លោក នី ចរិយា នឹងមិន ចូលខ្លួន ទៅបំភ្លឺ តាមដីកា តុលាការ នៅចុងខែ នេះទេ
RFA / វិទ្យុ អាស៊ី សេរី | ១៣ តុលា ២០១៥
លោក នី ចរិយា មន្ត្រីជាន់ខ្ពស់នៃសមាគមសិទ្ធិមនុស្សអាដហុក
(Adhoc)
ចុះឃ្លាំមើលការផ្ទុះនូវអំពើហិង្សានៅក្បែរទីលានប្រជាធិបតេយ្យ
និងផ្ដល់បទសម្ភាសន៍ដល់អ្នកកាសែតនៅព្រឹកថ្ងៃអង្គារ ទី១៥
ខែកក្កដា ឆ្នាំ២០១៤។ RFA
មន្ត្រី ការពារ ផ្នែកសិទ្ធិមនុស្ស នៃសមាគម អាដហុក (ADHOC) ប្រកាស ថា, នឹងមិន ចូលទៅបំភ្លឺ នៅសាលាដំបូង រាជធានីភ្នំពេញ តាមដីកាកោះ របស់ តុលាការទេ។ ការប្រកាស ច្រានចោល ដីកា ឲ្យចូលខ្លួន បំភ្លឺ របស់លោក នី ចរិយា ជាមន្ត្រី ជាន់ខ្ពស់ ផ្នែកសិទ្ធិមនុស្សនេះ គឺ នៅបន្ទាប់ ពីចៅក្រម ស៊ើបសួរ នៃសាលាដំបូង រាជធានីភ្នំពេញ បង្គាប់ ឲ្យលោក បង្ហាញខ្លួន នៅថ្ងៃទី២១ តុលា ខាងមុខ។
ប្រធានផ្នែកស៊ើបអង្កេត នៃសមាគមការពារសិទ្ធិមនុស្ស អាដហុកលោក នី ចរិយា ឲ្យដឹងនៅថ្ងៃទី១៣ តុលា ថា លោក នឹងមិនបង្ហាញខ្លួន តាមដីកាកោះរបស់តុលាការនោះ ដោយសារដីកានេះ ធ្វើឡើងរំលោភទៅនឹងគោលការណ៍ច្បាប់ ហេតុនេះលោកនឹងមិនចូលតាមការបង្គាប់បញ្ជា របស់តុលាការឡើយ។
ការថ្លែងបដិសេធដូចនេះ របស់លោក នី ចរិយា មន្ត្រីជាន់ខ្ពស់សមាគមអាដហុក ក្រោយពីចៅក្រមស៊ើបសួរ នៃតុលាការក្រុងភ្នំពេញ លោក វ៉េង ហ៊ត់ ចេញដីកាឲ្យចូលបំភ្លឺនៅសាលាដំបូងរាជធានីភ្នំពេញ នៅថ្ងៃទី២១ ខែតុលា ខាងមុខ។ លោកបន្តថា ម្យ៉ាងវិញទៀត ដីកានេះគឺលោកពុំបានទទួលដោយផ្ទាល់ ពីនគរបាលយុត្តិធម៌ទេ តែបែរជាត្រូវបានផ្សព្វផ្សាយជាសាធារណៈទៅវិញ។ ក្រៅពីនេះទៀត នគរបាលយុត្តិធម៌ គួរណាស់ បញ្ជូនត្រឡប់ទៅវិញ ហើយស្នើឲ្យតុលាការ ចេញដីកាថ្មីឡើងវិញមួយទៀត។ លើសពីនេះ បើដីកាដែលតុលាការចេញជាថ្មីទៀតនោះ នៅតែកំណត់ពេលវេលា ដូចក្នុងដីកាចាស់ គឺលោកនឹងមិនចូលខ្លួន តាមការបង្គាប់បញ្ជា របស់តុលាការដដែល ព្រោះវាផ្ទុយនឹងនីតិវិធីនៃក្រមព្រហ្មទណ្ឌ ដែលកំណត់ទុករយៈពេល៥ថ្ងៃ ក្រោយពីទទួលបានដីការួច៖ «និយាយ រួមទៅបើទោះបីមានដីកាថ្មីក៏ដោយប៉ុន្តែត្រឹមថ្ងៃទី២១ គឺខ្ញុំមិនអាចចូលបានទេ ដោយសារអី ដោយសារកាលណាខ្ញុំចូលខ្លួនបានន័យខ្ញុំរំលោភនីតិវិធីច្បាប់ហើយ ព្រោះនៅក្នុងក្រមនីតិវិធីព្រហ្មទណ្ឌ ដីកាត្រូវតែយកមកមុន ឲ្យបានមុនថ្ងៃដែលយើងចូលហ្នឹងឲ្យបាន៥ថ្ងៃ។»
កាលពីថ្ងៃទី ៨ ខែ តុលា ចៅក្រមស៊ើបសួរ នៃតុលាការក្រុងភ្នំពេញ បានចេញដីកាកោះហៅឲ្យលោក នី ចរិយា ចូលបង្ហាញខ្លួន នៅថ្ងៃទី ២១ តុលាខាងមុខនេះ ដោយ ភ្ជាប់យកករណីថ្មីបន្ថែមទៀត ចំពោះការធ្វើសន្និសីទកាសែត និង ប្រឆាំងការដាក់ពាក្យបណ្តឹងទៅ៤ស្ថាប័ន របស់លោក នី ចរិយា បន្ថែមទៀត ពាក់ព័ន្ធការចាប់ឃុំខ្លួនពលរដ្ឋ២នាក់ដោយខុសច្បាប់ នៅស្រុកស្វាយលើ ខេត្តសៀមរាប។
