រដ្ឋាភិបាល បដិសេធ រឿងវៀតណាម រំកិលព្រំដែន ចូលដីខ្មែរ នៅតន់ហន់
RFA / វិទ្យុ អាស៊ី សេរី | ១៨ ឧសភា ២០១៥
ច្រកទ្វារព្រំដែនកម្ពុជា នៅតំបន់តន់ហន់ ក្នុងឃុំព្រែកក្រឹស ស្រុកកំពង់ត្រាច ខេត្តកំពត។ រូបថតថ្ងៃទី១៤ ឧសភា ឆ្នាំ២០១៥ (RFA/Tha Kitya)
ប្រតិកម្មនេះធ្វើឡើងភ្លាមៗបន្ទាប់ពីតំណាងរាស្ត្របក្សប្រឆាំង និងប្រជាពលរដ្ឋរស់នៅតំបន់តន់ហន់ ខេត្តកំពត អះអាងថា ព្រែកវិញតេ គឺជាខ្សែបន្ទាត់ព្រំដែនពុះចែកប្រទេសកម្ពុជា-វៀតណាម នៅមុនឆ្នាំ១៩៧៩ ពោលគឺមិនមែនប្រឡាយ ៧៩ នោះទេ។
បញ្ហាព្រំដែនគឺជារឿងរសើបដែលរដ្ឋាភិបាលមិនចង់អោយអ្នក សារព័ត៌មាន និងប្រជាពលរដ្ឋ នឹកដើមដង្ហើមដល់។ អ្នកវិភាគលើកឡើងថា បញ្ហាចម្រូងចម្រាសជុំវិញព្រំដែនពុះចែកប្រទេសកម្ពុជា-វៀតណាម មិនមែនជារឿងថ្មីឡើយ។
បាតុភាពដែលកើតឡើងនៅតាមខ្សែបន្ទាត់ ព្រំដែនកម្ពុជា-វៀតណាម នៅតំបន់តន់ហន់ ស្ថិតនៅឃុំព្រែកក្រឹស ស្រុកកំពង់ត្រាច ខេត្តកំពត គឺជារឿងប្រវត្តិសាស្ត្រដែលតំណាងរាស្ត្របក្សប្រឆាំង និងប្រជាពលរដ្ឋខំជីកកកាយឡើងវិញដើម្បីរកយុត្តិធម៌។
បុរសចំណាស់សក់ស្កូវ ដុះពុកចង្កា សម្បុរខ្មៅម្នាក់ កំពុងអង្គុយក្រោមម្លប់ដើមឈើ សុំមិនបញ្ចេញឈ្មោះ បានរៀបរាប់ថា នៅមុនឆ្នាំ១៩៧៩ គិតចាប់ពីប្រឡាយ៧៩ រហូតដល់ព្រែកវិញតេ គឺជាទឹកដីរបស់ខ្មែរ ហើយព្រែកនេះ ប្រជាពលរដ្ឋទាំងពីរប្រើប្រាស់ជាមួយគ្នាធម្មតា ប៉ុន្តែនៅក្រោយឆ្នាំ១៩៧៩ ព្រែកវិញតេ បានក្លាយជាកម្មសិទ្ធិផ្ដាច់មុខរបស់វៀតណាម ពោលគឺប្រជាពលរដ្ឋខ្មែរពុំអាចប្រើប្រាស់ទឹកព្រែកទីនេះបានទៀត ឡើយ។
ចំណែកឯកខ្សែបន្ទាត់ព្រំដែនវិញ ក៏ត្រូវបានរំកិល រហូតដល់ប្រឡាយ៧៩ ដែរ៖ «ខ្ញុំ ដឹងពី៧៩ មក កាលណោះប្រជាជនបែកពីអា ពត មិនទាន់ចុះមកទេ ដូច្នេះវៀតណាម យកខ្មែរយើងដែលរត់ទៅវៀតណាម ហ្នឹង ជីកប្រឡាយ៧៩ ដើម្បីធ្វើជាខ្សែក្រវាត់ព្រំដែន។»
