ក្រុមអង្គការ មិនមែន រដ្ឋាភិបាល ទាមទារ ឲ្យមាន សមភាព យេនឌ័រ ក្នុងគ.ជ.ប. ថ្មី
RFA / វិទ្យុ អាស៊ី សេរី | ៧ មេសា ២០១៥
ក្រុមបណ្ដាញស្ត្រីលើកបដាស្នើសុំឲ្យគណបក្សនយោបាយទាំងពីរ
ធានាសមភាពរវាងស្ត្រី
និងបុរសក្នុងគណៈកម្មាធិការជាតិរៀបចំការបោះឆ្នោត នៅថ្ងៃទី៧
ខែមេសា ឆ្នាំ២០១៥។ Photo courtesy of CPWP
ក្រុមបណ្ដាញស្ត្រី ដែលមកពីអង្គការ និងសមាគមជិត ១០ស្ថាប័ន ធ្វើការងារ លើកស្ទួយ សិទ្ធិស្ត្រី ស្នើ ឲ្យគណបក្ស នយោបាយ ទាំងពីរ ដែលមាន អាសនៈ ក្នុងសភា ធ្វើយ៉ាងណា ឲ្យមាន សមភាព រវាង បុរស និងស្ត្រី នៅក្នុងក្បាលម៉ាស៊ីន ដឹកនាំ គណៈកម្មាធិការ ជាតិ រៀបចំ ការបោះឆ្នោត។
ពួកគេនាំគ្នាជិះរ៉ឺម៉កកង់បីមានបដា ទាមទារសមភាពយេនឌ័រក្នុង គ.ជ.ប. និងមានក្រុមរបាំត្រុដិដែលបង្ហាញថា នេះជាយុទ្ធនាការធ្វើឲ្យស្របនឹងពិធីបុណ្យចូលឆ្នាំប្រពៃណីជាតិ កំពុងខិតមកដល់។ ស្របពេលនៃការទាមទារនេះ បញ្ជីរបស់រដ្ឋសភាបង្ហាញថា មានស្ត្រីតែមួយរូបគត់បានដាក់ពាក្យជាបេក្ខនារីចូលរួមក្នុងការ ជ្រើសរើសសមាជិក គ.ជ.ប។
ការទាមទាររកសមភាពក្នុង គ.ជ.ប របស់ក្រុមបណ្ដាញស្ត្រី ធ្វើឡើងតាមរយៈការដាក់ញត្តិរបស់ពួកគេទៅស្ថាប័នចំនួន៣ រួមមានរដ្ឋសភា ទីស្នាក់ការគណបក្សប្រជាជនកម្ពុជា និងទីស្នាក់ការគណបក្សសង្គ្រោះជាតិ នៅព្រឹកថ្ងៃទី៧ ខែមេសា ប៉ុន្តែពួកគេត្រូវកងកម្លាំងអាជ្ញាធររារាំងមិនឲ្យចូលទៅខាងមុខ រដ្ឋសភាឡើយ។ ចំណែកផ្លូវនៅខាងមុខរដ្ឋសភា ក៏បិទមិនឲ្យមានចរាចរចេញចូលបានស្រួលឡើយ។ នៅតាមផ្លូវពីរដ្ឋសភាមកកាន់ទីស្នាក់ការគណបក្សប្រជាជនកម្ពុជា ក៏មានអាជ្ញាធររារាំង ដោយហាមប្រាមមិនឲ្យក្រុមនេះហែក្បួនរ៉ឺម៉កកង់៣។
ក្រុមដដែលនេះ ក៏ហួសទៅដាក់ញត្តិនៅទីស្នាក់ការគណបក្សសង្គ្រោះជាតិ។ នៅទីនោះ ពួកគេបានរាំត្រុដិជូនពរឆ្នាំថ្មី និងបណ្ដេញឧបទ្រពចង្រៃនៅខាងមុខគណបក្ស។ បន្ទាប់មក ពួកគេបានព្យាយាមចូលទៅខាងមុខគណបក្សប្រជាជនកម្ពុជា ប៉ុន្តែក៏ត្រូវរារាំង និងត្រូវកងកម្លាំងអាជ្ញាធរបណ្ដេញចេញ។ ក្រុមអ្នកកាសែត ក៏ត្រូវបណ្ដេញមិនឲ្យយកព័ត៌មាន ឬថតរូបនៅលើចិញ្ចើមផ្លូវខាងមុខគណបក្សនេះឡើយ។
ក្រុមអ្នកដាក់ញត្តិ បានសម្រេចបញ្ចប់ការដាក់ញត្តិ និងបំបែកគ្នាទៅតាមទីតាំងរៀងៗខ្លួន។ ក្រុមអាជ្ញាធរអះអាងថា ក្រុមនេះហែក្បួនក្នុងក្រុងដោយពុំមានការអនុញ្ញាតពីសមត្ថកិច្ច។
នាយិកាប្រតិបត្តិនៃអង្គការសីលការ និងជាប្រធានគណៈកម្មាធិការលើកស្ទួយស្ត្រីក្នុងវិស័យនយោបាយ អ្នកស្រី ធីតា ឃិះ មានប្រសាសន៍នៅក្នុងសន្និសីទសារព័ត៌មាននៅក្រោយការដាក់ញត្តិថា តាមមើលគណបក្សទាំងពីរបានសម្រេចសមាសភាព គ.ជ.ប នោះរួចហើយ ទើបមិនទទួលញត្តិរបស់ក្រុមអ្នកស្រី៖ «ការសម្រេចរបស់គេរួចទៅ ហើយ ចឹងគេពិបាកនឹងមកឆ្លើយជាមួយយើង បានជាអត់ជួបយើង ព្រោះជាការងារមួយដែលគេដោះស្រាយរឿងបញ្ហានយោបាយ គឺគេសម្រេចចិត្តរួចហើយ។»
