មន្ត្រី រដ្ឋាភិបាល ចាត់ទុកសម្ដី តំណាងរាស្ត្រ បក្សប្រឆាំង ថា, គ្មាន លក្ខណៈ ពិតប្រាកដ
RFA / វិទ្យុ អាស៊ី សេរី | ២០ កញ្ញា ២០១៥
លោក ផៃ ស៊ីផាន អ្នកនាំពាក្យទីស្ដីការគណៈរដ្ឋមន្ត្រី
ធ្វើសន្និសីទកាសែតនាទីស្ដីការគណៈរដ្ឋមន្ត្រី នៅថ្ងៃទី១៩ ខែសីហា
ឆ្នាំ២០១៥។ RFA/Morm Moniroth
មន្ត្រី រដ្ឋាភិបាល ចាត់ទុកសម្ដី របស់ តំណាងរាស្ត្រ បក្សប្រឆាំង ដែលនិយាយ ថា, សហរដ្ឋ អាមេរិក នឹងប្រើ ដំបង ដាក់រដ្ឋាភិបាល កម្ពុជា ប្រសិន រដ្ឋាភិបាល កម្ពុជា អនុម័ត សេចក្តីព្រាងច្បាប់ ស្ដីពី សហជីពនោះ គឺ គ្មាន លក្ខណៈ ពិតប្រាកដ។
សេចក្តីព្រាងច្បាប់ មួយនេះ ជារឿយៗ ក្រុមសង្គមស៊ីវិល តែងតែ រិះគន់ ថា នឹងធ្វើ ឲ្យប៉ះពាល់ ប្រយោជន៍ កម្មករ។ រដ្ឋលេខាធិការ នៃទីស្ដីការ គណៈរដ្ឋមន្ត្រី លោក ផៃ ស៊ីផាន អះអាងការពារសេចក្តីព្រាងច្បាប់នេះថា ធ្វើឡើងដើម្បីការពារសហជីព និងអ្នកពាក់ព័ន្ធ ថែមទាំងមានការចូលរួមពីអង្គការអន្តរជាតិខាងការងារ ហៅកាត់ថា អាយឡូ (ILO)។
មន្ត្រីជាន់ខ្ពស់រដ្ឋាភិបាលកម្ពុជា មិនជឿថា សហរដ្ឋអាមេរិក នឹងព្រមានកម្ពុជា បើសិនជានៅតែអនុម័តសេចក្តីព្រាងច្បាប់សហជីព ដូចសម្ដីរបស់តំណាងរាស្ត្រគណបក្សសង្គ្រោះជាតិ ថានោះទេ។
ការថ្លែងបែបនេះ បន្ទាប់ពី លោក សុន ឆ័យ បានផ្តល់បទសម្ភាសន៍ដល់វិទ្យុអាស៊ីសេរី ថា អាមេរិកនឹងប្រើដំបងមកលើរដ្ឋាភិបាលកម្ពុជា ដោយលែងបន្ធូរបន្ថយពន្ធលើទំនិញសម្លៀកបំពាក់របស់កម្ពុជា ដែលនាំចូលទៅលក់នៅសហរដ្ឋអាមេរិក។
លោក ផៃ ស៊ីផាន ចាត់ទុកសម្ដីរបស់តំណាងរាស្ត្រគណបក្សប្រឆាំង តែងតែប្រើប្រាស់ភាសាភូតភរ។ លោកថា ការបន្ធូរបន្ថយ ឬមិនយកពន្ធលើទំនិញកម្ពុជា ធ្វើឲ្យពលរដ្ឋរបស់សហរដ្ឋអាមេរិក ចំណាយលុយតិច ដើម្បីទិញទំនិញដែលមិនយកពន្ធនោះ៖ «រឿងហ្នឹងជារឿង មិនទាន់ដល់ ព្រោះភាសារបស់គណបក្សប្រឆាំងជាភាសាភូតភរតើ ហើយច្បាប់សហជីពមិនមែនជាច្បាប់បណ្ដេញ មិនឲ្យធ្វើការឯណា ជាច្បាប់ការពារសហជីព។»
ជាញឹកញាប់ណាស់ដែលកម្មករកម្មការិនី ពលរដ្ឋខ្មែរ និងសហជីព ប្រមូលផ្តុំគ្នាប្រឆាំងតវ៉ានឹងសេចក្តីព្រាងច្បាប់នេះ។ ក្រុមសហជីព ស្នើឲ្យមានការកែប្រែមាត្រាជាង៣០ ដែលគេយល់ថា មានចំណុចអាក្រក់ខ្លាំង គឺតម្រូវឲ្យមានលក្ខខណ្ឌតឹងតែងនៃការចុះបញ្ជិកាសហជីព។ ការកំណត់ចំនួនកម្មករពី ២៥% សម្រាប់បង្កើតសហជីព ការពិន័យថ្នាក់ដឹកនាំសហជីព ការរាយការណ៍ពីសកម្មភាពចំណូលចំណាយរបស់សហជីព ការកំណត់សមាជិក ៥០% បូក ១ ឡើងទៅ ដើម្បីរៀបចំមហាសន្និបាតសហជីព ឬធ្វើកូដកម្ម ព្រមទាំងចំណុចមួយចំនួនទៀត។
