ទស្សនៈ ក្រុមបាតុករ ទាមទារ ឲ្យលោក កឹម សុខា ចុះចេញ ពីតំណែង អនុប្រធាន រដ្ឋសភា
RFA / វិទ្យុ អាស៊ី សេរី | ២៦ តុលា ២០១៥
ពលរដ្ឋតវ៉ាលើកបដាទាមទារឲ្យលោក កឹម សុខា
ចុះចេញពីដំណែងអនុប្រធានទី១ រដ្ឋសភា នាមុខរដ្ឋសភា នៅថ្ងៃទី២៦
ខែតុលា ឆ្នាំ២០១៥។ RFA/Rann Samnang
អ្នកចូលរួម ធ្វើបាតុកម្ម ទាមទារ ឲ្យលោក កឹម សុខា ចុះចេញ ពីតំណែង ជាអនុប្រធាន សភា នៅថ្ងៃ ទី២៦ តុលា ដែលក្រុម បាតុករនោះ មានសមាសភាព ចម្រុះ, ហើយ ខ្លះ ចេញមុខ ជាចំហ, ខ្លះ ពាក់មួក ឃ្លុបខ្មៅរ បៀបគិញសម្ងាត់ លាក់ខ្លួន នៅក្បែរ របង និងក្រោម ដើមឈើ ជុំវិញ មន្ទីរ រដ្ឋសភា, ខ្លះ នៅសម្រាក លើរថយន្ត ដែលពួកគេ ជិះមកនោះ ដោយមិនខ្វល់ អ្វីទាំងអស់។
អ្នកចូលរួមបាតុកម្មទាំងនោះ បានបង្ហាញជំហរផ្សេងៗគ្នាអំពីការមកចូលរួមបាតុកម្មបណ្ដេញ លោក កឹម សុខា ឲ្យចុះចេញពីតំណែង។ អ្នកខ្លះខឹងសម្បារនឹងការសន្យារបស់មេដឹកនាំគណបក្សសង្គ្រោះជាតិ ដែលមិនគោរពតាមសន្យារបស់ខ្លួនកាលពីយុទ្ធនាការបោះឆ្នោតឆ្នាំ២០១៣ កន្លងមក។
យុវជនម្នាក់មកពីស្រុកកៀនស្វាយ ខេត្តកណ្ដាល ឈ្មោះ ម៉ៅ ញាំង បានឲ្យដឹងថា ពួកគេមកនេះដោយអ្នកជួលឡានឲ្យជិះដោយមិនគិតថ្លៃ ហើយអាជ្ញាធរបានដើរប្រាប់កាលពីល្ងាចថ្ងៃទី២៥ តុលា ថា ទៅធ្វើបាតុកម្មប្រឆាំង លោក កឹម សុខា ដោយគាត់សន្យាខ្យល់។
ចំណែកបុរសម្នាក់ទៀតដែលធ្វើដំណើរមកជាមួយគ្នាដែរនោះ ក៏បានថ្លែងប្រាប់ប្រហាក់ប្រហែលគ្នាដែរ ហើយបញ្ជាក់ថា ការមកចូលរួមនេះមិនមានការចាត់តាំងពីខាងណាមួយច្បាស់លាស់នោះទេ គឺមកតាមគ្នា ហើយមានអ្នកចែកទឹកមួយដប និងក្រមាក្រហមមួយ ដើម្បីឲ្យចងចង្កេះដូចៗគ្នា។
ទោះយ៉ាងណាក្តី សកម្មភាពពួកគេនោះ ក្រុមខ្លះហាក់លឹបលនៅឆ្ងាយពីក្បួនតវ៉ាធំនៅមុខរដ្ឋសភា ដែលមានមនុស្សច្រើនរយនាក់ចូលរួមស្រែកទាមទារឲ្យ លោក កឹម សុខា ចុះចេញពីតំណែង។
ក្រុមខ្លះទៀតបានស្រែកច្រៀងចម្រៀងដែលមានន័យថា លោក កឹម សុខា ជាមនុស្សបង្កប់របស់គណបក្សប្រជាជនកម្ពុជា ហើយពួកគេជ្រុលខ្លួនបោះឆ្នោតឲ្យ តែឥឡូវគេដឹងហើយ សូមឲ្យចុះចេញពីតំណែង។
