ទេសរដ្ឋមន្ត្រីទទួលបន្ទុកកិច្ចការព្រំដែន លោក វ៉ា គឹមហុង
(ឆ្វេង) និងឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេស លោក ហោ
ណាំហុង
បកស្រាយក្នុងកម្មវិធីតុមូលស្ដីពីបញ្ហាព្រំដែនកម្ពុជា-វៀតណាម
នារាជធានីភ្នំពេញ នៅថ្ងៃទី២១ ខែឧសភា ឆ្នាំ២០១៥។ Photo from YouTube
សង្គមស៊ីវិល និងបក្សប្រឆាំង ប្រតិកម្ម នឹងការបកស្រាយ រឿងព្រំដែន កម្ពុជា-វៀតណាម
RFA / វិទ្យុ អាស៊ី សេរី | ២១ ឧសភា ២០១៥
អង្គការ សង្គមស៊ីវិល និងគណបក្ស ប្រឆាំង ចាត់ទុកថា, រដ្ឋាភិបាល នៅតែ មានភាព លាក់លៀម ជុំវិញ ការកំណត់ បង្គោលព្រំដែននេះ ដែលជាមូលហេតុ ធ្វើឲ្យកម្ពុជា ចេះតែ បន្តបាត់បង់ បូរណភាព ទឹកដី ម្ដងហើយ ម្ដងទៀត ទៅវៀតណាម។
ការលើកឡើងនៅបន្ទាប់ពីមន្ត្រីជំនាញរបស់រដ្ឋាភិបាលបកស្រាយរឿង ជម្លោះព្រំដែននៅឃុំជាំ ស្រុកមេមត់ តាមរយៈកម្មវិធីតុមូលស្ដីពីបញ្ហាព្រំដែនកម្ពុជា-វៀតណាម។
គណបក្សនយោបាយដែលមានសំឡេងភាគតិចនៅក្នុងរដ្ឋសភា និងតំណាងក្រុមប្រឹក្សាឃ្លាំមើលកម្ពុជា បង្ហាញការសោកស្ដាយចំពោះការបកស្រាយបំភ្លឺពីមន្ត្រីជំនាញរបស់ រដ្ឋាភិបាលទទួលបន្ទុកកិច្ចការព្រំដែនដែលអះអាងថា គណបក្សប្រឆាំង និងអង្គការក្រៅរដ្ឋាភិបាលព្យាយាមគាស់កកាយរឿងព្រំដែនដែលខុសពីការ ពិត។
ការថ្លែងរិះគន់ភ្លាមៗ នៅថ្ងៃទី២១ ខែឧសភា របស់គណបក្សប្រឆាំង និងអង្គការមិនមែនរដ្ឋាភិបាលនៅពេលនេះ ធ្វើឡើងបន្ទាប់ពីកិច្ចពិភាក្សាតុមូលមួយនិយាយពីភាពចម្រូងចម្រាស ព្រំដែនកម្ពុជា-វៀតណាម ត្រង់ចំណុចឃុំជាំ ស្រុកមេមត់ ខេត្តត្បូងឃ្មុំ ដែលមានលោក ផៃ ស៊ីផាន មន្ត្រីនាំពាក្យទីស្ដីការគណៈរដ្ឋមន្ត្រីជាអ្នកសម្របសម្រួល ហើយវាគ្មិនមានលោក ហោ ណាំហុង រដ្ឋមន្ត្រីក្រសួងការបរទេស ព្រមទាំងលោក វ៉ា គឹមហុង ទេសរដ្ឋមន្ត្រីទទួលបន្ទុកកិច្ចការព្រំដែនកម្ពុជា។
