លោក នាយករដ្ឋមន្រ្តី ហ៊ុន សែន និងលោក សម រង្ស៊ី
លោក ហ៊ុន សែន ព្រមាន ថា, លោក សម រង្ស៊ី អាចជាប់គុក
VOD / វីអូឌី | ២៦ តុលា ២០១៥
លោក នាយករដ្ឋមន្រ្តី
ហ៊ុន សែន បានព្រមាន ថា, លោក សម រង្ស៊ី ប្រធាន គណបក្ស សង្រ្គោះជាតិ
អាច នឹងជាប់ ពន្ធនាគារ
ដោយលោក ថា, ប្រធាន គណបក្ស ប្រឆាំង រូបនេះ បានឲ្យ ទំព័រ ហ្វេសប៊ុក របស់លោក
ក្នុងការបង្ហោះ ឯកសារ របស់ អតីត សមាជិក ព្រឹទ្ធសភាគ ណបក្ស សម រង្ស៊ី
លោក ហុង សុខហួរ ដែលរងការ ចោទប្រកាន់ ពីការប្រើប្រាស់ ឯកសារ ក្លែងក្លាយ។
លោក ហ៊ុន សែន បានថ្លែង បែបនេះ
កាលពីល្ងាច ថ្ងៃទី២៥ ខែតុលា
ក្នុងពេលជួប សំណេះសំណាល ជាមួយ ប្រជាពលរដ្ឋ ខ្មែរ ដែលកំពុង រស់នៅ ក្នុងប្រទេស បារាំង និងនិស្សិត កម្ពុជា។
លោក ហ៊ុន សែន បានថ្លែង ធ្ងន់ៗ ករណី លោក
ហុង សុខហួរ ថា, បានប្រព្រឹទ្ធ បទល្មើស ជាក់ស្តែង
ដោយសារ តែ លោក បានធ្វើ អត្ថាធិប្បាយភ្ជាប់ ជាមួយ ឯកសារ លើប្រព័ន្ធ សង្គម ហ្វេសប៊ុក។ លោក មានប្រសាសន៍ ថា៖ «អញ្ចឹង សូម កុំភ័ន្តច្រឡំ
ថា, ម៉េច បាន ចាប់គែ? គេ មាន អភ័យឯកសិទ្ធិ។ អភ័យឯកសិទ្ធិ, គេ គោរពហើយ។
ប៉ុន្តែ បទល្មើស ជាក់ស្តែង គេ ចាប់ភ្លាម។» លោក ក៏បាន ព្រមាន ថា, លោក សម រង្ស៊ី អាច នឹងមានទោស ដោយសារ លោក បានផ្តល់កន្លែង ចែកចាយ ឯកសារ។
លោក ហ៊ុន សែន មានប្រសាសន៍ ថា៖ «ហើយ
អាម្ចាស់ Page [ទំព័រ] ជានរណា? ជារង្ស៊ីហ្មង (សម រង្ស៊ី)។ អញ្ចឹងទេ អាចដល់,
អាចដល់ ម្នាក់ហ្នឹង។ ហើយ បើ ដល់ម្នាក់ហ្នឹង, ម្តងនេះ ខ្ញុំ ឈប់លើកលែងទោស ឲ្យហើយ។
ខ្ញុំ លើកលែងទោស ឲ្យម្នាក់នេះ ពីរដង រួចមកហើយ។ លើកនេះ អត់ទេ។ លើកនេះ អត់ទេ។
ព្រៃ ស។ អត់មាន ទទួលស្គាល់ អ្នកណា ថា, ស្អី នេះទេ។» លោក បន្ថែមថា៖ «និយាយអញ្ចឹង ថា,
អាងគុក; អាងច្រវាក់; អាងទាហាន; អាងប៉ូលិស។ ចឹង កាន់អំណាច,
បើ មិនឲ្យ អាងអាហ្នឹង អាងអីគេ? ឥឡូវ សួរ គាត់ កាន់អំណាច, គាត់ អាងអី?
