លោក សម រង្ស៊ី ថាលោក ហ៊ុន សែន ចង់រកលេស បង្កើត ព្រឹត្តិការណ៍ ពន្យារ ការបោះឆ្នោត
RFA / វិទ្យុ អាស៊ី សេរី | ២៧ តុលា ២០១៥
លោក ហ៊ុន សែន (ស្ដាំ) និងលោក សម រង្ស៊ី
ថ្លែងទៅកាន់អ្នកកាសែត បន្ទាប់ពីប្រជុំ នៅមន្ទីររដ្ឋសភា ថ្ងៃទី ៨
ខែសីហា ឆ្នាំ ២០១៤។ RFA/Yeang Socheametta
ប្រធាន គណបក្ស ជំទាស់ ដ៏ធំ នៅកម្ពុជា បានចោទប្រកាន់ ប្រមុខ រដ្ឋាភិបាល និងជាប្រធាន គណបក្ស ប្រជាជនកម្ពុជា គឺ ជាអ្នក ដែលស្ថិតនៅ ពីក្រោយ នៃបាតុកម្ម ហិង្សា ដែលកើត នៅមុខ រដ្ឋសភា កាលពីថ្ងៃ ទី២៦ តុលា។ ជាងនេះទៀត លោក នាយករដ្ឋមន្ត្រី ថែមទាំង ចង់រកលេស ដែលឈានទៅ ប្រើហិង្សា ដើម្បី បង្កើតព្រឹត្តិការណ៍ បំណងចៀសវាង មិនឲ្យមាន ការបោះឆ្នោត នៅពេល ខាងមុខ។
ច្រានចោលការចោទប្រកាន់នេះ មន្ត្រីជាន់ខ្ពស់គណបក្សប្រជាជនកម្ពុជា អះអាងថា បាតុកម្មនៅមុខរដ្ឋសភានោះ គណបក្សប្រជាជនកម្ពុជា ពុំបានស្ថិតនៅពីក្រោយឡើយ។ ម្យ៉ាងវិញទៀត ការថ្លែងដូចនេះរបស់ លោក សម រង្ស៊ី គឺជាចេតនាដើម្បីចំណេញនយោបាយរបស់ខ្លួនប៉ុណ្ណោះ។
កម្ដៅនយោបាយបានផ្ទុះឡើងជាថ្មីទៀត ដែលការរីករាលដាលលើកនេះ គឺមានទ្រង់ទ្រាយធំ ដែលជាហេតុធ្វើឲ្យអ្នកនយោបាយហាក់មើលមុខគ្នាលែងចំ។
ទាក់ទងករណីនេះ លោក សម រង្ស៊ី ប្រធានគណបក្សប្រឆាំង បានហៅបាតុកម្មហិង្សានេះ ថាជាការប្រើល្បិចរបស់លោកនាយករដ្ឋមន្ត្រី ហ៊ុន សែន ដើម្បីក្រឡុកឲ្យមានស្ថានការណ៍នេះកើតឡើង ក្នុងបំណងដើម្បីបានរក្សាអំណាចច្រើនឆ្នាំទៅមុខទៀត។
ប្រតិកម្មនឹងការចោទប្រកាន់របស់ លោក សម រង្ស៊ី នេះ មន្ត្រីជាន់ខ្ពស់គណបក្សប្រជាជនកម្ពុជា យល់ឃើញថា ការនិយាយណាមួយ វាជាសិទ្ធិរបស់ប្រធានគណបក្សជំទាស់។
មន្ត្រីនាំពាក្យគណបក្សប្រជាជនកម្ពុជា លោក សុខ ឥសាន អះអាងថា ការពិតគណបក្សប្រជាជនកម្ពុជា ពុំបានស្ថិតនៅពីក្រោយបាតុកម្មណាមួយនោះទេ។ លើសពីនេះ គ្មានគោលការណ៍ច្បាប់ និងមាត្រាណាមួយ ដែលកំណត់ថា រដ្ឋាភិបាលត្រូវតែក្រាញអំណាចដោយគ្មានហេតុផល ឬដោយមិនចាំបាច់បោះឆ្នោតនោះឡើយ។ លោកបន្តថា «ពួកហ្វាស៊ីស ពួកអាដែងនែ! យូនីស្ត អីគេឈប់និយាយហើយ សតវត្សទី២១ ហើយ ហួសសម័យហើយ។ គាត់យកមករំឭកអ៊ីចឹង វាដូចជាហួសសម័យហើយ។ នេះជាការមួលបង្កាច់ហួសហេតុពេក។»
