០
ប្រធាន​ សហគមន៍ ​ខ្មែរ​ កម្ពុជា​ ក្រោម លោក ថាច់ សេដ្ឋា ឈរ​កាន់​ញត្តិ ​រង់ចាំ​ ដាក់​ជូន​ ស្ថានទូត នា​រាជធានី ​ភ្នំពេញ នៅ​ព្រឹក​ថ្ងៃ ​ទី​១៣ សីហា ២០១៤។  RFA/Mom Sophon

រដ្ឋាភិបាល​ បារាំង ​អះអាង​ថា នឹង​ប្រគល់ ​ឯកសារ ​ផ្សេងៗ ពាក់ព័ន្ធ​ នឹង​ប្រវត្តិសាស្ត្រ​ ទឹកដី កម្ពុជា​ក្រោម ទៅ​ឲ្យ​ អង្គការ​ សមាគម​ ខ្មែរ​ កម្ពុជា ​ក្រោម​ តាម​ការ​ស្នើសុំ។  ការ​អះអាង​នេះ ធ្វើឡើង​ ប្រមាណ ​ជាង​១​ខែ បន្ទាប់ ពី​អង្គការ​ សមាគម ​ខ្មែរ​ កម្ពុជា​ ក្រោម បាន​ដាក់​ញត្តិ​ ទៅកាន់​ស្ថានទូត​ បារាំង ​ប្រចាំ​កម្ពុជា ដើម្បី​ ឲ្យ​អតីត​ ប្រទេស​គ្រប់គ្រង និង​ធ្វើ​អាណានិគម នៅ​ឥណ្ឌូចិន ​មួយ​នេះ បង្ហាញ ​ឯកសារ​នានា ពាក់ព័ន្ធ ​នឹង​ការ​កាត់​ទឹកដី​ កម្ពុជា​ ក្រោម ទៅ​ឲ្យ ​វៀតណាម។

ការ​អះអាង ​របស់ ​រដ្ឋាភិបាល​ បារាំង ​នៅ​ពេល​នេះ អាច​ចាត់ទុក ថា ​ជា​ដំណឹង​ល្អ ​សម្រាប់ អង្គការ​ សមាគម​ ខ្មែរ កម្ពុជា ​ក្រោម ក្នុង​ការ​ប្រមូល ​ឯកសារ​ ភស្តុតាង បន្ថែម ​ទៅលើ​ឯកសារ ដែល​មាន​ស្រាប់ ដើម្បី ​ធ្វើជា​មូលដ្ឋាន បង្ហាញ ​ឲ្យ​រដ្ឋាភិបាល ​វៀតណាម ដឹង​ថា​, ទឹកដី ​កម្ពុជា​ ក្រោម គឺ ជា​អតីត ​ទឹកដី​ របស់​ខ្មែរ ដែល​ទើប​ ត្រូវ​ បាន​បារាំង​ កាត់​ឲ្យ វៀតណាម ​នៅ​ឆ្នាំ ១៩៤៩, គឺ​ មិន​មែន ​ជា​ទឹកដី ​របស់ ​វៀតណាម ​តាំងពី​យូរ​ណាស់ ​មក​ហើយ ដូច​ការ​អះអាង របស់ ​មន្ត្រី​ ស្ថានទូត​ វៀតណាម ​ប្រចាំ​កម្ពុជា កាលពី​កន្លង មក​នោះ ​ឡើយ។