មន្ត្រីជាន់ខ្ពស់នៃគណបក្សសង្គ្រោះជាតិ លោក សុន ឆ័យ បានផ្តល់បទសម្ភាសន៍ដល់វិទ្យុអាស៊ីសេរី កាលពីថ្ងៃទី១៧ ខែកញ្ញា នៅរដ្ឋធានីវ៉ាស៊ីនតោន សហរដ្ឋអាមេរិក ក្រោយលោកបានជួបអនុរដ្ឋមន្ត្រីក្រសួងការបរទេស និងអនុរដ្ឋមន្ត្រីក្រសួងសិទ្ធិមនុស្ស និងពលករ។ ក្នុងបទសម្ភាសន៍នោះ លោកឲ្យដឹងថា ប្រសិនរដ្ឋាភិបាលកម្ពុជា អនុម័តសេចក្តីព្រាងច្បាប់ស្ដីពីសហជីពដែលធ្វើឲ្យប៉ះពាល់ដល់កម្មករ និងអ្នកពាក់ព័ន្ធ អាមេរិកនឹងប្រើដំបង ប្រសិនរដ្ឋាភិបាលកម្ពុជា អនុម័តដោយគ្មានការកែប្រែ។ លោកបន្តថា រដ្ឋាភិបាលអាមេរិក ព្រួយណាស់ចំពោះច្បាប់ដែលអាក្រក់ធ្វើបាបពលរដ្ឋ៖ «ដំបងមានន័យថា សហរដ្ឋអាមេរិក គេលុបចោល ឬចោលការបន្ធូរបន្ថយពន្ធ ដោយសាររឿងនេះទាក់ទងកម្មករកាត់ដេរ។»
មកទល់ពេលនេះ សេចក្តីព្រាងច្បាប់ស្ដីពីសហជីពដែលមាន ១៧ជំពូក និង ៩៦មាត្រាស្ថិតក្នុងដៃក្រសួងការងារ និងបណ្តុះបណ្តាលវិជ្ជាជីវៈ និងក្រសួងពាក់ព័ន្ធ ដើម្បីពិនិត្យលើអក្ខរាវិរុទ្ធ និងផ្ទៀងផ្ទាត់ចំណុចណាដែលគួរដាក់បញ្ចូល ឬធ្វើការកែប្រែ។ ក្រោយអន្តរក្រសួងពិនិត្យរួចរាល់ នឹងបញ្ជូនទៅកាន់ទីស្ដីការគណៈរដ្ឋមន្ត្រីក្នុងខែសីហា ឬខែកញ្ញា។ ក្រសួងការងារ រំពឹងថា នឹងត្រូវបញ្ជូនទៅដល់ដៃរដ្ឋសភា ដើម្បីធ្វើការអនុម័តយ៉ាងយូរបំផុតចុងឆ្នាំ២០១៥។
ប្រធានសហភាពការងារកម្ពុជា លោក អាត់ ធន់ ដែលតែងប្រឆាំងការធ្វើសេចក្តីព្រាងច្បាប់នេះ ឲ្យដឹងថា ទាមទារឲ្យការធ្វើច្បាប់នេះមានការចូលរួមពីសហជីព និងភាគីពាក់ព័ន្ធនានា និងទទួលយកការផ្តល់យោបល់ក្នុងន័យការកែលំអ។ លោក អាត់ ធន់ យល់ថា ប្រសិនបើអាមេរិក រឹតបន្តឹងតម្លៃពន្ធទំនិញ ឬសម្លៀកបំពាក់របស់កម្ពុជា នឹងធ្វើឲ្យអ្នកវិនិយោគរត់ចេញពីកម្ពុជា ដែលបណ្ដាលឲ្យពលរដ្ឋខ្មែររាប់ម៉ឺននាក់បាត់បង់ការងារ៖ «មិនចង់ ឲ្យមានច្បាប់នេះ ព្រោះថា យើងមានច្បាប់ការងារអនុសញ្ញាអន្តរជាតិ រដ្ឋធម្មនុញ្ញ ឬក៏ប្រកាសផ្សេងៗដែលបង្កើតសហជីពបានហើយ។»
តំណាងរាស្ត្រគណបក្សសង្គ្រោះជាតិ លោក សុន ឆ័យ ថា តំណាងរាស្ត្រគណបក្សសង្គ្រោះជាតិ នឹងជំរុញឲ្យមានការចូលរួមដោយបើកចំហលើសេចក្តីព្រាងច្បាប់នេះ។ លោកថា លោកមិនចង់ឃើញការដាក់ទណ្ឌកម្មណាមួយមកលើប្រទេសកម្ពុជា ឡើយ៕
This dog Phay Siphan should stop barking. Every word he said has always irritated people.
ReplyDelete