ស្ថានភាព សុខភាព របស់ តំណាងរាស្ត្រ គណបក្ស ប្រឆាំង ដែលរងការ វាយដំ
RFA / វិទ្យុ អាស៊ី សេរី | ២៩ តុលា ២០១៥
អនុប្រធានគណបក្សសង្គ្រោះជាតិ លោក កឹម សុខា (អាវស)
និងមន្ត្រីគណបក្សផ្សេងទៀត ទៅសួរសុខទុក្ខតំណាងរាស្ត្រ លោក ញ៉យ ចំរើន
នៅមន្ទីរពេទ្យ នាក្រុងបាងកក ប្រទេសថៃ កាលពីថ្ងៃទី២៨ ខែតុលា
ឆ្នាំ២០១៥។ Photo courtesy of CNRP
អស់រយៈពេល ៤ថ្ងៃ មកហើយ របួស របស់ តំណាងរាស្ត្រ គណបក្ស សង្គ្រោះជាតិ ចំនួន ២រូប នៅតែ មានសភាព ធ្ងន់ធ្ងរ នៅឡើយ ក្រោយ ពីក្រុមបាតុករ ដែលគាំទ្រ គណបក្ស កាន់អំណាច ប្រើហិង្សា វាយដំ ឲ្យរងរបួស ធ្ងន់ កាលពីថ្ងៃច័ន្ទ ទី២៦ ខែតុលា។ រហូត មកទល់ ពេលនេះ ពួកគេ កំពុងសម្រាក ព្យាបាល ក្នុងទីក្រុង បាងកក ប្រទេសថៃ។ មានក្រុម តំណាងរាស្ត្រ បក្សប្រឆាំង ខ្លួនឯងខ្លះ បានទៅ សួរសុខទុក្ខ ពួកគេ នៅទីនោះ។ ប៉ុន្តែ មិនមាន ក្រុមតំណាងរាស្ត្រ ពីខាង គណបក្ស ប្រជាជនកម្ពុជា ដែលរួមការងារ ជាមួយ ចុះទៅ សួរសុខទុក្ខ ពួកគេ នោះឡើយ។
លោកតំណាងរាស្ត្រ ញ៉យ ចំរើន និយាយប្រាប់វិទ្យុអាស៊ីសេរីថា ក្រោយពីវេជ្ជបណ្ឌិតនៃមន្ទីរពេទ្យ ផ្យាថៃ (Phyathai Hospital) ក្នុងទីក្រុងបាងកក (Bangkok) បានធ្វើការវះកាត់ដៃស្ដាំរបស់លោកដែលបាក់បីកំណាត់ ហើយដាក់ដែកអបឆ្អឹងដែលបាក់នោះហើយ សុខភាពរបស់លោកនៅមានសភាពទ្រុឌទ្រោមនៅឡើយ។
ជនរងគ្រោះពីបាតុកម្មហិង្សារូបនេះអះអាងថា រាងកាយរបស់លោកដូចជាមនុស្សពិបាកស្លាប់ហើយពិបាករស់។ លោក ញ៉យ ចំរើន បន្តថា បន្ទាប់ពីវេជ្ជបណ្ឌិតវះកាត់ដៃស្ដាំរបស់លោកហើយ គេនៅត្រូវវះកាត់ព្យាបាលភ្នែកខាងស្ដាំរបស់លោកដែលហើមប៉ោងបាក់ ឆ្អឹងចាក់បុកទៅគ្រាប់ភ្នែកទៀត៖ «ដោយសារភ្នែកខាងស្ដាំនេះបែក ឆ្អឹងនៅខាងក្រោមចិញ្ចើមភ្នែកហ្នឹង ចូលទៅក្នុងភ្នែក អ៊ីចឹងហើយបានជាត្រូវធ្វើការវះកាត់។ (តាំង