លោក សម រង្ស៊ី និងលោក កែម ឡី ជួបគ្នា នៅចិន រឿងគ្រោងបង្កើត គណបក្សថ្មី
លោក សម រង្ស៊ី ប្រធាន គណបក្ស សង្គ្រោះជាតិ
CEN | ៨ វិច្ឆិកា ២០១៤
ភ្នំពេញ៖ មន្ត្រីជាន់ខ្ពស់ គណបក្ស សង្គ្រោះជាតិ បានទម្លាយប្រាប់ គេហទំព័រ CEN ឲ្យដឹង ថា, លោក សម រង្ស៊ី ប្រធាន គណបក្សសង្គ្រោះជាតិ និងលោក កែម ឡី ប្រធាន ក្រុមអ្នកស្រាវជ្រាវ ឯករាជ្យ ជាន់ខ្ពស់ និងជាអ្នក សម្របសម្រួល បណ្តាញសង្គម ខ្មែរ ដើម្បី ខ្មែរ ជួបចរចាគ្នា នៅទីក្រុង ហុងកុង ប្រទេសចិន ទាក់ទង ក្រុមសង្គមស៊ីវិល និងអ្នកវិភាគ ឯករាជ្យ មួយចំនួន គ្រោងបង្កើត គណបក្ស ដើម្បី ចូលរួម ប្រកួតប្រជែង នៅក្នុង ការបោះឆ្នោត ជ្រើសតាំង តំណាងរាស្ត្រ អាណត្តិ ទី៦ ឆ្នាំ២០១៨ ខាងមុខនេះ។
 |
| លោក កែម ឡី ប្រធាន ក្រុមអ្នកស្រាវជ្រាវ ឯករាជ្យ ជាន់ខ្ពស់ |
លោក សម រង្ស៊ី និងលោក កែម ឡី បានចាកចេញ ពីប្រទេស កម្ពុជា ទៅកាន់ប្រទេស ចិន កាលពីថ្ងៃ ទី៦ ខែវិច្ឆិកា ឆ្នាំ២០១៤ ដើម្បី ទៅចូលរួម ក្នុងសន្និសីទ សម្ព័ន្ធភាព គណបក្ស សេរីនិយម ទូទាំង ពិភពលោក ( Liberal International, ហៅកាត់ ថា LI ) រយៈពេល ៤ថ្ងៃ។ បន្ទាប់ ពីចប់កិច្ចប្រជុំនេះ អ្នកទាំងពីរ នឹងជួប ពិភាក្សាគ្នា ក្រៅកិច្ចប្រជុំ ទាក់ទង រឿងលោក កែម ឡី និងក្រុមមន្ត្រី សង្គមស៊ីវិល មួយចំនួន គ្រោងបង្កើត គណបក្ស មួយថ្មីទៀត ដើម្បី ចូលរួម ការបោះឆ្នោត ជ្រើសតាំង តំណាងរាស្ត្រ អាណត្តិ ទី៦ នៅឆ្នាំ២០១៨ ខាងមុខនេះ។
ប្រភពច្បាស់ការណ៍ បានឲ្យដឹង ថា, លោក សម រង្ស៊ី បានទាក់ទងគ្នា ជាមួយលោក កែម ឡី តាមទូរស័ព្ទ, រួច ក៏សូម ណាត់ជួបគ្នា នៅប្រទេស ចិន ដើម្បី ជៀសវាង កុំឲ្យបែកការណ៍ ដល់បណ្តាញ សង្គមខ្មែរ ដើម្បីខ្មែរ។ ហើយ ការណាត់ជួបគ្នា រវាង លោក សម រង្ស៊ី និងលោក កែម ឡី គឺ បន្ទាប់ ពីក្រុមសង្គមស៊ីវិល និងអ្នកវិភាគ ឯករាជ្យ មួយចំនួន គ្រោង នឹងបង្កើត គណបក្ស ដើម្បី ចូលរួម ការបោះឆ្នោត នាពេល ខាងមុខ។
ប្រភព បានបន្ត ថា, មូលហេតុ ដែលលោក សម រង្ស៊ី ណាត់ជួប ជាមួយ លោក កែម ឡី គឺ ដើម្បី ទប់ស្កាត់ កុំឲ្យមាន ការបង្កើត គណបក្សថ្មី ពីព្រោះ វា ធ្វើឲ្យមាន ការបែកសម្លេង របស់ គណបក្ស សង្គ្រោះជាតិ សម្រាប់ ការបោះឆ្នោត ជ្រើសតាំង តំណាងរាស្ត្រ នៅឆ្នាំ២០១៨ ខាងមុខនេះ។
