លោក វ៉ា គឹមហុង៖ អ.ស.ប. គ្រោងផ្ដល់ ផែនទី អាមេរិក ទម្លាក់គ្រាប់បែក មកកម្ពុជា
RFA / វិទ្យុ អាស៊ី សេរី | ២៥ កក្កដា ២០១៥
ប្រធានគណៈកម្មការចម្រុះខណ្ឌសីមានិងបោះបង្គោលព្រំដែន
កម្ពុជា លោក វ៉ា គឹមហុង ថ្លែងទៅកាន់អ្នកកាសែត
ក្នុងទីស្ដីការគណៈរដ្ឋមន្ត្រី នៅថ្ងៃទី៨ ខែកក្កដា ឆ្នាំ២០១៥។ RFA/Rann Samnang
មន្ត្រី រដ្ឋាភិបាល កម្ពុជា បញ្ជាក់ថា, ផែនទី ចំនួន ១៨ផ្ទាំង ខ្នាត ១/១០០.០០០ ដែលអង្គការ សហប្រជាជាតិ គ្រោងផ្ញើមក ឲ្យកម្ពុជា គឺ ជាផែនទី ខ្មែរ ធ្លាប់ប្រើប្រាស់ តវ៉ា ប្រឆាំង នឹងសហរដ្ឋ អាមេរិក ក្នុងការទម្លាក់ គ្រាប់បែក នៅតាមព្រំដែន រវាង កម្ពុជា និងវៀតណាម, គឺ ពុំមែន ផែនទី ខ្សែព្រំដែន ដែនអធិបតេយ្យភាព កម្ពុជា ឬផែនទី បោន ឡើយ។
ទោះ បែបនេះក្តី តំណាងរាស្ត្រ បក្សប្រឆាំង ថា, លោក មិនដែលដឹង ថា, ផែនទី UTM មានខ្នាត ១/១០០.០០០ (មួយ លើមួយរយពាន់) នោះទេ, ហើយ ថា, ផែនទីនេះ មិនអាច ប្រើ ដើម្បី វាស់វែង ព្រំដែន បានទេ។
ប្រធានកិច្ចការព្រំដែន លោក វ៉ា គឹមហុង ឲ្យដឹងនៅថ្ងៃទី២៥ ខែកក្កដា ថា ផែនទីចំនួន ១៨ផ្ទាំង ដែលទទួលបានការឆ្លើយតបពីអង្គការសហប្រជាជាតិ ជាផែនទីដែលខ្មែរធ្លាប់ដាក់ពាក្យប្ដឹងទៅអង្គការសហប្រជាជាតិ ប្រឆាំងនឹងការទម្លាក់គ្រាប់បែករបស់អាមេរិក នៅកម្ពុជា ឆ្នាំ១៩៦៤។
លោក វ៉ា គឹមហុង បន្តថា អង្គការសហប្រជាជាតិ នៅមិនទាន់រកឃើញផែនទីបោន ខ្នាត ១/១០០.០០០ ដែលរដ្ឋាភិបាលស្នើសុំនៅឡើយទេ។
បញ្ជាក់បន្ថែមពីលោក វ៉ា គឹមហុង អនុប្រធានកិច្ចការព្រំដែន អ្នកស្រី កុយ ពិសី ថ្លែងបញ្ជាក់ថា ផែនទីអង្គការសហប្រជាជាតិគ្រោងផ្ដល់នោះ ជាផែនទី UTM ខ្នាត ១/១០០.០០០ ជាផែនទីបោះពុម្ពនៅប្រទេសវៀតណាម។ អ្នកស្រីបន្ថែមថា ទោះផែនទីនោះបោះពុម្ពនៅវៀតណាម ប៉ុន្តែគ្រប់គ្រងដោយបារាំង។
កាលពីថ្ងៃទី៦ ខែកក្កដា លោកនាយករដ្ឋមន្ត្រី ហ៊ុន សែន បានស្នើទៅអគ្គលេខាធិការអង្គការសហប្រជាជាតិ លោក បាន គីមូន (Ban Ki-Moon) ដោយស្នើសុំផែនទីកម្ពុជា នៅអង្គការសហប្រជាជាតិ ដើម្បីផ្ទៀងផ្ទាត់ជាមួយផែនទីដែលរដ្ឋាភិបាលបានប្រើប្រាស់ និងដោះស្រាយបញ្ហាព្រំដែនជាមួយប្រទេសជិតខាងដែលស្របទៅតាមមាត្រា២ នៃរដ្ឋធម្មនុញ្ញ។
តំណាងរាស្ត្រគណបក្សសង្គ្រោះជាតិ លោក អ៊ុំ សំអាន ដែលតាមដានរឿងផែនទីលើកឡើងថា លោកមិនដែលដឹងថា ផែនទី UTM មានខ្នាតមួយលើមួយរយពាន់នោះទេ លោកធ្លាប់តែដឹងថា ផែនទីនេះមានខ្នាត ១/៥០.០០០ (មួយលើហាសិបពាន់)។ លោក អ៊ុំ សំអាន ថា ផែនទីនេះមិនអាចទទួលយកបានដើម្បីវាស់វែងដោះស្រាយបញ្ហាព្រំដែនបាន ទេ។
ទោះបែបនេះ អនុប្រធានកិច្ចការព្រំដែន អ្នកស្រី កុយ ពិសី ថា អ្នកស្រីមិនចង់ឆ្លើយឆ្លងជាមួយលោក អ៊ុំ សំអាន នោះទេ។
មាត្រា២ នៃរដ្ឋធម្មនុញ្ញចែងថា បូរណភាពទឹកដីរបស់ព្រះរាជាណាចក្រកម្ពុជា មិនអាចរំលោភបានជាដាច់ខាតក្នុងព្រំដែនរបស់ខ្លួនដែលមានកំណត់ ក្នុងផែនទី ១/១០០.០០០ ធ្វើនៅចន្លោះឆ្នាំ១៩៣៣-១៩៥៣ ហើយដែលត្រូវទទួលស្គាល់ជាអន្តរជាតិ នៅចន្លោះឆ្នាំ១៩៦៣-១៩៦៩៕
No comments:
Post a Comment