សារ៉ាដា៖ ឆ្អឹងដែលបុកចូលទៅក្នុងភ្នែកហ្នឹងមានប៉ះពាល់ដល់ប្រស្រីភ្នែកទេ?) ញ៉យ ចំរើន៖ បាទ! វាប៉ះពាល់ដល់ភ្នែកដែរ ដែលមើលទៅឃើញរូបច្រើន ហើយឥឡូវហ្នឹងធ្វើការវះកាត់ហើយអស់រយៈពេល ៥ម៉ោង ហើយគេនៅបិទភ្នែកហ្នឹងនៅប៉ង់សឺម៉ង់នៅឡើយទេ។»
លោកបន្តថា ក្រៅពីដៃរបស់លោកបាក់ ៣កំណាត់ ហើយច្រមុះរបស់លោកក៏បែកហើមប៉ោងបាក់ឆ្អឹងក្ដោងច្រមុះស្រុតចូលទៅ ក្នុង និងបាក់ធ្មេញខាងមុខទៀត។ លោកបន្តថា មុខរបួសរបស់លោកត្រូវនៅសម្រាកព្យាបាលយូរក្នុងមន្ទីរពេទ្យ៖ «ពិបាកដែរដោយសារខ្ញុំបាក់ខ្ទង់ច្រមុះខាងលើហ្នឹង ហើយធ្មេញមុខហ្នឹងបែក បាក់មួយកំណាត់ ហើយក្រៅពីហ្នឹងទៀត នៅជាំដើមទ្រូងខ្លាំង នៅចុកនៅឡើយ។ វេជ្ជបណ្ឌិតគេចាក់ថ្នាំផង ហើយឲ្យថ្នាំលេបផង។ ប្រហែលជានៅសម្រាកព្យាបាលយូរ។»
ចំណែកមុខរបួសរបស់លោកតំណាងរាស្ត្រ គង់ សភា វិញ ក៏មិនសូវខុសពីលោក ញ៉យ ចំរើន ប៉ុន្មានដែរ។ លោក គង់ សភា ដែលត្រូវជាកូនប្រុសរបស់លោក គង់ គាំ សមាជិកព្រឹទ្ធសភានៃគណបក្ស សម រង្ស៊ី ដែរនោះ នៅពេលនេះកំពុងបញ្ចូលខ្យល់អុកស៊ីហ្សែននៅឡើយក្រោយពីវេជ្ជបណ្ឌិត ធ្វើការវះកាត់ក្ដោងច្រមុះដែលបាក់ស្រុតចូលទៅផ្នែកខាងក្នុង។
តំណាងរាស្ត្រមណ្ឌលខេត្តកណ្ដាល របស់គណបក្សសង្គ្រោះជាតិ លោក អ៊ូ ច័ន្ទឫទិ្ធ ដែលបានអមដំណើរជនរងគ្រោះទាំងពីរទៅកាន់ប្រទេសថៃ កាលពីថ្ងៃអង្គារ ទី២៧ ខែតុលា បានប្រាប់វិទ្យុអាស៊ីសេរី តាមទូរស័ព្ទថា របួសរបស់លោក គង់ សភា ដែលធ្ងន់ជាងគេគឺនៅត្រង់ច្រមុះ និងត្រចៀក៖ «សូមជម្រាបថា ក្ដោងច្រមុះរបស់គាត់ដែលថតទៅឃើញបាក់ផុងហ្នឹង ខាងមន្ទីរពេទ្យបានវះកាត់ហើយ ហើយឥឡូវហ្នឹងក៏មិនអាចនិយាយបានដែរ ព្រោះកំពុងដាក់អុកស៊ីហ្សែននៅឡើយ។ ស្ថានភាពនៅធ្ងន់ធ្ងរនៅឡើយ ហើយមួយទៀតគាត់មានបញ្ហាត្រចៀក។ ត្រចៀកហ្នឹងអាចពិគ្រោះជាមួយគ្រូពេទ្យថា តើត្រូវវះកាត់នៅពេលណា?»
