សហគមន៍ ព្នង ខេត្ត មណ្ឌលគិរី បដិសេធ មិនទទួលយក ដំណោះស្រាយ ចែកដី
RFA / វិទ្យុ អាស៊ី សេរី | ៩ កញ្ញា ២០១៥
ពិធីសែនភូមិរបស់ជនជាតិភាគតិចព្នងនៅខេត្តមណ្ឌលគិរី (Photo: RFA)
សហគមន៍ ជនជាតិដើម ភាគតិច ព្នង ភូមិ ពូលូង, សង្កាត់ រមនា, ក្រុង សែនមនោរម្យ, ខេត្ត មណ្ឌលគិរី ច្រានចោល ដំណោះស្រាយ ចែកដី សហគមន៍ តាមការ សម្របសម្រួល របស់ អាជ្ញាធរ ក្រុង ទៅឲ្យបុគ្គល ជាមន្ត្រី ធ្វើជាកម្មសិទ្ធិ ឯកជន។ ចំណែក អាជ្ញាធរ ក្រុង អះអាងថា, ដំណោះស្រាយ នេះ ឈរលើគោលការណ៍ យុត្តិធម៌។
សហគមន៍ភូមិពូលូង ៤២គ្រួសារ ចោទប្រកាន់អភិបាលរងស្រុកកោះញែក ខេត្តមណ្ឌលគិរី ថាឃុបឃិតជាមួយមន្ត្រីមូលដ្ឋានសង្កាត់រមនា ធ្វើលិខិតកាន់កាប់ដីខុសច្បាប់រំលោភយកដីសហគមន៍។
ការចោទប្រកាន់នេះ ធ្វើឡើងបន្ទាប់ពីអាជ្ញាធរក្រុងសែនមនោរម្យ កាលពីថ្ងៃទី៤ កញ្ញា បានសម្របសម្រួលកាត់ដី ១០ហិកតារក្នុងចំនួនដី ២៥ហិកតារទៅឲ្យសហគមន៍ ចំណែកដី ១៥ហិកតារទៀត ប្រគល់ទៅឲ្យអភិបាលរងស្រុកកោះញែក ដោយសារតែអាជ្ញាធរសង្កាត់បានចេញលិខិតកាន់កាប់ដីទៅឲ្យអភិបាលរង ស្រុកជាកម្មសិទ្ធិឯកជន។
តំណាងសហគមន៍ អ្នកស្រី ជីង ម៉ាប់ មានប្រសាសន៍ថា ដំណោះស្រាយរបស់អាជ្ញាធរក្រុងនោះ មិនបានផ្តល់យុត្តិធម៌ជូនសហគមន៍ ហើយលម្អៀងទៅលើមន្ត្រីមូលដ្ឋាន។ លើសពីនេះទៀត អ្នកស្រីអះអាងថា លិខិតកាន់កាប់ដីដែលអាជ្ញាធរសង្កាត់ចេញទៅឲ្យអភិបាលរងស្រុក គឺទើបធ្វើកាលពីដើមឆ្នាំ២០១៥ ចំណែកដីសហគមន៍មានលិខិតទទួលស្គាល់ពីអាជ្ញាធរសង្កាត់-ក្រុង តាំងពីឆ្នាំ១៩៩៩៖ «លិខិតកាន់កាប់ដីរបស់គាត់ គាត់ធ្វើថ្មីនៅឆ្នាំ២០១៥ នេះទេ។ ដីកន្លែងហ្នឹងពីមុនជាតំបន់ចម្ការវិលជុំ និងព្រៃត្រណមពួកខ្ញុំ ក្នុងឆ្នាំ២០០២ គាត់ធ្វើលិខិតសុំធ្វើថ្មសុំច្បាប់កិនថ្មទេ ប៉ុន្តែឥឡូវគាត់យកជាកម្មសិទ្ធិ។»
អភិបាលរងស្រុកកោះញែក លោក ហួត សូនី កាលពីថ្ងៃទី២២ ខែឧសភា ឆ្នាំ២០១៥ បានប្ដឹងទាមទារដី ២៥ហិកតារពីសហគមន៍ភូមិពូលូង ដោយសំអាងថា ដីនោះលោកកាន់កាប់តាំងពីឆ្នាំ១៩៩៨ ដោយបានធ្វើចម្ការកាហ្វេ បន្ទាប់មកបានបើកការដ្ឋានកិនថ្មនៅលើដីនោះ។
