លោក សម រង្ស៊ី៖ ខ្ញុំ មិនខ្លាច ការចាប់ខ្លួន ទេ; ចង់យកខ្ញុំ ទៅធ្វើអ្វី ក៏ធ្វើទៅ!
RFI / វិទ្យុ បារាំង អន្តរជាតិ | ១៤ វិច្ឆិកា ២០១៥
លោក សម រង្ស៊ី ប្រធាន គណបក្ស សង្រ្គោះជាតិ ឲ្យដឹង ថា, ចរន្ត នយោបាយ នាំមក នូវសេរីភាព ដែលគ្មាន នរណា អាចទប់ស្កាត់ កំពុង តែ រីករាលដាល ទូទាំង ពិភពលោក ធ្វើឲ្យ របបផ្តាច់ការ ដួលរលំ ម្តងមួយៗ។ ដូច្នេះ អ្នកផ្តាច់ការ ទាំងនៅស្រុកគេ ទាំងនៅកម្ពុជា កំពុងតែ ភ័យខ្លាចហើយ! ទាក់ទាង នឹងការ ចាប់ខ្លួនលោក លោក សម រង្ស៊ី ថា, មិនខ្លាច ទេ។ ការបញ្ជាក់ របស់លោក បានធ្វើឡើង ក្រោយ ពីមាន ដីកា បង្គាប់ ឲ្យចាប់ ខ្លួនលោក សម រង្ស៊ី ពីតុលាការ ក្រុងភ្នំពេញ។
លោក សម រង្ស៊ី ប្រធានគណសង្រ្គោះជាតិបានថ្លែងប្រាប់អ្នកគាំទ្ររបស់ខ្លួននៅកូរ៉េខាងត្បូងនាថ្ងៃទី១៤ វិច្ឆិកា ថា «ចរន្តនយោបាយនាំមកនូវសេរីភាព ដែលគ្មាននរណាអាចទប់ស្កាត់បាន ដែលកំពុងតែរីករាលដាលទូទាំងពិភពលោក ធ្វើឲ្យរបបផ្តាច់ការដួលរលំម្តងមួយៗ ដូច្នេះពួកអ្នកផ្តាច់ការទាំងអស់ទៅនៅស្រុកគេខ្លះ កំពុងតែភ័យខ្លាចហើយ កំពុងតែស្លន់ស្លោហើយ! អញ្ចឹងហើយបានមកធ្វើបាបអ្នកប្រជាធិបតេយ្យប៉ុន្មានថ្ងៃចុងក្រោយនេះ។ ...ខ្ញុំអត់ខ្លាចទេ ចង់យកខ្ញុំទៅធ្វើអីធ្វើទៅ តែព្រលឹងខ្ញុំនៅតែតាមការពារខ្មែរជានិច្ច។»
សូមបញ្ជាក់ថា លោក សម រង្ស៊ី ប្រធានគណបក្សសង្រ្គោះជាតិ ត្រូវបានអយ្យការអមសាលាដំបូងរាជធានីភ្នំពេញ ចេញដីកាបង្គាប់ឲ្យចាប់ខ្លួនកាលពីថ្ងៃទី១៣ វិច្ឆកា ដោយចោទប្រកាន់ពីបទ បរិហារកេរ្តិ៍ជាសាធារណៈ និងញុះញង់ឲ្យមានការរើសអើង ហើយផ្តន្ទាទោសដាក់ពន្ធនាគារចំនួន ២ឆ្នាំ និងពិន័យជាប្រាក់ ៨លានរៀល។
លោក សម រង្ស៊ី ដែលកំពុងតែនៅប្រទេសកូរ៉េខាងត្បូងនៅឡើយ នឹងត្រឡប់មកកម្ពុជាវិញនៅថ្ងៃទី១៦ វិច្ឆិកា នេះបើតាមគម្រោងចាស់ ប៉ុន្តែមិនទាន់ដឹកថាអាចនឹងមានការប្រែប្រួលយ៉ាងណានោះទេ ក្រោយពីមានដីកាចាប់ខ្លួនលោក។ នេះបើតាមការបញ្ជាក់របស់លោក យ៉ែម បុញ្ញាឫទ្ធិ អ្នកនាំពាក្យគណបក្សសង្រ្គោះជាតិ។ ចំណែកលោក កឹម សុខា អនុប្រធានគណបក្សសង្រ្គោះជាតិ អាចនឹងនៅបរទេសបន្ត ដោយសារលោកមានកម្មវិធីមួយចំនួនទៀតត្រូវចូលរួម៕
No comments:
Post a Comment