ពលរដ្ឋខ្មែរ នៅអាមេរិក ធ្វើបាតុកម្ម មុខស្ថានទូត ខ្មែរ ទាមទារ ដោះលែង អ្នកទោស នយោបាយ
RFA / វិទ្យុ អាស៊ី សេរី | ១៣ កញ្ញា ២០១៥
មន្ត្រីគណបក្សសង្គ្រោះជាតិ លោក មាជ សុវណ្ណារ៉ា (ឆ្វេង)
និងសកម្មជនដទៃទៀត
ត្រូវបានសមត្ថកិច្ចបញ្ជូនតាមរថយន្តយកទៅឃុំនៅពន្ធនាគារព្រៃស
នៅថ្ងៃទី២១ កក្កដា ឆ្នាំ២០១៥។ RFA/Morm Moniroth
ប្រជាពលរដ្ឋ ខ្មែរ អាមេរិកាំង បាននាំគ្នា ធ្វើបាតុកម្ម មួយ កាលពីព្រឹក ថ្ងៃសៅរ៍ ទី១២ ខែកញ្ញា នៅមុខស្ថានទូត ខ្មែរ ប្រចាំ រដ្ឋធានី វ៉ាស៊ីនតោន នៃសហរដ្ឋ អាមេរិក។ នេះ គឺ ជាបាតុកម្ម លើកទីមួយហើយ បន្ទាប់ ពីឯកអគ្គរាជទូត ថ្មី គឺ លោក ជុំ ប៊ុនរ៉ុង បានឡើងមក កាន់តំណែងនេះ។
បាតុករដែលមានគ្នាប្រមាណជិត ១០០នាក់ បាននាំគ្នាទាមទារឲ្យរដ្ឋាភិបាលកម្ពុជា ដោះលែងអ្នកទោសនយោបាយ និងសកម្មជនការពារបរិស្ថាន ដែលរដ្ឋាភិបាលក្រុងភ្នំពេញចាប់ដាក់ពន្ធនាគារ និងឲ្យគោរពឯករាជ្យភាពនៃប្រព័ន្ធតុលាការ។ ក្រុមបាតុករក៏ទាមទារឲ្យរដ្ឋាភិបាល ធានាឲ្យបាននូវតម្លាភាពក្នុងការរៀបចំព្រំដែនជាមួយប្រទេសវៀតណាម។
បាតុករម្នាក់ គឺលោក គង់ សេរី ដែលនាំគ្នាប្រមាណ ៤០នាក់ពីរដ្ឋកិនេទិកេត (Connecticut) មានប្រសាសន៍ថា ក្រុមលោកមានគោលបំណងបីជាសំខាន់ ក្នុងការមកធ្វើបាតុកម្មនេះ៖ «បាតុកម្ម នេះ គឺជាបាតុកម្មអហិង្សា។ យើងអត់មានមកជេរមកវាយប្រហារ ឬមកទិតៀនបុគ្គលណាឡើយ។ យើងចង់ឲ្យរដ្ឋាភិបាលយើងរៀបចំលក្ខណៈប្រជាធិបតេយ្យរបស់ស្រុកខ្មែរ យើង ពីព្រោះយើងមើលឃើញថា លក្ខណៈប្រជាធិបតេយ្យ គឺអត់ទាន់មានលក្ខណៈគ្រប់គ្រាន់។ ទីពីរ យើងសុំឲ្យរដ្ឋាភិបាលគិតអំពីតម្លៃរបស់សិទ្ធិមនុស្ស ហើយនិងទីបី យើងចង់ទាមទារឲ្យរដ្ឋាភិបាល ពិគ្រោះពិចារណាឡើងវិញអំពីរឿងដោះលែងអ្នកដែលជាប់ឃុំឃាំងទាំង អម្បាលម៉ាន។»
ក្រុមបាតុករបាននាំគ្នារៀបចំញត្តិមួយ ដើម្បីផ្ញើតាមរយៈស្ថានទូតទៅរដ្ឋាភិបាលកម្ពុជា តែស្ថានទូតបិទទ្វារមិនមានអ្នកចេញមកទទួលឡើយ។ ទោះជាយ៉ាងនេះក្តី លោក គង់ សេរី គិតថា ការដែលស្ថានទូតចេញមកទទួលញត្តិ ឬមិនមកទទួល មិនជាការសំខាន់ប៉ុន្មានឡើយ៖ «បាទ! គេអត់ទទួលយើង ដោយសារគេអត់ធ្វើការ ប៉ុន្តែចំណុចសំខាន់របស់យើង យើងអត់ឲ្យតម្លៃទៅលើគេនៅឬមិននៅទេ។ ថ្ងៃនេះយើងចង់បញ្ចេញមតិរបស់យើងប្រាប់ប្រជាជនក្នុងពិភពលោក ទាំងអស់ថា ខ្មែរយើងនៅសហរដ្ឋមានទឹកចិត្តស្នេហាជាតិ យើងចង់ស្វែងរកយុត្តិធម៌ និងរកប្រជាធិបតេយ្យពិតប្រាកដឲ្យប្រទេសយើង ឲ្យប្រជាជនយើងនៅក្នុងប្រទេស។»
ទោះជាយ៉ាងណាក៏ដោយ អ្នកដឹកនាំបាតុកម្មនេះ ថានឹងបញ្ជូនញត្តិរបស់ពួកគេតាមសារអេឡិចត្រូនិកអ៊ីមែល និងតាមប្រព័ន្ធប្រៃសនីយ៍។
អ្នកដែលមកធ្វើបាតុកម្មនៅរដ្ឋធានីវ៉ាស៊ីនតោននេះ ខ្លះមកពីរដ្ឋរ៉ូតអាយលេនដ៍ (Rhode Island) រដ្ឋម៉ាសាឈូសិត (Massachusetts) រដ្ឋកិនេទិកេត (Connecticut) រដ្ឋប៉េនស៊ីវេនីញ៉ា (Pennsylvania) ព្រមទាំងរដ្ឋនៅតំបន់រដ្ឋធានីវ៉ាស៊ីនតោន មានដូចជារដ្ឋវឺជីនៀ (Virginia) និងមែរីឡេនដ៍ (Maryland) ជាដើម៕
No comments:
Post a Comment