ឆ្លើយតបការចោទប្រកាន់នេះ លោកអភិបាលរងស្រុកមានប្រសាសន៍ថា លោកមានលិខិតបទដ្ឋានបញ្ជាក់ថា ដីនោះលោកបានកាន់កាប់ជាក់ស្តែង ក៏ប៉ុន្តែដើម្បីសម្របសម្រួលបញ្ចប់បញ្ហាជាមួយសហគមន៍ លោកបានយល់ព្រមកាត់ដី ១០ហិកតារប្រគល់ឲ្យសហគមន៍ ចំណែកសហគមន៍ក៏បានព្រមព្រៀងទទួលយកដី ១០ហិកតារនោះនៅចំពោះមុខអាជ្ញាធរក្រុងរួចហើយ ក៏ប៉ុន្តែសហគមន៍បែរជាប្រែក្រឡាស់សម្ដីបដិសេធការសម្របសម្រួលនោះ វិញ៖ «មានច្បាប់ថ្មខ្ញុំសុំដល់ក្រសួងឧស្សាហកម្ម ចំណុចហ្នឹងដីក៏មានច្រើនដែរ គាត់ថាដីដូនតារបស់គាត់ ខ្ញុំក៏សម្រួលឲ្យទៅ។ លក់អានោះអស់ហើយ មកធ្វើអាហ្នឹងទៀត ខ្ញុំខ្ជិលទំនាស់ខ្ជិលឈ្លោះជូនគាត់តើ! ឥឡូវគាត់ថាម៉េចទៀត ខ្ញុំក៏មិនយល់ដែរ។»
ចំណែកអភិបាលក្រុងសែនមនោរម្យ លោក ឡុង វិបុល កត់សម្គាល់ថា ទំនាស់ដីធ្លីនេះលោកបានព្យាយាមសម្របសម្រួលដោយឈរលើស្មារតីផ្តល់ យុត្តិធម៌ដល់គ្រប់ភាគី។ លើសពីនេះទៀត សហគមន៍ក៏បានព្រមព្រៀងទទួលយកដី ១០ហិកតារតាមការសម្របសម្រួលរបស់អាជ្ញាធរក្រុងរួចហើយ ដូច្នេះប្រសិនសហគមន៍បដិសេធវិញ សហគមន៍ត្រូវធ្វើលិខិតជូនមកអាជ្ញាធរ ដើម្បីចាត់ការដោះស្រាយបញ្ហានេះបន្តទៀត៖ «ខ្ញុំនៅតែមានជំហរ មួយថា ឲ្យមានសមភាព និងសមធម៌ទាំងអស់គ្នាទៅ កុំឲ្យមានខាងណាមានប្រៀបជាងខាងណា។ លោក ហួត សូនី ដ្បិតតែគាត់កាន់កាប់អាស្រ័យផលត្រង់ហ្នឹងក្នុង ២៥ហិកតារ ដល់មានការសម្របសម្រួលពីយើង លោកក៏សុខចិត្តកាត់ ១០ហិកតារជូនទៅបងប្អូនវិញ តែបើគាត់ថាមិនទទួលយករបស់ថ្នាក់ក្រុង គាត់អាចបន្ត។»
ទាក់ទិនករណីនេះ មន្ត្រីសម្របសម្រួលនៃសមាគមការពារសិទ្ធិមនុស្សអាដហុក (ADHOC) ខេត្តមណ្ឌលគិរី លោក សុក រដ្ឋា កត់សម្គាល់ថា សហគមន៍មានបុព្វសិទ្ធិកាន់កាប់ និងអាស្រ័យផលដីចម្ការវិលជុំសហគមន៍តាមប្រពៃណីជនជាតិដើម។ ចំណែកអភិបាលរងស្រុក មិនមានលិខិតបទដ្ឋានជាក់លាក់ណាមួយបញ្ជាក់ថា ដីនោះលោកបានកាន់កាប់ស្របច្បាប់នោះទេ ជាពិសេសលោកមិនបានកាន់កាប់ ឬដាំដុះដីនោះជាក់ស្តែងឡើយ៖ «តែបើ លិខិតកាន់កាប់ធ្វើថ្មីថ្មោងនៅឆ្នាំ២០១៥ នេះ សួរថាតើយើងអាចយកជាផ្លូវការបានទេ? សម្ដេចនាយករដ្ឋមន្ត្រី គាត់ប្រកាសហើយប្រកាសទៀតអត់ឲ្យចេញលិខិតទទួលស្គាល់តទៅទៀតទេ។ អាហ្នឹងហើយវាខុសទៅនឹងបទដ្ឋានគតិយុត្តិ។»
ទោះជាយ៉ាងនេះក្តី អភិបាលក្រុងសែនមនោរម្យ លោក ឡុង វិបុល អះអាងថា ប្រសិនសហគមន៍បដិសេធមិនទទួលយកការសម្របសម្រួលទទួលយកដី ១០ហិកតារនោះទេ អាជ្ញាធរក្រុងនឹងបញ្ជូនសំណុំរឿងនេះជូនអាជ្ញាធរខេត្ត ដើម្បីដោះស្រាយបន្ត៕
No comments:
Post a Comment