ប្រធាន​ សហគមន៍​ខ្មែរ​កម្ពុជា​ក្រោម លោក ថាច់ សេដ្ឋា មានប្រសាសន៍​នៅ​ថ្ងៃ​ទី​១៦ វិច្ឆិកា ថា ស្ថានទូត​បារាំង​ប្រចាំ​កម្ពុជា កាលពី​ថ្ងៃ​ទី​១៣ វិច្ឆិកា បាន​ឆ្លើយតប​ថា ប្រទេស​បារាំង យល់ព្រម​ប្រគល់​ឯកសារ​នានា​ពាក់ព័ន្ធ​នឹង​ទឹកដី​កម្ពុជា​ក្រោម ទៅ​ឲ្យ​អង្គការ​សមាគម​ខ្មែរ​កម្ពុជា​ក្រោម និង​សម្ព័ន្ធ​យុវជន​ទៅតាម​ការ​ស្នើសុំ។ ទោះជា​យ៉ាងណា លោក​ថា​ពួក​លោក ត្រូវ​ធ្វើ​ដំណើរ​ទៅ​យក​ឯកសារ​ទាំងនោះ​ដោយ​ផ្ទាល់ នៅ​ប្រទេស​បារាំង គឺ​ទៅតាម​ការ​ចង្អុលបង្ហាញ​របស់​រដ្ឋាភិបាល​បារាំង។

លោក ថាច់ សេដ្ឋា ចាត់​ទុក​ការ​ឆ្លើយតប​របស់​រដ្ឋាភិបាល​បារាំង​នៅ​ពេល​នេះ ថា​ជា​រឿង ប្រវត្តិសាស្ត្រ​ដំបូង​បំផុត​មួយ​សម្រាប់​ខ្មែរ​ក្រោម ហើយក៏​ជា​កិត្តិយស​មួយ​សម្រាប់​ខ្មែរ​ក្រោម និង​ក្រុម​យុវជន​កម្ពុជា​ផង​ដែរ។ លោក​ថា​ក្រុម​លោក​នឹង​រៀបចំ​គណៈប្រតិភូ​ផ្លូវការ ដើម្បី​ទៅ​យក​ឯកសារ​ទាំងនោះ ពី​ប្រទេស​បារាំង។ ទោះ​យ៉ាងណា លោក​មិនទាន់​អាច​បញ្ជាក់​ពី​ពេលវេលា​ជាក់លាក់​ដើម្បី​ធ្វើដំណើរ​ទៅ​ប្រទេស​ បារាំង​នៅឡើយ​ទេ ដោយ​លោក​ថា​​មាន​បញ្ហា​កង្វះខាត​ថវិកា៖ «ដោយសារ ​បញ្ហា​ថវិកា វា​ទាក់ទិន​នឹង​ការ​ស្នាក់នៅ ហូបចុក សំបុត្រ​យន្តហោះ ទាំងអស់ អ៊ីចឹង​យើង​មានការ​ខ្វះខាត អ៊ីចឹង​កំពុង​ប្រជុំ​គ្នា​ត្រូវ​ដោះស្រាយ​យ៉ាងម៉េច​អ៊ីចឹង មានតែ​អំពាវនាវ​ដល់​សប្បុរស​ជន ដែល​គាំទ្រ​ក្នុង​ស្មារតី​ហ្នឹង សូម​ឲ្យ​លោក​ជួយ​វិភាគទាន តាម​លទ្ធភាព​ដើម្បី​យើង​មានឱកាស យើង​មានលទ្ធភាព​ក្នុង​ការ​ទៅ តាំងពី​សំបុត្រ យន្តហោះ ក៏​ដូចជា​ការ​ស្នាក់នៅ ដូច​បងប្អូន​យើង​នៅ​ស្រុក​បារាំង​អីចឹង យើង​អាច​ស្នើ​គាត់ សុំ​ជួយ​ដល់​ការ​ស្នាក់នៅ ហូបចុក ឬក៏​ដឹកជញ្ជូន ឬ​ជួយ​ទៅដល់​ការស្រាវជ្រាវ​បកប្រែ​អី​ទាំង អស់ហ្នឹង។»