នេះជាលើកទីពីរ ដែលមានបាតុករធ្វើបាតុកម្មប្រឆាំង លោក កឹម សុខា។ កាលពីខែមិថុនា ឆ្នាំ២០១៣ មានមនុស្សជាង ២ម៉ឺននាក់ តវ៉ាប្រឆាំង លោក កឹម សុខា ដែលដឹកនាំដោយ លោក ជុំ ម៉ី។
ចំណែកមនុស្សមួយក្រុមទៀតមិនថ្លែងអ្វីទាំងអស់ មានទឹកមុខកាចមាំ ពាក់មួកឃ្លុបខ្មៅ មានចងក្រមាក្រហមនៅចង្កេះបង្កប់ខ្លួនតាមកៀនរបង និងក្រោមដើមឈើឆ្ងាយប្រមាណ ១០០ម៉ែត្រ ជុំវិញបរិវេណរដ្ឋសភា ហាក់កំពុងរង់ចាំបទបញ្ជាឲ្យធ្វើសកម្មភាពអ្វីមួយ។
ដោយឡែកក្រុមមួយចំនួនទៀត អង្គុយមើលគេពីក្នុងឡាន ដូចមិនដឹងរឿងអ្វីទាំងអស់។ ពួកគាត់មួយចំនួន បានថ្លែងប្រាប់អ្នកកាសែតដោយប្រយ័ត្នប្រយែងបំផុត ព្រោះខ្លាចមេក្រុមពួកគេរករឿងថានិយាយផ្ដេសផ្ដាស។ ពួកគាត់ឲ្យដឹងដោយសុំឲ្យលាក់អត្តសញ្ញាណថា មុនឡើងឡានមក អាជ្ញាធរប្រាប់ថា ឲ្យទៅចូលរួមប្រជុំនៅភ្នំពេញ ប៉ុន្តែពេលមកដល់អត់មានប្រជុំរឿងអ្វីក្រៅពីធ្វើបាតុកម្មនោះទេ ធ្វើឲ្យពួកគេខកចិត្ត និងចាត់ទុកជាទង្វើមិនគប្បីមួយ។
ទោះបីអ្នកចូលរួមបាតុកម្មនៅមុខរដ្ឋសភា នៅថ្ងៃទី២៦ តុលា មិនបង្ហាញពីអង្គការចាត់តាំងច្បាស់លាស់យ៉ាងណាក្តី ប៉ុន្តែមុនព្រឹត្តិការណ៍កើតឡើងមួយថ្ងៃ លោកនាយករដ្ឋមន្ត្រី ហ៊ុន សែន ថ្លែងនៅប្រទេសបារាំង សំដៅទៅគណបក្សប្រឆាំងថា បើខឹងកុំលេង បើលេងកុំខឹង ហើយលេងលើកនេះ អាចបាត់តំណែងអនុប្រធានរដ្ឋសភាទៀតផង។ លោក ហ៊ុន សែន បន្តថា មេបាតុកម្មនៅទីក្រុងប៉ារីស និយាយថា គេគោរពសិទ្ធិអ្នកធ្វើបាតុកម្មនៅទីក្រុងប៉ារីស ដើម្បីប្រឆាំងលោក ដូច្នេះលោកក៏គោរពសិទ្ធិអ្នកធ្វើបាតុកម្មនៅភ្នំពេញដូចគ្នាដែរ។
ទាក់ទងបញ្ហានេះ មន្ត្រីសិទ្ធិមនុស្សមានក្តីបារម្ភថា ការធ្វើបាតុកម្មតបតគ្នាទៅវិញទៅមករវាងអ្នកប្រឆាំងរដ្ឋាភិបាល និងអ្នកគាំទ្ររដ្ឋាភិបាល ផ្ទុះឡើងនូវអំពើហិង្សាកាន់តែធ្ងន់ធ្ងរថែមទៀត។ ទន្ទឹមគ្នានេះ មន្ត្រីសង្គមស៊ីវិលក៏ចង់ឲ្យរដ្ឋាភិបាល គោរពសិទ្ធិអ្នកបញ្ចេញមតិពីគ្រប់ភាគីឲ្យបានស្មើៗគ្នា ឬកុំមានការរើសអើង៕
No comments:
Post a Comment