នៅក្នុងខ្សែអាត់វីដេអូ ដែលមានរយៈពេលជិត ៥០នាទី (៤៧.៤៨នាទី) ដែលត្រូវបានគេផ្សព្វផ្សាយជាសាធារណៈនៅថ្ងៃទី២១ ខែឧសភា គឺភាគីនៃកិច្ចពិភាក្សាព្យាយាមឆ្លើយការពារ និងដាក់បន្ទុកទៅលើក្រុមអ្នករិះគន់ថា មិនបានយល់ពីកិច្ចការដែលរដ្ឋាភិបាលកំពុងប្រឹងប្រែងអ្វីទាល់តែ សោះ។
ទាំងលោក វ៉ា គឹមហុង និងលោក ហោ ណាំហុង សុទ្ធតែបានអះអាងថា ការកំណត់ព្រំដែនរវាងកម្ពុជា ជាមួយប្រទេសវៀតណាមនេះ គឺយោងលើផែនទីដែលអតីតព្រះមហាក្សត្រ គឺព្រះបាទសម្តេចព្រះ នរោត្តម សីហនុ តម្កល់នៅអង្គការសហប្រជាជាតិដែលទទួលស្គាល់ដោយអន្តរជាតិ។ ដោយឡែក ទីតាំងដែលមានជម្លោះនោះ គឺជាចំណុចដែលមានការកែតម្រូវខ្លះៗ និងព្រមព្រៀងជាមួយវៀតណាម រួចរាល់ហើយ ដែលមានផ្ទៃដីប្រមាណ ១០០ហិកតារ។ ក៏ប៉ុន្តែ អ្វីដែលនាំឲ្យមានជម្លោះនេះ គឺពលរដ្ឋកម្ពុជា ធ្វើហួសពីការកែតម្រូវរបស់គណៈកម្មការព្រំដែនរវាងប្រទេសទាំងពីរ ហើយពលរដ្ឋកម្ពុជា ធ្វើចូលដីវៀតណាម ថែមទៀតរហូតជាង ១៦ហិកតារ ទៅក្នុងទឹកដីវៀតណាម។
បើទោះជាយ៉ាងនេះក៏ដោយចុះ ក៏តំណាងក្រុមប្រឹក្សាឃ្លាំមើលកម្ពុជា និងជាប្រធានសហព័ន្ធនិស្សិតបញ្ញវន្តកម្ពុជា ផង លោក ម៉ៅ ពិសេស យល់ឃើញថា ការឆ្លើយបំភ្លឺណាមួយរបស់មន្រ្តីជំនាញដែលជាតំណាងឲ្យភាគី រដ្ឋាភិបាលនោះ គឺវាពុំបានផ្អែកលើការពិតអ្វីឡើយ។ លោកចាត់ទុកផ្ទុយទៅវិញថា ការបកស្រាយនោះ គឺគ្រាន់តែធ្វើឡើងដើម្បីបិទបាំងពីភាពខុសឆ្គងក្នុងរឿងព្រំដែន នេះប៉ុណ្ណោះ៖ «ខ្ញុំអាចយល់បានថា អ្វីដែលគាត់លើកឡើងគឺផ្តោតទៅលើសន្ធិសញ្ញាបំពេញបន្ថែមឆ្នាំ២០០៥ នៃការបោះបង្គោលព្រំដែន ដែលធ្វើឲ្យប្រទេសកម្ពុជា បាត់បង់ទឹកដី។»
ការខ្វែងគំនិតគ្នាក្នុងការបោះបង្គោលព្រំដែនរវាងក្រុមអ្នក ឃ្លាំមើលកម្ពុជា និងរដ្ឋាភិបាលនេះ នៅត្រង់ក្រុមអ្នកឃ្លាំមើលកម្ពុជា ចាត់ទុកថា ការកំណត់សីមាព្រំដែនជាមួយវៀតណាម នេះ គឺរដ្ឋាភិបាលអនុវត្តតាមសន្ធិសញ្ញាបំពេញបន្ថែម ឆ្នាំ២០០៥ ក៏ប៉ុន្តែរដ្ឋាភិបាលវិញអះអាងថា ការពិតការកំណត់ព្រំដែននេះ គឺយោងតាមខ្នាតផែនទី ១/១០០.០០០ (មួយលើមួយរយពាន់) ដែលតម្កល់នៅអង្គការសហប្រជាជាតិ។
