រដ្ឋាភិបាល អនុម័ត សេចក្ដីព្រាងច្បាប់ ស្ដីពី អង្គការ-សមាគម
RFA / វិទ្យុ អាស៊ី សេរី | ៥ មិថុនា ២០១៥
អគាររដ្ឋាភិបាលដែលមានឈ្មោះថា "វិមានសន្តិភាព" ស្ថិតនៅក្នុងរាជធានីភ្នំពេញ។ RFA
សេចក្ដីព្រាងច្បាប់ ស្ដីពី សមាគម និងអង្គការ មិនមែន រដ្ឋាភិបាល ត្រូវ បានរដ្ឋាភិបាល អនុម័ត ជាស្ថាពរហើយ នៅថ្ងៃ ទី៥ ខែមិថុនា។ មន្ត្រីរដ្ឋាភិបាល អះអាងថា, មានចំណុច និងមាត្រា មួយចំនួន ត្រូវ បានកែប្រែ និងលុបចោល។ យ៉ាងណាក៏ដោយ សង្គមស៊ីវិល នៅតែ សម្ដែង ការខកចិត្ត ចំពោះ ការអនុម័ត សេចក្ដីព្រាង ច្បាប់ របស់ រដ្ឋាភិបាល នៅពេលនេះ។
បើ ទោះជាមាន ការរិះគន់ របស់ អង្គការសង្គមស៊ីវិលជាតិ និងអន្តរជាតិ នៅពេលកន្លងមកយ៉ាងណាក៏ដោយ ទីបំផុតសេចក្ដីព្រាងច្បាប់ដ៏ចម្រូងចម្រាសមួយនេះ ត្រូវបានទីស្ដីការគណៈរដ្ឋមន្ត្រីអនុម័តដោយរលូន។
អ្នកនាំពាក្យទីស្ដីការគណៈរដ្ឋមន្ត្រី លោក ផៃ ស៊ីផាន ឲ្យដឹងថា បើទោះជាច្បាប់នេះត្រូវបានអនុម័តរួចរាល់ហើយក្តី រដ្ឋាភិបាលក៏បានលុបចោលមាត្រាចំនួន២ ដើម្បីធ្វើឲ្យសង្គមស៊ីវិលដំណើរការទៅបានល្អ។ មាត្រាចំនួន ២នោះ គឺមួយចំនួនពាក់ព័ន្ធទៅនឹងការរឹតត្បិតទៅលើការប្រើប្រាស់ថវិកា រដ្ឋបាលរបស់សង្គមស៊ីវិល និងមួយទៀតពាក់ព័ន្ធទៅនឹងភាពស្មុគស្មាញនៃការិយាធិបតេយ្យក្នុងការ បង្កើតអង្គការ។
លោក ផៃ ស៊ីផាន ឲ្យដឹងដែរថា ក្រៅពីលុបចោលមាត្រាមួយចំនួនក៏មានការកែប្រែពាក្យពេចន៍ខ្លះៗផង ដែរ។ លោកថា រដ្ឋាភិបាលនឹងបញ្ជូនសេចក្ដីព្រាងច្បាប់ដ៏ចាំបាច់នេះទៅកាន់ រដ្ឋសភានៅសប្ដាហ៍ក្រោយ៖ «ការគិតការធ្វើសេចក្ដីព្រាងច្បាប់ ហ្នឹងមានរយៈពេល ២០ឆ្នាំហើយ មានការធ្វើសេចក្ដីព្រាងច្បាប់ ការកែសម្រួល ឬការប្រមូលទិន្នន័យមួយចំនួនដើម្បីធ្វើច្បាប់ហ្នឹង គឺអស់រយៈពេល ២០ឆ្នាំហើយ នៅក្នុងនោះគឺមានតាំងពីគណបក្សប្រឆាំង ក៏បានគិតបានគូរនៅក្នុងរឿងហ្នឹងដែរ ដូច្នេះអ្នកដែលលើកឡើងថា ច្បាប់នេះមិនមានជាសារសំខាន់សម្រាប់កម្ពុជា គឺខុស។ ឥឡូវយើងបានធ្វើសម្រេចហើយច្បាប់នេះ សម្តេចតេជោ លោកមានប្រសាសន៍ថា ជាច្បាប់មួយដើម្បីការពារផលប្រយោជន៍អង្គការក្រៅរដ្ឋាភិបាល។»