ចំណែកមន្ត្រីជាន់ខ្ពស់ គណបក្សសង្គ្រោះជាតិ បានឲ្យដឹងថា លោក សម រង្ស៊ី នឹងស្នើសូមឲ្យលោក កែម ឡី និងក្រុមសង្គមស៊ីវិល កុំបង្កើតគណបក្ស ពីព្រោះមិនអាចប្រមូលកម្លាំង យកឈ្នះជាមួយ គណបក្សប្រជាជនកម្ពុជា បានទេ តែបើប្រមូលកម្លាំង យកមកចូលរួម ជាមួយកម្លាំង គណបក្សសង្គ្រោះជាតិ ដែលមានស្រាប់នោះ គឺវាអាចមានសង្ឃឹមឈ្នះ គណបក្សប្រជាជនកម្ពុជា នៅក្នុងការបោះឆ្នោត ជ្រើសតាំងតំណាងរាស្ត្រ អាណត្តិទី៦ ឆ្នាំ២០១៨។
លោក កែម ឡី មិនអាចសុំការអត្ថាធិប្បាយបានទេ ដោយទូរស័ព្ទ មិនអាចទំនាក់ទំនងបាន។
លោក យឹម សុវណ្ណ អ្នកនាំពាក្យគណបក្សសង្គ្រោះជាតិ មិនអាចសុំការអត្ថាធិប្បាយបានទេ ដោយទូរស័ព្ទចូល មិនមានអ្នកទទួល។ ប៉ុន្តែលោក យឹម សុវណ្ណ ធ្លាប់បានបញ្ជាក់ នៅក្នុងសន្និសីទកាសែត កាលពីថ្ងៃទី២ ខែវិច្ឆិកា ថា ចំពោះក្រុមសង្គមស៊ីវិល មួយចំនួន មានបំណងចង់បង្កើតគណបក្ស សម្រាប់ការចូលរួម ប្រកួតប្រជែង សម្រាប់ការបោះឆ្នោត ឆ្នាំ២០១៨ គឺមិនមានអំណោយផលទេ។ នៅក្នុងបរិបទ នៃប្រទេសកម្ពុជា ត្រូវដឹងថា ទម្រាំតែបង្រួបបង្រួម កម្លាំងប្រជាធិបតេយ្យ បានមកដល់ពេលនេះ ពីឆ្នាំ១៩៩៣ រហូតមកដល់ឆ្នាំ២០១៣ រយៈពេល២០ឆ្នាំ ទម្រាំតែតំណាងរាស្ត្រ ទៅអង្គុយពាក់កណ្តាលសភា (៥៥អាសនៈ) រួបរួមជាកម្លាំងប្រជាធិបតេយ្យ។
លោកបាន លើកឡើងថា បើសិនជាមាន ចលនាប្រជាធិបតេយ្យ មន្ត្រីអង្គការសង្គមស៊ីវិលណា ដែលមកចង់ធ្វើនយោបាយ គួរតែមករួបរួមគ្នាទៅ ហើយនៅពេលដែល គណបក្សសង្គ្រោះជាតិ កំពុងតែធ្វើការកែទម្រង់ កែលំអកម្មវិធីនយោបាយយើង ចូលរួមទាំងអស់គ្នាទៅ។ ការដែលគ្រោងបង្កើតគណបក្សនោះ គឺមិនស្របតាមកាលៈទេសៈ បច្ចុប្បន្នទេ បើចង់កែទម្រង់ឲ្យបានឆាប់ ត្រូវខិតខំជ្រើសរើសយកប្រព័ន្ធ តាមរបៀបសហរដ្ឋអាមេរិក មានគណបក្សតែពីរធំៗ ដើម្បីដឹកនាំប្រទេស តែបើកាលណាបង្កើត គណបក្សផ្សេងទៀត វាធ្វើឲ្យបំបែកសម្លេង ហើយការផ្លាស់ប្តូរជិតមកដល់ គួរតែនាំគ្នាជួយជម្រុញ ចរន្តនឹងដើម្បីធ្វើការផ្លាស់ប្តូរ មិនមែនមានន័យថា គណបក្សសង្គ្រោះជាតិ មានចំណុចខ្វះខាតបន្តិចបន្តួច បែរជាមិននាំគ្នាចូលមកកែទម្រង់ បែរជានាំគ្នាទៅបង្កើតគណបក្ស៕
The article came out blank.
ReplyDeleteCan someone write or translate it in English please ?
Thank you