លោក សុខ ឥសាន បន្តថា លោកក៏ពុំធ្លាប់ដែលបានសារភាពដែរថា ការប្រើហិង្សាប្រឆាំងអ្នកតំណាងរាស្ត្រ ២រូប កាលពីថ្ងៃទី២៦ តុលា ជាក្រុមបាតុករនោះទេ ក៏ប៉ុន្តែលោកសន្និដ្ឋានថា អាចមានក្រុមដែលឆ្លៀតឱកាសណាមួយ។
ជុំវិញករណីនេះ ក្រុមអង្គការមិនមែនរដ្ឋាភិបាល បានចេញលិខិតរួមគ្នា ដោយថ្កោលទោសការប្រើហិង្សានៅមុខវិមានរដ្ឋសភា និងនៅគេហដ្ឋាន លោក កឹម សុខា ហើយអំពាវនាវឲ្យមានការស៊ើបអង្កេតដោយឯករាជ្យ និងមានតម្លាភាពទៅលើការប្រើហិង្សានោះ។ ស្របពេលជាមួយគ្នានេះ រដ្ឋសភា ក៏បានចេញសេចក្ដីថ្លែងការណ៍របស់ខ្លួន ហើយថ្កោលទោសចំពោះអំពើហិង្សាដែលរំលោភយ៉ាងធ្ងន់ធ្ងរដល់អភ័យ ឯកសិទ្ធិអ្នកតំណាងរាស្ត្រ ដែលបញ្ញត្តិរដ្ឋធម្មនុញ្ញ និងច្បាប់ជាធរមាន។ លិខិតបន្តថា រដ្ឋសភា ស្នើឲ្យអាជ្ញាធរមានសមត្ថកិច្ច និងរាជរដ្ឋាភិបាល ចាត់វិធានការយ៉ាងម៉ឺងម៉ាត់ ស្រាវជ្រាវចាប់ខ្លួនជនល្មើសយកមកផ្ដន្ទាទោសតាមច្បាប់ជាធរមាន។
ឆ្លើយតបរឿងនេះ លោក ខៀវ សុភ័គ មន្ត្រីនាំពាក្យក្រសួងមហាផ្ទៃ បានឲ្យដឹងតាមការចុះផ្សាយកាសែតក្នុងស្រុកថា លោក ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ សម្រេចបង្កើតគណៈកម្មការស៊ើបអង្កេតលើសំណុំរឿងអ្នកតំណាងរាស្ត្រ ២រូប ដែលមានសមាសភាពសុទ្ធតែជាមន្ត្រីនគរបាល ចាប់ពីស្នងការរង រហូតដល់ប្រធាននាយកដ្ឋាន។
បើទោះជាបែបណា បន្ទាប់ពីមានផ្ទុះបាតុកម្មទម្លាក់ លោក កឹម សុខា បានមួយថ្ងៃ និងក្រោយពី លោក ហ៊ុន សែន ព្រមានថា ប្រធានគណបក្សប្រឆាំង អាចប្រឈមនឹងជាប់ពន្ធនាគារ ព្រោះតែអនុញ្ញាតឲ្យ លោក ហុង សុខហួរ បង្ហោះកិច្ចព្រមព្រៀងរវាងកម្ពុជា និងវៀតណាម ក្លែងក្លាយនៅលើទំព័របណ្ដាញសង្គមរបស់ខ្លួននោះ លោក សម រង្ស៊ី បានសរសេរនៅក្នុងទំព័រហ្វេសប៊ុក (Facebook) របស់លោកនៅថ្ងៃទី២៧ តុលា ដោយប្រើសម្ដីធ្ងន់ៗពុំធ្លាប់មាន បន្ទាប់ពីមានវប្បធម៌សន្ទនាថា អ្វីដែលសំខាន់នោះ លោក ហ៊ុន សែន ហាក់ដូចជាចង់រកលេសប្រើអំពើហិង្សាកាន់តែច្រើន ដើម្បីបង្កើតព្រឹត្តិការណ៍អវិជ្ជមាន និងអធម្មនុញ្ញ ចៀសវាងការបោះឆ្នោតខាងមុខ។ ម្យ៉ាងវិញទៀត លោក ហ៊ុន សែន ដឹងថា ការបោះឆ្នោតខាងមុខមិនឈ្នះ និងដើម្បីរក្សាអំណាចបានច្រើនឆ្នាំតទៅទៀត ហេតុនេះ លោក ហ៊ុន សែន កំពុងប្រើវិធីស្រដៀងក្រុមហ្វាស៊ីស (Fascist) នៅប្រទេសអ៊ីតាលី ប្រើហិង្សាទៅលើអ្នកតំណាងរាស្ត្រ និងអ្នកដទៃទៀត។
បើទោះជាបែបនេះក៏ដោយចុះ លោក សុខ ឥសាន យល់ឃើញថា មធ្យោបាយដូច លោក សម រង្ស៊ី លើកជាឧទាហរណ៍នេះ វាគឺហួសសម័យ និងចាស់គំរឹលទៅហើយសម្រាប់សតវត្សទី២១ នេះ។ ម្យ៉ាង គណបក្សប្រជាជនកម្ពុជា នឹងមិនប្រើមធ្យោបាយដូចនេះ ដើម្បីរក្សាអំណាចរបស់ខ្លួនឡើយ ជាពិសេសនោះ លោកពេញចិត្តដៃគូដែលខ្លាំង ហើយប្រកួតប្រជែងដោយយុត្តិធម៌។
សាស្ត្រាចារ្យផ្នែកវិទ្យាសាស្ត្រនយោបាយ លោក សូ ចន្ថា ថ្លែងថា ការពិត រដ្ឋាភិបាលអាចបន្តនៅក្នុងអំណាចតទៅទៀតបាន ប្រសិនបើប្រទេសស្ថិតក្នុងអាសន្ន ឬមានវិបត្តិដ៏ធ្ងន់ធ្ងរ។ បើមិនដូច្នេះ គឺចាំបាច់ត្រូវផ្លាស់ប្ដូរតាមរយៈការបោះឆ្នោតក្នុងរយៈពេលរៀងរាល់ ៥ឆ្នាំម្ដង។ លោកបន្តថា «ក្នុងករណីដែលប្រទេសស្ថិតនៅក្នុង ស្ថានការណ៍សង្គ្រាម បើសិនស្ថិតនៅក្នុងស្ថានការណ៍សង្គ្រាម ការបោះឆ្នោតអាចនឹងពន្យារតទៅទៀត ហើយរដ្ឋាភិបាលចាំផ្ទះ នឹងបន្តអ្វីដែលជាការកាន់អំណាចរបស់ខ្លួនតទៅទៀត។ ប៉ុន្តែផ្ទុយទៅវិញ បើសិនជាសង្គមឥតចលាចល ឥតមានសង្គ្រាមទេ ការបោះឆ្នោតត្រូវតែធ្វើឡើងស្របទៅតាមច្បាប់ដែលកំណត់ ៥ឆ្នាំម្ដង ។»
យ៉ាងណាក៏ដោយ លោកនាយករដ្ឋមន្ត្រី ហ៊ុន សែន ធ្លាប់ព្រមានមុនចេញទៅបំពេញទស្សនកិច្ចនៅប្រទេសបារាំង ថា លោកនឹងកំដរគ្រប់ទម្រង់នៃល្បែងនយោបាយជាមួយគណបក្សប្រឆាំង ប្រសិនបើគណបក្សក្រៅរដ្ឋាភិបាលចង់បន្តបែបនេះ៕
No comments:
Post a Comment