បើទោះជាលោក ផៃ ស៊ីផាន អះអាងថា ច្បាប់នេះបង្កើតឡើងដើម្បីការពារផលប្រយោជន៍របស់អង្គការមិនមែន រដ្ឋាភិបាល និងបានអនុញ្ញាតឲ្យសង្គមស៊ីវិលចូលរួមផ្ដល់យោបល់រួចហើយក្តី មន្ត្រីអង្គការសង្គមស៊ីវិលនៅតែសម្ដែងការខកចិត្តចំពោះការអនុម័ត សេចក្ដីព្រាងច្បាប់ដ៏រហ័សរបស់រដ្ឋាភិបាលនៅពេលនេះ។
នាយកប្រតិបត្តិនៃគណៈកម្មាធិការសហប្រតិបត្តិការដើម្បីកម្ពុជា ហៅកាត់ថា ស៊ី.ស៊ី.ស៊ី (CCC) លោក សឿង សារឿន មានប្រសាសន៍ថា រដ្ឋាភិបាលគួរបើកឲ្យសង្គមស៊ីវិលបានចូលរួមផ្តល់យោបល់ឲ្យបាន ទូលំទូលាយ មុននឹងអនុម័តសេចក្ដីព្រាងច្បាប់នេះបញ្ជូនទៅកាន់រដ្ឋសភា។
លោក សឿង សារឿន បញ្ជាក់ថា លោកគាំទ្ររដ្ឋាភិបាលដែលបានលុបមាត្រាចំនួន២ នោះ យ៉ាងណាក៏ដោយ លោកថា នៅមានចំណុចអវិជ្ជមានមួយចំនួនទៀតដែលសង្គមស៊ីវិលព្រួយបារម្ភ ក្នុងនោះមានដូចជាការរឹតត្បិតលើការប្រតិបត្តិការរបស់អង្គការនៅ តាមមូលដ្ឋាន ភាពមិនច្បាស់លាស់ថា តើបណ្ដាញសង្គមមួយចំនួនដែលមិនបានចុះបញ្ជីអាចធ្វើប្រតិបត្តិរបស់ ខ្លួនបានដែរ ឬក៏យ៉ាងណា និងពីការរំលាយអង្គការក្រៅរដ្ឋាភិបាលជាដើម។
លោក សឿង សារឿន មានប្រសាសន៍ទៀតថា បើទោះជារដ្ឋាភិបាលបានអនុម័តសេចក្ដីព្រាងច្បាប់នេះហើយក៏ដោយចុះ លោកសង្ឃឹមថា នៅពេលច្បាប់នេះទៅដល់រដ្ឋសភា រដ្ឋសភានឹងបើកទូលាយឲ្យសង្គមស៊ីវិលចូលរួមផ្ដល់យោបល់មុននឹង អនុម័ត៖ «យើងកន្លងមកធ្លាប់បានជជែកជាមួយឯកឧត្តម ឈាង វុន ហើយនិងសមាជិកគណៈកម្មការទី៥ នៃរដ្ឋសភា គឺយើងសង្ឃឹមថា នឹងមានការទទួលបានការពិគ្រោះយោបល់យ៉ាងទូលំទូលាយ ហើយសង្ឃឹមថា អ្វីដែលយើងបារម្ភពីរបីចំណុចទៀត។ យើងសង្ឃឹមថា នឹងអាចត្រូវដោះស្រាយនៅរដ្ឋសភា។»
បច្ចុប្បន្ន ប្រទេសកម្ពុជា មានអង្គការសង្គមស៊ីវិលដែលកំពុងធ្វើសកម្មភាពមានចំនួនសរុបប្រមាណ ៥ពាន់។ ពួកគេបានរួមចំណែកយ៉ាងច្រើននៅក្នុងការអភិវឌ្ឍប្រទេសកម្ពុជា ទាំងក្នុងវិស័យសង្គម សេដ្ឋកិច្ច និងពង្រឹងការគោរពសិទ្ធិមនុស្ស និងលទ្ធិប្រជាធិបតេយ្យ។ យ៉ាងណាក៏ដោយ អង្គការសហប្រជាជាតិ និងអង្គការសង្គមស៊ីវិលអន្តរជាតិមួយចំនួន បានលើកឡើងថា វាជារឿងចម្លែកនៅពេលដែលរដ្ឋាភិបាលធ្វើច្បាប់ដើម្បីការពារ ផលប្រយោជន៍របស់សង្គមស៊ីវិល តែរដ្ឋាភិបាលបែរជាមិនឲ្យសង្គមស៊ីវិលចូលរួមក្នុងដំណើរការធ្វើ ច្បាប់នេះទៅវិញ៕
No comments:
Post a Comment