លោក សម រង្ស៊ី អះអាង ជាថ្មី ថា, លោក មិនយក ខ្មែរណា ជាសត្រូវ ឡើយ
RFA / វិទ្យុ អាស៊ី សេរី | ២៧ កញ្ញា ២០១៥
លោក សម រង្ស៊ី ប្រធានគណបក្សសង្គ្រោះជាតិ
ផ្ដល់បទសម្ភាសន៍ដល់អ្នកកាសែតក្រោយកិច្ចប្រជុំសភា
ស្ដីពីការត្រួតពិនិត្យ
និងអនុម័តច្បាប់ស្ដីពីការទូទាត់ថវិកាជាតិឆ្នាំ២០១៣
កាលពីថ្ងៃទី២៩ ខែមិថុនា ឆ្នាំ២០១៥។ RFA/Brach Chev
ប្រធាន គណបក្ស ជំទាស់ អះអាង ជាថ្មីទៀត ថា, លោក នឹងមិនយក ខ្មែរ ណាមួយ ធ្វើជាសត្រូវ ឡើយ ក្នុងជីវិត នយោបាយ របស់លោក។
ការបញ្ជាក់ ពីជំហរ ដូចនេះ ទំនង ជាលោក សម រង្ស៊ី ចង់សំដៅ ដល់ការគំរាម របស់ ប្រធាន គណបក្ស ប្រជាជន កម្ពុជា ដែលថា មិនផ្ដល់ ឱកាស ឬ អត់ឱន ចំពោះ ជនណាម្នាក់ ដែលចង់ប្ដូរ រដ្ឋាភិបាល តាមរយៈ បដិវត្តពណ៌ នៅកម្ពុជា ជាដាច់ខាត។
ការបញ្ជាក់ ជំហរ ដូចនេះ របស់លោក សម រង្ស៊ី ប្រធាន គណបក្ស ជំទាស់ អាចចាត់ទុក ថា ជាលើក ទីមួយហើយ ក្រោយពីលោក ត្រឡប់ ពីបរទេសវិញ ដែលបន្ត ភាពស្ងប់ស្ងាត់ មួយរយៈ ជាមួយ បណ្ដាញសារព័ត៌មាន។
លោក សម រង្ស៊ី ថ្លែងនៅចំពោះមុខសកម្មជនរបស់ខ្លួនក្នុងខេត្តនៅខេត្តកំពង់ចាម កាលពីព្រឹកថ្ងៃទី២៦ កញ្ញា ហើយត្រូវបានចុះផ្សាយក្នុងទំព័របណ្ដាញសង្គមរបស់លោកផ្ទាល់ នៅថ្ងៃទី២៧ កញ្ញា ថា គណបក្សប្រឆាំងនឹងមិនយកខ្មែរណាមួយធ្វើជាសត្រូវសម្រាប់ជីវិត នយោបាយរបស់លោកទេ លោក សម រង្ស៊ី បានដាក់ជាសំណួរថា តើសង្គ្រាមនឹងកើតឡើងដោយរបៀបណា បើគ្មានសត្រូវផងនោះ?
