សហគមន៍ ព្រៃឈើ គ្រោងលើកគ្នា តវ៉ា ប្រឆាំង អ្នកទន្ទ្រាន ដីព្រៃ នៅសាលាខេត្ត កំពង់ឆ្នាំង
RFA / វិទ្យុ អាស៊ី សេរី | ២៨ កញ្ញា ២០១៥
ផែនទីខេត្តកំពង់ឆ្នាំង។ Photo: RFA
តំណាង សហគមន៍ ភ្នំព្រះធាតុ នៅស្រុក សាមគ្គី មានជ័យ ខេត្ត កំពង់ឆ្នាំង ព្រមាន លើកគ្នា យ៉ាងតិច ៥០នាក់ ឡើងតវ៉ា នៅខាងមុខ សាលាខេត្តនេះ ក្នុងពេល ឆាប់ៗ ដើម្បី ឲ្យអភិបាលខេត្ត ចាត់វិធានការ លើជនល្មើស និងអ្នកពាក់ព័ន្ធ ដែលចូលទន្ទ្រាន កាន់កាប់ដីព្រៃ សហគមន៍។
តំណាង និងប្រជាសហគមន៍ភ្នំព្រះធាតុ ដែលមានសមាជិកប្រើប្រាស់ព្រៃសហគមន៍ចំនួន ៧ភូមិ នៃឃុំពាម បានផ្ដិតមេដៃ ៤៩៥ស្នាមមេដៃ ភ្ជាប់នឹងពាក្យបណ្ដឹងដាក់ជូនសាលាខេត្តកំពង់ឆ្នាំង រដ្ឋបាលព្រៃឈើ បញ្ជាការដ្ឋានកងរាជអាវុធហត្ថខេត្ត និងអង្គការក្រៅរដ្ឋាភិបាលជាបន្តបន្ទាប់ តាំងពីខែសីហា ឆ្នាំ២០១៥ ប៉ុន្តែនៅមិនទាន់មានពន្លឺនៃការដោះស្រាយអ្វីនៅឡើយ។
ប្រធានសហគមន៍ព្រៃឈើភ្នំព្រះធាតុ លោក ប៊ុន យ៉ូន ឲ្យដឹងនៅថ្ងៃទី២៧ ខែកញ្ញា ថា មេភូមិច្រកថ្កូវ លោក សួស សារ៉េម និងមេឃុំពាម លោក យី ផេង ធ្លាប់គំរាមលោក និងបញ្ជាក់ថា ដីដែលមន្ត្រីនគរបាលពីរនាក់ និងជនមិនស្គាល់មុខផ្សេងទៀតបានកាប់ទន្ទ្រានយកនៅប្លង់ដីសហគមន៍ នោះ គឺអ្នកទាំងនោះមានប្លង់កម្មសិទ្ធិត្រឹមត្រូវ។
លោកថា បើស្ថាប័នដែលគាត់ដាក់បណ្ដឹងចូលមិនចាត់ការដកហូតដីដែលបានបាត់ បង់ប្រមាណ ១០ហិកតារនោះមកវិញទេ ក្រុមពលរដ្ឋនឹងឡើងតវ៉ានៅពេលបង្ហើយដៃពីការដកស្ទូងប៉ុន្មានថ្ងៃ ខាងមុខទៀតនេះ៖ «ដល់ចុងក្រោយគាត់ (មេឃុំ) ប្រជាជន អត់ដឹងអីទេ សម្រេចលើអ្ហែងទៅ ឲ្យតែអ្ហែងព្រមព្រៀងទៅចប់ហើយ! ថ្ងៃរសៀលម៉ោងពីរគាត់ស្រែកមកទៀត អញឲ្យអ្ហែង ១ពាន់ដុល្លារឈប់មាត់ទៅ អាហ្នឹងពាក្យមេឃុំ និយាយផ្ដាំតាមតា ម៉ៅ អុន។ បើមិនមានដំណោះស្រាយទេ គឺខ្ញុំនាំប្រជាពលរដ្ឋទៅដើម្បីឲ្យអភិបាលខេត្តដោះស្រាយយកដីនោះ មកវិញ។»
