អង្គការ សិទ្ធិមនុស្ស អន្តរជាតិ ទទូច ឲ្យរដ្ឋាភិបាល ទម្លាក់ បទចោទប្រឆាំង លោក ហុង សុខហួរ
RFA / វិទ្យុ អាស៊ី សេរី | ០១ តុលា ២០១៥
សាលាដំបូងរាជធានីភ្នំពេញ
បញ្ជូនសមាជិកព្រឹទ្ធសភាមកពីគណបក្ស សម រង្ស៊ី លោក ហុង សុខហួរ
(ពាក់ក្រវាត់ក) ទៅឃុំខ្លួននៅអគ្គស្នងការដ្ឋាននគរបាលជាតិ
ដើម្បីរង់ចាំបន្តការសាកសួរ កាលពីល្ងាចថ្ងៃទី១៥ ខែសីហា
ឆ្នាំ២០១៥។ Photo: RFA
អង្គការ ឃ្លាំមើល សិទ្ធិមនុស្ស អន្តរជាតិ យូមែន រ៉ៃត៍ វ៉ច្ឆ (Human Rights Watch) ទទូច ឲ្យរដ្ឋាភិបាល កម្ពុជា ទម្លាក់ បទចោទប្រឆាំង សមាជិក ព្រឹទ្ធសភា លោក ហុង សុខហួរ ក្នុងរឿង ក្លែងបន្លំ ឯកសារ សាធារណៈ។ ការទទូច របស់ យូមែន រ៉ៃត៍ វ៉ច្ឆ ធ្វើឡើង មួយថ្ងៃ មុនពេល សាលាដំបូង រាជធានីភ្នំពេញ បើកសវនាការ ជំនុំជម្រះ លើករណី លោក ហុង សុខហួរ។
យូមែន រ៉ៃត៍ វ៉ច្ឆ អះអាងថា ការចោទប្រកាន់របស់រដ្ឋាភិបាលទៅលើសមាជិកព្រឹទ្ធសភាមកពីគណបក្ស សម រង្ស៊ី លោក ហុង សុខហួរ គឺគ្មានមូលដ្ឋានឡើយ។
នៅក្នុងសេចក្តីថ្លែងការណ៍របស់ខ្លួនចុះថ្ងៃទី១ ខែតុលា យូមែន រ៉ៃត៍ វ៉ច្ឆ លើកឡើងថា វាមិនមានភស្តុតាងណាមួយ ដែលបញ្ជាក់ថា លោក ហុង សុខហួរ បានបង្កើតអត្ថបទសន្ធិសញ្ញាឆ្នាំ១៩៧៩ ដែលលោកបង្ហោះលើទំព័រហ្វេសប៊ុក (Facebook) នោះឡើយ ហើយវាក៏គ្មានភស្តុតាងណាមួយដែលបង្ហាញថា លោក ហុង សុខហួរ ដឹងថា ឯកសារដែលលោកបង្ហោះនោះជាឯកសារមិនពិតនោះដែរ។ យូមែន រ៉ៃត៍ វ៉ច្ឆ ថ្លែងថា ការដែល លោក ហុង សុខហួរ បង្ហាញឯកសារនេះជាសាធារណៈ គឺមិនមានបំណងបង្កភាពវឹកវរអ្វីនោះដែរ។ ផ្ទុយទៅវិញ គាត់គ្រាន់តែចង់បង្កើតឲ្យមានការពិភាក្សាបន្ថែមទៅលើខ្លឹមសារដែល មានចែងនៅក្នុងសន្ធិសញ្ញា ឆ្នាំ១៩៧៩ រវាងកម្ពុជា-វៀតណាម ប៉ុណ្ណោះ។
យូមែន រ៉ៃត៍ វ៉ច្ឆ អះអាងបន្ថែមថា ការកាត់ទោសលើ លោក ហុង សុខហួរ គឺជាសកម្មភាពផ្ទុយទៅនឹងកាតព្វកិច្ចរបស់កម្ពុជា ក្នុងការធានានូវសេរីភាពក្នុងការសម្ដែងមតិ ដែលមានចែងនៅក្នុងកតិកាសញ្ញាអន្តរជាតិស្ដីពីសិទ្ធិពលរដ្ឋ និងនយោបាយ ដែលកម្ពុជា ជារដ្ឋភាគី។
នាយកប្រតិបត្តិទទួល
បន្ទុកកិច្ចការតំបន់អាស៊ីរបស់អង្គការឃ្លាំមើលសិទ្ធិមនុស្ស
អន្តរជាតិ យូមែន រ៉ៃត៍ វ៉ច្ឆ (Human Rights Watch) លោក ប៊្រែដ អាដាម (Brad
Adams) ក្នុងបន្ទប់ផ្សាយរបស់វិទ្យុអាស៊ីសេរី នាទីក្រុងវ៉ាស៊ីនតោន
(Washington DC) សហរដ្ឋអាមេរិក កាលពីថ្ងៃទី២៨ ខែមិថុនា ឆ្នាំ២០១៣។
នាយកអង្គការឃ្លាំមើលសិទ្ធិមនុស្សអន្តរជាតិប្រចាំតំបន់អាស៊ី លោក ប៊្រែដ អាដាម (Brad Adams) ថ្លែងចាត់ទុកការចាប់ខ្លួន លោក ហុង សុខហួរ ដោយរដ្ឋាភិបាល ថាជារឿងនយោបាយ។ លោកថា លោកនាយករដ្ឋមន្ត្រី ហ៊ុន សែន មានចេតនាបង្ក្រាបទៅលើបក្សប្រឆាំង ហើយ លោក ហ៊ុន សែន ក៏ចង់បង្ហាញឲ្យគេឃើញដែរថា លោកអាចចាប់មនុស្សដាក់គុកពេលណាក៏បាន។