កាលពីដើម​ខែ​តុលា ឆ្នាំ​២០១៤ លោក ថាច់ សេដ្ឋា និង​ក្រុម​សម្ព័ន្ធ​យុវជន បាន​ដង្ហែ​ញត្តិ ទៅ​ដាក់​នៅ​ស្ថានទូត​បារាំង ដើម្បី​ស្នើ​ឲ្យ​រដ្ឋាភិបាល​បារាំង​ជួយ​បញ្ជាក់​អំពី​កិច្ចព្រមព្រៀង​នានា រវាង​បារាំង និង​វៀតណាម ដែល​ឈាន​ដល់​ធ្វើ​ច្បាប់​លេខ ៤៩/៧៣៣ ក្នុង​ការ​កាត់​ទឹកដី​កម្ពុជា​ក្រោម ទៅ​ឲ្យ​វៀតណាម។

លោក ថាច់ សេដ្ឋា ថ្លែង​នៅ​ពេល​នេះ​ថា ឯកសារ​ដែល​ពួក​លោក​នឹង​ទទួល​បាន​ពី រដ្ឋាភិបាល​បារាំង​ក្នុង​ពេល​ខាងមុខ នឹង​ក្លាយ​ជា​ឯកសារ​ប្រវត្តិសាស្ត្រ​ដ៏​សំខាន់។ លោក​ថា លោក​នឹង​យក​ឯកសារ​ទាំងនោះ មក​សិក្សា​ជាមួយ​អ្នកច្បាប់ ដើម្បី​ស្វែង​យល់​ថា​តើ ឯកសារ​ដែល​នឹង​ទទួល​បាន ត្រូវ​យក​ទៅ​ប្រើ​ប្រាស់​បែប​ណា។

ស្រដៀង​គ្នា​នេះ​ដែរ អ្នកវិភាគ​នយោបាយ​ឯករាជ្យ លោក​បណ្ឌិត សុខ ទូច កត់​សម្គាល់​ថា ឯកសារ​ដែល​បារាំង​ប្រុង​ប្រគល់​ឲ្យ​ខ្មែរ​ក្រោម​នេះ នឹង​ក្លាយ​ជា​ឯកសារ​ដ៏​មាន​សារៈសំខាន់​ខ្លាំង​ណាស់​សម្រាប់​ប្រវត្តិសាស្ត្រ ​ទឹកដី​កម្ពុជា​ក្រោម ព្រោះ​លោក​ថា​បារាំង​ខ្លួនឯង​ផ្ទាល់​ជា ដើរ​តួនាទី ជា​អាជ្ញាកណ្ដាល​ក្នុង​ការ​កាត់​ទឹកដី​កម្ពុជា​ក្រោម​ទៅ​ឲ្យ​វៀតណាម៖ «ទី ​១​បារាំង​ចង់​បង្ហាញ​ថា​នៅ​ក្នុង​សម័យ​អាណានិគម​ខ្លួន​បាន​ធ្វើ​កិច្ចការ​ ហ្នឹង ដោយសារ​មាន​ហេតុការណ៍​ជាច្រើន​ពាក់ព័ន្ធ​នឹង​ឯកសារ ទី​២​បើ​បារាំង​មិន​បង្ហាញ​ឯកសារ ទេ ខ្ញុំ​ជឿជាក់​ថា​ខាង​ខ្មែរ​កម្ពុជា​ក្រោម ឬ​ទំនាក់ទំនង​កម្ពុជា​ទៅ​ថ្ងៃ​អនាគត នៅ​ពេល​ដែល មានការ​ដោះដូរ​អ្នកនយោបាយ ហាក់បីដូចជា​ល្អក់កករ​ជាមួយ​ប្រទេស​កម្ពុជា ចំណុច​ទី​៣ បើ​សិន​ជា​បារាំង​នៅតែ​បន្ត​អាថ៌កំបាំង​ទេ ខ្ញុំ​ជឿជាក់​ថា​ដំបៅ​មហារីក​នៅ​កម្ពុជា​ក្រោម​កាន់តែ​ផ្ទុះ។»

