គ.ជ.ប. គ្រោងជ្រើសរើស បុគ្គលិក ជាង២ពាន់នាក់ សម្រាប់ ការងារ ចុះបញ្ជីឈ្មោះ បោះឆ្នោត
RFA / វិទ្យុ អាស៊ី សេរី | ១១ កក្កដា ២០១៥
ពលរដ្ឋចូលរួមបោះឆ្នោតបោះឆ្នោតជ្រើសតាំងតំណាងរាស្ត្រ
នីតិកាលទី៥ នាមណ្ឌលបោះឆ្នោត ក្នុងសង្កាត់កាកាប ខណ្ឌពោធិ៍សែនជ័យ
នៅថ្ងៃទី២៨ កក្កដា ឆ្នាំ២០១៣។ RFA
សេចក្ដីប្រកាស ព័ត៌មាន របស់ គណៈកម្មាធិការ ជាតិ រៀបចំ ការបោះឆ្នោត ចុះថ្ងៃ ទី១០ ខែកក្កដា ឲ្យដឹងថា, គ.ជ.ប. គ្រោង នឹងជ្រើសរើស បុគ្គលិក ប្រមាណ ២.៤០០នាក់ សម្រាប់ បម្រើការងារ ចុះបញ្ជីឈ្មោះ អ្នកបោះឆ្នោត នៅតាម ការិយាល័យ ចុះឈ្មោះ បោះឆ្នោត ក្នុងឃុំ-សង្កាត់ ទូទាំងប្រទេស។
ការប្រកាសជ្រើសរើសបុគ្គលិកនេះ ជាផ្នែកមួយនៃលទ្ធផលកិច្ចប្រជុំពិភាក្សាលើលទ្ធផលស្រាវជ្រាវស្ដីពី ការប្រើប្រាស់ប្រព័ន្ធកុំព្យូទ័រសម្រាប់ការចុះបញ្ជីឈ្មោះអ្នកបោះ ឆ្នោត ក្រោមជំនួយផ្នែកបច្ចេកទេសរបស់ជប៉ុន ដោយមានការចូលរួមពីមន្ត្រីស្ថានទូតជប៉ុន និងតំណាងទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន ហៅកាត់ថា ចាយកា (JICA) ប្រចាំកម្ពុជា។
អ្នកនាំពាក្យគណៈកម្មាធិការជាតិរៀបចំការបោះឆ្នោត លោក ហង្ស ពុទ្ធា ឲ្យដឹងនៅថ្ងៃទី១១ កក្កដា ថា ដំណើរការជ្រើសរើសបុគ្គលិក ២.៤០០នាក់នេះ នឹងចាប់ផ្ដើមនៅដើមខែកញ្ញា ដើម្បីរៀបចំកិច្ចការចុះបញ្ជីឈ្មោះសាកល្បងដែលគ្រោងនឹងធ្វើនៅ ពាក់កណ្ដាលខែកញ្ញា។ លោកថា បុគ្គលិកទាំងនោះត្រូវមានសមត្ថភាពប្រើប្រាស់កុំព្យូទ័រស្ទាត់ជំនាញ អាចបម្រើការនៅតាមការិយាល័យចុះឈ្មោះបោះឆ្នោតក្នុងឃុំ-សង្កាត់ ដែលពួកគេរស់នៅ ហើយពួកគេនឹងទទួលបានប្រាក់កម្រៃទៅតាមថ្ងៃដែលពួកគេធ្វើការ។
តាមសេចក្ដីប្រកាសព័ត៌មាននេះ ភាគីជប៉ុន នឹងផ្ដល់ប្រព័ន្ធផ្ទុកទិន្នន័យ (Server) ដល់មជ្ឈមណ្ឌលកុំព្យូទ័ររបស់គ.ជ.ប ហើយគ្រោងនឹងបញ្ជូនអ្នកជំនាញការផ្នែកបច្ចេកទេសប្រព័ន្ធកុំព្យូទ័រ មកធ្វើការជាមួយមន្ត្រី គ.ជ.ប នៅខែតុលា ខាងមុខ៕
No comments:
Post a Comment