លោក ហុង សុខហួរ ត្រូវបានអាជ្ញាធរចាប់ខ្លួនកាលពីថ្ងៃទី១៥ ខែសីហា ពីរថ្ងៃក្រោយពី លោក ហ៊ុន សែន បានចេញបញ្ជា។ ការចេញបញ្ជាឲ្យតាមចាប់ខ្លួននេះ គឺបន្ទាប់ពី លោក ហុង សុខហួរ បានបង្ហោះវីដេអូឃ្លីប (Video Clip) បកស្រាយពីសន្ធិសញ្ញាកម្ពុជា-វៀតណាម ឆ្នាំ១៩៧៩ ហើយដែលក្រោយមកត្រូវបាន លោក ហ៊ុន សែន ចាត់ទុកថាជាចេតនាក្លែងបន្លំឯកសារ ដើម្បីបង្កភាពវឹកវរក្នុងសង្គម ដែលជាអំពើក្បត់ជាតិ។
លោក ហុង សុខហួរ ដែលមានសញ្ជាតិបារាំង ផងដែរនោះ ត្រូវបានតុលាការចោទប្រកាន់ពីបទក្លែងបន្លំឯកសារសាធារណៈ ប្រើប្រាស់ឯកសារសាធារណៈក្លែង និងញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម។ លោកនឹងត្រូវសាលាដំបូងរាជធានីភ្នំពេញ បើកសវនាការកាត់ទោសនៅថ្ងៃទី២ ខែតុលា។ យ៉ាងណា យូមែន រ៉ៃត៍ វ៉ច្ឆ ថាការចោទប្រកាន់នេះផ្ទុយពីការពិត ហើយជំរុញឲ្យតុលាការទម្លាក់បទចោទប្រឆាំង លោក ហុង សុខហួរ ជាបន្ទាន់ និងគ្មានលក្ខខណ្ឌ។
ឆ្លើយតបចំពោះការលើកឡើងរបស់ យូមែន រ៉ៃត៍ វ៉ច្ឆ នេះ មន្ត្រីរដ្ឋាភិបាល និងជាអ្នកនាំពាក្យអង្គភាពព័ត៌មាន និងប្រតិកម្មរហ័ស នៃទីស្ដីការគណៈរដ្ឋមន្ត្រី លោក ទិត្យ សុធា មានប្រសាសន៍ថា កម្ពុជា ជាប្រទេសប្រកាន់យកនីតិរដ្ឋ។ លោកថា បើ យូមែន រ៉ៃត៍ វ៉ច្ឆ អះអាងថា លោក ហុង សុខហួរ មិនបានប្រព្រឹត្តបទល្មើសមែននោះ យូមែន រ៉ៃត៍ វ៉ច្ឆ អាចសហការ ឬគួរផ្តល់ឯកសារទៅឲ្យមេធាវីរបស់ លោក ហុង សុខហួរ ដើម្បីយកទៅតតាំងគ្នាទៅតាមផ្លូវតុលាការ។ លោកថា កម្ពុជា ត្រូវអនុវត្តទៅតាមច្បាប់៖ «វាមិនដែលឯកឧត្តម ហុង សុខហួរ នៅសុខៗមិនប្រព្រឹត្តបទល្មើស ហើយគេចាប់ខ្លួននោះទេ ដូច្នេះរឿងរ៉ាវយើងបានដឹងហើយថាមានការក្លែងសន្ធិសញ្ញា ហើយធ្វើការបង្ហោះនៅលើទំព័រហ្វេសប៊ុកផ្ទាល់ខ្លួនរបស់ឯកឧត្តម សម រង្ស៊ី ទៀត។ អ៊ីចឹង ត្រង់ចំណុចណាដែលថា ជាការបង្កើតឡើងដោយលោកនាយករដ្ឋមន្ត្រី ហ៊ុន សែន ហើយជាការបំបិទសិទ្ធិបក្សប្រឆាំង? ខ្ញុំយល់ថា នេះគ្រាន់តែជាការចោទប្រកាន់មួយដែលមិនផ្អែកលើមូលដ្ឋាន ច្បាស់លាស់តែប៉ុណ្ណោះ។»
គិតមកទល់ពេលនេះ មន្ត្រី និងសកម្មជនបក្សប្រឆាំងសរុបចំនួន ១៥នាក់ហើយដែលត្រូវបានអាជ្ញាធររដ្ឋាភិបាលចាប់ខ្លួន។ អង្គការសិទ្ធិមនុស្សជាតិ និងអន្តរជាតិ ចាត់ទុកការចាប់ខ្លួននេះ ជារឿងនយោបាយ ហើយតែងបានទទូចឲ្យតុលាការលើកលែងការចោទប្រកាន់ចំពោះសកម្មជនបក្ស ប្រឆាំងទាំងអស់នេះ៕
No comments:
Post a Comment