ពលរដ្ឋ ខេត្តក្រចេះ ចោទក្រុមហ៊ុន វៀតណាម ថា, ឈូសឆាយ ប៉ះពាល់ ដីធ្លី អាស្រ័យផល
RFA / វិទ្យុ អាស៊ី សេរី | ២ សីហា ២០១៥
មន្ទីររៀបចំដែនដី នគរូបនីយកម្ម សំណង់ និងសុរិយោដី ខេត្តក្រចេះ។ រូបថតកាលពីខែសីហា ឆ្នាំ២០១៤។ RFA/Saut Sokprathna
ពលរដ្ឋ មានទំនាស់ ដីធ្លី ចំនួន ២៨គ្រួសារ រស់នៅ ភូមិ គ្រញូង សែនជ័យ ខាងជើង, ឃុំ ឃ្សឹម, ស្រុក ស្នួល ចោទក្រុមហ៊ុន វៀតណាម ថា, យកគ្រឿង ចក្រឈូសឆាយ ផលដំណាំ ពួកគាត់ ជាច្រើន ហិកតារ នៅព្រឹក ថ្ងៃទី២ កក្កដា។ ចំណែក តំណាងក្រុមហ៊ុន វៀតណាម បដិសេធ ការចោទប្រកាន់នេះ ដោយសំអាង ថា, ក្រុមហ៊ុន ឈូសឆាយ តែ ដី ដែលរដ្ឋាភិបាល ផ្តល់អាជ្ញាប័ណ្ណ ប៉ុណ្ណោះ។
អ្នកភូមិដែលមានជម្លោះដីធ្លីនៅស្រុកស្នួល ឲ្យដឹងថា ក្រុមមន្ត្រីបរិស្ថាន ប៉ូលិស និងយោធាស្រុកស្នួល ប្រមាណជិត ២០នាក់ ខ្លះកាន់អាវុធ ដឹកនាំដោយមន្ត្រីបរិស្ថានខេត្តក្រចេះ រួមទាំងតំណាងក្រុមហ៊ុនវៀតណាម ទទួលបានដីវិនិយោគសម្បទានសេដ្ឋកិច្ចនៅព្រឹកថ្ងៃទី២ សីហា បានយកគ្រឿងចក្រចំនួន ៣គ្រឿង ឈូសឆាយផលដំណាំកសិកម្មអ្នកភូមិ ដោយសំអាងថា ដីនៅតំបន់នោះជាដីសម្បទានសេដ្ឋកិច្ចរបស់ក្រុមហ៊ុន សាយ ដុង កៅស៊ូ ឌុក ដុង (Say dong Kawsaou Douk Dong)។
តំណាងពលរដ្ឋ លោក ស៊ូ ផល្លា អះអាងថា ពលរដ្ឋចំនួន ២៨គ្រួសារ មានដីធ្លីកសិកម្មសរុបចំនួន ៤៩ហិកតារ ដែលគ្រប់គ្រងតាំងពីឆ្នាំ២០០៧ ប៉ុន្តែក្រុមហ៊ុនសម្បទានសេដ្ឋកិច្ចវៀតណាម ទើបតែទទួលបានអាជ្ញាប័ណ្ណវិនិយោគក្រោយអ្នកភូមិមករស់នៅ។ លោកថា ក្រុមហ៊ុនមានចេតនាយកគ្រឿងចក្រឈូសឆាយដីកសិកម្មពលរដ្ឋ ដើម្បីបំបិទភស្តុតាង និងព្យាយាមបណ្ដេញពលរដ្ឋនៅតំបន់នោះចេញ ដោយចោទពលរដ្ឋវិញថា មករស់នៅ និងកាប់ឆ្ការដីរបស់ក្រុមហ៊ុនយ៉ាងអនាធិបតេយ្យទៅវិញ។ បន្ថែមពីលើនេះ ក្រុមហ៊ុនបានព្យាយាមដាក់បារាសបិទផ្លូវច្រកចេញចូល មិនឲ្យពលរដ្ឋធ្វើដំណើរបាន ហើយក៏មានមន្ត្រីប៉ូលិសយាមឲ្យក្រុមហ៊ុនទៀតផង៖ «ដឹកនាំកម្លាំង ហ្នឹងយកមកបំផ្លិចបំផ្លាញ ឈូសបំផ្លាញមិនបានដាំមិនបានអី មិនដឹងបានអីឲ្យប្រពន្ធកូនទិញអង្ករទិញអីហូបទេ។»
ឆ្លើយតបការចោទប្រកាន់នេះ តំណាងក្រុមហ៊ុនសម្បទានសេដ្ឋកិច្ចរបស់វៀតណាម លោក ឆេន បដិសេធថា ពលរដ្ឋទាំងនោះទៅវិញទេដែលមកទន្ទ្រានរំលោភយកដីក្រុមហ៊ុន និងមកតាំងលំនៅយ៉ាងអនាធិបតេយ្យ។ លោកថា ក្រុមពលរដ្ឋទាំងនោះជាពលរដ្ឋចំណាកស្រុក មករស់នៅក្រោយក្រុមហ៊ុនធ្វើការឈូសឆាយ វិនិយោគដាំកៅស៊ូនៅតំបន់នោះ៖ «ខាងក្រុមហ៊ុនខ្ញុំមកវិនិយោគហើយ បានផ្ដួលរំលំសម្អាតដីអស់ហើយ បាននាំគ្នាមក ហើយដល់ហើយគាត់ទៅចោទប្រកាន់ក្រុមហ៊ុនទៅបំពានយកដីគាត់អីណា។»
