តុលាការសម្រេចបញ្ជូនលោក ហុង សុខហួរ ទៅឃុំនៅពន្ធនាគារព្រៃសចោទ៣បទល្មើស
RFA / វិទ្យុ អាស៊ី សេរី | ១៦ សីហា ២០១៥
សាលាដំបូងរាជធានីភ្នំពេញ
បញ្ជូនសមាជិកព្រឹទ្ធសភាមកពីគណបក្ស សម រង្ស៊ី លោក ហុង សុខហួរ
(ពាក់ក្រវាត់ក) ទៅឃុំខ្លួននៅអគ្គស្នងការដ្ឋាននគរបាលជាតិ
ដើម្បីរង់ចាំបន្តការសាកសួរ កាលពីល្ងាចថ្ងៃទី១៥ ខែសីហា
ឆ្នាំ២០១៥។
Photo: RFA
ចំណែកប្រធានគណបក្សប្រឆាំង លោក សម រង្ស៊ី គ្រាន់តែជាន់ជើងដល់ដីខ្មែរវិញ ថានឹងរកមធ្យោបាយត្រជាក់ដែលមិនមែនជាវប្បធម៌សន្ទនា ដើម្បីឲ្យមានការដោះលែង លោក ហុង សុខហួរ និងសកម្មជនគណបក្សសង្គ្រោះជាតិ ផ្សេងទៀត។
ភ្លាមៗក្រោយការសាកសួរពេញមួយព្រឹកនៅសាលាដំបូងរាជធានីភ្នំពេញ សមត្ថកិច្ចចម្រុះប្រដាប់ដោយអាវុធរាប់សិបនាក់ បានបញ្ជូនខ្លួន លោក ហុង សុខហួរ សមាជិកព្រឹទ្ធសភាមកពីគណបក្ស សម រង្ស៊ី ទៅឃុំខ្លួនបណ្ដោះអាសន្ននៅពន្ធនាគារព្រៃស។ ក្រោមបទចោទ គឺបទក្លែងឯកសារសាធារណៈ ប្រើប្រាស់ឯកសារក្លែង និងបទញុះញង់។
ការសាកសួរនៅថ្ងៃទី១៦ ខែសីហា មិនអនុញ្ញាតឲ្យក្រុមអ្នកសារព័ត៌មានចូលទៅក្នុងបរិវេណសាលាដំបូង រាជធានីភ្នំពេញ ដើម្បីផ្ដិតយករូបភាពនៃការបញ្ជូនខ្លួននេះទេ។
មេធាវីការពារក្តីរបស់ លោក ហុង សុខហួរ គឺលោកមេធាវី ជូង ជូងី បញ្ជាក់ថា តុលាការមិនបានចោទប្រកាន់កូនក្តីលោកពីបទក្បត់ជាតិទេ។ លោកថា តុលាការបានយកឯកសារថតចម្លងស្ដីពីសន្ធិសញ្ញាសន្តិភាព មិត្តភាព និងសហប្រតិបត្តិការរវាងកម្ពុជា-វៀតណាម ឆ្នាំ១៩៧៩ មកចោទប្រកាន់កូនក្តីលោក។ មេធាវីបន្តថា ក្រុមមេធាវីនឹងស្នើសុំឲ្យ លោក ហុង សុខហួរ នៅក្រៅឃុំបណ្ដោះអាសន្នដោយតម្កល់ប្រាក់ធានា៖ «ខ្ញុំ នឹងដាក់ប្រាក់តម្កល់នៅគាត់ (លោក ហុង សុខហួរ) នៅក្រៅឃុំ ព្រោះគាត់មិនរត់ទៅណាទេ ប្រសិនបើគាត់រត់គាត់មិនអាចធ្វើជាសមាជិកព្រឹទ្ធសភាបានទេ»។
ថ្លែងប្រាប់អ្នកសារព័ត៌មាននៅព្រលានយន្តហោះអន្តរជាតិភ្នំពេញ លោក សម រង្ស៊ី អះអាងថា លោកនឹងប្រើមធ្យោបាយត្រជាក់ដើម្បីឲ្យមានការដោះលែង លោក ហុង សុខហួរ និងសកម្មជនគណបក្សសង្គ្រោះជាតិ ដែលកំពុងជាប់ឃុំ។ នេះជាការថ្លែងលើកទី១ ដែល លោក សម រង្ស៊ី មិនប្រើវប្បធម៌សន្ទនាជាមួយលោកនាយករដ្ឋមន្ត្រី ហ៊ុន សែន នៅពេលស្ថានការណ៍នយោបាយឡើងកម្ដៅ៖ «ខ្ញុំសង្ឃឹមថា ស្ថានការណ៍មានភាពធូរស្រាលបន្តិចទៀតនេះ ខ្ញុំនឹងខិតខំប្រើមធ្យោបាយត្រជាក់ដើម្បីឲ្យសភាពការណ៍វិលមកធម្មតា វិញ»។