ជាទូទៅប្រជាពលរដ្ឋរស់នៅតំបន់នោះ មិនសូវហ៊ាននិយាយពីបញ្ហាព្រំដែនឡើយ ហើយបើនិយាយក៏សុំលាក់អត្តសញ្ញាណដែរ។ វិទ្យុអាស៊ីសេរី បានជួបសម្ភាសជាមួយពលរដ្ឋម្នាក់ទៀត មានរាងស្គមខ្ពស់ និយាយថា សម័យសង្គមរាស្ត្រនិយម សម័យ លន់ នល់ និងសម័យ ប៉ុល ពត នោះ ព្រែកវិញតេ ស្ថិតក្នុងកណ្ដាប់ដៃរបស់ខ្មែរនៅឡើយ៖ «ព្រែកវិញតេ នៅគ្រប់ជំនាន់ ពិសេសសម័យ លន់ នល់ សម័យ ប៉ុល ពត ក៏នៅតែខ្មែរយើងកាន់កាប់ដដែល ដូច្នេះទើបនឹងបាត់បង់ក្រោយ៧៩ ហ្នឹងទេ ដោយសារខ្មែរយើងអស់ឥទ្ធិពល។»
១៤-ឧសភា-២០១៥៖
ព្រែកវិញតេ ដែលតំណាងរាស្ត្របក្សប្រឆាំង និងពលរដ្ឋអះអាងថា
ជាខ្សែបន្ទាត់ព្រំដែនចាស់ ពុះចែកប្រទេសកម្ពុជា-វៀតណាម
ហើយនៅមុនឆ្នាំ១៩៧៩ គឺពលរដ្ឋទាំងពីរប្រើប្រាស់បាន
ប៉ុន្តែក្រោយឆ្នាំ១៩៧៩ ជាកម្មសិទ្ធិវៀតណាម ផ្តាច់មុខ។ RFA/Tha Kitya
កាលពីថ្ងៃ ទី១៤ ឧសភា ថ្មីៗនេះ, តំណាងរាស្ត្រ គណបក្ស សង្គ្រោះជាតិ លោក អ៊ុំ សំអាន បានចុះ ទៅត្រួតពិនិត្យ ខ្សែបន្ទាត់ ព្រំដែន កម្ពុជា-វៀតណាម នៅតំបន់ តន់ហន់។ លោក រកឃើញ ថា, ខ្សែបន្ទាត់ព្រំដែន នៅតំបន់នេះ គឺ កំណត់ យកប្រឡាយ ៧៩, ដូច្នេះ វា មិនមែន ជាខ្សែបន្ទាត់ ព្រំដែន កម្ពុជា- វៀតណាម ដែលមាន នៅក្នុងផែនទី ធ្វើនៅចន្លោះ ឆ្នាំ១៩៣៣-១៩៥៣ ដែលព្រះ បរមរនតកោដ្ឋ បានយក ទៅតម្កល់ នៅអង្គការ សហប្រជាជាតិ ឆ្នាំ១៩៦៤ នោះទេ។
លោក អ៊ុំ សំអាន៖ «ព្រំដែននេះ កំណត់ដោយប្រឡាយ៧៩ ជាសម័យដែលយួនគ្រប់គ្រងខ្មែរយើង។ ដូច្នេះពេលយើងមកមើលជាក់ស្ដែង គឺប្រជាពលរដ្ឋគាត់ប្រាប់ហើយថា ខ្សែបន្ទាត់ព្រំដែនកំណត់ដោយព្រែកវិញតេ ឬព្រែកជីក ហើយតាមផែនទីដែលបារាំង ធ្វើនៅឆ្នាំ១៩៥២ ដែលសម្ដេចតាតម្កល់នៅអង្គការសហប្រជាជាតិ ក៏កំណត់ពាក់កណ្ដាលព្រែកវិញតេដែរ ដូច្នេះតើរឿងអីដែលគាត់ (វ៉ា គឹមហុង) កំណត់ដោយប្រឡាយ៧៩ បើមិនដឹងឭ គឺកាត់ដីអោយយួនហើយ។»
ពាក់ព័ន្ធជាមួយបញ្ហានេះ សេក ឈិន មេឃុំព្រែកក្រឹស ចាត់ទុកការលើកឡើងរបស់ប្រជាពលរដ្ឋ និងតំណាងរាស្ត្របក្សប្រឆាំងថា មិនមែនជាការពិតនោះទេ គឺគ្រាន់តែជាការញុះញង់ឲ្យមានបញ្ហាជម្លោះ។
លោកបន្តថា សព្វថ្ងៃនេះ ទំនាក់ទំនងរវាងប្រជាពលរដ្ឋកម្ពុជា និងវៀតណាម ល្អធម្មតា ពុំមានអ្វីជាឧបសគ្គនោះទេ៖ «មិនមែន ដូចការនិយាយទេ ជាក់ស្ដែងយើងផ្អែកទៅលើបារាំង ដែលចែកអោយមានខ្សែបន្ទាត់ព្រំដែនច្បាស់លាស់។ ប្រជាជនយើងមានដីស្រែនៅជាប់ព្រំដែនទាំងអស់ មិនអាចវៀតណាម មកយកបានទេ ព្រោះអ្នកនិយាយអត់ដីស្រែចេះតែថាទៅ។ ខ្ញុំខ្មែរដែរ រឿងអីខ្ញុំមិនស្រលាញ់ទឹកដីខ្មែរ។ ខ្សែព្រំដែនគេមានបង្គោលឡាក់ចាស់របស់បារាំង។»