ក្រុមហ៊ុនសម្បទានសេដ្ឋកិច្ច សាយ ដុង កៅស៊ូ ឌុក ដុង (Say dong Kawsaou Douk Dong) របស់វៀតណាម វិនិយោគដំណាំឧស្សាហកម្មកៅស៊ូ ទទួលសិទ្ធិវិនិយោគលើផ្ទៃដីចំនួន ១.៨៥២ហិកតារ កាលពីឆ្នាំ២០១០។
អភិបាលរងស្រុកស្នួល ទទួលបន្ទុកដោះស្រាយទំនាស់ដីធ្លី លោក សាន ណាស់ ឲ្យដឹងនៅថ្ងៃទី២ សីហា ថា លោកពុំទាន់ទទួលព័ត៌មានស្ដីពីការឈូសឆាយរបស់ក្រុមហ៊ុននៅឡើយទេ។ យ៉ាងណា លោកថា ពលរដ្ឋទាំងនោះមករស់នៅលើដីដែលរដ្ឋាភិបាល ផ្តល់សិទ្ធិឲ្យក្រុមហ៊ុនសម្បទានសេដ្ឋកិច្ចវិនិយោគ ហើយពលរដ្ឋក៏នាំគ្នាមកតាំងលំនៅជាបន្តបន្ទាប់លើដីក្រុមហ៊ុននៅ តំបន់នោះ។ លោកថា រដ្ឋាភិបាលធ្លាប់សម្រេចផ្តល់ដីសម្បទានសង្គមកិច្ចចំនួន ៧៥០ហិកតារ ត្រង់តំបន់ត្រពាំងឈូក ឃុំឃ្សឹម ស្រុកស្នួល រួមជាមួយពលរដ្ឋមានទំនាស់ដីធ្លីផ្សេងទៀត តែពលរដ្ឋទាំងនេះបានបដិសេធមិនទទួលយក និងប្រកាសដាច់ខាតមិនព្រមចាកចេញនោះទេ៖ «ព្យាយាមដើម្បីសម្រប សម្រួលដោះស្រាយរកដំណោះស្រាយណាមួយឲ្យសមស្រប ជាមួយពួកគាត់ចឹង អាចដោះស្រាយជាគោលនយោបាយ ទី១ គាត់ភាគច្រើនគឺគាត់អត់ព្រម។»
ទាក់ទិនបញ្ហានេះដែរ មន្ត្រីស៊ើបអង្កេតនៃសមាគមអាដហុក (Adhoc) ខេត្តក្រចេះ លោក ឌិន ខន្នី លើកឡើងថា អាជ្ញាធរ និងក្រុមហ៊ុន យកគ្រឿងចក្រឈូសឆាយផលដំណាំកសិកម្មអ្នកភូមិ ស្របពេលដែលដីមិនទាន់ដោះស្រាយ ថាជាករណីខុសនីតិវិធី និងរំលោភសិទ្ធិរស់នៅពលរដ្ឋធ្ងន់ធ្ងរ។ លោករកឃើញថា ក្រុមពលរដ្ឋទាំងនោះមានចំនួន ២គ្រួសារ មករស់នៅតាំងពីឆ្នាំ១៩៩០ ប្រកបរបរដងជ័រទឹក ចំណែកពលរដ្ឋផ្សេងទៀតបានមកតាំងលំនៅជាបន្តបន្ទាប់តាំងពីឆ្នាំ ២០០៧ មុនពេលក្រុមហ៊ុនទទួលសិទ្ធិវិនិយោគ។ លោកថា អាជ្ញាធរពាក់ព័ន្ធគួរយកចិត្តទុកដាក់ដោះស្រាយបញ្ហានេះជូនពលរដ្ឋ ដោយយោងលើគោលនយោបាយប្រមុខរដ្ឋាភិបាល ដែលតម្រូវឲ្យកាត់ផលប៉ះពាល់ចេញ៖ «អាជ្ញាធរស្រុកស្នួល គាត់បានធ្វើការសន្យានៅលើដីប្រជាពលរដ្ឋហើយ ថាដោះស្រាយកាត់ដីឲ្យពលរដ្ឋ ខ្ញុំសុំស្នើឲ្យអាជ្ញាធរស្រុក និងក្រុមហ៊ុន ធ្វើម៉េចកាត់ដីឲ្យពលរដ្ឋឲ្យទាន់វេលា ឲ្យពួកគាត់បានដាំដុះ។»
អ្នកភូមិអះអាងថា ពលរដ្ឋចំនួន ១៨គ្រួសារ កាលពីឆ្នាំ២០១៤ និងដើមឆ្នាំ២០១៥ ធ្លាប់បានដាក់ញត្តិទៅស្ថាប័នរដ្ឋសភា និងខុទ្ទកាល័យនាយករដ្ឋមន្ត្រី ព្រមទាំងស្ថាប័នពាក់ព័ន្ធផ្សេងទៀត បន្ទាប់ពីអាជ្ញាធរខេត្តក្រចេះ ហាក់មិនយកចិត្តទុកដាក់ដោះស្រាយទាក់ទិនបញ្ហាដីធ្លីនេះបាន តែរហូតមកដល់បច្ចុប្បន្ន នៅមិនទាន់ទទួលដំណឹងពីលទ្ធផលស្ដីពីដំណោះស្រាយនៅឡើយទេ៕
No comments:
Post a Comment