កាលពី​ខែ​មិថុនា ឆ្នាំ​២០១៤ ពោល​គឺ​បន្ទាប់ពី​អង្គការ​សមាគម​ខ្មែរ​កម្ពុជា​ក្រោម ធ្វើ​ពិធី​រម្លឹក​ខួប​បាត់បង់​ទឹកដី​កម្ពុជា​ក្រោម អ្នកនាំពាក្យ​ស្ថានទូត​វៀតណាម​ប្រចាំ​កម្ពុជា លោក ត្រឹង វ៉ាំងថុង (Tran Van Thong) បាន ​អះអាង​ថា ទឹកដី​កម្ពុជា​ក្រោម គឺជា​ទឹកដី​របស់ វៀតណាម​តាំងពី​យូរយារ​ណាស់​មក​ហើយ។ ការ​អះអាង​នេះ ត្រូវ​បាន​ខ្មែរ​ក្រោម​និង​យុវជន យល់ថា​វៀតណាម​មាន​ចេតនា​បំភ្លៃ​ប្រវត្តិសាស្ត្រ និង​ជា​ការ​ប្រមាថ​មើលងាយ​ទៅ លើ​ប្រជាពលរដ្ឋ​ខ្មែរ។ ពួកគេ​បាន​ធ្វើ​បាតុកម្ម​ជា​បន្តបន្ទាប់​ចំនួន​៤​លើក​រួច​មក​ហើយ ដើម្បី​ទាមទារ​ឲ្យ​រដ្ឋាភិបាល​វៀតណាម ប្រកាស​ទទួលស្គាល់​ប្រវត្តិសាស្ត្រ​ទឹកដី​កម្ពុជា​ក្រោម និង​សុំទោស​ពលរដ្ឋ​ខ្មែរ​ជា​សាធារណៈ​។

ប៉ុន្តែ​រហូត​មក​ទល់​ពេលនេះ រដ្ឋាភិបាល​វៀតណាម នៅ​មិន​ទាន់​បាន​ឆ្លើយតប​យ៉ាងណា ចំពោះ​ការ​ទាមទារ​របស់​ខ្មែរ​ក្រោម និង​យុវជន​នៅឡើយ។

ទោះជា​យ៉ាងណា លោក ថាច់ សេដ្ឋា បញ្ជាក់​ជាថ្មី​ថា ក្រុម​លោក​នឹង​មិន​បោះបង់​ចោលការ ទាមទារ​ឲ្យ​រដ្ឋាភិបាល​វៀតណាម​ទទួលស្គាល់​ប្រវត្តិសាស្ត្រ​ទឹកដី​កម្ពុជា​ ក្រោម​នោះ​ទេ។ លោក​ថា ប្រសិនបើ​ពលរដ្ឋ​ខ្មែរ​មិន​ទាមទារ​នៅ​ពេល​នេះ​ទេ រដ្ឋាភិបាល​វៀតណាម​នឹង​បន្ត បំភ្លៃ​ប្រវត្តិសាស្ត្រ​ខ្មែរ និង​បន្ត​ប្រមាថ​មើលងាយ​ទៅលើ​ប្រជាជាតិ​ខ្មែរ​នៅ​ថ្ងៃ​ខាងមុខ​ទៀត៕

1 comment:

  1. Anonymous12:32 PM

    France USA Canada Australia EU UN please pressure Vietnam to accept the TRUE history of Khmers Kampuchea Krom. The recognition is a drop in the bucket compared to all our suffering over many centuries. Many people who are not Khmer don't care. Of course they don't. They have never had their heads used to make tea or drowned in a canal or had their religious leaders executed or had to run away from their homeland.

    So please boycott cheap Vietnam yuon products and pressure them. International pressure works very well, like in South Africa. Also ban all Viet yuon from international conventions and meetings. This is not discrimination, but the Yuon mobster attacks on Khmer Krom and the genocide is discrimination at its worst.

    ReplyDelete