អ្នកវិភាគ ថា, ការបែកធ្លាយ ឯកសារ សម្ងាត់ ជាការបែកបាក់ ផ្ទៃក្នុង បក្សប្រជាជន
RFA / វិទ្យុ អាស៊ី សេរី | ១២ កញ្ញា ២០១៥
សមាជិកគណៈកម្មការអចិន្ត្រៃយ៍នៃគណបក្សប្រជាជនកម្ពុជា
ចេញពីទីស្នាក់ការកណ្ដាលបក្ស ក្រោយបោះឆ្នោតជ្រើសរើសប្រធាន
និងអនុប្រធានគណបក្សនេះកាលពីថ្ងៃទី២០ ខែមិថុនា ឆ្នាំ២០១៥។ RFA/Brach Chev
ក្រុម អ្នកវិភាគ ហៅ ការបែកធ្លាយ ឯកសារសម្ងាត់ របស់ គណបក្សប្រជាជន កម្ពុជា ថា, ជាសញ្ញា នៃការបែកបាក់ ផ្ទៃក្នុងបក្ស។ ប៉ុន្តែ មន្ត្រីជាន់ខ្ពស់ បក្សប្រជាជន កម្ពុជា អះអាង ថា, ផ្ទៃក្នុង បក្សប្រជាជន នៅតែ រឹងមាំល្អ។
តើ ការបែកធ្លាយ លិខិតសម្ងាត់នេះ ប៉ះពាល់ ប្រជាប្រិយភាព គណបក្សប្រជាជន កម្ពុជា ដែរទេ?
ការបែកធ្លាយសារបង្គាប់បញ្ជាដ៏កម្រនេះ ត្រូវក្រុមអ្នកវិភាគនិយាយថា ប្រព័ន្ធគ្រប់គ្រងផ្ទៃក្នុងបក្សអាចមានការធ្លុះធ្លាយ។ ជាងនេះទៅទៀត អ្នកវិភាគថា នេះជាការបង្ហាញឲ្យឃើញថា មន្ត្រីថ្នាក់ក្រោមបក្សមិនពេញចំណាត់ការរបស់ថ្នាក់លើនោះទេ។
អ្នកសិក្សាស្រាវជ្រាវការអភិវឌ្ឍន៍សង្គម លោកបណ្ឌិត មាស នី យល់ឃើញថា ការបង្ហាញឯកសាររបស់គណបក្សកាន់អំណាចនៅពេលនេះ គឺធ្វើឲ្យថ្នាក់ដឹកនាំបក្សព្រួយបារម្ភចំពោះថ្នាក់ក្រោមខ្លួន។ លោក មាស នី បន្តថា នេះសញ្ញាមួយប្រាប់ឲ្យគណបក្សកាន់អំណាចចាស់វស្សាមួយនេះប្រយ័ត្ន ប្រយែងនឹងមន្ត្រីថ្នាក់ក្រោមរបស់ខ្លួន ព្រោះអ្នកថ្នាក់ក្រោម បង្ហាញការមិនពេញចិត្តនឹងការបង្គាប់បញ្ជា៖ «ផ្ទៃក្នុងខាងក្នុង គណបក្សប្រជាជនកម្ពុជា មួយចំនួនមានការរង្គាលចិត្ត ឬថាមិនពេញចិត្តក៏បានដែរ បានជាចាប់ផ្ដើមបញ្ចេញព័ត៌មានរសើបមួយចំនួនឲ្យសាធារណៈបានដឹង។»
លិខិតដែលមានបោះត្រាថា «សម្ងាត់» បង្ហោះតាមបណ្ដាញសង្គមហ្វេសប៊ុក (Facebook) កាលពីថ្ងៃទី១១ ខែកញ្ញា ដែលចុះហត្ថលេខាដោយលោក សាយ ឈុំ អនុប្រធានគណបក្សប្រជាជនកម្ពុជា សរសេរទៅកាន់ប្រធានគណៈកម្មាធិការបក្សនៅគ្រប់រាជធានី-ខេត្ត។ ក្នុងលិខិតនោះ លោក សាយ ឈុំ ណែនាំឲ្យសមាជិកគណបក្សលោក «យកចិត្តទុកដាក់បំផុសបំផុលណែនាំឲ្យមជ្ឈដ្ឋាននានា ធ្វើញត្តិគាំទ្រសេចក្ដីថ្លែងការណ៍របស់លោក ហ៊ុន សែន ស្ដីពីបញ្ហាផែនទី និងព្រំដែន ដែលធ្វើឡើងកាលពីថ្ងៃទី៨ ខែកញ្ញា។»
ក្រុមប្រឹក្សាឃ្លាំមើលកម្ពុជា ដែលមានមូលដ្ឋានក្នុងប្រទេសន័រវែស (Norway) បានចេញសេចក្ដីថ្លែងការណ៍ថ្កោលទោសលិខិតគណបក្សកាន់អំណាចចុះថ្ងៃទី ៩ ខែកញ្ញា ដែលមានបោះត្រាថា ជាឯកសារ «សម្ងាត់» ចាត់តាំងអោយមន្ត្រីគណបក្សប្រជាជនកម្ពុជា គ្រប់លំដាប់ថ្នាក់ធ្វើញត្តិគាំទ្រសេចក្ដីថ្លែងការណ៍របស់លោក នាយករដ្ឋមន្ត្រី ហ៊ុន សែន ស្ដីពីបញ្ហាផែនទីនិងព្រំដែន។