តុលាការនឹងបំពេញនីតិវិធីរបស់ខ្លួនជាបន្តទៀត ប៉ុន្តែមិនទាន់កំណត់ថ្ងៃនៅឡើយទេក្រោយការសាកសួរ កាលពីថ្ងៃទី១៥ ខែសីហា។ លោក ហុង សុខហួរ ត្រូវ លោក ហ៊ុន សែន ចោទប្រកាន់ថា មានទោសក្បត់ជាតិ ព្រោះក្លែងឯកសារជាតិពាក់ព័ន្ធនឹងសន្ធិសញ្ញាសន្តិភាព មិត្តភាព និងសហប្រតិបត្តិការរវាងកម្ពុជា-វៀតណាម ឆ្នាំ១៩៧៩។
ទោះបែបនេះក្តី អ្នកនាំពាក្យគណបក្សប្រជាជនកម្ពុជា លោក សុខ ឥសាន លើកឡើងថា ការចាប់ខ្លួននេះជាបទល្មើសព្រហ្មទណ្ឌ មិនទាក់ទងនឹងរឿងនយោបាយឡើយ។ លោក សុខ ឥសាន ឆ្លើយតបការលើកឡើងរបស់ លោក សម រង្ស៊ី ថា ប្រសិនបើ លោក សម រង្ស៊ី ចង់បានមធ្យោបាយត្រជាក់ ឬការចរចានោះ គឺប្រាប់ទៅថ្នាក់ក្រោមរបស់ខ្លួនឲ្យត្រជាក់រហូតទៅ គឺគ្មានបញ្ហាអ្វីកើតឡើងឡើយ៖ «មធ្យោបាយត្រជាក់ហ្នឹង គាត់ចង់សុំទៅការចរចា បើចង់ឲ្យត្រជាក់ ប្រាប់ឲ្យកូនគាត់ (លោក សម រង្ស៊ី) ត្រជាក់ទៅ គឺត្រជាក់បាត់ទៅហើយ»។
ភរិយារបស់ លោក ហុង សុខហួរ អ្នកស្រី គន្ធ លំអង និយាយទាំងហូរទឹកភ្នែកក្រោយការចោទប្រកាន់នេះថា តុលាការធ្វើខុសនីតិវិធី ខណៈដែលប្ដីអ្នកស្រីកំពុងមានអភ័យឯកសិទ្ធិ។ អ្នកស្រី គន្ធ លំអង ស្នើឲ្យ លោក ហ៊ុន សែន ធ្វើការងារនេះគោរពតាមច្បាប់៖ «ចំពោះខ្ញុំទង្វើនេះគឺឃោរឃៅខុសនីតិវិធីទាំងស្រុង ប្ដីខ្ញុំនៅមានអភ័យឯកសិទ្ធិទាំងស្រុង»។
ក្រុមសមត្ថកិច្ចត្រៀម
ការពារឡានដឹកសមាជិកព្រឹទ្ធសភាមកពីគណបក្ស សម រង្ស៊ី លោក ហុង សុខហួរ
នៅខាងមុខសាលាដំបូងរាជធានីភ្នំពេញ កាលពីព្រឹកថ្ងៃទី១៦ ខែសីហា
ឆ្នាំ២០១៥។ RFA/Brach Chev
មកទល់ថ្ងៃទី១៦ សីហា នេះ ព្រឹទ្ធសភាមិនទាន់កោះប្រជុំថា តើត្រូវសម្រេចដកអភ័យឯកសិទ្ធិ លោក ហុង សុខហួរ ឬយ៉ាងណានៅឡើយទេ? តែក្រុមអ្នកច្បាប់លើកឡើងថា ករណី លោក ហុង សុខហួរ នេះ តុលាការអាចទម្លាក់ការចោទប្រកាន់បាន ប្រសិនបើ លោក ហុង សុខហួរ ដឹងពីកំហុសរបស់ខ្លួន សុំទោសជាសាធារណៈ និងគ្មានចេតនាក្នុងការក្លែងបន្លំឯកសារនោះ។
លោក សម រង្ស៊ី ចង់ឃើញលទ្ធផលចុងក្រោយ គឺសកម្មជនគណបក្សសង្គ្រោះជាតិ ដែលត្រូវចាប់ខ្លួន នឹងត្រូវបានដោះលែង។ លោក សម រង្ស៊ី ក្រៅពីប្រាប់ថា លោកបានទាក់ទងជាមួយ លោក ហ៊ុន សែន រឿងនេះតាំងពីនៅក្រៅប្រទេស ក៏លោកមានគម្រោង និងគំនិតផ្ដួចផ្ដើមឲ្យមានការដោះលែងសកម្មជនជាមួយ លោក ហ៊ុន សែន បន្ថែមទៀត៕
No comments:
Post a Comment