សមត្ថកិច្ច ចាប់បាន ជនសង្ស័យ គំរាមសម្លាប់ លោកបណ្ឌិត សុខ ទូច
RFA / វិទ្យុ អាស៊ី សេរី | ៦ កញ្ញា ២០១៥
ប្រធានវិទ្យាស្ថានទំនាក់ទំនងអន្តរជាតិកម្ពុជានៃ
រាជបណ្ឌិត្យសភា លោកបណ្ឌិត សុខ ទូច
ថ្លែងក្នុងសន្និសីទសារព័ត៌មាននៅរាជបណ្ឌិត្យសភា កាលពីថ្ងៃទី២២
ខែកក្កដា ឆ្នាំ២០១៥។ RFA/Brach Chev
កម្លាំងសមត្ថកិច្ចនគរបាលកម្ពុជា ចាប់បានជនសង្ស័យគំរាមសម្លាប់ លោកបណ្ឌិត សុខ ទូច តាមហ្វេសប៊ុក (Facebook) ហើយ កាលពីល្ងាចថ្ងៃទី៥ ខែកញ្ញា។
គេហទំព័ររបស់អគ្គស្នងការដ្ឋាននគរបាលជាតិ ដែលចេញផ្សាយនៅថ្ងៃទី៥ ខែកញ្ញា អះអាងថា ជនសង្ស័យបានសារភាពថា គេជាអ្នកធ្វើ និងបង្ហោះសារគំរាមសម្លាប់នោះដោយប្រើតាមទូរស័ព្ទដៃ។ សមត្ថកិច្ចថា បានចាប់ខ្លួនជនសង្ស័យនេះ នៅតំបន់ព្រំដែនប៉ោយប៉ែត បន្ទាប់ពីគេបានឆ្លងដែនពីប្រទេសថៃ ចូលកម្ពុជា។
ជនសង្ស័យឈ្មោះ ផង់ សីហា ភេទប្រុស អាយុ ២៧ឆ្នាំ មានស្រុកកំណើត ខេត្តព្រៃវែង ប៉ុន្តែគេទៅប្រទេសថៃ ធ្វើពលករតាំងពីឆ្នាំ២០១២។
ទាក់ទងរឿងនេះដែរ ប្រធានក្រុមស្រាវជ្រាវកិច្ចការព្រំដែននៃរាជបណ្ឌិត្យសភា លោកបណ្ឌិត សុខ ទូច ស្នើឲ្យសមត្ថកិច្ចធ្វើការតាមនីតិវិធី ប៉ុន្តែលោកក៏ចង់ដឹងដែរថា ជនសង្ស័យនោះចង់សម្លាប់លោកនោះមកពីប្រភពណា ឬជាគំនិតរបស់គេ។
\
លោកបន្តទៀត ទោះសមត្ថកិច្ចចាប់បានជនសង្ស័យក្តី ប៉ុន្តែលោកនៅភ័យខ្លាចដដែល ព្រោះនៅតាមបណ្តាញសង្គមហ្វេសប៊ុក មានការរិះគន់ ឬក៏ប្រមាថលោកច្រើនក្នុងការងារព្រំដែនកម្ពុជា-វៀតណាម៖ «ការបារម្ភរបស់ខ្ញុំនៅតែព្រួយបារម្ភ ប៉ុន្តែខ្ញុំត្រូវធ្វើ (ចុះវាស់បង្គោលព្រំដែនកម្ពុជា-វៀតណាម) ព្រោះជាប្រវត្តិសាស្ត្រផង និងជាស្នាដៃរបស់អ្នកស្រាវជ្រាវ។ បើសិនយើងនៅតែខ្លាចមនុស្សមួយក្រុមតូច តើគំរាមយើង ឬយើងធ្វើដើម្បីប្រយោជន៍រួម?»
កាលពីថ្ងៃទី២៩ ខែសីហា លោក សុខ ទូច ត្រូវបានអ្នកលេងហ្វេសប៊ុក ម្នាក់សរសេរគំរាមសម្លាប់ដោយចោទប្រកាន់ថា លោកលក់ក្បាលឲ្យវៀតណាម ក្នុងរឿងព្រំដែន។
ការគំរាមសម្លាប់នេះ បានកើតឡើងបន្ទាប់ពីបញ្ហាព្រំដែនរវាងកម្ពុជា-វៀតណាម បានផ្ទុះឡើងជាថ្មីម្ដងទៀត ហើយលោក សុខ ទូច កំពុងធ្វើការងារលើរឿងដែលមានទាំងផ្ទៀងផ្ទាត់ផែនទី និងចុះទៅតំបន់បោះបង្គោលព្រំដែន។ ក្រៅពីលោកបណ្ឌិត សុខ ទូច ក៏មានអនុប្រធានលេខាធិការដ្ឋានអចិន្ត្រៃយ៍នៃអាជ្ញាធរជាតិទទួល បន្ទុកកិច្ចការព្រំដែន អ្នកស្រី កុយ ពិសី ដែរ ដែលត្រូវអ្នកលេងហ្វេសប៊ុក ព្រមានសម្លាប់ ប៉ុន្តែសមត្ថកិច្ចមិនទាន់ចាប់ខ្លួនជនសង្ស័យដែលព្រមានសម្លាប់ អ្នកស្រី កុយ ពិសី បាននៅឡើយទេ៕
No comments:
Post a Comment