លោក វ៉ា គឹមហុង ទេសរដ្ឋមន្ត្រីទទួលបន្ទុកកិច្ចការព្រំដែនកម្ពុជា បានឆ្លើយសំណួររបស់លោក ផៃ ស៊ីផាន នៅក្នុងពិភាក្សាតុមូលនោះថា ការកំណត់ព្រំដែនជាមួយប្រទេសវៀតណាមនេះ គឺពុំបានប្រើប្រាស់តាមសន្ធិសញ្ញាបំពេញបន្ថែមណាមួយឡើយ។ លើសពីនេះទៀត សន្ធិសញ្ញាបំពេញបន្ថែមនេះទៀតសោត ក៏ពុំមានលទ្ធភាពណាមួយក្នុងការកំណត់ផែនទីនោះទៀតផង៖ «សន្ធិសញ្ញា បំពេញបន្ថែមឆ្នាំ២០០៥ មាននិយាយពីផែនទីកាលណា។ រួចគាត់ថា យកផែនទីឆ្នាំ១៩៨២ ១៩៨៣ ១៩៨៥ និងឆ្នាំ២០០៥។ គាត់គិតថា ធ្វើសន្ធិសញ្ញាមួយ ធ្វើផែនទីមួយ។»
បើទោះជាមានការបកស្រាយបែបនេះក្តី អ្នកតំណាងរាស្ត្រមណ្ឌលកំពង់ចាម របស់គណបក្សសង្គ្រោះជាតិ លោក ម៉ៅ មុនីវណ្ណ អះអាងថា ការបកស្រាយណាមួយរបស់រដ្ឋាភិបាលរឿងខ្នាតផែនទីនេះ គឺនៅតែពុំអាចទទួលយកបាន។ លោកចាត់ទុកថា បើរដ្ឋាភិបាលពិតជាមានភាពស្មោះត្រង់មែន គួរលាតត្រដាងជាសាធារណៈពីអ្វីដែលបានធ្វើរួចហើយនោះ ថាតើពិតជាបានអនុវត្តតាមផែនទីដែលពុំមែនជាផែនទីនៃសន្ធិសញ្ញា បំពេញបន្ថែមមែន ឬយ៉ាងណា៖ «ឯកឧត្ដម វ៉ា គឹមហុង ឯកឧត្ដម ហោ ណាំហុង នឹងបង្ហាញសាធារណជនមកថា ផែនទីមួយណា? ខុសគ្នាត្រង់ថាផែនទីគាត់ ដែលគាត់យកទៅវាស់ យកទៅបោះបង្គោលហ្នឹង គឺជាផែនទីដែលមិនផ្សាយជាសាធារណៈទេ។»
ការខ្វែងគំនិតគ្នារឿងព្រំដែននៅចំណុចឃុំជាំ ស្រុកមេមត់ នេះ កើតឡើងបន្ទាប់ពីប្រជាពលរដ្ឋកម្ពុជា ចោទប្រកាន់កាលពីពេលថ្មីៗថា វៀតណាម បានបាញ់ថ្នាំពុលធ្វើឲ្យខូចដំណាំកសិកម្ម។ ក៏ប៉ុន្តែភ្លាមៗ រដ្ឋមន្រ្តីក្រសួងការបរទេសកម្ពុជា លោក ហោ ណាំហុង បានប្រតិកម្មវិញ ដោយអះអាងថា ការពិតពលរដ្ឋកម្ពុជា បានធ្វើស្រែចូលដីវៀតណាម ជាង ១៦ហិកតារ ទៅវិញទេ៕
No comments:
Post a Comment