របាយការណ៍ស្ដីពីសភាពការណ៍ព្រំដែនដើមឆ្នាំ១៩៩៩ របស់អគ្គមេបញ្ជាការកងយោធពលខេមរភូមិន្ទ លោក កែ គឹមយ៉ាន ជូនលោកនាយករដ្ឋមន្ត្រី ហ៊ុន សែន ក្នុងខែសីហា ឆ្នាំ១៩៩៩ បានបង្ហាញថា វៀតណាមបានជីកព្រែកតាមបន្ទាត់ព្រំដែនពីកើតទៅលិច។ បើតាមការអះអាងពីប្រជាជនថា ព្រែកជីកនេះ វៀតណាមជីកនៅឆ្នាំ១៩៧៩ ចូលដីខ្មែរ ១.២៧០ម៉ែត្រ ដោយគិតពីព្រែកជីកវិញតេ ដែលបានជីកតាំងពីជំនាន់អាណានិគមនិយមបារាំង។ ប៉ុន្តែយ៉ាងណាក៏ដោយ របាយការណ៍នេះ ត្រូវបានប្រធានគណៈកម្មាធិការចម្រុះកិច្ចការព្រំដែន លោក វ៉ា គឹមហុង បដិសេធចោល ដោយអះអាងថា លោក កែ គឹមយ៉ាន មិនមែនជាអ្នកជំនាញកិច្ចការព្រំដែនឡើយ។
លោក វ៉ា គឹមហុង៖ «កុំនិយាយ កែ គឹមយ៉ាន ប្រមាណ ១០ឆ្នាំជាងហើយ ខ្ញុំឃើញនៅក្រសួងមហាផ្ទៃ ថាចូលអ៊ីចេះ ចូលអ៊ីចុះ។ នេះជាធម្មតាទេ គាត់ទទួលខុសត្រូវ គាត់តែងតែនិយាយការពិតថា ចូល ប៉ុន្តែយើងដេញអោយគេទៅវិញ យើងតវ៉ា ហើយរដ្ឋាភិបាលក៏មិននៅស្ងៀមដែរ។»
លោក វ៉ា គឹមហុង ទទួលស្គាល់ការលើកឡើងរបស់ប្រជាពលរដ្ឋថា ចំណុចខ្លះនៃព្រែកវិញតេ គឺជាខ្សែបន្ទាត់ព្រំដែនពុះចែកប្រទេសទាំងពីរ ប៉ុន្តែដោយឡែកចំណុចខ្លះទៀត គឺវានៅជ្រៅក្នុងប្រទេសវៀតណាម មិនមែនជារបស់ខ្មែរឡើយ បើយោងទៅតាមផែនទី។
លោកពន្យល់ទៀតថា ប្រឡាយ៧៩នេះ គឺមិនមែនកំណត់សម្គាល់ថា ជាខ្សែបន្ទាត់ព្រំដែនឡើយ ជារួមគឺធ្វើយោងទៅតាមផែនទីដែលតម្កល់នៅអង្គការសហប្រជាជាតិខ្នាត ១/១០០,០០០ របស់ក្រុមភូមិសាស្ត្រឥណ្ឌូចិន៖ «ព្រែកតាមែង ខ្ញុំមិនស្គាល់អីទេ ព្រោះវាគ្មាននៅក្នុងផែនទីរបស់ក្រុមភូមិសាស្ត្រឥណ្ឌូចិន ព្រោះយើងយកខ្សែព្រំដែនតាមផែនទីភូមិសាស្ត្រឥណ្ឌូចិន ដែលគេទុកតម្កល់អោយយើង។ យើងទៅដាក់នៅអង្គការសហប្រជាជាតិក៏ផែនទីហ្នឹង យើងយកទៅប្រើក៏ផែនទីហ្នឹង ទាំងអស់គឺមានតែផែនទីមួយប៉ុណ្ណឹង។ ទី១ ខ្ញុំថា ព្រែកព្រៃតាមែង គឺវាមិនមាននៅក្នុងផែនទី។ ទី២ ខ្សែព្រំដែន វានៅកន្លែងខ្លះ វាដើរទន្ទឹមនឹងព្រែកតន់ហន់ ដូច្នេះវៀតណាម រមៀលចូលដីខ្មែរមិនកើតទេ។»
