វៀតណាម អះអាងថា, មិនបាន សាងសង់ សំណង់ ចូលក្នុងដី ខ្មែរ នោះទេ
RFA / វិទ្យុ អាស៊ី សេរី | ១៧ កក្កដា ២០១៥
ទីតាំងអាជ្ញាធរវៀតណាម
ជីកលេណដ្ឋានធ្វើប៉ុស្តិ៍យាមជាសំណង់រឹងមាំ
នៅព្រំដែនស្ថិតក្នុងភូមិព្រែកស្បូវ ស្រុកកោះធំ ខេត្តកណ្ដាល។
រដ្ឋាភិបាលកម្ពុជា អះអាងថា
តំបន់នោះជាតំបន់មិនទាន់មានកិច្ចព្រមព្រៀងបោះបង្គោលព្រំដែនជា
ផ្លូវការនៅឡើយ។ រូបថតថ្ងៃទី២០ ខែមិថុនា ឆ្នាំ២០១៥។ RFA/Sek Bandith
រដ្ឋាភិបាល កុម្មុយនិស្ត វៀតណាម អះអាង ថា, គម្រោងសំណង់ ដែលវៀតណាម បានសាងសង់ នៅតាម បណ្ដោយព្រំដែន កម្ពុជា-វៀតណាម ក្នុងរយៈពេល ប៉ុន្មានឆ្នាំ ចុងក្រោយនេះ គឺ ស្ថិតនៅលើទឹកដី របស់ វៀតណាម។
អ្នកនាំពាក្យ ក្រសួង ការបរទេស វៀតណាម លោក ឡេ ហាយប៊ិញ (Le Hai Binh) បានថ្លែងប្រាប់ បណ្ដាញសារព័ត៌មាន វៀតណាម នៅថ្ងៃ ទី១៦ កក្កដា ថា, ប្រទេស វៀតណាម បានគោរព យ៉ាងខ្ជាប់ខ្ជួន នូវកិច្ចព្រមព្រៀង ដែលបានចុះ ជាមួយ កម្ពុជា ក្នុងការគ្រប់គ្រង តំបន់ព្រំដែន ក្នុងអំឡុងពេល ដំណើរការ បោះបង្គោល និងខណ្ឌសីមា ព្រំដែន រវាង ប្រទេស ទាំង២។
អ្នកនាំពាក្យក្រសួងការបរទេសវៀតណាម រូបនេះ បញ្ជាក់ដែរថា ក្នុងកំណត់ទូតរបស់ខ្លួនផ្ញើទៅកាន់ក្រសួងការបរទេសកម្ពុជា និងទៅគណៈកម្មការកិច្ចការព្រំដែន ក៏ដូចជានៅក្នុងកិច្ចប្រជុំរវាងគណៈកម្មការកិច្ចការព្រំដែនកម្ពុជា- វៀតណាម ចាប់ពីថ្ងៃទី៧ ដល់ទី៩ ខែកក្កដា រដ្ឋាភិបាលវៀតណាម បានបញ្ជាក់ច្បាស់ហើយថា រាល់ការសាងសង់នៅតាមបណ្ដោយព្រំដែនកម្ពុជា-វៀតណាម ទាំងអស់ គឺសុទ្ធតែធ្វើឡើងនៅក្នុងទឹកដីដែលស្ថិតនៅក្រោមការគ្រប់គ្រងរបស់ វៀតណាម។
លោក ឡេ ហាយ ប៊ិញ ថ្លែងបន្តថា ភាគីវៀតណាម ថែមទាំងបានស្នើដល់ភាគីកម្ពុជា ជាផ្លូវការឲ្យគោរពតាមគោលការណ៍ដែលមានចែងនៅក្នុងអនុស្សរណៈនៃការ យោគយល់គ្នា ដែលប្រទេសទាំង២ បានចុះជាមួយគ្នាកាលពីឆ្នាំ២០១១ ទៀតផង នោះគឺការរក្សាស្ថានភាពនៅតាមព្រំដែនឲ្យនៅដដែល រហូតដល់មានការបោះបង្គោលព្រំដែនត្រឹមត្រូវ។ ប៉ុន្តែអ្នកនាំពាក្យរូបនេះ អះអាងថា ភាគីកម្ពុជា មិនបានឆ្លើយតបចំពោះសំណើប្រកបដោយសុឆន្ទៈរបស់វៀតណាម នោះឡើយ។
វិទ្យុអាស៊ីសេរី មិនអាចទាក់ទងប្រធានគណៈកម្មការចម្រុះកិច្ចការព្រំដែនកម្ពុជា លោក វ៉ា គឹមហុង ចំពោះការលើកឡើងរបស់រដ្ឋាភិបាលវៀតណាម បាននៅឡើយទេ។
យ៉ាងណាក៏ដោយ អ្វីដែលរដ្ឋាភិបាលវៀតណាម លើកឡើងនៅពេលនេះ គឺផ្ទុយទាំងស្រុងទៅនឹងអ្វីដែលរដ្ឋាភិបាលកម្ពុជា បានលើកឡើងនៅបន្ទាប់ពីកិច្ចប្រជុំជាមួយភាគីវៀតណាម កាលពីពេលថ្មីៗនេះ។
រដ្ឋាភិបាលកម្ពុជា អះអាងថា នៅក្នុងកិច្ចប្រជុំនោះ ភាគីវៀតណាម បានសន្យាថា នឹងលុបស្រះជីកនៅក្នុងខេត្តរតនគិរី ផ្អាកការសាងសង់ប៉ុស្តិ៍យោធានៅស្រុកកោះធំ ខេត្តកណ្ដាល និងផ្អាកការសាងសង់ផ្លូវនៅស្រុកចន្ទ្រា និងស្រុកកំពង់រោទិ៍ ខេត្តស្វាយរៀង តាមការតវ៉ារបស់កម្ពុជា។
ទាក់ទងបញ្ហានេះ អនុប្រធានគណៈកម្មការចម្រុះកិច្ចការព្រំដែនកម្ពុជា អ្នកស្រី កុយ ពិសី មានប្រសាសន៍ថា អ្នកស្រីមិនបានទទួលព័ត៌មានជុំវិញការលើកឡើងរបស់រដ្ឋាភិបាលវៀតណាម នេះនៅឡើយទេ។ យ៉ាងណាក៏ដោយ អ្នកស្រីបញ្ជាក់ថា ដរាបណាប្រទេសវៀតណាម ធ្វើការសាងសង់សំណង់រំលោភបំពានចូលទឹកដីកម្ពុជា នោះកម្ពុជា នឹងនៅតែបន្តការតវ៉ា៕
No comments:
Post a Comment