លោក អ៊ូ ច័ន្ទឫទ្ធិ បន្តថា វេជ្ជបណ្ឌិតនឹងបន្តធ្វើការវះកាត់ត្រចៀករបស់លោក គង់ សភា ដោយសារតែអាចដាច់ក្រដាសត្រចៀក៖ «យើង មិនទាន់ដឹងថា គាត់អាចងើបរួចបាននៅពេលណានៅឡើយ ហើយម្យ៉ាងទៀត យើងមិនទាន់បានកំណត់ពេលថា ត្រូវវះកាត់ត្រចៀកនៅពេលណាទេ។ ដូច្នេះយើងមិនទាន់ដឹងថា តើត្រូវចាកចេញពីមន្ទីរពេទ្យហើយត្រឡប់ទៅកម្ពុជា វិញនៅពេលណាទេ។»
ក្រៅពីការរងរបួសធ្ងន់ធ្ងរនៅត្រង់ច្រមុះ និងត្រចៀក លោក អ៊ូ ច័ន្ទឫទិ្ធ ប្រាប់ថា លោក គង់ សភា មានស្នាមជាំរាងកាយដោយសារការវ៉ៃដំរបស់ក្រុមបាតុករហិង្សា។ លោកបន្តថា ទាំងលោក ញ៉យ ចំរើន និង គង់ សភា តែងស្រែកត្អូញពីការឈឺចុកចាប់ផ្នែកខាងក្នុងនៃរាងកាយដែលបណ្ដាល មកពីការខ្ទាំខ្លាំង។
រហូតមកទល់ពេលនេះ មានក្រុមតំណាងរាស្ត្រខ្លះពីខាងបក្សប្រឆាំងបាននាំគ្នាទៅសួរ សុខទុក្ខពួកគេដល់មន្ទីរពេទ្យ ផ្យាថៃ ក្នុងទីក្រុងបាងកក ប៉ុន្តែមិនមានក្រុមតំណាងរាស្ត្រណាមួយពីខាងគណបក្សប្រជាជនកម្ពុជា ដែលរួមការងារជាមួយពួកគេចុះមកសួរសុខទុក្ខនោះឡើយ។
បាតុកម្មកាលពីថ្ងៃច័ន្ទ ទី២៦ ខែតុលា ធ្វើឡើងក្នុងគោលបំណងដើម្បីទម្លាក់ លោក កឹម សុខា អនុប្រធានគណបក្សសង្គ្រោះជាតិ ចេញពីតំណែងអនុប្រធានរដ្ឋសភា។ បាតុកម្មហិង្សានេះអាចកើតឡើងដោយសារកំហឹងរបស់លោក ហ៊ុន សែន ដែលខឹងសម្បាយ៉ាងខ្លាំងទៅនឹងបាតុកម្មដែលមានមនុស្សប្រមាណ ៦០០នាក់ ប្រឆាំងរូបលោក នៅពេលដែលលោកទៅចូលរួមកិច្ចប្រជុំកំពូលប្រចាំឆ្នាំរបស់អង្គការ សហប្រជាជាតិកាលពីខែកញ្ញា នៅបុរីញីវយ៉ក។ កំហឹងនេះមិនទាន់រំសាយចិត្តផង ក៏មានបាតុកម្មមួយទៀតប្រឆាំងរូបលោកម្ដងទៀតនៅប្រទេសបារាំង កាលពីថ្ងៃអាទិត្យ ទី២៥ ខែតុលា កន្លងទៅ។
លោក ហ៊ុន សែន ថ្លែងទៅកាន់ក្រុមអ្នកគាំទ្ររបស់លោកក្នុងប្រទេសបារាំង កាលពីថ្ងៃអាទិត្យ ទី២៥ ខែតុលា ថា បាតុកម្មប្រឆាំងនឹងរូបលោកនៅបារាំង គឺជាសិទ្ធិប្រជាពលរដ្ឋ ចំណែកបាតុកម្មប្រឆាំងលោក កឹម សុខា ក៏ជាសិទ្ធិរបស់ពលរដ្ឋដូចគ្នា ហើយថា "បើលេងកុំខឹង បើខឹងកុំលេង"។