ទាក់ទិននឹងបញ្ហានេះ លោក សុខ ទូច អ្នកវិភាគឯករាជ្យ បានលើកឡើងថា បើនិយាយពីរឿងប្រវត្តិនៃការបាត់ទឹកបាត់ដី គឺមានរឿងឈឺចាប់ច្រើនណាស់សម្រាប់កម្ពុជា ប៉ុន្តែទាំងនោះជារឿងប្រវត្តិសាស្ត្រ។ លោកលើកឡើងថា ការបោះបង្គោលព្រំដែនថ្មីរវាងកម្ពុជា-វៀតណាម គឺជារឿងល្អមួយដើម្បីបញ្ឈប់ការឈ្លានពានពីបរទេស ហើយកម្ពុជា ក៏មានឱកាសអភិវឌ្ឍប្រទេស និងការពារកុំអោយបាត់បង់ដីតទៅទៀត៖ «អ៊ីចឹង យើងកំណត់ព្រំដែនយើងអោយហើយទៅ ហើយយើងចាប់ផ្តើមអភិវឌ្ឍន៍ ឬការពារព្រំដែនដែលមានបង្គោលស្រាប់ កុំអោយបន្តលួចមកទៀត។ បើនិយាយរឿងប្រវត្តិសាស្ត្រ គឺវាឆ្ងាយណាស់ មិនមែនត្រឹមព្រែកវិញតេហ្នឹងទេ។»
ផែនទីដែលកម្ពុជា ប្រើប្រាស់ជាផ្លូវការនៅពេលបច្ចុប្បន្ននេះ ត្រូវបានតំណាងរាស្ត្របក្សប្រឆាំងរិះគន់ថា មានភាពមិនប្រក្រតី ដោយសារសន្ធិសញ្ញាព្រំដែនបំពេញបន្ថែមឆ្នាំ២០០៥ និងសន្ធិសញ្ញាព្រំដែនគោកឆ្នាំ១៩៨៥ វាផ្ទុយនឹងកិច្ចព្រមព្រៀងទីក្រុងប៉ារីស និងផ្ទុយទៅនឹងមាត្រា៥៥ នៃរដ្ឋធម្មនុញ្ញ ដែលទុកជាមោឃភាពនៃសន្ធិសញ្ញាទាំងអស់ក្នុងទសវត្ស៨០។
ប្រធានគណៈកម្មាធិការព្រំដែនកម្ពុជា ដែលមានមូលដ្ឋានក្នុងប្រទេសបារាំង លោក ស៊ាន ប៉េងសែ ធ្លាប់បានអះអាងថា សន្ធិសញ្ញាឆ្នាំ១៩៨២ ដែលលោក ហ៊ុន សែន បានចុះហត្ថលេខាជាមួយលោក ង្វៀង កូថាច់ រដ្ឋមន្ត្រីការបរទេសវៀតណាម ខណៈកម្ពុជា ស្ថិតក្រោមការត្រួតត្រារបស់កងទ័ពវៀតណាម បាននាំឲ្យកម្ពុជា បាត់ព្រំដែនទឹករបស់ខ្លួនចម្ងាយជាង ៣ម៉ឺនគីឡូម៉ែត្រការ៉េ ហើយបានបាត់កោះត្រល់ទំហំជាង ៥០០គីឡូម៉ែត្រការ៉េ ស្មើនឹងប្រទេសសិង្ហបុរី ទាំងមូល ព្រមទាំងបាត់កោះក្រចកសេះ ទំហំប្រហែល ៦គីឡូម៉ែត្រការ៉េថែមទៀត។
ទាក់នឹងបញ្ហាព្រំដែននេះដែរ លោក អ៊ុំ សំអាន អះអាងថា លោក សម រង្ស៊ី ប្រធានគណបក្សសង្គ្រោះជាតិ នឹងប្រើប្រាស់វប្បធម៌សន្ទនាដើម្បីជជែកដោះស្រាយបញ្ហាព្រំដែនជាមួយ លោក ហ៊ុន សែន នាយរដ្ឋមន្ត្រីកម្ពុជា ដើម្បីកុំអោយភាគីវៀតណាម ចូលទឹកដីកម្ពុជា ដែលធ្វើអោយប៉ះពាល់ដល់ប្រជាពលរដ្ឋខ្មែរ៕
No comments:
Post a Comment