ជុំវិញរឿងនេះ លោក នី ចរិយា ធ្លាប់បានចូលបំភ្លឺនៅសាលាដំបូងរាជធានីភ្នំពេញម្ដងរួចមកហើយកាល ពីថ្ងៃទី១៣ កក្កដា ជុំវិញបទចោទ បទបរិហារកេរ្តិ៍ ឬបរិហារបង្កាច់កេរ្តិ៍ និង ការដាក់សម្ពាធលើយុត្តាធិការតុលាការ នៃក្រមព្រហ្មទណ្ឌ។
ពាក់ព័ន្ធសំណុំរឿងនេះ គឺជាវិវាទកើតឡើងដោយសារជម្លោះដីធ្លី នៅស្រុកស្វាយលើខេត្តសៀមរាប ហើយម្ចាស់ដី២នាក់ ត្រូវបានចាប់ខ្លួនដាក់ពន្ធនាគារ។ បញ្ហានេះ លោក នី ចរិយា យល់ឃើញថា ព្រះរាជអាជ្ញារងលោក សុក កែវបណ្ឌិត និងចៅក្រមស៊ើបសួរខេត្តសៀមរាប លោក គី ឬទ្ធី ចោទប្រកាន់ និងឃុំខ្លួនមនុស្សដោយខុសច្បាប់។
វិទ្យុអាស៊ីសេរី ពុំអាចទាក់ទងមន្ត្រីតុលាការខេត្តសៀមរាបទាំងនេះ ដើម្បីសុំការឆ្លើយតបពីបញ្ហានេះ បានទេនៅថ្ងៃទី១៣ តុលា។ ដោយឡែកក្រុមមេធាវីការពារក្ដី របស់លោក នី ចរិយា ក៏ពុំអាចសុំការអត្ថាធិប្បាយបាននៅឡើយដែរ។
លោក អំ សំអាត មន្ត្រីជាន់ខ្ពស់អង្គការលីកាដូ(LICADHO) ចាត់ ទុកថា នេះជាមធ្យោបាយដាក់សម្ពាធបន្ថែមទៀត ប្រឆាំងសកម្មជនការពារសិទ្ធិមនុស្ស។ លោកយល់ឃើញថា ការប្រើប្រព័ន្ធតុលាការ ដើម្បីដាក់គំនាបមកលើអ្នកការពារសិទ្ធិមនុស្សនេះ គឺជាការបំបិទសិទ្ធិសេរីភាព ដ៏ធ្ងន់ធ្ងរ ក្រោមហេតុផល ដើម្បីផលប្រយោជន៍បុគ្គល ហើយការពារអ្នកដែលបានប្រព្រឹត្តបទល្មើសប៉ុណ្ណោះ៖ «សាមី ខ្លួនបានទទួលដីកាពីតុលាការ វាទាល់តែសាមីខ្លួនហ្នឹងគាត់បានទទួលពិតប្រាកដ ហើយមានការចុះហត្ថលេខាទទួលស្គាល់អំពីការទទួលដីកា ។អាហ្នឹងបានទាក់ទងនឹងការទទួលដីកាតាមផ្លូវច្បាប់ ហើយគាត់ហត្ថលេខាទទួលហើយគាត់មិនទៅទើបតុលាការសិទ្ធិចាត់វិធានការ តាមផ្លូវច្បាប់។ »
អង្គការមិនមែនរដ្ឋាភិបាល យល់ឃើញថា ការប្រើប្រាស់ប្រព័ន្ធតុលាការ ក្រោមហេតុផលដើម្បីយុត្តិធម៌សង្គម ប្រឆាំងសកម្មជនព្រៃឈើ អ្នកការពារសិទ្ធិមនុស្ស សកម្មជនការពារបរិស្ថាន និងអ្នកនយោបាយក្នុងដំណាក់កាលចុងក្រោយនេះ គឺមិនខុសគ្នាចំពោះ ការសម្លាប់មនុស្សក្រៅប្រព័ន្ធតុលាការ កាលជាង ១០ឆ្នាំមុនប៉ុន្មាននោះទេ។
មានមនុស្សជាងច្រើន ដែលឃាតកបាញ់សម្លាប់ហើយ មិនទាន់ទទួលបានយុត្តិធម៌នៅឡើយ ដូចជាតារាភាពយន្ត អ្នកស្រី ពិសិដ្ឋ ពីលីកា ប្រធានសហជីព លោក ជា វិជ្ជា ព្រះតេជគុណ សំ ប៊ុនធៀន លោក ជួ ជាថារិទ្ធ និង ចុងក្រោយគឺលោក ឈុត វុទ្ធី សកម្មជនការពារបរិស្ថានដ៏ល្បីល្បាញ តែមកទល់ពេលនេះ ជនល្មើសនៅក្រៅសំណាញ់ច្បាប់នៅឡើយ។
ដោយឡែកករណីលោក នី ចរិយា នេះវិញ ក្រុមមន្ត្រីសិទ្ធិមនុស្សលើកឡើងថា លោកបានធ្វើការដើម្បីការពារសិទ្ធិសាធារណជន តែត្រូវបានប្រឈមនឹងការប្រើប្រាស់ប្រព័ន្ធតុលាការ ក្នុងការគាបសង្កត់ទៅវិញ៕
No comments:
Post a Comment