សម្ដីរបស់លោក ហ៊ុន សែន ទាំងនេះហើយដែលអាចជាការបញ្ឆេះកំហឹងញុះញង់អោយប្រព្រឹត្តហិង្សា។ បាតុករខ្លះដែលមានចងកន្សែងបិទមុខព្យាយាមលាក់បាំងអត្តសញ្ញាណរបស់ ខ្លួនបានចាប់អូសតំណាងគណបក្សសង្គ្រោះជាតិ ២រូប គឺលោក គង់ សភា និង លោក ញ៉យ ចំរើន ទម្លាក់ចេញពីរថយន្ត ហើយព្រួតគ្នាចោមរោមវៃទាត់ធាក់យ៉ាងសាហាវបណ្ដាលឱ្យរងរបួសជា ទម្ងន់ ដួលសន្លប់នៅនឹងកន្លែង។
អង្គការឃ្លាំមើលសិទ្ធិមនុស្សអន្តរជាតិ យូមែន រ៉ៃត៍ វ៉ច្ឆ (Human Rights Watch) ហៅបាតុកម្មហិង្សានោះជាការរៀបចំទុកជាមុនរបស់គណបក្សប្រជាជន កម្ពុជា ដែលផ្ទុះឡើងមួយថ្ងៃបន្ទាប់ពីលោក ហ៊ុន សែន ប្រកាសថា នឹងមានបាតុកម្មប្រឆាំងអនុប្រធានគណបក្សសង្គ្រោះជាតិ។
រដ្ឋាភិបាលក្រុងវ៉ាស៊ីនតោន (Washington) កាលពីថ្ងៃអង្គារ បានថ្កោលទោសយ៉ាងដាច់អហង្ការចំពោះអំពើហិង្សានេះ។ ក្រសួងការបរទេសសហរដ្ឋអាមេរិក ស្នើឲ្យអាជ្ញាធរកម្ពុជា បើកការស៊ើបអង្កេតយ៉ាងម៉ត់ចត់ និងមានតម្លាភាពចំពោះករណីវាយប្រហារលើតំណាងរាស្ត្រទាំងនេះ។ កាលពីថ្ងៃពុធ ទី២៩ ខែតុលា លោកនាយករដ្ឋមន្ត្រី ហ៊ុន សែន ខ្លួនឯងក៏បានហៅបាតុកម្មហិង្សាកាលពីថ្ងៃច័ន្ទ ទី២៦ តុលា ថា ជាអំពើថោកទាប ហើយបញ្ជាឲ្យមានការចាប់ខ្លួនជនដៃដល់យកមកផ្ដន្ទាទោសតាមផ្លូវ ច្បាប់។
ទោះជាយ៉ាងណាក៏ដោយ ជនរងគ្រោះ លោក ញ៉យ ចំរើន មានប្រសាសន៍ពីមន្ទីរពេទ្យក្នុងប្រទេសថៃ មកថា លោកនឹងតាមដានយ៉ាងយកចិត្តទុកដាក់លើចំណាត់ការរបស់នាយករដ្ឋមន្ត្រី នៅពេលនេះ។ ទោះជាយ៉ាងណាក៏ដោយ លោកថា សមត្ថកិច្ចខកខានមិនទាន់បានរកយុត្តិធម៌ឲ្យលោកនៅឡើយចំពោះអំពើ ហិង្សារបស់កងសន្តិសុខរបស់រដ្ឋាភិបាលដែលវ៉ៃលោកឲ្យរបួសកាលពី ឆ្នាំ២០១៤ កន្លងទៅនោះ៕
No comments:
Post a Comment