វា មិនដែល ម៉ែអាណា កាន់អំណាច ឲ្យ អាង ទានធូប ទេហី។»
វីអូឌី មិនទាន់អាចទាក់ទងលោក សម រង្ស៊ី ដើម្បីសុំការឆ្លើយតបលើបញ្ហានេះបាននៅឡើយទេ។ អ្នកនាំពាក្យគណបក្សសង្រ្គោះជាតិ លោក យឹម សុវណ្ណ ចាត់ទុកថានេះជាការគំរាមកំហែងម្តងហើយម្តងទៀតរបស់លោក ហ៊ុន សែន។ លោកមានប្រសាសន៍ថា៖ «លោកប្រធានសម រង្ស៊ី អត់មានបានធ្វើអ្វីខុសនោះទេ ហើយជាការគំរាមកំហែងមួយដែលយើងមិនបានធ្វើអ្វីខុស។ យើងនៅមានបញ្ហាជាតិជាច្រើនដែលត្រូវដោះស្រាយ។» លោកអំពាវនាវកុំឲ្យនាំគ្នាផ្តោតអារម្មណ៍លើបញ្ហានេះ ដោយជំរុញឲ្យផ្តោតលើបញ្ហាជាតិរួមមានការដោះស្រាយបញ្ហាភាពក្រីក្រ បញ្ហាពុករលួយនិងការការពារសម្បត្តិធម្មជាតិជាដើម។
បើតាមលោក យឹម សុវណ្ណ លោក សម រង្ស៊ី
ទៅបំពេញទស្សនកិច្ចនៅប្រទេសបារាំង
ដើម្បីជំរុញឲ្យមានការគោរពយុត្តិធម៌សង្គម
ការគោរពសិទ្ធិមនុស្សនិងការដោះលែងសកម្មជនគណបក្សសង្រ្គោះជាតិ។
លោកមិនទាន់ដឹងថាលោក សម រង្ស៊ី ត្រឡប់មកកម្ពុជាវិញពេលណានោះទេ។
លោកបន្ថែមថានឹងមិនមាជំនួបរវាងលោក ហ៊ុន សែន និងលោក សម រង្ស៊ី
នៅប្រទេសបារាំងនោះទេ។
ក្នុងដំណើរទស្សនកិច្ចរបស់លោក ហ៊ុន សែន
មានប្រជាពលរដ្ឋខ្មែររស់នៅប្រទេសបារាំងប្រមាណ១០០នាក់
បានធ្វើបាតុកម្ម ទាមទារឲ្យលោក ហ៊ុន សែន ចុះចេញពីតំណែង ។
លោក ហុង សុខហួរ
ត្រូវបានឃុំខ្លួនបណ្តោះអាសន្ននៅពន្ធនាគារព្រៃស
តាមការចោទប្រកាន់៣ករណីគឺបទក្លែងឯកសារសាធារណៈ
ប្រើប្រាស់ឯកសារសាធារណៈក្លែងក្លាយនិងញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម។
លោក ហុង សុខហួរ
ត្រូវបានសមត្ថកិច្ចចាប់ខ្លួន ពីរថ្ងៃបន្ទាប់ពីលោកនាយករដ្ឋមន្ត្រី ហ៊ុន សែន
បានចេញបញ្ជាឲ្យចាប់ខ្លួន
ដោយចោទថាក្លែងឯកសារសន្ធិសញ្ញាកម្ពុជានិងវៀតណាមនៅឆ្នាំ១៩៧៩។
ប៉ុន្តែគណបក្សសង្គ្រោះជាតិបានចាត់ទុកករណីនេះជារឿងនយោបាយ
មិនមែនជាបទល្មើសជាក់ស្តែងនិងជាការសម្តែងមតិរបស់សមាជិកព្រឹទ្ធសភា។
សង្គមស៊ីវិលមួយចំនួននិងគណបក្សសង្រ្គោះជាតិចាត់ទុកករណីនេះជារឿងនយោបាយ៕
No comments:
Post a Comment