ក្នុងញត្តិរបស់ក្រុមបណ្ដាញស្ត្រី បានស្នើនូវចំណុចសំខាន់ពីរ រួមមាន បើប្រធានគណៈកម្មាធិការជាតិរៀបចំការបោះឆ្នោតជាស្ត្រី ឬបុរស នោះអនុប្រធានត្រូវជាភេទផ្ទុយគ្នា ហើយក្នុងចំណោមសមាជិក ៤រូបនៃ គ.ជ.ប ដែលជ្រើសរើសដោយគណបក្សនីមួយៗ ត្រូវមានស្ត្រីយ៉ាងតិចពី ១ ទៅ ២រូប។
តំណាងរាស្ត្រ និងជាអ្នកនាំពាក្យគណបក្សប្រជាជនកម្ពុជា លោក សុខ ឥសាន មានប្រសាសន៍ថា លោកគាំទ្រសំណើរបស់អង្គការមិនមែនរដ្ឋាភិបាល ប៉ុន្តែលោកពុំឃើញមានស្ត្រីដាក់ពាក្យច្រើនឡើយ ដែលពិបាកនឹងជ្រើសរើស៖ «ខ្ញុំមើលទៅប្រហែលជាគាត់មានលក្ខណៈ សម្បត្តិមិនគ្រប់គ្រាន់ ដែលមានចែងក្នុងច្បាប់។ អ៊ីចឹងមានតែម្នាក់ទេ នេះជាសិទ្ធិសម្រេចរបស់គណបក្សសង្គ្រោះជាតិ តើគាត់រើសនារី ឬអត់? ព្រោះកូតា ៤ៗពីបក្សទាំង២។»
ក្នុងបញ្ជីរបស់រដ្ឋសភា បង្ហាញថា ក្នុងចំណោមបេក្ខជនសរុប ២៤រូប មានស្ត្រីតែមួយរូបគត់ចូលរួម គឺអ្នកស្រី តែ ម៉ានីរ៉ុង។
អ្នកនាំពាក្យគណបក្សសង្គ្រោះជាតិ លោក យឹម សុវណ្ណ មានប្រសាសន៍ថា លទ្ធផលនៃការជ្រើសរើសនេះយ៉ាងណា គឺឋិតក្នុងការពិភាក្សានៅឡើយ៖ «សំណួរ៖ ឃើញថាស្ត្រីមានតែម្នាក់ទេដែលចុះឈ្មោះ តើគាត់អាចជ្រើសរើសដែរទេ? ចម្លើយ៖ បាទ នឹងជូនព័ត៌មាននៅថ្ងៃស្អែក នៅក្រោយពេលមេដឹកនាំតំណាងរាស្ត្រគណបក្សទាំង២។ ជាគោលការណ៍ គឺយើងគាំទ្រស្ត្រី។»
យ៉ាងណា មន្ត្រីនៃគណៈកម្មាធិការខុមហ្រ្វែល (COMFREL) អ្នកស្រី សឺន កេតសេរីលក្ខណ៍ មានប្រសាសន៍ថា ពុំខ្វះទេស្ត្រីដែលមានសមត្ថភាព។ ផ្ទុយទៅវិញ គឺពួកគេពុំទទួលបានការផ្ដល់ឱកាស និងការលើកទឹកចិត្តពីគណបក្ស៖ «ឫសគល់នៃការយកចិត្តទុកដាក់រឿង ស្ត្រី ចាប់ផ្ដើមពីការអនុម័តច្បាប់បោះឆ្នោត រៀបចំសមាសភាព គ.ជ.ប ពីថ្នាក់លើដល់ថ្នាក់ក្រោម។ តើពួកគាត់បានយកចិត្តទុកដាក់ពីចំនួនស្ត្រីហើយឬនៅ? អ៊ីចឹងអ្នកបោះឆ្នោតទាំងអស់ទាំងបុរសស្ត្រី ជាពិសេសស្ត្រីអាចពិចារណាថា ថ្ងៃបោះឆ្នោតយើងគួរបន្តការគាំទ្រគណបក្សទាំងហ្នឹងទៀតអត់ បើពួកគាត់នៅតែមិនអើពើការចូលរួមរបស់ស្ត្រី ហើយកុំនិយាយពីរឿងគ្មានស្ត្រីអ្នកពូកែធ្វើការងារអី កុំនិយាយ ជាលេសរបស់ពួកគាត់ដែលគិតតែពីយកអំណាចដើម្បីគ្រប់គ្រងរដ្ឋ។»
ក្រុមអង្គការទាំងនោះមើលឃើញថា ខ្វះស្ត្រីក្នុងសមាសភាព គ.ជ.ប និងជំរុញឲ្យចំនួនស្ត្រីចូលរួមឈរឈ្មោះបោះឆ្នោតនៅតែតិច ធ្វើឲ្យស្ត្រីក្នុងតួនាទីធ្វើសេចក្ដីសម្រេចក៏តិច ដែលធ្វើឲ្យបញ្ហាស្ត្រី និងកុមារនៅតែមិនត្រូវយកចិត្តទុកដាក់ឲ្យបានពេញលេញ។ ការទាមទាររបស់ក្រុមអង្គការមិនមែនរដ្ឋាភិបាលនេះ គឺនៅមួយថ្ងៃមុនពេលតំណាងគណបក្សទាំងពីរជួបគ្នាជាថ្មី ដើម្បីសម្រេចពីសមាសភាពរបស់ គ.ជ.ប ហើយដែលលទ្ធផលនឹងប្រកាសឲ្យដឹងនៅថ្ងៃទី១៣ ខែមេសា៕
No comments:
Post a Comment