ទាក់ទងរឿងនេះដែរ អ្នកសិក្សាស្រាវជ្រាវការអភិវឌ្ឍសង្គម លោក កែម ឡី និយាយថា ស្ថានការណ៍នៅពេលនេះបង្ហាញថា ការស្មោះត្រង់របស់មន្ត្រីថ្នាក់ក្រោមគណបក្សចំពោះថ្នាក់លើមានការ ប្រែប្រួល។ លោក កែម ឡី ថា ករណីបែបនេះ គឺធ្វើឲ្យប៉ះពាល់ប្រជាប្រិយភាពបក្ស និងជាបញ្ហាទៅថ្ងៃមុខ៖ «យើង ឃើញព័ត៌មានផ្ទៃក្នុងចាប់ផ្ដើមចេញមក ចឹងមានន័យថា ប្រព័ន្ធគ្រប់គ្រងរបស់គាត់ (គណបក្សប្រជាជនកម្ពុជា) ធ្លុះធ្លាយហើយ។»
ឯកសារណែនាំឲ្យប្រធានគណៈកម្មាធិការបក្សប្រជាជនកម្ពុជា នៅរាជធានី-ខេត្ត ឲ្យបំផុសមជ្ឈដ្ឋាននានា ធ្វើញត្តិគាំទ្រសេចក្ដីថ្លែងការណ៍របស់លោកនាយករដ្ឋមន្ត្រី ហ៊ុន សែន ស្ដីពីបញ្ហាផែនទី និងព្រំដែន។ លិខិតនេះជាលិខិតផ្ទៃក្នុងទី២ ដែលបានបែកធ្លាយ។ ឯកសារទី១ ត្រូវបានគេបង្ហោះតាមបណ្ដាញសង្គម កាលពីខែមិថុនា ក្នុងអំឡុងលោក ជា ស៊ីម ទទួលមរណភាព គណបក្សប្រជាជនបោះឆ្នោតជ្រើសរើសប្រធានបក្សថ្មី ដោយក្នុងនោះបេក្ខភាពប្រធានបក្ស គឺលោក ហ៊ុន សែន តែម្នាក់ និងបេក្ខភាពអនុប្រធានបក្ស គឺលោក សាយ ឈុំ និងលោក ស ខេង។
ផ្ទុយពីការលើកឡើងរបស់ក្រុមអ្នកវិភាគ អ្នកនាំពាក្យគណបក្សប្រជាជនកម្ពុជា លោក សុខ ឥសាន បកស្រាយថា ការបង្ហាញឯកសារមួយចំនួនរបស់គណបក្សប្រជាជនកម្ពុជា គឺបញ្ជាក់ថា គណបក្សលោកបើកសិទ្ធិសេរីភាពទូលំទូលាយក្នុងការផ្សព្វផ្សាយព័ត៌មាន។ លោកបន្តថា គណបក្សប្រជាជនកម្ពុជា នៅតែធ្វើការងារជាធ្លុងមួយ ហើយការលើកឡើងថា គណបក្សប្រជាជនបែកបាក់ផ្ទៃក្នុង ក៏មិនមែនជាលើកទីមួយដែរ៖ «គេលើកតាំងពីឆ្នាំ១៩៩៣ មកថា គណបក្សប្រជាជនកម្ពុជា មានបក្ខពួកសម្ដេច ហ៊ុន សែន សម្ដេច ជា ស៊ីម សម្ដេច ហេង សំរិន ប៉ុន្តែទីបំផុតមានឯណា? គណបក្សប្រជាជននៅតែធ្លុងមួយដដែល។»
ដោយឡែក សាស្ត្រាចារ្យវិទ្យាសាស្ត្រនយោបាយ លោកបណ្ឌិត រស់ រ៉ាវុធ និយាយថា នេះជារឿងធម្មតាទេនៅក្នុងគណបក្សនយោបាយធំមួយតែងតែបែកធ្លាយ ឯកសារខ្លះៗហើយ ព្រោះនេះជាសារបង្ហាញមានអ្នកមិនពេញចំពោះទង្វើរបស់ថ្នាក់ដឹកនាំ បក្ស។ លោកសាស្ត្រាចារ្យមានជំនឿថា ការបែកធ្លាយឯកសារមិនអាចចោទជាបញ្ហាចំពោះគណបក្សប្រជាជនកម្ពុជា ឡើយ៖ «មិនមានការរង្គោះរង្គើធំដុំទេ ប៉ុន្តែគ្រាន់តែមានសម្ដែងការមិនពេញចិត្ត។»
អ្នកនាំពាក្យប្រជាជនកម្ពុជា លោក សុខ ឥសាន ថា កន្លងមកឯកសារផ្ទៃក្នុងបក្សដែលហាមឃាត់មិនឲ្យផ្សព្វផ្សាយដោយគ្មាន ការអនុញ្ញាតនោះ គឺកិច្ចប្រជុំមហាសន្និបាតបក្ស។ លោកបញ្ជាក់ថា ទាក់ទងសារជូនពរក្បាលម៉ាស៊ីនបក្សពេលឡើងតួនាទី ឬថ្ងៃកំណើតរបស់ថ្នាក់ដឹកនាំគណបក្សប្រជាជនកម្ពុជា មិនដែលចេញលិខិតបង្គាប់បញ្ជាឡើយ៕
No comments:
Post a Comment