ម្យ៉ាងវិញទៀត គណបក្សជំទាស់នឹងនៅតែបន្តដោះស្រាយព្រំដែនជាមួយប្រទេសជិតខាង ប៉ុន្តែយន្តការនៃការដោះស្រាយ គឺធ្វើឡើងស្ថិតក្រោមក្របខ័ណ្ឌច្បាប់អន្តរជាតិ។ លោក សម រង្ស៊ី ចាត់ទុកអ្នកដែលនិយាយពីសង្គ្រាម ប្រសិនបើបន្តកកូរកកាយរឿងព្រំដែនជាមួយប្រទេសជិតខាងកម្ពុជា ថានេះគ្រាន់តែជាការមួលបង្កាច់ និងបំភ័យសភាពការណ៍នយោបាយប៉ុណ្ណោះ។
បើទោះជា ប្រធានគណបក្សជំទាស់បញ្ជាក់ជំហរនៅពេលនេះ មិនសំដៅឈ្មោះអ្នកដែលគំរាមពីការផ្ទុះសង្គ្រាមយ៉ាងណាក៏ដោយចុះ ក៏គេដឹងជាទូទៅហើយថា ទំនងជាលោក សម រង្ស៊ី ចង់សំដៅឲ្យលោក ហ៊ុន សែន ។
ការប្រកាសពីជំហរជាថ្មីរបស់មេបក្សប្រឆាំងនៅពេលនេះ បន្ទាប់ពីមានការថ្លែងជាសាធារណៈរបស់លោក ហ៊ុន សែន ដែលគំរាមផ្ទួនៗលើបក្សប្រឆាំងក្នុងពេលកន្លងទៅ។
ជុំវិញរឿងនេះ អាចចាត់ទុកថា ជាលើកទីមួយហើយ ដែលប្រធានគណបក្សជំទាស់ឆ្លើយឆ្លងសានយោបាយរបស់ខ្លួនជាសាធារណៈ បន្ទាប់ពីស្ងប់ស្ងាត់មួយរយៈពេលខ្លីក្រោយត្រឡប់ពីបរទេសវិញ។ លោក សម រង្ស៊ី ថែមទាំងបានអះអាងទៀតថា បើគណបក្សរបស់លោកឈ្នះឆ្នោតក្នុងពេលខាងមុខនេះ គឺលោកនឹងប្រមូលដីពីឧកញ៉ា ឬមន្ត្រីរដ្ឋាភិបាល អ្នកដែលរំលោភពីប្រជាជនជូនអ្នករងគ្រោះទាំងនោះវិញ។
យ៉ាងណាក៏ដោយ ប្រមុខរដ្ឋាភិបាល និងជាប្រធានគណបក្សប្រជាជនកម្ពុជា ផង គំរាមជាថ្មីម្ដងទៀត កាលពីថ្ងៃទី២២ កញ្ញា ថា កម្ពុជាប្រាកដជានឹងមានសង្គ្រាម ប្រសិនបើគណបក្សផ្សេងឈ្នះឆ្នោត ក្រៅពីគណបក្សប្រជាជនកម្ពុជា។
លោកនាយករដ្ឋមន្ត្រីអះអាងថា សង្គ្រាមវណ្ណៈនឹងផ្ទុះឡើង គួបផ្សំនឹងជម្លោះជាមួយប្រទេសខាងផង បើបក្សនយោបាយផ្សេងឈ្នះឆ្នោតពិតប្រាកដមែន។
អ្នកវិភាគនយោបាយ យល់ឃើញថា នេះពុំមែនទើបជាលើកទីមួយទេ ចំពោះសារគំរាមរបស់លោក ហ៊ុន សែន។ ជាងនេះទៀត ការគំរាមថា អាចនឹងមានសង្គ្រាមកើតឡើង បើបក្សផ្សេងឈ្នះឆ្នោតនោះ គឺក្នុងបរិបទនយោបាយនាពេលបច្ចុប្បន្ននេះនឹងមិនអាចទៅរួចទេ។
លោក មាស នី អ្នកវិភាគនយោបាយថ្លែងថា អាចជាជម្រើសដ៏ល្អទៅវិញរបស់គណបក្សជំទាស់នៅពេលដែលមានការគំរាម បែបនេះរបស់ប្រមុខរដ្ឋាភិបាល ព្រោះអាចធ្វើឲ្យគណបក្សប្រឆាំង មានភាពរឹងមាំកាន់តែខ្លាំង ហើយចេះប្រុងប្រយ័ត្នចំពោះគោលនយោបាយរបស់ខ្លួន។ លោក មាស នី ពុំមានជំនឿថា សង្គ្រាមនឹងអាចកើតឡើងទៀតនោះទេ បើយោងទៅបរិបទនយោបាយចុងក្រោយនេះ។
ជុំវិញរឿងនេះ លោកនាយករដ្ឋមន្ត្រីនៅតែប្រកាន់ជំហរថា លោកនឹងមិនចរចាជាមួយគណបក្សសង្គ្រោះជាតិឡើយ ជាពិសេសរវាងលោក សម រង្ស៊ី បើមេបក្សនេះ នៅតែមិនមានភាពស្មោះត្រង់ក្នុងរឿងនយោបាយ ឬក្នុងការប្រើប្រាស់វប្បធម៌សន្ទនាជាមួយលោកទៀតនោះ៕
No comments:
Post a Comment