លោក ប៊ុន យ៉ូន បញ្ជាក់ថា សហគមន៍ភ្នំព្រះធាតុ ឋិតនៅឃុំពាម មានផ្ទៃដីសរុប ៦៨២ហិកតារ ត្រូវជនល្មើសលួចកាប់ឆ្ការ និងដាក់គ្រឿងចក្រឈូសអស់ប្រហែល ១០ហិកតារ នៅចំណុចពេជ្រចង្វា។ លោកថា ប្រជាពលរដ្ឋទាំង ៧ភូមិ នៃឃុំពាម ប្ដេជ្ញាទាមទារដីសហគមន៍ដែលបាត់បងមកវិញឲ្យបាន ហើយលោកជាតំណាងនឹងរកគ្រប់វិធីសាស្ត្រ ដើម្បីសុំអន្តរាគមន៍ពីអាជ្ញាធរមានសមត្ថកិច្ចថ្នាក់លើទៀត។
វិទ្យុអាស៊ីសេរី មិនអាចទាក់ទងមេឃុំពាម និងមេភូមិច្រកថ្កូវ ដើម្បីបំភ្លឺតបចំពោះការចោទប្រកាន់នេះបានទេ នៅថ្ងៃទី២៧ ខែកញ្ញា។ ប៉ុន្តែកន្លងទៅ មេឃុំពាម លោក យី ផេង បញ្ជាក់ថា ទីតាំងដីដែលកំពុងមានជម្លោះនោះ ពិតជាមានអ្នកចូលទៅកាប់ព្រៃដាំដើមស្វាយមែន តែមន្ត្រីប៉ូលិស និងអ្នកខ្លះទៀតមានលិខិតកាន់កាប់ទទួលស្គាល់ដោយអាជ្ញាធរភូមិ ឃុំ តាំងពីឆ្នាំ២០០៤ គឺមុនពេលដែលតំបន់នោះ បានបង្កើតទៅជាព្រៃសហគមន៍នៅឆ្នាំ២០១០។
លោកថា កាលណោះការគ្រប់គ្រងទឹកដីរដ្ឋបាលរបស់ឃុំពាម ជាមួយឃុំជិតខាងមិនទាន់មានភាពច្បាស់លាស់ ស្របពេលនោះក៏មានពលរដ្ឋខ្លះនៅឃុំជិតខាងបានលក់ដីនៅតំបន់នោះ។ គ្រានោះមិនដឹងរឿងអ្វីច្បាស់លាស់ឡើយ ព្រោះលោកទើបឡើងធ្វើជាមេឃុំពាមនៅឆ្នាំ២០០៩។
តំណាង និងប្រជាសហគមន៍ភ្នំព្រះធាតុ ចំនួន ១១នាក់ ធ្លាប់ជួបជុំគ្នានៅខាងមុខសាលាខេត្ដ ដើម្បីដាក់ពាក្យបណ្ដឹងទាក់ទងនឹងព្រៃសហគមន៍ជូនអភិបាលខេត្ត លោក ឈួរ ច័ន្ទឌឿន ម្ដងរួចហើយ កាលពីថ្ងៃទី២៨ ខែសីហា ឆ្នាំ២០១៥។ ភ្លាមនោះអ្នកនាំពាក្យសាលាខេត្តកំពង់ឆ្នាំង លោក ម៉ម ឈឿម បញ្ជាក់ថា ពាក្យបណ្ដឹងនឹងដាក់ដល់ដៃអភិបាលខេត្តពិនិត្យ និងដោះស្រាយក្នុងពេលឆាប់ៗ៕
No comments:
Post a Comment